तीतुस 2 - गवली उनाई नियम

सच्चो शिक्षा गा अनुसरण

¹ पेनो आम हे तीतुस विश्वासी कुरकू के येनोगो बातो इथूकु चाले जो नियम गा सच्चो शिक्षा गा रोंगो होना।

² बुड्डा कोरोकु समझातिंज्कु कि दिकु सयमी, समाझदार, गम्भीर, विश्वास गेन मजबूत, प्यार एठा सेहेसेन गेन हमेशा आरुका थंदळकु।

³ इनिका रोंगो मसीह गा मंडली बुड्डेन जापाएकु के भी समझातिंज्कु कि परमेश्वर गा आदर दडा लठ्ठाका चोखरा जीवन बितातिंजे। दिकु जेका गा निंदा दडामिंकू एठा सिडूकुत्त्य बाकी होना, पेनो दिकु अच्छा बातो इथूमिंकू होना,

⁴ देटे दिकु खुदके जवान जापाएकु गा सम्मान उदाहरण गा रुपोन ठहरातिंजूबा, एठा दिकुके इथूकु कि दिकु इकुगा सानाकु एठा चाफ्निकु टे प्यार डाए,

⁵ एठा सयमी, आपना साना प्रति वफादार, एठा आपना उरा गा कामय संसाभलातिंज मिठाच, भली एठा आपना साना इटान थंदळ मिठाच होना, ताकी जेका परमेश्वर गा वचन गा खिलाफबेन बाकी दडा होना।

⁶ डेनोगोका जवान कोरोकु के भी समझातिंज्कु कि दिकु सयमी होना।

⁷ इनी सेबाई बातो गेन आम आपना खुदके भला कामयनौर गा उदाहरण आरोए। जब आम विश्वासीकु इथूवा होय, मेटे अमा शिक्षा गेन सफाई, गम्भीरता गा सेंग्गोन डायु।

⁸ अमा शिक्षा गेन हमेशा सच्चाई होना, देटे कि अमा दुश्मनकु के आलेगा बारेन निंदा दडा गा तुनिका बातो बाकी घाटायु एठा दिकु सेरोमजु।

⁹ भाग्यकु के समझातिंज्कु कि दिकु हर परिस्थितिनौर गेन आपना स्वामी गा इटान थंदळे एठा सेबाई बातोनौर गेन दिकुके खुशो डोकु एठा आनोवा डाके बिना दिकुगा हुकूम मनातिंजे,

¹⁰ दिकुटे चोच्का चोरी चलाकी बाकी दडा पेनो आपना खुदके विश्वास लायको साबित डे, येनेगो दडा टे दिकु आलेगा उध्दार दडामिठाच परमेश्वर गा शिक्षा गा सोबा बळातिंजेवा।

मसीह प्रेरणा गा सुबा

¹¹ चोयाकी परमेश्वर नी हेजा कृपा सेबाई कुरकू गा उध्दार गा घल्जी ओटके मेना होय।

¹² परमेश्वर गा कृपा आलेके चेतावनी जेबा होय, कि आले बिनाभक्ती एठा दुनिया गा इच्छानौर के आराकी, एठा सयमी, धर्मी, एठा भक्ति टे इनी दुनिया गेन जीवन बितातिंजे।

¹³ एठा डी धन्य दिन गा कोरा डोगे, जो आलेगा आसानौर पूराऊवा एठा आलेगा महान परमेश्वर एठा उध्दार दडामिठाच यीशु मसीह गा महिमा ओटजू होना।

¹⁴ जो मसीह यीशु नी हेज खुदके आलेगा जीके मेना। कि देटे डीच आलेके सेबाई रेंग्गो गा बुरा कामय टे बचातिंजकोम्बा एठा आलेके चोखरा प्रजा आरुकोम्बा, जो चोखरा डाऊवा, जो दियागा खुद गा डाऊवा एठा अच्छा कामय दडा गा घल्जी तैयार थंदळवा।

¹⁵ आम इनी बातोनौर के पूरा अधिकार गा सेंग्गोन आपना आजोम मिंकूके इनी बातो इथूकु, दिकुके आरीकु एठा समझातिंज्कु, कि जेका आमके तुच्छा चिनायाकेमी बाकी होना।