ՄՆԱՑՈՐԴԱՑ ԱՌԱՋԻՆ 29 - Գրաբար Աստվածաշունչ (1895)1 Եւ ասէ Դաւիթ արքայ ցամենայն եկեղեցին. Սողոմոն որդի իմ զոր ընտրեաց իւր Տէր, մանուկ փոքր է, եւ գործս մեծ է. վասն զի ոչ մարդոյ է շինուածս, այլ Տեառն Աստուծոյ։ 2 Ըստ ամենայն զօրութեան իմոյ պատրաստեցի նիւթս տանն Աստուծոյ իմոյ, ոսկի եւ արծաթ, պղինձ եւ երկաթ, փայտս եւ քարինս անկեանց եւ կամարաց, եւ քարինս ընտիրս եւ ականս պատուականս, եւ այլ պատրաստութիւն բազում։ 3 Եւ եւս վասն հաճոյն լինելոյ իմ ի տան Աստուծոյ իմոյ եղեւ ինձ զոր նուիրեցիդ Տեառն, ոսկի եւ արծաթ. եւ ահաւադիկ՝՝ ետու զայդ ի տուն Աստուծոյ իմոյ ի բարձրութիւն. բաց յայնցանէ զոր պատրաստեցի ի տուն սրբութեանցն, 4 երիս հազարս տաղանդս ոսկի ի Սովփերայ, եւ եւթն հազար տաղանդ ընտիր արծաթ, օծանել նոքօք զորմս տաճարին 5 ի ձեռն՝՝ արուեստաւորաց. եւ որ ոք յօժարիցէ մտօք լնուլ զձեռս իւր՝՝ այսօր Տեառն։ 6 Եւ յառաջամիտք եղեն իշխանք տոհմիցն եւ իշխանք որդւոցն Իսրայելի, հազարապետք եւ հարիւրապետք եւ վերակացուք գործոցն, եւ գաւառապետք՝՝ աքայի. 7 եւ ետուն ի գործ տանն Տեառն ոսկի՝ տաղանդս հինգ հազար, եւ բեւր դահեկան. եւ արծաթ՝ տաղանդս տասն հազար. եւ պղինձ՝ տաղանդս բեւր եւ ութ հազար, եւ երկաթ՝ տաղանդս հարեւր հազար։ 8 Եւ ոյր ուրուք գտաւ քար պատուական՝ ետուն ի շտեմարանս տանն Տեառն, ի ձեռս Յեքիելի որդւոյ Գերսոնի։ 9 Եւ զուարճացաւ ժողուվուրդն յաղագս յառաջամիտ լինելոյն. վասն զի լի սրտիւ եղեն յառաջամիտք Տեառն. եւ Դաւիթ արքայ ուրախ եղեւ մեծապէս։ 10 Եւ օրհնեաց արքայ Դաւիթ զՏէր առաջի եկեղեցւոյն՝ եւ ասէ. Օրհնեալ է Տէր Աստուած Իսրայելի հարցն մերոց յաւիտենից մինչեւ յաւիտեանս. 11 քո է, Տէր, մեծութիւն եւ զօրութիւն եւ պարծանք եւ յաղթութիւն եւ կարողութիւն. վասն զի դու ամենեցուն որք են յերկինս եւ ի վերայ երկրի՝ տիրես. յերեսաց քոց դողան ամենայն թագաւորք եւ ազգք՝՝։ 12 Ի քէն է մեծութիւն եւ փառք. դու ես ամենեցուն իշխան, Տէր, եւ իշխան ամենայն իշխանութեանց.՝՝ ի ձեռին քում է զօրութիւն եւ հարստութիւն, եւ ի ձեռին քում ամենակալ մեծութիւն՝ զօրացուցանել զամենայն։ 13 Եւ արդ, Տէր, գոհանամք զքէն, եւ օրհնեմք զանուն պարծանացդ քոց։ 14 Ո՞ եմ ես, եւ ո՞ է ժողովուրդ քո, զի կարացաք յօժարամիտ լինել քեզ յայսմ ամենայնի. վասն զի քո է ամենայն ինչ, եւ ի քոյոցդ տուաք քեզ։ 15 Քանզի պանդուխտք եմք մեք առաջի քո եւ նժդեհք՝ որպէս ամենայն հարք մեր. իբրեւ զստուեր են աւուրք մեր ի վերայ երկրի, եւ ոչ գոն մեր մնացուածք ինչ։ 16 Տէր Աստուած մեր, ամենայն բազմութիւնս այս զոր պատրաստեցի շինել զտուն անուան սրբութեան քո, է ի ձեռանէ քումմէ, եւ քո է ամենայն ինչ։ 17 Եւ ծանեայ, Տէր, եթէ դու ես որ քննես զսիրտս, զարդարութիւն սիրես. եւ մեք պարզ սրտիւք յօժարամիտք եղեաք յայսմ յամենայնի. եւ արդ զժողովուրդս քո որ գտաւ աստ՝ տեսի ուրախութեամբ լի, եղեալ առ քեզ յօժարամիտ։ 18 Տէր Աստուած Աբրահամու եւ Իսահակայ եւ Իսրայելի հարցն մերոց, պահեա զայս ի միտս եւ ի սիրտ ժողովրդեան քո յաւիտեան, եւ ուղղեա զսիրտս նոցա առ քեզ։ 19 Եւ Սողոմոնի որդւոյ իմում տուր սիրտ բարի՝ առնել զպատուիրանս քո եւ զվկայութիւնս քո եւ զհրամանս քո, եւ ի կատարումն ածել զպատրաստութիւն տան քո՝՝։ 20 Եւ ասէ Դաւիթ ցամենայն եկեղեցին. Օրհնեցէք զՏէր Աստուած ձեր։ Եւ օրհնեաց ամենայն եկեղեցին զՏէր Աստուած հարցն իւրեանց, եւ խոնարհեցուցեալ զծունկս՝ երկիր պագին Տեառն եւ արքայի։ 21 Եւ եզեն Դաւիթ՝՝ Տեառն զոհս, եւ մատոյց ողջակէզս Աստուծոյ՝՝ ի վաղիւն առաջնոյ աւուրն, զուարակս հազար, խոյս հազար, գառինս հազար, եւ զնուէրս նոցա եւ զզոհսն յաճախութեամբ ամենայն Իսրայելի։ 22 Կերան եւ արբին առաջի Տեառն յաւուր յայնմիկ ուրախութեամբ. եւ թագաւորեցուցին երկրորդ անգամ զՍողոմոն որդի Դաւթի, եւ օծին զնա Տեառն ի թագաւոր, եւ զՍադովկ՝ ի քահանայութիւն։ 23 Եւ նստաւ Սողոմոն յաթոռ Դաւթի հօր իւրոյ, եւ յաջողեցաւ. եւ հնազանդեցաւ նմա ամենայն Իսրայէլ։ 24 Իշխանք եւ զօրաւորք եւ ամենայն որդիք արքայի Դաւթի հօրն նորա հնազանդեցան նմա՝՝։ 25 Եւ մեծացոյց Տէր զՍողոմոն ի վերուստ առաջի ամենայն Իսրայելի, եւ ետ նմա փառս թագաւորութեան, որ ոչ ումեք եղեւ ամենեցուն թագաւորացն որք յառաջ քան զնա։ 26 Եւ Դաւիթ որդի Յեսսեայ թագաւորեաց ի վերայ Իսրայելի ամս քառասուն՝՝. 27 ի Քեբրոն ամս եւթն, եւ յԵրուսաղէմ ամս երեսուն եւ երեք։ 28 Եւ վախճանեցաւ բարի ծերութեամբ, լի աւուրբք, մեծութեամբ եւ փառօք. եւ թագաւորեաց Սողոմոն որդի նորա փոխանակ նորա։ 29 Եւ մնացեալ բանք արքայի Դաւթի՝ առաջինք եւ վերջինք, գրեալ են ի բանս Սամուելի տեսանողի, եւ ի բանս Նաթանայ մարգարէի եւ ի բանս Գադայ տեսանողի, 30 յագաղս ամենայն թագաւորութեան նորա եւ հարստութեան նորա, եւ ժամանակք որ եղեն նորա ի վերայ Իսրայելի եւ ի վերայ ամենայն թագաւորութեանց երկրի՝՝։ |