ದರ್ಶಾನ್ 3 - गवली उनाई नियम

सरदिस शहर गा - गोएन मसीह गा मंडली

¹ डीचनी इंजाटे इनी भी मंडीके सरदिस शहर गा मसीह गा मंडली गा स्वर्गदूत के इनी ओले, “इंज डीचका मेना, जो परमेश्वर गा याई आत्मानौर एठा याई इफिलकु साटे थंदळवा मेना। इंज इनी मंडीवा मेना कि इंज आमगा कामयनौर के हाडाई मेना, आम आत्मिक तौर लिंजेन जीटाकानी डूगुवाका होय, पेनो आए टेमोन आम नका इंजा अनुसरण बान दडा।

² इनिघल्जी, झाटटोए एठा इंजा लिंजेन जो थोळासा भारोसा आपेगा तालान बाकी होय, डी भारोसा के मजबूदे, ताकी डी पूरा खिजाटे स्यायु बाकी होना। इंज हाडाई मेना कि अमा कमी घोनेचका खाट होय, चोयाकी जो आम दडा लक्के होय परमेश्वर देटे खुशी बाऊ होय।”

³ आपे डी शिक्षानौर के यादो डोए जो आमनी आजुम्के एठा मनेन जे डा, जो आमके इथूकेमी मेना होय डेगा अनुसरण डाए, एठा आपना बुरा कामयनौर टे मन बादलाए, अगर आम हमेशा बुराई के डाएका चालेवा, मेटे इंज चोर गा रोंगो अचानक हेजेवा, एठा आमेन मालूमु भी बाने कि इंज चोला आमके दण्डो जिऊ गा घल्जी हेजेवा।

⁴ पेनो सरदिस शहर गेन आपेगा तालान अदा का कुरकू होय, जो पापो टे बिसोटो बाने होय, दिकु सापा पुलूम कपळे उरीटे इंजा सेंग्गोन गा थंदळवा, चोयाकी दिकु लायको होय।

⁵ जो बुराई लिंजेन जीटाऊवा, दियेन इनिका रोंगो पुलूम कपाळे उरेवा, एठा इंज दियागा जीमू जीवन गा पुस्तक गा टे तुनिका रितो टे बान उथुर, डेन परमेश्वर नी हमेशा गा जीवन घाटाऊ मिठाच गा ओलटे डोके मेना होय। पेनो दियागा जीमू आपना बाटे एठा दियागा स्वर्गदूतकु गा सम्मान मनातिंजेवा।

⁶ हर जेका जो इंजा खाबोर के समझो चाहतावा होय, डीचके डी बातो के ध्यान टे होना, जो पवित्र आत्मा मसीह गा मंडलीनौर टे मंडीवा।

फिलादिलया शहर गा-विश्वास लायको मसीह गा मंडली

⁷ “डीचनी इंजाटे इनी भी मंडीके, फिलादिलफिया शहर गा मसीह गा मंडली गा स्वर्गदूत के इनी ओले,” इंज डीचका मेना जो चोखरा एठा सच्चो होय, एठा दियागा मेरान दाऊद गा कुंजी होय। जब इंज कुंजी के सेगेवा मेना एठा म्या दरवाजा खुल्लाएबा मेंबा, मेटे जेकाभी डीके बांदोए बान सकतावा, डेनोगोका जब इंज डीके बंदोएच्बा मेना, मेटे जेकाभी डीके खुल्लाए बान सकता।

⁸ इंज अमा कामयनौर के हाडाई मेना, आजुमे अमा शक्ती येटोका होय। पेनो जो इंज्नी आमटे मंडीके डीचके आमनी पालन डाके होय। आमनी इंजा लिंजेन विश्वास दोडो चालुका होय। इनिघल्जी इंज्नी आमगा घल्जी म्या दरवाजा खुल्लाके होय, डीके जेका बांदोए बान सकता।

⁹ आजुमे, इंज शैतान गा डी आराधनालय गा मुख्या के अमा काबुनेच्बा, जो हेज खुदके यहूदी कुरकू मंडीवा होय, पेनो जो यहूदा गा बाऊ होय, लेकिन लाबाळ मंडीवा होय। इंज दिकुके टोलकुवा, कि दिकु हेजेवा डो अमा नंगा गेन सब्बा, एठा इनी चिनाएवा, कि इंज्नी अमाटे प्यार डोके होय।

¹⁰ आमनी इंजा खाबोर गा पालन डाके ताकी जब आम कासु टूलेवा मेटे दियेन आराम्बोटे सेहेंजा होना। इनिघल्जी, इंज डी भारी सिनी गा टेमो टे अमा रक्षा डाएवा, जो पृथ्वी गा सेबाई थंदळ मिंकू लिंजेन दिकुके चिचना गा घल्जी हेजेमिठाच होय।

¹¹ इंज जल्दीका हेजेमिठाच मेना, आपना खुदके विश्वास गेन मजबूत आरुका डोए, ताकी जेकाभी आमगा फल रुटीया बाकी, जो मुकूट गा खिजा होय।

¹² जो बुराई जीटाऊवा, दिकु परमेश्वर गा मंदिर गेन खम्बा गा खिजा होंगा, दियागा इंज सेवा दडावा मेना, एठा डीच डाबोलटे चोलाकाभी बल्लान बान ओट एठा इंज इंजागा परमेश्वर गा जीमू, एठा आपना परमेश्वर गा पूरा मतलब उनाई यरूशलेम शहर गा जीमू, जो इंजा परमेश्वर गा मेराटे स्वर्ग लिंजेन टे आगुरू मिठाच होय एठा हेजा उनाई जीमू डे लिंजेन ओलेवा।

¹³ हर जेका जो इंजा खाबोर के समझातिंज चाहतावा होय, डीचके डी बातो के ध्यान टे होना जो पवित्र आत्मा मसीह गा मंडलीकु टे मंडीवा होय।

लौदीकिया शहर गा - गुनगुनी मसीह गा मंडली

¹⁴ डीचनी इंजाटे इनी भी मंडीके, लौदीकिया पुरा गा मसीह गा मंडली गा स्वर्गदूत के इनी ओले, इंज आमीन मंडीवा मेना, चोयाकी इंज विश्वास लायको मेना एठा इंज परमेश्वर गा बारेन सच्चो गवाह मेना, एठा जो चोच्काभी डीचनी आरुके होय, इंज दिकु सेबाई गा कास वाजा मेना। एठा इंज आमटे इनी मंडीवा मेना।

¹⁵ इंज आमगा डाके मिनी कामयनौर के हाडाई मेना, इंज हाडाई मेना, कि आपे न मेटे इंजा लिंजेन भरोसा दडावा होय एठा न ही इंज्के प्यार दडावा होय। आपे डी डा गा खिजा होय जो न मेटे ठंडा होय एठा न ही चाटा होय। अच्छा होंगा कि या मेटे आम चाटा होय या ठंडा।

¹⁶ इनिघल्जी कि आम गुणगुणा होना, इंजा प्रति आपना विश्वास गेन सिर्फ अदा-अधुरा होय, एठा इंज आमके आरा गेन मेना।

¹⁷ अमा जो मंडीवा होय, कि इंज लाकपाती मेना, एठा इंजेन तुनिका चीजो गा कमी बाऊ, लेकिन आम इनी बान हाडाई, कि आम गिरबो होय, मनहुश होय, दया पूरा होय एठा आम अंधळा होय, एठा आम नंगा होय।

¹⁸ इनिघल्जी इंज आमके सलाह जेबा मेना, कि आमेन इंजाटे चोखा सोना मोलाटे सा होना, ताकी आम आए टेमोन लाकपाती आरुयु होना। आमेन इंजाटे अमा उरी गा घल्जी पुलूम कपळे भी मोलाटे सा होना, ताकी आमगा कोम्बोर उगुरका थंदळकु एठा आम सेरोमनी बाकी डाऊ। एठा आमेन आमगा मेट गा इलाज दडा गा घल्जी इंजाटे दवा भी मोलाटे सा होना ताकी आम दोडो लज्जू।

¹⁹ इंज जेटे प्यार दडावा मेना, डीचके इंज इथूवा मेना एठा सजा भी जेबा मेना ताकी डीच अच्छा आरुयु होना, इनिघल्जी अच्छा डाए चाले, पापो टे मन बदलाए।

²⁰ आजुमे, इंज दराजो गेन टेंगेनटे दराजो थोटथोडेवा मेना, अगर जेका इंजा आवाज आजुम्बा होय एठा दराजो खुल्लाएबा होय, मेटे इंज दिकुगा उरा गेन हेजेवा एठा दिकुगा सेंग्गोन जोम्बा, एठा दिकु इंजा सेंग्गोन आटा जोम्बा।

²¹ जो बुराई लिंजेन जीटाऊवा, दिकु इंजा सेंग्गोन इंजा सिंघासन लिंजेन सुबानबा, डीका खिजाटे जैसा इंज्नी जीटाऊ हासिलजे एठा आपना बाटे गा सेंग्गोन दियागा सिंघासन लिंजेन सुबानजे।

²² हर जेका जो इंजा खाबोर के समझतिंज चाहतावा होय, डीचके डी बातो के ध्यान टे होना, जो पवित्र आत्मा मसीह गा मंडलीकु टे मंडीवा होय।