ದರ್ಶಾನ್ 6 - गवली उनाई नियम

पेला मुहर-पुलूम घुडगी लिंजेन चुटके

¹ इंज्नी डोके कि मेंडा कोंटे नी डी याई चिक्खानौर गेन टे पेला चिक्खा खुल्लाके। डी टेमो इंज्नी उफुन जीटा जानवरकु टे म्याखोम के डा साडी खिजा खाट आवाज गेन इनी मंडीटे आजुम्के, “हेजे!”

² एठा इंजा मेट गा सम्मान म्या पुलूम घुळगी डोके मेना। जो दिया लिंजेन चुटके डा, दियागा टीन धनुष्य डा। डीचके म्या मुकूट उरिके मेना डा एठा डीच स्वर्ग टे पृथ्वी गा कोनेन म्या जिटाके गा खिजा जीटाऊ हासिल दडा ओटजे मेना।

दूसरा मुहर - लाड़ाई

³ जब मेमना नी दूसरा मोहर खुल्लाके, मेटे इंज्नी दूसरा जीटा जानवर के इनी मंडीटे आजुम्के, “हेजे!”

⁴ मेटे इंज्नी म्या घुळगी ओटटे डोकेनेच। डीच राटा रेंगो गा डा, एठा जो दिया लिंजेन चुटके डा, डीचके पृथ्वी लिंजेन टे शान्ति उथुर गा हाक जीके मेना, देटे कोरो इनीच-डीचके घोजेच, डीचके खाट तलवार जीके।

आफाई मुहर-कळकी

⁵ जब मेमना नी आफाई खुल्लाके, मेटे इंज्नी आफाई जीटा जानवर के इनी मंडीटे आजुम्के, “हेजे!” एठा मेटे इंज्नी म्या केंडे घुळगी डोके, एठा जो दिया लिंजेन चुटके डा, दियागा टीन किलो ग्रम डा।

⁶ एठा उफुन जीटा जानवरकु गा तालान इंजेन मेनकी म्या आवाज इनी मंडी लठ्ठाका आजुम्के, “हेजे मिनी टेमोन पृथ्वी लिंजेन काळकी गा दिन डाऊवा इनिघल्जी दिनभोर गा मुंजारी गा किमतो गेन मात्र म्या किलो गुं या मात्र आफाई किलो उंभी! पेनो जैतून गा सुनूम एठा अंगूर रेस्सो गा नुकसान बाकी दडा।”

उफुन चिक्खा-गुजू

⁷ एठा जब मेमना नी उफुन मुहर खुल्लाके, मेटे इंज्नी उफुन जीटा जानवर के इनी मंडीटे आजुम्के, “हेजे!”

⁸ मेटे इंज्नी पिवळी घुळगीके डोकेनेच। जो दिया लिंजेन चुटके डा, दियागा जीमू डा गुजू एठा पातल दियागा टाऊ-टाऊटे हेज लक्के डा। डीचके पृथ्वी गा म्या उफुन भागो के तलवार, काळकी, खाट रोगो यानेकी डोंगोर जानवरकु द्वारा नशो दडा गा हाक जीके मेना।

मोनाईया मुहर-शाहिदजे

⁹ जब मेंडा कोंटे नी मोनाईया मुहर खुल्लाके, मेटे इंज्नी वेदी गा इटान डी कुरकू गा आत्मानौर के डोके, दिकुके घोचकेकु मेना डा। दिकुन नी परमेश्वर गा बारेन वचन गा एलान डाके डा एठा विश्वास लायको गवाह होय।

¹⁰ एठा दिकुनी खाट आवाज टे हकोटे मंडीके, “हे सर्व शक्तिमान, चोखरा एठा सच्चो प्रभु! चोटो टाएन आम पृथ्वी लिंजेन कुरकू गा न्याय बान दडा एठा आलेके घोगेज मिंकूके नंगा साब डाए बाने?”

¹¹ दिकु तालाटे हर म्याखोम के पुलूम कपळे जीके एठा परमेश्वर नी डीचनी मंडीके, थोडा टेमो एठा आराम्बो डोए, जब टाएन दिकुगा सोपती-भाग्य के या डाई-बोकजाईकु गा संख्या पूरा बान डाऊ, जो आपेगा का रोंगो घोगेच मिठाच डा, मेटे का इंज बदला सेगेवा।

तुरुई चिक्खा-आतंक

¹² इंज दोडो लक्के, मेंडा कोंटे नी तुरुई मुहर खुल्लाके एठा म्या घोनेचका खाट भूकंप डाएन। सूर्य केंडे इकिर खुदरत चद्दार गा खिजा केंडेन, एठा पूरा चंद्र पचना गा रेंग्गो गा खिजा राटाएन।

¹³ बदळा गा इफिल्कू पृथ्वी लिंजेन बोचोएन, जैसा धुंदळ हेजे लिंजेन सिंज टे काचा जौ ओटे लिंजेन बोचोएन होय।

¹⁴ बदळा चिराएन एठा म्या कतळे गा पत्र रोंगो कुराटे झिक्काएन मेना डा। सेबाई टुक्की एठा द्वीप आपना-आपना जागाटे म्याधेळेनके।

¹⁵ डाबोलटे येनेगा आसार इनी डाएन कि पृथ्वी गा राजा, प्रधान, सेनापति, लाकपति एठा शक्तीशाली कुरकू, भाग्य एठा आजादी कोरो सेबाईकु गा सेबाईकु टुक्कीनौर गा गुफानौर एठा पठानौर गेन उखोएन।

¹⁶ एठा दिकु टुक्की एठा पठानौर टे मंडी लज्जे, “आले लिंजेन बोचोगे एठा सिंघासन लिंजेन सुबान गा नजर टे एठा मेंडा कोंटे गा दण्डो टे आलेके उखुकोम।”

¹⁷ चोयाकी डी भयानक दिन हेन मेना होय, एठा जेकाभी इनी दण्डो टे बचातिंजू बाने।