रोमियो 11 - गवली उनाई नियम

इस्राएल लिंजेन परमेश्वर गा दया

¹ इनिघल्जी इंज कोकाम्बरावा मेना, चोच परमेश्वर नी हेजा प्रजा के आराके? बाने! बिल्कुल बाने! इंजभी मेटे इस्राएली कुरकू गा तालाटे मेना, अब्राहम गा पीढी एठा बिन्यामीन गा खान्दान गा तालाटे मेना।

² परमेश्वर नी हेजा डी प्रजा के बान आराडुका, डीके डीचनी पेलाटेका कलामके। आपे हाडाई होय, कि पवित्र ग्रंथ परमेश्वर गा कोनेटे मंडीमिठाच एलिय्याह गा कथा गेन चोच मंडीवा होय, कि डीच इस्राएली कुरकू गा खिलाफ परमेश्वर टे बिनती दडावा होय।

³ डीचनी मंडीके, “हे प्रभु, दिकुनी परमेश्वर गा कोनेटे मंडीमिंकू के घोच्केकु, एठा अमा वेदीनौर के नाशोके मेना होय। एठा इंज एकलाका अमा हुकूम के ममानातिंज मिठाच बचातिंज्के, एठा दिकु इंज्के घोगेच चाहताके होय।”

⁴ पेनो परमेश्वर नी एलिय्याह टे मंडीके, “इंज्नी इंजा घल्जी एई हजार कोरोकु के डोकेकु होय, दिकुनी लाबाळ गोमेच ताखत गा आराधना बान दडुका होय।”

⁵ इनिका रिती टे इनी टेमो भी, कि परमेश्वर गा कृपा गा वाजा, इनी यहूदिकु गा म्या सानी सा हिस्सा होय, डीके परमेश्वर नी हेजा सच्चो कुरकू गा रुपोन कलामकेकु होय।

⁶ अगर चुनाव कृपा टे डाएन होय, मेटे अच्छा कामयनौर टे बाने, पाचन अच्छा कामय गा द्वारा डाएन, मेटे कृपा मेटे कृपा बान थंदळ डुका।

⁷ डाबोलटे परिणाम चोच डाएन? इनी कि इस्राएली कुरकू जो बातो के घागाटा लक्के डा, दिकु डीके बान घाटाडुका, पेनो कलामके मिंकून घाटाएन एठा कास कुरकू गा दिल जिद्दो आरोएन।

⁸ जैसा पवित्र ग्रंथ गेन परमेश्वर गा कोनेटे मंडीमिठाच यशायाह गा द्वारा ओल्के होय, “परमेश्वर नी दिकुके टाइंज गा दिन टाएन दिमाग खाटके मेना होय एठा येनेगो मेट जीके जो दोडो भी मका बान दोडो एठा येनेगो लुटूर जो आजोम भी मका बान आजोम।”

⁹ एठा राजा दाऊद मंडीवा होय, “इंजा अनुरोध होय कि डी कुरकू गा सेबाई आशीर्वाद, बस दिकुके सिस्या गा वाजा डायु। देटे टाएन कि दिकुके सजा घाटायु।”

¹⁰ दिकुगा मेट लिंजेन पट्टी टोल्कि ताकी दिकु डोयु बाकी होना, एठा दिकुके हर टेमो दिकुगा परेशानीनौर गा इटान झुकातिंज थंदळकु।

¹¹ मेटे इंज कोकाम्बरावा मेना, “चोच यहूदी कुरकू टोकोट जोम गा वोजीटे हमेशा गा घल्जी बोचोएन होय?” बाने! बिल्कुल बाने! पेनो दिकुगा अविश्वास गा वाजा अलग्गो जाटोकुन उध्दार घाटाएन, ताकी दिकुन जुलू डायु।

¹² इनिघल्जी अगर दिकुगा बोचो दुनिया गा अविश्वास कमी अलग्गो जाटोकु गा घल्जी सम्पत्ति गा वाजा डाएन, मेटे दिकुगा भेट्टी टे चोच मेटे बान डाऊ।

अलग्गो जाटोकु गा उध्दार

¹³ इंज आपे अलग्गो जाटो टे इनी बातो मंडीवा मेना। जब कि इंज अलग्गो जाटोकु गा घल्जी कलामके मिठाच चेला मेना, मेटे इंज इंजा सेवा गेन घमंड दडावा मेना,

¹⁴ ताकी तुनिका रिती टे इंज इंजा सगाकुटे जालन डाटे दिकु तालाटे तुनिका म्याखोम गा उध्दार डाकी होना।

¹⁵ चोयाकी जब कि इस्राएल गा कुरकू गा आरा दुनिया गा कुरकू गा मिलातिंजू गा वाजा डाएन, मेटे चोच दिकुगा मसीह के मसीहा ममानातिंज, जरुर टेका गोएन मिंकूटे जीटाऊ गा बराबोर डाऊवा।

¹⁶ अगर सोकळा गा पेला तुकळा परमेश्वर के जेबा मेना होय, मेटे पूरा सोकळा भी दियागा होय, एठा अगर सिंज गा जळी परमेश्वर के पेळेजेवा होय, मेटे डांगोल भी दियागा होय।

¹⁷ पेनो अगर खिटी बिट्बे मिनी जैतून गा सिंज गा अदा डांगोल के टुक्काके मेना होय, एठा म्या डोंगोर जैतून गा सिंज गा म्या डांगोल येने गेन बेल्लाएन होय। मेटे आपे अलग्गो जाटोकु डोंगोर जैतून गा सिंज गा जळी गा खिजा होय, एठा नका आपे यहूदिकु गा मजबूत आत्मिक जीवन के साजा दडावा होय।

¹⁸ मेटे आपे खुदके डांगोलनौर टे बळातिंजटे बाकी ससामझातिंज। अगर घमंड दडा चाहतावा होय, मेटे यादो डोकी कि आपे जळीके बान ससाम्भालातिंज, बनकी जळी आपेके सम्भलातिंजकोम्बा।

¹⁹ आपे मंडेबा, “डांगोलनौर इनिघल्जी म्हाटे अलग्गोके मेना कि इंजेन रोपो येंडाकी होना।”

²⁰ सही होय, दिकु अविश्वासी वोजीटे म्हाटे अलग्गोके मेना एठा आपे विश्वास गा ताखात लिंजेन आपना जगान बान दडुका होय। इनिघल्जी घमंड बाकी दडा, पेनो ध्यान टे थंदळे।

²¹ जब परमेश्वर नी यहूदी कुरकू लिंजेन दया बान दडुका जो स्वाभाविक डांगोलनौर गा रोंगो होय, मेटे डीच आपे लिंजेन भी दया बान दडा।

²² परमेश्वर गा दयालुता एठा कठोरता, बाएरा लिंजेन बिचार डाए। जो बोचोएन, दिकु लिंजेन कळाक्को, पेनो अमा लिंजेन दयालुता गा लायको आरुका थंदळे, बानकी मेटे आपेके भी म्हाटे अलग्गो कोम्बा।

²³ दूसरा कोनेन, अगर यहूदी कुरकू इकुगा विश्वास आरागेवा, मेटे दिकुभी रोपो येंडाएवाका, चोयाकी परमेश्वर दिकुके डाबोलटे रोपो येंडा गेन शक्ती होय।

²⁴ चोयाकी अगर आपे डी जैतून टे, जो स्वभाव टे डोंगोरा होय, म्हाके एठा स्वभाव गा खिलाफ अच्छा जैतून गेन सटातिंज्केनेच, मेटे इनी जो स्वाभाविक डंगोलनौर होय, डीके इकु खुद जैतून गा सिंज गेन बेल्लाऊ असान होय।

सेबाई इस्राएल गा कुरकू गा उध्दार

²⁵ हे विश्वासी डाईचो, आपे अलग्गो जाटोकु के खुद लिंजेन घमंड बान दडा चाहताके। इनिघल्जी इंज इस्राएल गा कुरकू गा सेंग्गोन चोच डाएन होय, येनेगा उखु बातो घालेवा। अदा इस्राएली कुरकू जिद्दी आरोएन होय, एठा दिकु मेटे टाएन येनेगोका थंदळवा, जब टाएन कि अलग्गो जाटोकु गा पूरा संख्या परमेश्वर गा मेरान बान हेजे।

²⁶ येनेगो डाऊ लिंजेन इस्राएल देशो गा सेबाई कुरकू उध्दार घाटाऊवा। जैसा पवित्र ग्रंथ गेन ओल्के होय, “आरामिठाच सिय्योन टे हेजेवा। एठा अभाक्ति के याकूब गा पीढी टे लेंक्कीनेबा।

²⁷ एठा दिकुगा सेंग्गोन इंजा इनिका उनाई करार डाऊवा, जब इंज दिकुगा पापो के मापो कीवा।”

²⁸ यहूदी कुरकू अच्छा खाबोर के बान ममानातिंज गा वाजा परमेश्वर गा दुश्मान होय। पेनो परमेश्वर दिकुटे प्यार दडावा होय, चोयाकी डीचनी दिकुके कलामकेकु होय। येनेगा का डीचनी दिकुके जुना सनाकु टे वादा डाके डा।

²⁹ चोयाकी परमेश्वर न मेटे हेजा कृपा हिरागेवा एठा न हेजा हाको बोचोगेवा होय।

³⁰ चोयाकी जैसा आपेनी पेला परमेश्वर गा हुकूम बान आजोमडुका, पेनो नका इस्राएल गा कुरकू गा हुकूम बान आजोम टे आपे लिंजेन परमेश्वर गा दया डाएन।

³¹ डेनोगोका दिकुभी नी नका हुकूम बान आजोमडुका, कि आपे लिंजेन जो दया डाऊवा होय एनेटे दिकु लिंजेन भी दया डायु।

³² इनिघल्जी परमेश्वर नी सेबाईकु के हुकूम बान आजोम गा पापो गेन फसातिंज डाएकेनेच, चोयाकी डीच सेबाईकु लिंजेन दया तिटीपी चाहता डा।

परमेश्वर गा स्तुति

³³ आहा! परमेश्वर गा डामा एठा मन एठा ज्ञान चोचका गंभीर होय! एठा जेकाभी दियागा निर्णयनौर गा व्याख्या बान डाई साकता, एठा दियागा तरीका जेका बान समझातिंजे।

³⁴ “प्रभु गा मन जे चिनाके? या जे डेगा सलाहकार आरोएन होय?

³⁵ या जेनी पेला डीचके चोच्का जीके होय, डेगा बेदला डीचके जेबा?”

³⁶ सेबाईका परमेश्वर टे, परमेश्वर गा द्वारा यानेकी परमेश्वर गा घल्जी होय। दियागा का हमेशा-हमेशा टाएन महिमा डायु! आमीन।