ದರ್ಶಾನ್ 4 - गवली उनाई नियम

परमेश्वर गा सिंघासन

¹ इंज्नी इनी सेबाई बातो के दोडो गा बादोन, स्वर्ग गेन म्या खुल्लाके मिनी दरोजो डोके। डाबोलटे इंज्नी डीका आवाज डाबोलटे आजुम्के जो कि म्या पिंगी गा आवाज जैसा डा। डीचनी इंजाटे मंडीके, “इंजा मेरान येटेन मठान हेजे, एठा इंज दिकु बातो आमके घालेवा, दिकुगा इनी बातोनौर गा बदोन डाऊ जरुरी होय।”

² तुरुटो इंज आत्मा गा अगुवाई गेन हेन, एठा इंज्नी स्वर्ग गेन म्या सिंघासन एठा सिंघासन लिंजेन जेका के सुबानटे ड़ोकेनेच।

³ जो सिंघासन लिंजेन सुबानके डा, डीच किमती घोटा यशब एठा माणिक्य गा खिजा डोके डा। डी सिंघासन गा उफुन भी कोनेन म्या इन्द्रधनुष डा, जो निला किमती घोटा जैसा डूगु डा।

⁴ डी सिंघासन गा उफुन भी कोनेन चौबीस अलग्गो सिंघासन डा, एठा इनी सिंघासननौर लिंजेन चौबीस जुना सनाकु पुलूम कपळे उरीटे सुबानके डा, एठा दिकुगा कपारनौर लिंजेन सोना गा मुकूट डा।

स्वर्ग गेन आराधना

⁵ डी सिंघासन टे चिरेन गा चमकातिंजू, पळाळ-पळाळ यानेकी बदळानौर गा डाकार गा आवाज ओट लक्के डा। सिंघासन गा सम्मान याई दिवा जुलू लक्के डा, दिकु परमेश्वर गा याई आत्मानौर होय।

⁶ एठा डी सिंघासन गा सम्मान म्या फर्श डा जो समुन्द्र गा खिजा चौड़ा डा, एठा डी कांचो गा खिजा सापा डा। डी खाट सिंघासन दिकु सेबाईकु गा तालान डा, एठा दियागा उफुन भी कोनेन इंज्नी उफुन जीटा जानवरकु के डोकेकु, दिकुगा कोम्बोर पूरा खिजाटे मेटनौर टे उगुरके डा।

⁷ इनी जीटा जानवरकु तालाटे पेला जानवर कुला गा रोंगो डा, एठा दूसरा जानवर कलोर गा रोंगो डा, आफाई जानवर गा चेहरा कोरो गा रोंगो डा, एठा उफुनजा जानवर आफिर मिठाच उकाब गा रोंगो डा।

⁸ एठा उफुन भी जीटा जानवरकु गा तुरिय्या-तुरिय्या काफा डा, एठा दिकु लिंजेन सेबाई जागान मेट डा, येटे टाएन कि दिकुगा काफा गा इटान भी एठा दिकु रात-दिन बिना आराम्बो घल्जी इनी मंडीवा होय, “पवित्र, पवित्र, चोखरा प्रभु परमेश्वर सर्वशक्तीमान, जो हमेशा टे डा, एठा जो आए भी होय एठा जो हेजेमिठाच होय।”

^9-10 जो सिंघासन लिंजेन सुबानके होय, डीचका होय जो हमेशा-हमेशा टाएन जीटाका थंदळवा होय। जब भी जीटा जानवर डीचके महिमा एठा आदर एठा धन्यवाद जिऊवा होय, मेटे चौबीस जुना सनाकु दियागा सम्मान बोचोवा होय एठा दियागा आराधना दडावा होय जो हमेशा-हमेशा टाएन जीटाका होय। डीच इनी मंडी लठ्ठाका सिंघासन गा सम्मान इकु-इकुगा मुकूट डोएबा होय एठा मंडीवा होय।

¹¹ “हे आलेगा प्रभु, एठा परमेश्वर, आमका महिमा, एठा आदर, एठा शक्तीगा लायको होय, चोयाकी आमका नी सेबाई चीजोनौर के आरुके एठा अमाका इच्छाटे डीच अस्तित्व गेन होय एठा दिकुगा सृष्टि डाएन होय।”