ՄՆԱՑՈՐԴԱՑ ԱՌԱՋԻՆ 22 - Գրաբար Աստվածաշունչ (1895)1 Եւ ասէ Դաւիթ. Այս է տուն Տեառն Աստուծոյ, եւ այս սեղան ողջակիզաց Իսրայելի։ 2 Եւ ասաց Դաւիթ ժողովել զամենայն եկսն յերկրին Իսրայելի. եւ կացոյց քարահատս հատանել քարինս կոփածոյս եւ շինել զտունն Աստուծոյ։ 3 Եւ երկաթ բազում ի բեւեռս դրացն եւ դրանն, եւ զշրջանակսն արար՝՝ Դաւիթ, եւ պղինձ բազում յոյժ որոյ ոչ գոյր կշիռ. 4 եւ մայր փայտս որոյ ոչ գոյր թիւ, վասն զի բերէին Սիդոնացիքն եւ Տիւրացիք մայր փայտս յաճախութեամբ Դաւթի։ 5 Եւ ասէ Դաւիթ. Սողոմոն որդի իմ մանուկ փոքր է. եւ տունս զոր շինէ՝՝ Տեառն՝ մեծ եւ ի վեր անուամբ եւ ի փառս յամենայն երկրի. պատրաստեցից նմա նիւթս։ Եւ պատրաստեաց Դաւիթ յաճախութեամբ յառաջ քան զվախճան իւր։ 6 Եւ կոչեաց զՍողոմոն զորդի իւր, եւ պատուիրեաց նմա շինել զտունն անուան՝՝ Տեառն Աստուծոյ Իսրայելի։ 7 Եւ ասէ Դաւիթ ցՍողոմոն. Որդեակ, իմ եղեւ ի մտի շինել տուն անուան Տեառն Աստուծոյ. 8 եւ բան Տեառն եղեւ առ իս եւ ասէ. Արիւն բազում հեղեր եւ պատերազմունս մեծամեծս արարեր. ոչ շինեսցես դու տուն անուան իմոյ, վասն զի արիւն բազում հեղեր ի վերայ երկրի առաջի իմ. 9 ահա ծնցի քեզ որդի, եւ նա եղիցի այր հանգստեան. եւ հանգուցից զնա յամենայն թշնամեաց շուրջանակի. քանզի Սողոմոն անուն է նորա. եւ զխաղաղութիւն եւ զհանդարտութիւն տաց ի վերայ Իսրայելի յաւուրս նորա։ 10 Նա շինեսցէ տուն անուան իմոյ. նա եղիցի ինձ յորդի եւ ես եղէց նմա ի հայր, եւ ուղղեցից զաթոռ թագաւորութեան նորա յԻսրայելի մինչեւ յաւիտեան։ 11 Եւ արդ, որդեակ իմ, եղիցի ընդ քեզ Տէր եւ յաջողեսցէ, եւ շինեսցես տուն Տեառն Աստուծոյ քո, որպէս խօսեցաւ վասն քո։ 12 Եւ տացէ քեզ Տէր հանճար եւ իմաստութիւն, եւ զօրացուսցէ զքեզ ի վերայ Իսրայելի, եւ պահեսցես առնել զօրէնս Տեառն Աստուծոյ քո։ 13 Եւ յայնժամ յաջողեսցիս, եթէ պահեսցես առնել զհրամանս եւ զիրաւունս զոր պատուիրեաց Տէր Մովսիսի ի վերայ Իսրայելի. քաջ լեր եւ զօրացիր. մի՛ երկիցես եւ մի՛ զարհուրիցիս։ 14 Եւ ահա ես ըստ աղքատութեան իմում պատրաստեցի ի տուն Տեառն ոսկի տաղանդս հարեւր հազար, եւ արծաթ տաղանդս հազար հազար, եւ պղինձ եւ երկաթ որոյ ոչ գոյ թիւ, վասն զի բազում է յոյժ, եւ փայտ եւ քարինս պատրաստեցի, եւ դու յաւելցես յայդ բազմութեամբ՝ 15 առնել գործ արուեստից՝՝, շինօղս քարանց եւ հիւսունս փայտից, եւ ամենայն իմաստուն՝ յամենայն գործս 16 ոսկւոյն եւ արծաթոյ եւ պղնձոյ եւ երկաթոյ, որոյ ոչ գոյ համար. արդ արի եւ արա, վասն զի Տէր ընդ քեզ է։ 17 Եւ պատուիրեաց Դաւիթ ամենայն իշխանացն Իսրայելի օգնել Սողոմոնի որդւոյ իւրում. 18 եւ ասէ. Ո՞չ ապաքէն Տէր ընդ ձեզ է, եւ հանգոյց զձեզ շուրջանակի. վասն զի ետ ի ձեռս ձեր զբնակիչսդ երկրիդ, եւ հնազանդեցաւ երկիրդ առաջի Տեառն եւ առաջի ժողովրդեան նորա։ 19 Եւ արդ տուք զսիրտս ձեր եւ զանձինս ձեր խնդրել զՏէր Աստուած ձեր. արիք եւ շինեցէք զսրբութիւնս Տեառն Աստուծոյ մերոյ, տանել ի ներքս զտապանակ ուխտին Տեառն եւ զսպաս սրբութեանցն Աստուծոյ ի տունն զոր շինէք անուան Տեառն։ |