रोमियो 10 - गवली उनाई नियम

इस्राएल के अच्छा खाबोर गा जरुरत

¹ हे विश्वासी डाईचो, इस्राएल देशो गा कुरकू गा घल्जी इंजा मन गा बुरा इच्छा एठा परमेश्वर टे इंजा प्रार्थना होय, परमेश्वर दिकुगा उध्दार डाएवा।

² चोयाकी इंज दिकुगा गवाही जेबा मेना, कि दिकुके परमेश्वर गा घल्जी आरी थंदळवा होय, पेनो परमेश्वर गा सेवा दडा गा दिकुगा समझो सही बाऊ होय।

³ चोयाकी दिकु परमेश्वर गा धार्मिकता टे अनजान थंदळ टे, एठा इकुगा धार्मिकता सुसाबान गा कोशिश डाटे, परमेश्वर गा धार्मिकता गा हात टाल्ले बान हेजडुका।

⁴ मूसा गा नियम गा मकसद नका पुराएन होय, चोयाकी मसीह हेन मेना होय। इनिघल्जी हर जेकाभी जो मसीह गेन विश्वास दडावा होय, डीचके परमेश्वर धार्मिकता एलानेजबा होय।

नका यहूदी एठा अलग्गो जाटो गेन तुनिका भेदो बान थंदळ डुका

⁵ चोयाकी मूसा गा नियम लिंजेन आधारित धार्मिकता गा बारेन ओल्बा होय, “जो कोरो डेगा पालन दडावा होय, डीच दिकुटे जीटा थंदळवा।”

^6-8 जो धार्मिकता विश्वास टे होय डी इनी मंडीवा हो, “आम अमागा मनेन इनी बाकी मंडी कि स्वर्ग लिंजेन जे पेडेच्बा?” (मतलब मसीह के आगुरू गा घल्जी), या “पातल गेन जे आगुरुवा?” (मतलब मसीह के गोएन मिठाच जाटे जीटाटे मठान सा गा घल्जी!) पेनो मंडीवा होय कि, “आपे इनी वचन के आपना चाभु टे मनेन नेजबा होय एठा इनिके आपना दिलेन भी मनेन नेजबा होय।” इनी डीका विश्वास गा वचन होय, जो आले प्रचार दडावा होय।

⁹ अगर आम यीशु के प्रभु चिनाटे सेबाईकु सम्मान मनातिंजे एठा आपना मन टे विश्वास डाए, कि परमेश्वर नी डीचके गोएन मिठाच जाटे जीटाकेनेच, मेटे आम पक्कान उध्दार घाटाएवा।

¹⁰ चोयाकी परमेश्वर गा सेंग्गोन धर्मी आरु गा घल्जी मन टे विश्वास डूगुवा होय, एठा उध्दार गा घल्जी चाभु टे मंडीऊवा होय।

¹¹ चोयाकी पवित्र ग्रंथ परमेश्वर गा कोनेटे मंडीमिठाच यशायाह मसीह गा बारेन मंडीवा होय, “जो जेकाभी दिया लिंजेन विश्वास दडावा होय डीच नराजोऊ बाने।”

¹² यहूदी कुरकू एठा अलग्गो जाटो गा कुरकू गेन तुनिका भेदो बाने, इनिघल्जी कि परमेश्वर सेबाईकु गा प्रभु होय। एठा आपना सेबाई प्रार्थना दडामिंकू गा घल्जी उदारी होय यूनानी गेन चोच्क भेद बाने इनिघल्जी कि देटेन सेबाईकु प्रभु होय येन आपना सेबाई जीमू सा मिठाच गा घांजी उदार होय।

¹³ चोयाकी इनी ओल्के होय, “प्रभु हेजा जीमू गा घल्जी हर जेरकाकेभी बचातिंज्कुवा।”

इस्राएल गा बान मेन आखरी बाऊ

¹⁴ पेनो येनेटे पेला कि कुरकू परमेश्वर टे मदत आसे टासो, दिकुके दिया लिंजेन विश्वास दडा होना। एठा येनेटे पेला कि दिकु दिया लिंजेन विश्वास डाकी होना, दिकुके दियागा बारेन आजोम होना। एठा कुरकू के प्रभु गा बारेन आजोम गा घल्जी जेकाकेका दिकुके (यीशु मसीह गेन विश्वास दडा गा बारेन) घागल होना।

¹⁵ एठा अगर खाबोर घागल मिंकू बल्लान बान कुलु होय मेटे खाबोर टोनोगो घालूवा होय? जैसा कि पवित्र ग्रंथ मंडीवा होय, “खुशखाबोर सा मिंकू कुरकू गा हेजे चोटो अच्छा होय!”

¹⁶ पेनो सेबाईकु नी अच्छा खाबोर के मनेन डुका होय। परमेश्वर गा कोनेटे मंडीमिठाच यशायाह नी खुद मंडीके, “हे प्रभु, आलेगा खाबोर लिंजेन जेनी विश्वास डाके होय?”

¹⁷ इनिघल्जी विश्वास आजोम टे एठा आजोम मसीह गा वचन टे डाऊवा होय।

¹⁸ पेनो इंज मंडीवा मेना, चोच इस्राएल गा कुरकू नी मसीह गा खाबोर बान आजोमडुका? दिकुनी जरुर आजुम्के होय चोयाकी पवित्र ग्रंथ गेन ओल्के, “दिकुगा वचन सेबाई पृथ्वी लिंजेन, एठा दियागा वचन दुनिया गा हारेक जगह टाएन आदिरजे होय।”

¹⁹ पेनो इंज डाबोलटे मंडीवा मेना, चोच इस्राएली कुरकू नी मसीह गा खाबोर बान समजातिंजडुका? पेला मेटे प्रभु नी मूसा गा द्वारा इनी मंडीके, “हे यहूदिकु, इंज आपेके जुलकोम्बा जब आपे डी कुरकू टे इंजा प्यार डोगेवा जो यहूदी बाऊ होय, इंज आपेके बेदिमाग अलग्गो जाटो गा द्वारा खीजोकोम्बा।”

²⁰ डाबोलटे परमेश्वर नी यशायाह गा द्वारा मंडीवा होय, “जो इंज्के बान घागटा डा, दिकुनी इंज्के घाटायेमी, एठा जो इंज्के कोकाम्बरा भी बान डा, दिकु लिंजेन इंज ओटजे मेना।”

²¹ पेनो इस्राएली कुरकू गा बारेन परमेश्वर इनी मंडीवा होय, “इंज सेबाई दिन इंजा टीन म्या हुकूम बान आजोम मिठाच एठा हिंजमन दडामिठाच प्रजा गा कोनेन पासरा थंदळजे।”