रोमियो 12 - गवली उनाई नियममसीही आचार-व्यवहार 1 इनिघल्जी हे डाईचो, इंज आपेटे परमेश्वर गा दया यादो जीटे बिनती दडावा मेना, कि इंज खुदके जीटा, एठा पवित्र, एठा परमेश्वर के पसानेन हेजे रोंगो बलिदान डाटे पेळेजे। चोयाकी इनिका आपेगा सच्चो सेवा होय। इनिका आपेगा आत्मिक आराधना होय। 2 एठा आपे इनी दुनिया गा कुरकू गा खिजा बाकी आरु, पेनो सेबाईका उनाई नजर टे डोगे एठा आपना स्वभाव बादलाकी। इनी रोंगो हेज्का चिनाऊवा कि परमेश्वर चोच चाहतावा होय एठा दियागा नजर गेन चोच भला, पसान यानेकी सेबाई अच्छा होय। आत्मिक वरदननौर टे परमेश्वर गा सेवा 3 चोयाकी इंज कृपा गा वाजा जो इंजेन घाटाएन होय, आपे तालाटे हर म्याखोमटे मंडीवा मेना, कि जैसा समझातिंजू होना, देटे बळातिंजटे जेकाभी आपना खुदके बाकी समझातिंजू। पेनो जैसा परमेश्वर नी आपेके विश्वास जीके होय, हर म्याखोम के परिमाण खाटिंजके होय, डेनोगोका बेसुध्दो गा सेंग्गोन खुदके समझातिंजे। 4 चोयाकी जैसा आलेगा कोम्बोर गेन घोनेचका अंगो होय, एठा सेबाई अंगो गा म्याका रोंगो कामय बाने होय। 5 डेनोगोका आलेभी, जो मसीह गेन विश्वास दोडोवा होय, आले सेबाईकु मसीह गा कोम्बोर गा भागो होय, एठा आले सेबाईकु इनिज-दियाटे जोळातिंज्के होय। 6 जब कि डी कृपा गा खिजा जो परमेश्वर टे आलेन घाटाके होय, आलेन रेंग्गो-रेंग्गो वरदान घाटाएन होय। मेटे जेन भविष्यवाणी गा दान घाटाके होय, डीचके डी शब्दनौर के मंडी होना डेन दियेन विश्वास होय कि परमेश्वर नी डीचके घाल्के होय। 7 अगर सेवा दडा गा वरदान घाटाएन टासो, मेटे दूसराकु गा सेवा गेन चालुका थंदळकु। अगर जेकाकेका इथूमिनी वरदान घाटाके टासो, मेटे इथून चालुका थंदळकु। 8 जेगा मेरान शिक्षा जिऊ गा वरदान होय, डीच शिक्षा जिऊ गेन चालुका थंदळक। जेगा मेरान दूसराकु गा अगुवाई दडा गा वरदान होय, मेटे डीच आरीटे अगुवाई डाए, एठा जेगा मेरान दया दडा गा वरदान होय, डीच खुशीटे दया डाए। मसीही व्यवहार 9 प्यार पूरा खिजाटे ईमानदारी टे डाऊ होना। जो बुराई होय देटे खीजो डाए, एठा भालाई लगातार डाए चाले। 10 म्या खटला गा सदस्यकु गा रुपोन इनिज-दियाटे प्यार डाए, एठा इनिज-दियागा आदर दडा गा घाल्जी आरीका थंदळे। 11 कळक्को बळाई डाए एठा आळसी बाकी आरु। भक्ति भेट्टी दिल टे परमेश्वर गा सेवा डाए। 12 आपेगा मेरान जो आसा होय, डेन आपेके खुश थंदळजू होना, आपना परीशाननौर गेन आराम्बो डोए एठा हारेक टेमो प्रार्थना डाए। 13 चोखरा कुरकू के जो चोच्काभी जरुरत होय, डेन दिकुगा मदत डाए, पांचार दडा गेन चालुका थंदळकु। 14 आपना तक्लिप जिऊ मिंकूके आशीर्वाद जे पेनो श्रपो बाकी जिऊ। 15 खुशी जिऊमिंकू गा सेंग्गोन खुशी डाए, एठा जाम मिंकू गा सेंग्गोन जामे। 16 इनिज-दियागा बारेन देटोका परवाह डाए जितना कि आपना बारेन। घमंडी बाकी आरु, पेनो दिन कुरकू गा सेंग्गोन सोपती डोए एठा आपना नजर गेन दिमागदार बाकी आरु। 17 बुराई गा बेदला जेकाटे बुराई बाकी दडा। जो बातो सेबाई कुरकू गा नजर गेन भाली होय, डेगा चिंता डाए चाले। 18 येटो टाएन डाऊ टासो, आपे आपेगा कोनेटे सेबाई कोरोकु गा सेंग्गोन मिलातिंज डोकी। 19 हे प्रियो आपना बादला बाकी सा, पेनो परमेश्वर के आपेगा बादला सा डाए, चोयाकी पवित्र ग्रंथ गेन प्रभु नी मंडीके होय, “बादला सा इंजा कामय होय प्रभु मंडीवा होय इंज का बादला जेबा।” 20 पवित्र ग्रंथ इनी भी मंडीवा होय, “अगर अमा दुश्मान रांगेच होय टासो मेटे डीचके आटा चाराए, अगर डा तटाम टासो, मेटे डीचके डा आनोए। चोयाकी येनेगो दडा टे आपे डीचके सेरोमेच्बा।” 21 बुराई टे बाकी ठहरातिंजू पेनो भलाई टे बुराई के जिटाये। |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation