ದರ್ಶಾನ್ 7 - गवली उनाई नियम

म्या अंतराल

^1-2 येनेगा बादोन इंज्नी उफुन स्वर्गदूतकु के डोकेकु, एठा दिकु तालाटे हारेक स्वर्गदूत पृथ्वी गा उफुन भी कोनानौर लिंजेन टेंगेनके डा। स्वर्गदूतकु नी उफुन भी कोनेन कोयोनौर के रोराकातिंज लक्के डा, ताकी पृथ्वी, समुद्र एठा सिंज लिंजेन तुनिका कोयो बाकी सेंदरा। डी स्वर्गदूतकु के पृथ्वी एठा समुद्र गा मुसीबत दडा गा भी हाक जीके मेना डा। डाबोलटे इंज्नी म्या एठा स्वर्गदूत के पूर्व टे हेजे लठ्ठाका डोकेनेच, एठा डीच जीटा परमेश्वर गा चिक्खा के कुरकू लिंजेन येंडा गा घल्जी तैयारके डा। डीचनी डी उफुन स्वर्गदूतकु के खाट्टेका हाकोटे मंडीके,

³ “जब टाएन आले आलेगा परमेश्वर गा सेवककु गा ठीकरी लिंजेन चिक्खा बाकी येंडा, मेटे टाएन आपे न मेटे पृथ्वी के, न समुद्र के एठा न सिंजनौर के नुकसान जेबा।”

इस्राएल गा म्या लाखो चौरेचळीस हजार कुरकू

⁴ जब स्वर्गदूतकु नी निशान येंडा पूरा डाके, मेटे जेकानी इंज्के घाल्ले कि डी कुरकू दिकुगा ठीकरी लिंजेन स्वर्गदूतकु नी परमेश्वर गा चिक्खा टे निशान येंडाके होय, दिकुगा संख्या म्या लखो चौरेचळीस हजार डा। इनी कुरकू इस्राएल देशो गा सेबाई बारह पीढी तालाटे डा।

⁵ स्वर्गदूतकु नी यहूदा पीढी टे बारह हजार कुरकू लिंजेन चिक्खा येंडाके, यहूदा गा पीढी तालाटे बारह हजार कुरकू लिंजेन, रूबेन गा पीढी तालाटे बारह हजार कुरकू लिंजेन, गाद गा पीढी तालाटे बारह हजार कुरकू लिंजेन,

⁶ आशेर गा पीढी तालाटे बारह हजार कुरकू लिंजेन, नप्ताली गा पीढी तालाटे बारह हजार कुरकू लिंजेन, मनश्शे गा पीढी गा तालाटे बारह हजार लिंजेन,

⁷ शमौन गा पीढी गा तालाटे बारह हजार लिंजेन, लेवी गा पीढी गा तालाटे बारह हजार लिंजेन, इस्साकार गा पीढी गा तालाटे बारह हजार लिंजेन,

⁸ जबूलून गा पीढी गा तालाटे बारह हजार लिंजेन, यूसुफ गा पीढी गा तालाटे बारह हजार लिंजेन, एठा बिन्यामीन गा पीढी गा तालाटे बारह हजार लिंजेन मुहर येंडाके।

सिनी टे म्या खाट घोंजा

⁹ येनोगो बादोन इंज्नी डोके कि कुरकू गा म्या येटो खाट घोंजा डा कि जेकाभी दिकु सेबाईकु के उमनाऊ बान सकता डा, दिकु दुनिया गा सेबाई जाटो, पीढी, राष्ट्र एठा भाषा टे डा, दिकु सिंघासन एठा मेंडा कोंटे गा सम्मान टेंगेनके डा, दिकुनी पुलूम कपळे उरीटे मेना डा एठा हर म्या कोरोनी इकु-इकु टी गेन खाजुर गा डंगोल उठाके मेना डा जो कि म्या तिवार गा वाजा डा।

¹⁰ एठा खाट्टेका हाको-हाकोटे मंडी लक्के डा, “आलेगा परमेश्वर गा स्तुति जो सिंघासन लिंजेन सुबांके होय, एठा मेंडा कोंटे गा स्तुति डाए! आमका उध्दार जिऊमिठाच होय।”

¹¹ मेटे सेबाई स्वर्गदूतकु सिंघासन गा उफुन कोनेन जुना सनाकु गा एठा उफुन जीटा जानवरकु गा उफुन भी कोनेन टेंगेनके डा। दिकु सेबाई-सेबाईकु सिंघासन गा सम्मान झुकातिंजे एठा इनी मंडी लठ्ठाका परमेश्वर गा आराधना डाके एठा दिकुनी मंडीके,

¹² “आमीन! आलेगा परमेश्वर के हमेशा-हमेशा टाएन स्तुति, महिमा, ज्ञान, धन्यवाद, आदर, एठा शक्ती! आमीन!”

¹³ येने लिंजेन जुना सनाकु तालाटे म्याखोम नी इंजाटे कोम्बाराके, “इनी पुलूम कपळे उरिके जे होय एठा तोनेटे हेन होय?”

¹⁴ इंज्नी दिकुके जवाब जीके, “महोदय, इंज बान हाडाई पेनो आम हाडाई होय”, एठा डीचनी इंजाटे मंडीके, “इंकू डी कुरकू होय, जो खाट सिनी गा टेमो गोएन मेना। इंकू डी कुरकू होय दिकुनी इकुगा कपळे मेंडा कोंटे गा पचना टे आबुंजटे पुलूमके मेना होय।

¹⁵ इनिका वोजीटे दिकु परमेश्वर गा सिंघासन गा सम्मान टेंगेन थंदळ डा एठा रातो-दिन दियागा मंदिर गेन दियागा सेवा दडावा होय। जो सिंघासन लिंजेन सुबंके होय, डीच इंकुगा देखभाल डाएवा।

¹⁶ इंकून डाबोलटे चोलाका न मेटे रांगेच हेजेवा एठा न डा तटाम्बा, इंकून न मेटे कळक्को घामो टे तक्लिप डाऊवा एठा न तुनिका रोंगो गा चाटा टे दिकुके जुल्कुवा।

¹⁷ चोयाकी ताला गा सिंघासन गा लिंजेन सुबांके मेंडा कोंटे इंकुगा ताठ्या आरुवा एठा डीच दिकुके ताजा डा नुनू गा घल्जी साकुवा जो कुरकू के जीवन जेबा होय। एठा परमेश्वर दिकुगा मेट टे सेबाई डा ओजोएवा।”