रोमियो 9 - गवली उनाई नियम

परमेश्वर एठा दियागा कलामके कुरकू

^1-3 (नका अगर जेकाभी आलेके परमेश्वर गा प्यार टे अलग्गो कोम बाने होय, मेटे इस्राएल देशो गा कुरकू, इंजा यहूदी डाई परमेश्वर टे अलग्गो चोया होय?) इंजेन दिकु भेबाव दुख होय, एठा इंजा दिल गेन हमेशा दिकुगा घल्जी कासु महसूस डाऊवा होय। आए टेमोन, भलाका इंज खुद लिंजेन आरोप येंडाटे, इंजा डाईचो गा उध्दार गा घल्जी खुदके मसीह गेन सच्चो के गवाही गा रुपोन घाले लक्के मेना। पवित्र आत्मा एठा इंजा मन भी गवाही जिऊवा होय कि इनी लाबाळ बाऊ होय।

⁴ डी इस्राएल देशो गा कुरकू के परमेश्वर नी बुलून साटे हेजा कोणकु मेन गा हाक जीटे महिमा, वादानौर, नियम एठा परमेश्वर गा आराधना दडा गा हाक दिकुके जीके होय।

⁵ महान जुना सनाकु अब्राहम, इसहाक एठा याकूब दिकुगा का होय एठा कोम्बोर गा नाते मसीह दिकुका तालाटे होय। परमयाजक परमेश्वर गा हमेशा-हमेशा स्तुति डायु। आमीन।

इस्राएल गा बान मेन एठा परमेश्वर गा मकसद

⁶ इनी बाकी समझातिंजू होना कि परमेश्वर गा वचन रद्दएन होय, चोयाकी इस्राएल गा पीढी गेन डाऊ सेबाई कुरकू सच्चो इस्राएली एठा सच्चो परमेश्वर गा कुरकू बाऊ होय।

⁷ अब्राहम गा पीढी गेन जनम साटेका सेबाई दिकुगा सच्चो कोणकु बान डाऊ। पेनो परमेश्वर नी अब्राहम टे मंडीके, “जो इसहाक गा पीढी गेन जनम सावा होय, दिकुका अमा पीढीकु मनातिंजूवा।”

⁸ येनेगा मतलब इनी होय कि कोम्बोर गा रोंगो जनम सावा होय, दिकु परमेश्वर गा कोणकु बाने होय, बनकी जेगा जनम करार गा रोंगो डाएन, दिकुका अब्राहम गा पीढीकु मनातिंजूवा होय।

⁹ चोयाकी करार गा वचन इनी होय, “हेजे साल इंज इनिका टेमो डाबोलटे हेजेवा एठा मेटे सारा के म्या कोण डाऊवा।”

¹⁰ एठा बस इनिका बाने, पेनो जब रिबका भी म्याका पोट्टा मतलब आलेगा जुना सना इसहाक टे लाजके डा, एठा जोळा कोणकिंज के जनम जीके।

^11-12 दियागा बरी भी कोणकिंज गा जनम भी बान दडुका डा, एठा दिकुनी डी टेमो टाएन तुनिकाभी पापो या पुण्य गा कामय बान दडुका डा, जब रिबका टे इनी मंडीके, “खाट सानी गा इटान थंदळवा। इनी इनिघल्जी डाएन कि परमेश्वर गा वचन गा मकसद आरुका थंदळजू, जो कोरोकु गा कर्मनौर लिंजेन बाने, बनकी परमेश्वर गा निर्णय लिंजेन निर्भर होय।”

¹³ इनी डेनोगोका डाएन जैसा पवित्र ग्रंथ गेन ओल्के होय, “इंज्नी याकूब टे प्यार डावे, पेनो एसाव के अप्रिय चिनाकेनेच।”

इस्राएल गा बान मेन एठा परमेश्वर गा न्याय

¹⁴ इनी सेबाई के दोडो लठ्ठाका, आले चोच मंडे? चोच परमेश्वर अन्याय दडावा होय? बाने! बिल्कुल बाने!

¹⁵ चोयाकी परमेश्वर मूसा टे मंडीवा होय, “इंज जो जेकाभी लिंजेन दया दडा चाहतावा, दिया लिंजेन दया डाएवा, एठा जो जेकाभी लिंजेन कृपा दडा चाहतावा दिया लिंजेन कृपा डाएवा।”

¹⁶ इनिघल्जी परमेश्वर डीचके का कलामेज्बा दिया लिंजेन डीच दया घागल गा फैसला दडावा होय। दियागा चुनाव इनी बातो लिंजेन निर्भर बान दडा कि कुरकू चोच चाहतावा होय।

¹⁷ चोयाकी पवित्र ग्रंथ गेन मिस्र देशो गा फिरौन राजाटे मंडीके मेना, “इंज्नी आमके इनिघल्जी राजा आरुके, कि आपेन नी इंजा शक्ती घालेवा, एठा इंजा जीमू गा प्रचार दुनिया गा सेबाई कुरकू गेन होय।”

¹⁸ मेटे डाबोलटे, डीच जे लिंजेन चाहतावा होय, दिया लिंजेन दया दडावा होय, एठा जेके चाहतावा होय, जेके चाहतावा डीचके कामचोर आरोएच्बा होय।

¹⁹ मेटे अदा कुरकू इंजाटे मंडेबा, “दिकु डाबोलटे चोया दोष येंडावा होय? जे दियागा इच्छा गा सामना दडावा होय?”

²⁰ हे कोरो आम जे होय, जो परमेश्वर गा सेंग्गोन हिंजमानबा होय? चोच आरुके मिनी चीजो आरु लक्के मिठाच जाटे मंडी सकतावा होय, “आमनी इंज्के येनेगो चोया आरुकेमी होय।”

²¹ चोच कुम्हार गा कासा लिंजेन हाक बाऊ, कि म्याका गुली तालाटे, म्या बर्तन आदर गा घल्जी एठा दूसराकु के अनादर गा घल्जी आरुकु।

²² एठा परमेश्वर नी जो डाके होय डीका सच्चो होय। डीच हेजा हिस्सा के घागल चाहतावा डा, एठा हेजा ताखत गा परिचय जिऊ चाहता डा। लेकिन डीच डी कुरकू गा आराम्बो जिऊ गेन भेबाव आराम्बो दोडो डा, जो दियागा गुस्सा गा सामोन डा, जो विनाश गा घल्जी बर्बादी डा।

²³ एठा डीच हेजा महिमा के ओट चाहतावा डा, जो आले लिंजेन बरसातिंज्के मेना डा, जो दियागा दया गा सामोन होय, एठा दया गा बर्तननौर लिंजेन डीके डीचनी महिमा गा घल्जी पेलाटेका तैयारके डा।

²⁴ मतलब आले लिंजेन डीके डीचनी न बस यहूदी कुरकू तालाटे पेनो अलग्गो जाटो तालाटे भी कलमजे होय।

²⁵ जैसा कि परमेश्वर गा कोनेटे मंडीमिठाच होशे गा पुस्तक गेन भी मंडीवा होय, “जो इंजा प्रजा बान ड, दिकुके इंज इंजा प्रजा मंडेबा, एठा जो प्रिया बान डा, डीके प्रिया मंडेबा।

²⁶ एठा जो जागा लिंजेन डीचनी दिकुटे इनी मंडीके डा, आपे इंजा प्रजा बाने मेना डीगान का दिकु जीटा परमेश्वर गा कोणकुटे मंडेबा।”

²⁷ एठा परमेश्वर गा कोनेटे मंडीमिठाच यशायाह इस्राएल गा बारेन हाकोटे मंडीवा होय, “चाहे इस्राएली कुरकू गा गिनती समुद्र गा रिती गा बराबोर होय, तोभी दिकु तालाटे थोळाकु का बचातिंजूवा।

²⁸ चोयाकी प्रभु पूरा रुपोटे झाल्लोका पृथ्वी गा सेबाई कुरकू गा न्याय डाएवा।”

²⁹ जैसा परमेश्वर गा कोनेटे मंडीमिठाच यशायाह नी पेलाभी नी मंडीके डा, “अगर सेनाकु गा प्रभु आलेगा घल्जी अदा पीढी बान, मेटे आले सदोम गा बराबोर जुवा, एठा अमोरा गा खिजा ठहरातिंजूबा।”

इस्राएल गा अविश्वास

³⁰ इंकू सेबाईकु के दोडो लठ्ठाका, आले चोच मंडे? कि अलग्गो जाटोकु नी खुदके परमेश्वर गा सेंग्गोन धर्मी दोडो गा कोशिश बान दडुका, लेकिन परमेश्वर नी दिकुके खुद का धर्मी डोकेकु, चोयाकी दिकुनी दिया लिंजेन भरोसा डाके।

³¹ पेनो इस्राएल देशो गा कुरकू, जो मूसा गा नियम के ध्यान गेन दोडो लठ्ठाका परमेश्वर गा द्वारा धर्मी एलानु चाहतावा होय। एठा दिकुनी डी धार्मिकता के हासिलडुका बाने।

³² तुनी घल्जी? इनिघल्जी कि दिकु विश्वास टे बाने, पेनो मन टे अच्छा कामय टे घगाटा डा। दिकुनी डी टोकोट गा घोटा लिंजेन टोकोट जोवे।

³³ जैसा परमेश्वर नी पवित्र ग्रंथ गेन मंडीके होय, “डोगे इंज सिय्योन गेन म्या उजू घाई गा घोटा, एठा टोकोट जोम गा पाठा डोएबा मेना, एठा जो डे लिंजेन विश्वास डाएवा, डीच सेरोमु बाने।”