ದರ್ಶಾನ್ 9 - गवली उनाई नियम

मोनाई पिंगी

¹ जब मोनाई स्वर्गदूतकु नी पिंगी साडीके। मेटे इंज्नी म्या इफिल डोकेनेच, जो बदळा टे पृथ्वी लिंजेन बोचोएन डा, एठा डी इफिल के पेनो पातल गा कुंजी जीके मेना।

² डीचनी यानेकी पातल खुल्लाके, मेटे देटे तालाटे धुंजा ओटजे, जो खाट भेट्टी गा धुंजा-खिजा डा। एठा पातल गा इनी धुंजाटे सूर्य एठा बदळा निस्तेज एठा वायुमंडल केडेन मेना।

³ डी धुंजा तालाटे तोतोरकु ओटजे डो पृथ्वी लिंजेन फैलातिंजे, एठा दिकुके किडींजकु गा खिजा कुरकू के तटाम्बा शक्ती जीके मेना डा।

^4-5 जैसा जेका के किडींज गा टाम्बा घाऊ टे कासुवा होय, डेनोगोका इनी तोतोरकु के कुरकू जाटो के घोगेज गा हुकूम बाने डा, दिकुके सिर्फ मोनाई महिना टाएन दिकुके ताक्लिप जिऊ गा हुकूम जीके डा, दिकुगा ठीकरी लिंजेन परमेश्वर गा मुहर गा निशान बाने डा। पेनो दिकुके न मेटे पृथ्वी गा झराके, न तुनिका रोपो के एठा नका तुनिका सिंजके नुकसान जिऊ डा।

⁶ डी दिनेन कुरकू गुजू गा तरीका घगाटावा, पेनो दिकु गुजू बान साकता। दिकु गुजू गा इच्छा डाएवा, पेनो दिकुके गुजू गा तुनिका बान घाटाऊ।

⁷ इनी तोतोरकु घुळगी गा खिजा डूगु डा, जो लडाई गेन सेने गा घल्जी तैयारके होय। दिकुनी इकुगा कापरनौर लिंजेन चोच्का उरिके मेना डा, जो सोना गा मुकूट खिजा घाई डा। एठा दिकुगा म्वार कुरकू गा म्वार गा खिजा डा।

⁸ दिकुगा हुफ जापाएकु गा हुफनौर खिजा एठा दिकुगा तिळींज कुलाकु गा तिळींज गा खिजा मजबूत डा।

⁹ येनोगो घाई लक्के डा कि दिकुनी लोखोंडो टे आरुके मिनी झिलम उरिके डा। जब दिकु आफिर लक्के डा, मेटे दिकु येनोगो आवाज दडा डा, जैसा चोटोका घुळगीकु लडाई लिंजेन सेने मिंकू रथनौर गा आवाज खिजा डा।

¹⁰ दिकुगा चुट ताटाम्बा किडींजकु गा खिजा डा। दिकुगा चुटनौर गा टाम्बा गेन कोरोकु के मोनाई महिना टाएन तक्लिप जिऊ गा शक्ती डा।

¹¹ इनिघल्जी पातल गा दूत दिकुगा घल्जी राजा गा रुपो गेन डा। इब्रानी भाषा गेन डीचके बादोन यानेकी यूनानी भाषा गेन अपोलियान मेंबा होय, डेगा मतलब होय डीच जो नशोकुवा होय।

¹² पेला सिनी नका ओले होय। येनेगा बादोन बरी सिनीनौर एठा हेजे मिनी होय।

तुरुई पिंगी

¹³ जब तुरुई स्वर्गदूतकु नी पिंगी साडीके। मेटे इंज्नी परमेश्वर गा सम्मान धुपो जुजूल गा सोना गा वेदी गा उफुन भी कोनेटे म्या आवाज आजुम्के।

¹⁴ मेटे इंज्नी डीचके पिंगीमिंकू तुरुई स्वर्गदूतकु टे इनी मंडीटे आजुम्के, “खाट गडा फारत गा मेरान टोलके मिंकू उफुन दूतकु के खुल्लाकेकु।”

¹⁵ इनिघल्जी डी उफुन दूतकु गा बंधन खुल्लाके मेना, जो डीका टेमो, दिन, महिना एठा साल गा घल्जी तैयार डा, दिकुके दुनिया गा म्या आफाई हिसा कुरकू के घोगेज डा।

¹⁶ घुळगीमिंकू सैनिककु गा संख्या इसा करोड डा। इंज्नी दिकुगा संख्या गा एलान आजुम्के।

¹⁷ जो घुळगीकु एठा दिकुगा मठान कुरकू के चुटके कुरकू के इंज्नी डोकेकु डा, दिकुनी सिंगेल गा रोंगो राटा, घाट निला एठा फुल्गी गा रोंगो पिवळी झिलम उरिके मेना डा। घुळगीकु गा कापर कुलाकु गा कापर खिजा डा एठा दिकुगा चाभु टे सिंगेल, धुंजा एठा फुल्गी ओट लक्के डा।

¹⁸ इनी आफाई सिनीनौर द्वारा, मतलब जो कि घुळगीकु गा चभुटे ओटमिनी सिंगेल, धुंजा एठा गंधक डा, सेबाई कोरोकु तालाटे म्या आफाई के घोच्केकु।

¹⁹ चोयाकी इनी घुळगीकु गा शक्ती दिकुगा नबी एठा दिकुगा चुटनौर गेन पक्का डा। चोयाकी दिकुगा चुट सिरदार बिंजकु गा रोंगो डा, दिकुगा प्रयोग डी कोरोकु के तक्लिप जिऊ गा घल्जी दडा डा।

^20-21 पेनो बाकी गा कुरकू जो डी सिनीनौर टे बान गोचडुका डा, दिकुनी आए भी इकुगा बुरा कामयनौर टे मन बदलाडुका बाने, दिकुनी घोगेज घल्जी, जादू-टोना, आनोवापण या चुरी दडा टे मन बदलाडुका बाने, दिकुनी भूतोकु एठा इकुगा टी टे आरुके मिनी चीजो गा पूजा दडा भी बान आराडुका, जैसा कि सोना या चाँदी या पित्रा या लकडी टे आरुके मिनी मूर्तिनौर, दिकु मूर्तिनौर, न मेटे दोडोवा होय, न आजोम्बा होय, एठा न ही सेंदरावा होय।