ದರ್ಶಾನ್ 5 - गवली उनाई नियम

चिक्खा येंडाएन पुस्तक एठा मेमना

¹ जो सिंघासन लिंजेन सुबानके डा, इंज्नी दियागा डाखुरी टीन म्या पुस्तक डोके डा, डे लिंजेन बरी भी कोनेन ओल्के डा, एठा डीच याई चिक्खा येंडाटे बंदोके मेना डा।

² डाबोलटे इंज्नी म्या स्वर्गदूत के डोकेनेच जो खाट आवाज टे इनी हाको लक्के डा, “जे इनी पुस्तक गा चिक्खा के तुटाक्का एठा इनिके कुखल्ला लायको होय?”

³ पेनो स्वर्ग गेन, पृथ्वी लिंजेन या पृथ्वी गा इटान जेका एंगो कोरो बान घाटाडुका, जो पुस्तक कुख्खला या पपाळतिंजेन लायको होय।

⁴ मेटे इंज घोनेच जोर-जोर टे जामके, चोयाकी डी पुस्तक गा कुख्खला या पपाळतिंज गा लायको जेका बान घाटाडुका डा।

⁵ एने लिजेन डी जुना सनाकु टे म्याखोम नी इंजाटे मंडीके, “बाकी जाम डोगे, यहूदा गा पीढी गा जो कुला होय, डीच राजा दाऊद गा महान कुल होय, डीचनी शैतान लिंजेन जीटाऊ घाटाएन होय, इनिघल्जी डीच डी पुस्तक गा याई भी चिक्खा के तुटाक्का एठा डीके कुखल्ला गा लायको होय।”

⁶ मेटे इंज्नी उफुन जीटा जानवरकु एठा चौबीस जुना सनाकु गा तालान सिंघासन गा बाजुन म्या मेंडा कोंटे के टेंगेनका डोकेनेच। दियागा याई सिंगी एठा याई मेट डा, इनी परमेश्वर गा याई आत्मानौर होय, जो सेबाई पृथ्वी लिंजेन कुल्के मिनी होय।

⁷ मेटे मेमना नी मेरान हेके सिंघासन लिंजेन सुबान मिठाच गा डाखुरी टी टे पुस्तक के साय्ये।

⁸ जब मेमना पुस्तक साय्ये, मेटे दिकु उफुन भी जीटा जानवर एठा चौबीस जुना सनाकु डी मेंडा कोंटे गा सम्मान बोचोएन, एठा हरेक गा टीन वाणी एठा धुप टे भेट्टिके सोना गा कठोर डा, जो कि चोखरा कुरकू गा प्रार्थना के दर्शातिंजेवा होय।

⁹ दिकु इनी मंडी लठ्ठाका म्या उनाई सिरिंज गना लज्जे, “आम इनी पुस्तक गा चिक्खा के तुटाक्का एठा इनिके कुखल्ला गा लायको होय, चोयाकी आमके गोचकेमी मेना डा। एठा आमनी अमा पचना आडीटे परमेश्वर गा घल्जी हरेक कुल, भाषा, देशो एठा सेबाई जाटो टे कोरोकु के मोलाटे सावे।

¹⁰ आमनी दिकुके आलेगा परमेश्वर गा सेवा गा घल्जी म्या राज्य एठा याजक आरुके होय, एठा दिकु पृथ्वी लिंजेन राजो डाएवा।”

मेमना गा बढाई

¹¹ जब इंज्नी डोके, मेटे डी सिंघासन एठा डी जीटा जानवर एठा डी जुना सनाकु गा उफुन भी कोनेन घोनेच टे स्वर्गदूतकु गा आवाज आजुम्के, दिकुगा उमनाऊ लाखो एठा करोड़ गा डा।

¹² एठा दिकु खाट आवाज गेन सिरिंज लक्के डा, “डी मेंडा कोंटे डीचके घोच्केनेच मेना डा, डीच महिमा गा लायको होय, दियागा हाक महान होय, दियागा ज्ञान खोल होय, डीच भेबाव शक्तीशाली होय एठा डीच भेबाव लकपति होय, हेजे आबु दियागा आदर डाए, हेजे आबु दियागा स्तुति डाए।”

¹³ डाबोलटे इंज्नी स्वर्ग गेन, पृथ्वी लिंजेन, पृथ्वी गा इटान, एठा समुद्र गा सेबाई जानवारकु के इनी मंडीटे आजुम्के, हेजे आबु दियागा स्तुति डाए जो सिंघासन लिंजेन सुबांके होय, हेजे आबु मेंडा कोंटे गा स्तुति डाए, हेजे आबु हमेशा गा घल्जी दियागा आदर एठा महिमा डाए, चोयाकी डीच सेबाई टे जादा शक्तीशाली होय, दियागा राज्य हमेशा-हमेशा थंदळजू।

¹⁴ एठा उफुन भी जीटा जानवरकु नी आमीन मंडीके, एठा जुना सनाकु नी होबटे नंगा सब्बा।