ದರ್ಶಾನ್ 8 - गवली उनाई नियम

याईय्या चिक्खा- पिंगीनौर एठा सोना गा धुपोदन

¹ जब सिळी कोंटे याईय्या चिक्खा कोलाके, मेटे स्वर्ग गेन जोभी डा अदा घंटा गा घल्जी शांतेन।

² येनेगा बादोन इंज्नी डोके कि डी याई स्वर्गदूतकु के, जो परमेश्वर गा सम्मान टेंगेन थंदळवा होय, याई पिंगीनौर जीके मेना।

³ सोना गा धुपोदान साटेका म्या अलग्गो स्वर्गदूत हेंडो वेदी गा मेरान टेंगेंजे। डीचके खाट जादा गेन धुपो जीके मेना डीच डीके सेबाई चोखरा कुरकू गा प्रार्थनानौर गा सेंग्गोन डी सोना गा वेदी लिंजेन जुल्की, जो सिंघासन गा सम्मान होय।

⁴ जब स्वर्गदूत गा द्वारा जुल्के मिनी धुपो टे ओटमिनी धुंजा चोखरा कुरकू गा प्रार्थनानौर गा सेंग्गोन मठान परमेश्वर गा सम्मान बिटजे,

⁵ मेटे स्वर्गदूत नी धुपोदान साटे वेदी गा मठाटे जुलू मिनी अंगरा टे भेट्टिके एठा पृथ्वी लिंजेन टेप्पाके। देटे बदळानौर गा डाकार, गुळू-गुळू यानेकी बिजलीनौर ओटके मेना एठा भूकम्पा डाएन।

⁶ एठा दिकु याई स्वर्गदूतकु, दिकुगा मेरान याई पिंगीनौर डा, आपना-आपना पिंगी ससाडी के तैयार जे।

पेला पिंगी

⁷ पेला स्वर्गदूत नी पिंगी साडीके। तुरुटो पचना टे घाटाके मिनी घोनेच जादा बारप मिनी डा घामा एठा सिंगेल पृथ्वी लिंजेन बोचोएन। इनी वोजीटे म्या आफाईय्या पृथ्वी गा हिसा जुलजे एठा म्या आफाईय्या सिंज जुलजे एठा सेबाई निला झरा जुलजे।

दूसरा पिंगी

⁸ दूसरा स्वर्गदूत नी पिंगी साडीके। मेटे म्या खाट जुलू मिनी टुक्की गा खिजा डूगु डा डीच समुद्र गेन बोचोएन। इनी वोजीटे म्या आफाईय्या समुद्र पचना आरोएन।

⁹ समुद्र गेन थंदळ मिठाच म्या आफाईय्या जीटा जानवरकु गोएन एठा म्या आफाईय्या खाट डोंगानौर के भी नशोके।

आफाई पिंगी

¹⁰ आफाई स्वर्गदूतकु नी पिंगी साडीके। येने लिंजेन मशाल गा खिजा जुलू मिनी म्या खाट इफिल स्वर्ग टे बोचोके। येनेगा वोजीटे म्या आफाईय्या गडानौर लिंजेन एठा डा पाजेर लिंजेन बोचोएन।

¹¹ डी इफिल गा जीमू “नागदौना” होय। येनेगा आसर रुपोन डी सेबाई डा तोटेन इफिल बोचोएन, काटेन मेना, एठा घोनेचका कुरकू डा नुनू गा वाजाटे गोएन, चोयाकी डी डा काटेन मेना डा।

उफुन पिंगी

¹² उफुनजा स्वर्गदूतकु नी पिंगी साडीके। येने लिंजेन म्या आफाईय्या सूर्य, म्या आफाईय्या चंद्र एठा म्या आफाईय्या इफिलकु लिंजेन चोच्का धुक्काएन, देटे दिकुगा म्या आफाईय्या भागो अंधराएन मेना। इनी वाजाटे दिन गा म्या आफाईय्या टेमो टाएन सूर्य उजाला डुका बाने, एठा चंद्र एठा इफिलकु भी रातो गा म्या आफाईय्या टेमो टाएन बान चमकातिंजडुका।

¹³ जब इंज इनी सेबाई दोडो लक्के डा, मेटे बदळा गा ताला गेन आफिर मिठाच म्या शिकिरया के खट्टेका इनी मंडीटे आजुम्के, “धिक्कार! धिक्कार! धिक्कार! डी बुरा कुरकू लिंजेन सिनीनौर हेजेवा, जो पृथ्वी लिंजेन थंदळवा होय। चोयाकी जब आखरी आफाई स्वर्गदूतकु इकुगा पिंगीनौर होलेमेबा, मेटे आफाई सिनीनौर बाकी थंदळवा जो दिकुके गोच्केकुवा।”