रोमियो 8 - गवली उनाई नियम

पवित्र आत्मा द्वारा चोखरा आरु

¹ दियागा वोजीटे नका जो मसीह यीशु गेन होय, दिकु लिंजेन दण्डो गा हुकूम बाने।

² चोयाकी आपे जो यीशु मसीह गेन होय, जीवन जिऊ मिनी आत्मा गा नियम शक्तीनी आपेके पापो गा शक्ती आझादकेमी होय, जो गुजू गा कोनेन साकोम्बा होय।

³ चोयाकी जो कामय मूसा गा नियम आलेगा पापोमय स्वभाव टे कामजोर रोंगो टे बान दडुका, डीके परमेश्वर डाके, मतलब हेजा कोणटे के आलेगा रोंगो पापोमय कोम्बोर गेन, आलेगा पापो गा घल्जी बलिदान डाऊ गा घल्जी कुल्केनेच। एठा परमेश्वर नी हेजा कोणटे गा कोम्बोर गा द्वारा पापो गा शक्तीके टुक्काके।

⁴ परमेश्वर नी येनेगो इनिघल्जी डाके ताकी आले पवित्र आत्मा गा रोंगो मूसा गा नियम गा सेबाई विधीनौर लिंजेन सेंदरायु होना, न कि कोरो गा स्वभाव गा रोंगो सेंदराए।

⁵ चोयाकी जो कुरकू पापी स्वभाव गा रोंगो सेंदरावा होय, दिकु बुरा चीजो गा बारेन सोचातिंज्बा होय। लेकिन जो पवित्र आत्मा गा रोंगो सेंदरावा होय, दिकु डी चीजोनौर गा बारेन सोचातिंज्बा होय जो आत्मा के खुशोएच्बा होय।

⁶ जो कुरकू पापी स्वभाव लिंजेन मन येंडावा होय दिकुगा मेरान गुजू का होय, पेनो जो कुरकू पवित्र आत्मा लिंजेन मन येंडावा दिकुगा मेरान जीवन एठा शांती होय।

⁷ चोयाकी पापी स्वभाव लिंजेन मन येंडा टासो मेटे परमेश्वर टे दुश्मनी दोडो होय, चोयाकी पापी स्वभाव न मेटे परमेश्वर गा नियम गा हात टाल्ले होय एठा नका मूसा गा नियम गा पालन दडावा होय।

⁸ एठा जो कुरकू पापी स्वभाव गा रोंगो सेंदरावा होय, दिकु परमेश्वर के खुशोएच बाने।

⁹ पेनो जब पवित्र आत्मा आपे लिंजेन थंदळवा होय, मेटे आपे पापी स्वभाव गा रोंगो बान सेंदरा, पेनो आत्मा गा रोंगो सेंदरावा होय। अगर जेकान का पवित्र आत्मा बाने मेटे डीच मसीह गा संबंध गेन बाने।

¹⁰ अगर मसीह आपेन होय, मेटे पापो गा वोजीटे कोम्बोर गा गुजू लिंजेन भी धार्मिकता गा वाजा आपेगा आत्मा जीटा होय।

¹¹ एठा अगर परमेश्वर गा आत्मा डीचनी यीशु मसीह के गोएन मिठाच जाटे जीटाकेनेच आपेन नी सुबांके मेना होय। मेटे डीचनी यीशु मसीह के गोएन मिठाच जाटे जीटाकेनेच, डीच आपेगा गुजू कोम्बोरके भी हेजा आत्मा गा द्वारा जो आपेन नी सुबांके होय जीटाकुवा।

आत्मा गा द्वारा मसीह गा कोंटे

¹² इनिघल्जी हे विश्वासी डाईचो, आले पापी स्वभाव गा कर्जोदार बाने, कि पापी स्वभाव गा रोंगो जीवन बितातिंजे।

¹³ चोयाकी अगर आपे पापी स्वभाव गा रोंगो जीवन बितातिंजेवा, मेटे आत्मिक रुपोटे गुजूवा एठा परमेश्वर टे लेंक्कीन जुवा। अगर पवित्र आत्मा गा शक्तीटे पापी स्वभाव गा रोंगो जीवन बिबातातिंज बंदोकी, मेटे आपे जीटा थंदळवा।

¹⁴ इनिघल्जी कि जोभी कुरकू परमेश्वर गा आत्मा गा रोंगो सेंदरावा होय दिकुका परमेश्वर गा कोणकु होय।

¹⁵ परमेश्वर नी जो आत्मा आपेके जीके होय, डी आपेके भाग्य बान आरु होय एठा न आपेके हिघराकोम्बा होय। येनेगा बाजाय डी आत्मा आपेके परमेश्वर गा कोणकु आरुकोम्बा होय, एठा डी आत्मा टे अगुवाई टे आले परमेश्वर के, “बाटे! इंजा बाटे!” हाकोएवा होय।

¹⁶ परमेश्वर गा आत्मा खुद का आलेगा आत्मा गा सेंग्गोन बेल्लाटे इनी घोषणा डाएवा होय, कि आले सच्चोका परमेश्वर गा कोणकु होय।

¹⁷ एठा अगर कोण होय टासो मेटे वारिश भी होय, पेनो परमेश्वर गा वारिश एठा मसीह गा सेंग्गो वारिश होय, अगर आले यीशु गा खिजा ताक्लिप सेहेसेनबा होय, मेटे आले दियागा महिमा गेन भी हिस्सा साहवा।

हेजे मिनी टेमो गेन ओटमिनी महिमा

¹⁸ इंज समझातिंजेवा कि आले लिंजेन जो महिमा ओटमिनी होय, डेगा बारबोर गेन इनी टेमो गा कासु एठा मुसीबत, चोच्कभी बाऊ होय।

¹⁹ चोयाकी सेबाई आरु खाट आसा टे परमेश्वर गा कोणकु गा ओट गा राह दोडो लक्के होय।

²⁰ चोयाकी दुनिया परमेश्वर नी आरुके डा, डीचनी हेजा किम्मत आटके, येनोगो इनिघल्जी बान दडुका, चोयाकी दुनिया खुद चाहतावा होय कि येनोगो डायु, पेनो दुनिया आरुके परमेश्वर येनेगो डाके, पेनो इनी आसा भी आरुका थंदळके।

²¹ डी आरु खुद म्या दिन हेजा गुलामी टे आरागुवा एठा परमेश्वर गा कोणकु गा महिमा गा आजादी घाटाएवा।

²² चोयाकी आले हाडाई होय कि सेबाई आरु आए टाएन कासु गेन होय एठा डी जाम लक्के होय। साही डीका खिजा जैसा म्या जापाए कोणटे के जनम जिऊ गा टेमो कासु गेन थंदळवा एठा जामबा होय।

²³ पेनो बस एकला आरु बान जाम, पेनो आलेभी जामबा होय, दिकुगा मेरान आत्मा गा पेला फल होय। चोयाकी आले आए भी डी टेमो गा राह दोडोवा होय जब परमेश्वर आलेके हेजा कोणकु आरुटे ठुलकोम्बा एठा आलेगा कोम्बोरके डी बुराई टे आराकोम्बा।

²⁴ चोयाकी इनी आसा टे डा कि आले बचातिंजे होय। अगर जेका डी बातो दोडोवा होय डेगा डीच दोडोवा होय, मेटे डीके आसा बान मंडी साकता होय, कोरोकु डी चीजो के दोडोवा होय, डेगा आसा बान डाए साकता होय।

²⁵ पेनो अगर आले डीके घाटाऊ गा आसा दडावा होय, जो आलेनी बान दोडो होय, मेटे आराम्बो गा सेंग्गोन दियागा राह दोडो होना।

²⁶ इनी रिती टे आत्मा भी आलेगा लोकोमनौर गेन मदत दडावा होय। चोयाकी आले बान हाडाई कि प्रार्थना तुनी रिती टे दडा होना, पेनो आत्मा हेज्का मन भेट्टी-भेट्टिटे जो बयान टे बल्लान होय, आलेगा घल्जी बिनती दडावा होय।

²⁷ परमेश्वर मन के चिचाना मिठाच हाडाई होय, कि पवित्र आत्मा चोच मंडी लक्के होय। चोयाकी आत्मा चोखरा कुरकू गा घल्जी परमेश्वर गा इच्छा गा रोंगो का बिनती दडावा होय।

²⁸ आले हाडाई होय कि जो कुरकू परमेश्वर टे प्यार दडावा होय एठा दियागा मकसद गा रोंगो हाकोलेकु होय, परमेश्वर दिकुगा भला गा घल्जी सेबाई बातो गेन दिकुगा मदत दडावा होय।

²⁹ चोयाकी परमेश्वर नी पक्काके कि दिकुके डीचनी पेलाटेका कलामटे हेजा समझातिंज्के, दिकु दियागा कोणकु गा रोंगो आरुवा। देटे दियागा कोणटे इनी रोंगो घोनेचका डाईचो-बोकाजाईकु गेन पेला कोण डायु।

³⁰ डीचनी जो कुरकू के पेलाटेका पक्काकेकु, दिकुके कलामटे हाकोलेकु भी होय। दिकुके कलामटे हाकोलेकु, दिकुके धार्मिक भी ठहरातिंज्केकु होय एठा इंकुके धार्मिक ठहरातिंज्केकु होय दिकुगा सेंग्गोन हेजा महिमा मंडीनौरबे।

परमेश्वर गा प्यार

³¹ इंकू सेबाईकु के दोडो लठ्ठाका, आले चोच मंडी सकतावा होय? अगर परमेश्वर आलेगा पक्ष गेन होय, मेटे आलेगा खिलाफबेन जे थंदळ सकतावा होय?

³² परमेश्वर नी हेजा मेन कोणटे के भी बान बचातिंजडुका, पेनो डीचके आले सेबाईकु गा घल्जी दियागा दुश्मनकु गा टीन जीकेनेच मेटे दिकु दियागा सेंग्गोन आलेके एठा सेबाईका चोया बान जिऊ?

³³ परमेश्वर गा कलामके मिंकू लिंजेन दोष जे येंडावा? जेका बाने! चोयाकी परमेश्वर होय, जो दिकुके धर्मी ठहरातिंजकोम मिठाच होय।

³⁴ मेटे डाबोलटे जे दिकुगा खिलाफबेन डाएवा मसीह यीशु? बाने, जो गोएन एठा जो जीवन गा घल्जी ठुल्केनेच डा एठा परमेश्वर गा जेवना कोनेन होय, आलेगा घल्जी प्रार्थना दडा लक्के होय।

³⁵ जे आलेके मसीह गा प्यार टे अलग्गो कोम्बा होय? चोच सिनी या मुसीबत? चोच अत्याचार, रांगेच, नंगापणा, जोखिम या तलवार?

³⁶ जैसा पवित्र ग्रंथ गेन ओल्के होय, “अमा घल्जी आले दिनभोर गुजूवा होय आले घोच्कु मेंडाकू रोंगो उमनाऊवा होय।”

³⁷ पेनो इनी सेबाई बातोनौर गेन आले दियागा द्वारा जीटाऊटे भी बळातिंजटे होय, डीचनी आलेटे प्यार डावे होय।

^38-39 चोयाकी इंज पक्का मेना कि जेकाभी आलेके परमेश्वर गा प्यार टे लेंक्कीन कोम बाने होय, येनेटे तुनिका फरक बान बोचो कि आले गुजूवा होय या जीटाऊवा होय। स्वर्ग गेन स्वर्गदूत, राजो एठा शक्तीनौर आलेके दियागा प्यार टे अलग्गो कोम बाने होय, एठा नका चोच डाऊ लक्के होय एठा सम्मान चोच डाऊवा, बादळा या पाताल गा तुनिकाभी शक्ती आलेके दियागा प्रेम टे अलग्गो कोम बाने।