रोमियो 1 - गवली उनाई नियमनमस्कार 1 इंज पौलुस इनी चिठ्ठी ओल लक्के मेना, यीशु मसीह गा भाग्य एठा परमेश्वर गा कोनेटे कलामके मिठाच चेला एठा परमेश्वर गा अच्छा खाबोर गा प्रचार दडा घल्जी अलग्गो केमी होय। 2 जो अच्छा खाबोर के परमेश्वर नी पेलाका परमेश्वर गा कोनेटे मंडीमिंकू गा द्वारा पवित्र ग्रंथ गेन ओल्के होय। 3 इनी अच्छा खबर दियागा कोणटे आलेगा प्रभु यीशु मसीह गा बारेन होय, जो कोरो गा रोंगो मेटे दाऊद गा पीढी गेन डाएन मेना। 4 एठा पवित्र आत्मा गा द्वारा टे यीशु मसीह गोएन मिठाच जाटे जीटाऊ गा वोजीटे शक्तीगा सेंग्गोन परमेश्वर गा कोण ठहरातिंज्के होय। 5 मसीह गा द्वारा आलेन परमेश्वर टे कृपा एठा कलामके चेला आरु गा अच्छा मौका एठा हाक घाटाएन, ताकी अलग्गो जाटोकु मसीह गा खाबोर लिंजेन विश्वास डाए एठा डीके मनातिंजे। 6 दिकुन आपे भी जो रोम शहर गेन थंदळवा होय, यीशु मसीह गा डाऊ गा घल्जी हाकोलेमी होय। 7 इंज इनी चिठ्ठी रोम शहर गेन थंदळ मिंकू आपे सेबाई विश्वासीकु के ओल्बा मेना, दिकुके परमेश्वर प्यार दडावा होय एठा दिकुके हेजा चोखरा कुरकू डाऊ गा घल्जी हाकोलेमी होय। आलेगा परमेश्वर बाटे एठा प्रभु यीशु मसीह आपेके कृपा एठा शांती जे लक्कू। धन्यवाद गा प्रार्थना 8 पेला इंज आपे सेबाईकु घल्जी यीशु मसीह गा द्वारा आपना परमेश्वर गा धन्यवाद दडावा मेना, चोयाकी आपेगा विश्वास जो यीशु मसीह गेन होय, दियागा बारेन घोनेच सेबाई कुरकू बातो लक्के होय। 9 परमेश्वर जेगा सेवा इंज पूरा मन टे दियागा कोणटे गा अच्छा खाबोर गा प्रचार दडा गा बारेन दडावा मेना, डीका इंजा गवाह होय, कि इंज इंजागा प्रार्थनानौर गेन आपे कुरकू के रोजका यादोकोम्बा मेना। 10 एठा रोजका इंजा प्रार्थनानौर गेन बिनती दडावा मेना, कि परमेश्वर गा इच्छा गा रोंगो इंज तुनिका-ना-तुनिका रोंगो टे आपेटे मिलातिंजू आपे मेरान हेयु। 11 चोयाकी इंज आपेटे मिलातिंजू गा इच्छा दडावा मेना, ताकी इंज आपेके तुनिका आत्मिक वरदान जे, देटे आपे विश्वास गेन पक्का आरुयु, 12 मतलब इनी कि जब इंज आपे तालान थंदळवा मेटे आले डी विश्वास गा द्वारा इनिज-डीचके बळातिंज्कु, जो इंजेन नी एठा आपेन नी होय। 13 हे विश्वासी डाईचो, इंज चाहतावा मेना कि आपे चिनाया कि इंज्नी बार-बार आपेगा मेरान हेजे चाहताके, चोयाकी जैसा इंज्नी अलग्गो जाटोकु गा तालान मसीह गा घल्जी चेलाकू आरुकेकु, डीका रोंगो टे आपे तालान भी मसीह गा चेलाकू आरुकु, पेनो आए टाएन रुकातिंज्केका। 14 इनेटे तुनिका फरक बान बोचो कि कुरकू इथूके मिंकू होय या अनपळकु होय, कुरकू दिमागदार होय या बेदिमागदार होय, इंज सेबाईकु के अच्छा खाबोर घागल गा घल्जी कर्जोदार मेना। 15 इनिघल्जी इंज आपेके भी जो रोम शहर गेन थंदळवा होय, अच्छा खाबोर घागल गा घल्जी आरीके मेना। अच्छा खाबोर गा शक्ती 16 इंजेन अच्छा खाबोर लिंजेन घमंड होय, चोयाकी डी हर म्या विश्वास दडामिंकू गा घल्जी, पेला मेटे यहूदी कुरकू डाबोलटे गैर-यहूदी कुरकू गा घल्जी, उध्दार गा घल्जी परमेश्वर गा शक्ती होय। 17 चोयाकी अच्छा खाबोर द्वारा परमेश्वर इनी ओट चाहतावा होय, कि परमेश्वर तुनी खिजा कुरकू के धार्मिकता ठहरातिंज होय। इनी पेला टे आखिरी टाएन विश्वास दडा गा द्वारा का डाऊवा होय। जैसा पवित्र ग्रंथ गेन ओल्के होय, “विश्वास दडा गा द्वारा का धर्मी कुरकू जीटाका थंदळवा।” कोरो जाटोकु गा पापो 18 परमेश्वर स्वर्ग टे हेजा खीजो डी सेबाई कुरकू गा लिंजेन ओडेवा मेना होय, जो इकुगा सेबाई बुरा कामय एठा अधर्म गा कामयनौर गा द्वारा परमेश्वर गा बारेन सच्चाई चिचानाटे रोकातिंज्कुवा होय। 19 चोयाकी इनी सेबाई कुरकू गा घल्जी सापा कि परमेश्वर टोनोगो होय, चोयाकी परमेश्वर नी खुद दिकुके सापा रुपोटे ओटके होय। 20 जब टे परमेश्वर नी दुनिया के आरुके होय, दियागा बान डूगु गुणनौर, मतलब दियागा हमेशा गा शक्ती एठा दियागा ईश्वरीय स्वभाव इनी बाएराके भी सापा रुपोटे डोके मेना होय। इनिघल्जी डी कुरकू गा मेरान तुनिका बहाना बाऊ। 21 इनी खिजाटे दिकु परमेश्वर के मेटे हाडाई होय, लेकिन दिकु डीचके आदर बान जिऊ होय, एठा नका दिकु डीचके धन्यवाद जिऊवा होय इनिका वोजीटे दिकुगा बिचार पूरा खिजाटे वोया ओले होय, एठा दिकुगा खाली दिमाग अंधरा टे भेट्टिके मेना होय। 22 दिकु इकु खुदके दिमागदार घाल्टे बेदिमाग आरोएन। 23 एठा हमेशा जीटा थंदळ मिठाच परमेश्वर गा महिमा दडा गा बेदला दिकुनी नाशो मिंकू कोरोकु, एठा भूरिकु, एठा जानवरकु, एठा गोसोरमिंकू जंतुकू गा मूर्ति गा आराधना दडावा होय। 24 इनी वोजीटे परमेश्वर नी दिकुके दिकुगा मन गा बुरा इच्छानौर गा रोंगो खरोबाऊ गा घल्जी आराकेकु, कि दिकु इकु-इकुनका बुरा कामयनौर गेन इकुगा कोम्बोरके बिसोटो डाएवा होय। 25 चोयाकी दिकुनी परमेश्वर गा सच्चाई लिंजेन विश्वास बान दडुका, पेनो लाबाळ लिंजेन विश्वास डाके। एठा दिकुनी दुनिया गा आराधना एठा सेवा डाके, पेनो परमेश्वर गा बान दडुका डीचनी डी दुनिया के आरुके होय एठा जो हमेशा धन्य होय। आमीन। 26 एनोगो दडा गा वोजीटे परमेश्वर नी दिकुके खराबो कामनानौर गा काबून आराकेकु, एटे टाएन कि जापाएकु नी सना गा सेंग्गोन कुदरती सम्बन्ध दोडो आराटे, एनेगा बेदला दिकु दूसरा जापाएकु गा सेंग्गोन सम्बन्ध दोडो लज्जे। 27 इनी रोंगो सनाकु नी भी जापाएकु गा सेंग्गोन कुदरती सम्बन्ध दोडो आराटे, सनाकु नी सनाकु सेंग्गोन सम्बन्ध डोके। इनी खिजाटे दिकु इकु बुरा स्वभाव गा सही सजा खुद घाटाएवा होय। 28 जब दिकुनी परमेश्वर गा ज्ञान हासिल दडा सही बान समजातिंजडुका, मेटे परमेश्वर नी भी दिकुके डी सेबाई बिसोटो कामय दडा गा घल्जी दिकुगा निकम्मा मन गा काबून आराकेकु। 29 दिकु सेबाई प्रकार गा अधर्म, एठा बुराई टे व्यवहार, एठा लालीचो, एठा खीजो, एठा हिंजमान टे भेट्टेन। एठा घोगेच, एठा झागळा, एठा धोका जिऊ, एठा जुलू टे भेट्टेन मेना, एठा चुगलीखोर, 30 गप्पा मिंकू, खिलाफबेन दडामिंकू, परमेश्वर टे खीजो दोडोमिंकू, हिंसक, आभिमानी, टोचा येंडा मिठाच, बुरा-बुरा बातो के आरुमिठाच, आंटे-बाटे गा हुकूमनौर के बान आजोम मिठाच, 31 बेदिमाग, विश्वासघाती प्यार एठा दया बान दडामिंकू आरोएन। 32 दिकु हाडाई होय कि परमेश्वर गा नियम मंडीवा होय कि जो कुरकू इनी खिजाटे गा कामय दडावा होय, दिकुनी मेटे गुजू गा लायको होय। फिरभी न बस दिकु इनी कामयनौर के दडा चालुका डोकीवा होय, बनकी दिकु दूसरा कुरकू के येनोगो कामय डाटे धोटे खुशोऊवा होय। |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation