रोमियो 3 - गवली उनाई नियमयहूदी एठा अलग्गो जाटोकु बार्खिंज पापो गा हात टाल्लेन 1 चोच यहूदी कुरकू के अलग्गो जाटोकु लिंजेन चोच्का फायदा होय? या खतना डाऊ गेन चोच्का फायदा होय। 2 हेन, येनेगा घोनेच फायदा होय। पेला मेटे इनी कि परमेश्वर गा वचन परमेश्वर गा कोनेटे मंडीमिंकू द्वारा यहूदी कुरकू जीके मेना होय। 3 अगर अदा यहूदी कुरकू विश्वासघाती ओटजे भी मका मेटे चोच डायेन? चोच येनेगा मतलब इनी होय कि दिकुगा विश्वासघाती थंदळ टे परमेश्वर विश्वास लायको बान ठहरातिंजू? 4 बाने! बिल्कुल बाने! पेनो परमेश्वर हमेशा सच्चो होय एठा हरेक कोरो लबाळ होय, जैसा पवित्र ग्रंथ गेन परमेश्वर गा बारेन ओल्के होय, “देटे आम आमगा बातो गेन धर्मी ठहरातिंजू, एठा न्याय दडा टेमो आम जीटायु।” 5 लेकिन चोच डाऊ अगर आलेगा गलत कामय येठाभी सापा रुपोटे परमेश्वर गा हाक के घागल गा कामय दडावा होय? मेटे चोच आले मंडी सकतावा होय, कि जब परमेश्वर आलेके सजा जेबा होय मेटे डीच गलत दडावा होय? (इनी मेटे इंज कोरोकु गा रिती लिंजेन मंडीवा मेना)। 6 बाने! बिल्कुल बाने! अगर परमेश्वर यहूदी कुरकू के न्याय दडा गेन साही बाऊ होय, मेटे डीच दुनिया गा कुरकू गा न्याय टोनोगो डाए सकतावा होय? 7 लेकिन अगर इंजा लाबाळ परमेश्वर गा महिमा के उजागरेवा होय एठा दियागा सच्चाई के सापा रुपोटे घालेवा होय? मेटे इंज चोया आए भी पापी गा रोंगो दण्डो लायको ठहरातिंजूबा मेना? 8 मेटे आलेके चोया बान मंडीडुका, “बुराई डा डाए ताकी अच्छा डायु होना”? अदा कुरकू नी आए टेमोन इंजा लिंजेन इनी बातो मंडी गा आरोप येंडाटे इंजा अपमान डाके होय। दिकुके सजा जिकी होना डेगा दिकु लायको होय। तुनिकाभी कोरो धर्मी बाऊ होय 9 मेटे डाबोलटे चोच आले यहूदी कुरकू, यूनानी कुरकू गा तुल्न गेन अच्छा हालेन होय? बिल्कुल बाने! इंज पेलाका घाल्के मेना, कि यहूदी एठा अलग्गो जाटो बराबोर पापो गा शक्तीगा काबून होय। 10 जैसा पवित्र ग्रंथ गेन ओल्के होय, “जेका परमेश्वर गा सम्मान धर्मी बाऊ म्याखोमभी बाने। 11 तुनिकाभी म्या कोरो बाऊ होय जो समझातिंजेवा होय कि चोच सही होय, जेकाभी परमेश्वर के घगाटा मिठाच बाऊ होय। 12 सेबाईकु परमेश्वर टे लेंक्कीनजे होय, दिकु सेबाईकु निकम्माएन होय जेकाभी भलाई दडामिठाच बाने, म्याखोमभी बाने। 13 दिकुगा चाभु खुल्लाके मिनी कब्र गा रोंगो सोरोट सुकींज रोंगो होय, चोयाकी दिकु बुरा मंडीवा होय। दिकु इकुगा शब्दनौर गा इस्तमाल कुरकू के धोका जिऊ गा घल्जी दडावा होय। एठा जो दिकु मंडीवा होय डी बिंज गा जहर गा रोंगो विनाशकारी थंदळवा होय। 14 एठा दिकुगा भाषण श्रपो एठा काटिच टे भेट्टिके होय। 15 दिकुके कासु जिऊ एठा घोगेज गा जल्दी होय। 16 दिकु तुंगान कभी सेनेवा होय बुराई एठा कासु सेगेवा होय। 17 दिकु बान हाडाई कि टोनोगो शांती टे थंदळ होना। 18 दिकुन नी परमेश्वर गा हिगरा होय का बाने।” 19 नका आले हाडाई होय कि नियम तालाटे सेबाईका डी कुरकू लिंजेन लागुवा होय, जो मूसा गा नियम हात टाल्ले होय। ताकी कोरोकु गा सेबाई बहनानौर के रोकातिंजकी होना। एठा पूरा दुनिया के परमेश्वर गा न्याय गा हात टाल्लेन साली होना। 20 चोयाकी मूसा गा नियम गा बातो गा पालन दडा टे तुनिकाभी कोरो परमेश्वर गा नजर गेन सही बान ठहरातिंजू, पेनो मूसा गा नियम गा द्वारा इनी मलुमूवा होय कि पापो चोच होय। विश्वास गा द्वारा परमेश्वर गा धार्मिकता 21 पेनो नका मूसा गा नियम गा पालन डाके बिना, परमेश्वर नी आलेके हेजा गा सेंग्गोन सही एलान डाके होय इनी मूसा गा नियम एठा परमेश्वर गा कोनेटे मंडीमिंकू गा पुस्तकनौर गेन पेलाका ओल्के मेना होय। कि टोनोगो आले परमेश्वर द्वारा धार्मिकता आरुकोम्बा होय। 22 जब आले यीशु मसीह गेन भरोसा दडावा होय, मेटे आले परमेश्वर गा सेंग्गोन धर्मी आरुवा होय। चोयाकी परमेश्वर जेका गा सेंग्गोन भेद-भाव बान दडावा होय। 23 इनिघल्जी कि सेबाईकु नी पापो डावे होय एठा परमेश्वर गा महिमा टे लेंक्कीनजे। 24 पेनो परमेश्वर गा कृपा टे आले यीशु मसीह गा द्वारा डी दण्डो टे आराएन जो आलेन आलेगा पापो गा वोजीटे घाटाऊ डा एठा इनी खिजाटे परमेश्वर नी एलन डाके, कि आले बिना चोच्का डाके धर्मी होय। 25-26 परमेश्वर नी हेजा कोणटे मसीह के आलेगा पापो गा किम्मत फेफाळा गा घल्जी बलिदान डाके, ताकी दियागा पचना गा द्वारा दिया लिंजेन विश्वास दडामिंकू कुरकू गा पापोनौर के मापोकी। परमेश्वर नी येनेगो डाटे टिपीके कि डीच धर्मी होय। पेला डीचनी सेहेन टे कुरकू गा पापो लिंजेन ध्यान बान जिऊ डा। लेकिन आए गा टेमो गेन डीच कुरकू गा पापोनौर टे निपटातिंज्के होय, ताकी डीच हेजा धार्मिकता टिपीकी होना। एठा डीच यीशु लिंजेन विश्वास दडामिंकू सेबाई कुरकू के धर्मी आरुका डोकुवा होय। 27 डाबोलटे, चोच आले येनेगा बारेन घमंड डाए सकतावा होय? बाने! एठा येनेगा वाजा चोच होय? चोच इनी होय कि आले नियम गा पालन दडावा होय? बाने, लेकिन आले मूसा गा नियम के विश्वास गा द्वारा ममानातिंज्बा होय। 28 इनिघल्जी आले इनी नतीजा लिंजेन आदिरके होय, कि कोरोकु मूसा गा नियम गा कामय गा बिना विश्वास गा द्वारा धर्मी ठहरातिंजूबा होय। 29 परमेश्वर बस यहूदी कुरकू गा परमेश्वर बाने, पेनो अलग्गो जाटोकु गा भी परमेश्वर होय। 30 चोयाकी म्याका परमेश्वर होय, जो खतना मिंकूके विश्वास टे एठा बिना खतना मिंकूके भी विश्वास गा द्वारा धर्मी ठहरातिंज्कुबा। 31 मेटे चोच आले मूसा गा नियम के विश्वास गा द्वारा वोया ठहरातिंजेवा होय? बाने! बिलकुल बाने! पेनो आले नियम के पक्काएवा होय। |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation