रोमियो 4 - गवली उनाई नियम

अब्राहम विश्वास टे धर्मी ठहरातिंज्के

¹ मेटे आलेन चोच दडा होना जैसा कि यहूदी आलेगा जुना सना अब्राहम गा बारेन मंडीवा होय? डी तुनी वाजा डा डेगा वोजीटे डीच धर्मी ठहरातिंजे?

² चोयाकी अगर अब्राहम अच्छा कामयनौर टे धर्मी ठहरातिंजूबा, मेटे दियेन घमंड दडा गा वाजा डाऊवा। पेनो डीच परमेश्वर गा सम्मान घमंड बान डाए साकता।

³ पवित्र ग्रंथ चोच मंडीवा होय? “इनी कि अब्राहम नी परमेश्वर गा वादा लिंजेन विश्वास डाके, एठा इनी दियागा घल्जी धार्मिकता उमनाएन मेना।”

अब्राहम खतना टे पूरा विश्वास टे धर्मी ठहरातिंज्के

^4-5 कामय दडामिंकू गा मुंजीरी जिऊ दान बाऊ, पेनो हाक समझातिंजेवा होय। जो परमेश्वर गा कृपा के घाटाऊ गा घल्जी कामय बान दडा होय, पेनो बुरा कुरकू गा धर्मी ठहरातिंजू मिंकू विश्वास लिंजेन दडावा होय, दियागा विश्वास दियागा घल्जी धार्मिकता उमनाऊवा होय।

⁶ इनिका खिजाटे दाऊद नी ओल्के होय कि परमेश्वर डी कोरो के टोनोगो धन्य मंडीवा होय, डीचके परमेश्वर बिना कामय डाका बना धर्मी आरोएच्बा।

⁷ “धन्य दिकु होय दिकुगा अपराध मापोएन होय, एठा दिकुगा पापो मापोके मेना होय।

⁸ धन्य होय डी कोरो दियागा पापो गा हिसाब परमेश्वर बाकी दोडो।”

⁹ मेटे इनी धन्य वचन चोच खतना मिंकू का घल्जी होय, या बिना खतना मिंकू घल्जी भी? आले डी मंडी लक्के होय जो पवित्र ग्रंथ मंडीवा होय, “अब्राहम गा घल्जी दियागा विश्वास धार्मिकता उमनाये होय।”

¹⁰ मेटे इनी चोला डाएन? अब्राहम गा खतना दडा गा पेला डाएन डा, न कि खतना दडा गा बादोन।

¹¹ दियागा खतना बादोन डाके मेना डा एठा दियागा खतना इनी संकेत डा, कि दियागा विश्वास गा वोजीटे परमेश्वर नी दियागा खतना डाऊटे पेला डीचके धर्मी मनातिंज्केनेच डा। इनिघल्जी अब्राहम दिकु सेबाईकु गा आत्मिक बाटे होय, जो परमेश्वर गेन विश्वास दडावा होय एठा दियागा द्वारा धर्मी गा रुपोन मनेन कोम्बा होय भलाका दिकुगा खतना बान दडुका होय।

¹² एठा आलेगा जुना सना अब्राहम खतना दडा मिंकुगा बाटे होय, एठा दिकुगा अलावा विश्वास दडामिंकू गा भी बाटे होय, जो डीका विश्वास मिनी जीवन बिबातातिंज्बा होय जैसा आलेगा जुना सना अब्राहम नी खतना डाऊटे पेला बितातिंज्बे डा।

विश्वास गा द्वारा वादा गा घाटाऊ

¹³ परमेश्वर नी अब्राहम एठा दियागा पीढी के इनी करार कि दिकु दुनिया गा वरिश आरुवा, मूसा गा नियम गा पालन दडा गा द्वारा बान जिडुका डा, पेनो विश्वास गा धार्मिकता गा द्वारा जीके डा।

¹⁴ अगर दुनिया गा वरिश आरु गा करार परमेश्वर नी डी कुरकू टे डाके होय, जो मूसा गा नियम गा पालन दडावा होय। मेटे विश्वास वोया एठा करार गा तुनिका मतलब का बाऊ।

¹⁵ परमेश्वर डीचके दण्डो जेबा होय, जो मूसा गा नियम गा पूरा खिजाटे पालन बान दडा। पेनो जब तुनिका नियम का बाने होय, मेटे डेगा उल्लंघन भी बाने।

¹⁶ इनिका वोजीटे करार परमेश्वर गेन विश्वास लिंजेन आधरित होय, ताकी परमेश्वर गा करार दियागा कृपा गा रिती लिंजेन डायु। इनी करार अब्राहम गा डी पीढीनौर गा घल्जी का बाने होय, दिकुगा मेरान मूसा गा नियम होय। पेनो इनी डी सेबाई पीढीनौर गा घल्जी होय दिकुगा विश्वास अब्राहम गा रोंगो होय। चोयाकी अब्राहम आले सेबाईकु गा जुना सना होय।

¹⁷ जैसा पवित्र ग्रंथ गेन ओल्के होय, “इंज्नी आमके घोनेच्का जाटोकु गा बाटे ठहरातिंज्केमी होय।” परमेश्वर गा नजर गेन अब्राहम आलेगा बाटे होय। डीचनी डी परमेश्वर गेन विश्वास डाके, जो गोएन मिंकूके डाबोलटे जीटाकुवा होय एठा जो चीजोनौर होय का बाने, दिकुगा जीमू येनोगो सेगेवा होय, कि मेनकी दिकु होय।

^18-19 परमेश्वर नी अब्राहम टे मंडीके कि दियेन चोटोका पीढी पेदाऊवा, लेकिन अब्राहम नी हेज खुदके डोके कि डी कोणकु पेपैदा घल्जी ठायका बुड्डा होय, चोयाकी डीच अंदजोटे सौ साल गा डा। सारा दियागा जापाएटे खुद कोणकु पेपैदा बान डा पेनो दियेन सेबाईका डोके मेना कि डीच घोनेच अलग्गो जाटो गा बाटे बान आरु साकता, लेकिन डीच हेजा गा विश्वास गेन कमजोर बान दडुका। पेनो डीच विश्वास दडाका लक्के एठा डीचनी आसा बान आराडुका।

²⁰ एठा डीचनी न अविश्वास थंदळ टे परमेश्वर गा करार लिंजेन शक डाके, पेनो विश्वास गेन मजबूत टे परमेश्वर गा महिमा डाके।

²¹ एठा पक्काटे चिनाये कि जो बातो गा परमेश्वर नी करार डाके होय, डीच डीके पुपारान भी समर्थी होय।

²² चोयाकी अब्राहम नी विश्वास डाके, एठा इनी दियागा घल्जी धार्मिकता उमनाएन मेना।

²³ एठा इनी वचन, “विश्वास दियागा घल्जी धार्मिकता उमनाएन,” न बस दियाका घल्जी ओल्के मेना,

²⁴ पेनो आले घल्जी भी दिकुके परमेश्वर धर्मी ठहरातिंज्केकु। मतलब अगर आले परमेश्वर गेन विश्वास डाएवा, डीचनी आलेगा प्रभु यीशु के गोएन मिठाच जाटे जीटाकेनेच, मेटे आलेभी विश्वास गा वोजीटे धर्मी मनातिंजूवा।

²⁵ यीशु आलेगा पापोनौर गा घल्जी उठाएन मेना ताकी डीच घोयु होना, परमेश्वर नी आलेके हेजा गा सेंग्गोन धर्मी आरु गा घल्जी डीचके डाबोलटे गोएन मिठाच जाटे जीटाकेनेच।