ದರ್ಶಾನ್ 20 - गवली उनाई नियम

शैतान के हजार साल गा घल्जी यानेकी कुंड गेन येंडा

¹ येनेगा बादोन इंज्नी म्या स्वर्गदूत के स्वर्ग टे आगुरुटे डोकेनेच। दियागा टी गेन पातल गा कुंजी एठा म्या खाट सकळी डा।

^2-3 डीचनी डी अजीगार, मतलब जुना बिंजके, जो दोष येंडा मिठाच शैतान होय, उठाटे सकळी टे टोलटे पातल गेन टेप्पाकेनेच। येनेगा बादोन दिया लिंजेन चिक्खा येंडाके ताकी डीच हजार साल गा स्यागु टाएन राष्ट्र गा कुरकू के भूल्लाकू बाकी होना। येनेगा बादोन डीच थोडा टेमो गा घल्जी जरुरी का डाबोलटे खुल्लाएबा।

मसीह गा सेंग्गोन हजार साल टाएन राजो दडा

⁴ इंज्नी सिंघासन डोके, एठा डे लिंजेन डी कुरकू के सुबानटे डोकेकु दिकुगा कापर परमेश्वर गा वचन एठा यीशु गा खाबोर के घागल गा वाजाटे गेटजे मेना डा। इनी कुरकू नी डी भायनक जानवर गा एठा दियागा मूर्ति गा आराधना बान दडुका डा, एठा न ही दिकुनी भायनक जानवर गा चिन्हा के हेजा ठीकरी लिंजेन या हेजा टी लिंजेन ओल्के मेना। डीच जीटाटे सिंघासन लिंजेन सुबांके एठा परमेश्वर नी डीचके राज्य दडा गा हाक जीके एठा डीच मसीह गा सेंग्गोन म्या हजार साल टाएन राजो दडा लक्के।

^5-6 इनी कुरकू जीटाऊ मिंकू पेला होय, एठा दिकु कास तौर लिंजेन धन्य एठा पवित्र होय। दूसरा गुजू गा दिकु लिंजेन तुनिका हाक बाऊ। डी कुरकू परमेश्वर एठा मसीह गा याजक आरुवा एठा दिकुगा सेंग्गोन हजार साल गा घल्जी राजो डाएवा। बाकी गोएन मिंकू मेटे टाएन जीटाडुका बाने जब टाएन हजार साल पुराऊ बाने। धन्य एठा चोखरा डीच होय, जो पेला डाबोलटे जीटाऊ गेन बेल्लाके होय। येनेगो कुरकू लिंजेन दूसरा गुजू गा तुनिका हाक बाऊ होय। दिकु परमेश्वर एठा मसीह गा जुना सनाकु डाऊवा एठा दियागा सेंग्गोन म्या हजार साल टाएन राजो डाएवा।

शैतान गा नशो

⁷ म्या हजार साल पुराऊ गा बादोन शैतान जेल टे आरागुवा मेना।

⁸ एठा डीच डी कुरकू गा समूह के धोका जिऊ गा घल्जी बल्लान हेजेवा, जो पूरा दुनिया गेन बिगळातिंज्के होय। इनी कुरकू के गोग एठा मागोग मंडीवा मेना होय। शैतान दिकु सेबाईकु के म्या जागा लिंजेन गोलाएवा देटेन दिकु लडाई डाएवा। दिकु घोनेच सेबाईकु डाऊवा येनोगो कि जेका दिकुके समुद्र गा धुरा गा रिती गा खिजा उमनाए बान साकता।

⁹ दिकु पृथ्वी लिंजेन हर जागान फैलातिंजे। दिकुनी डी शहर के घेराये, देटे परमेश्वर प्यार दडावा होय, देटेन दियागा कुरकू थंदळ डा, लेकिन बदळा टे सिंगेल आगुरुके एठा डीचनी दिकुके नशोकेकु।

¹⁰ दिकुके बहकातिंज मिंकू शैतान के सिंगेल एठा गंधक गा कुंड गेन येंडाकेनेच मेना, भायनक जानवर एठा लाबाळ कुरकू जो हेज खुदके परमेश्वर गा कोनेटे मंडीमिंकू मंडीवा सिंगेल गेन येंडाकेनेच मेना डा। दिकु जमाना-जमाना टाएन दिन-रातो तळपातिंज्कुवा।

पुलूम खाट सिंघासन एठा आखरी न्याय

¹¹ डाबोलटे इंज्नी म्या पुलूम सिंघासन डोके, डे लिंजेन परमेश्वर सुबांके डा। पेनो देटेन परमेश्वर सुबांके डा, देटे जागान पृथ्वी एठा बदळा सेबाई गयाबजे, एठा जेकानी भी दिकुके डाबोलटे बान दोडुका।

¹² इंज्नी सानी-खाट, सेबाई गोएन मिंकू कुरकू के सिंघासन गा सम्मान टेंगेन डोकेकु। पुस्तकनौर खुल्लाके, मेटे म्या दूसरा पुस्तका मतलब जीवन गा पुस्तक खुल्लाके। पुस्तकनौर गेन ओल्के मिनी बातो गा आधार लिंजेन गोएन मिंकू गा दिकुगा कामयनौर गा रोंगो न्याय डाके मेना।

¹³ समुद्र नी हेजा गोएन मिंकूके घाल्केकु। मेटे गुजू यानेकी पातल नी हेजा गोएन मिंकूके घाल्केकु। हर म्याखोम गा दियागा कामयनौर गा रोंगो न्याय डाके मेना।

^14-15 डी सेबाई कुरकू दिकुगा जीमू जीवन गा पुस्तक गेन बान ओलडुका मेना डा, दिकुके सिंगेल गा समुद्र गेन टेप्पाकेकु मेना, येनेगा बादोन नका गुजू बाऊ होय, नका गोएन मिंकू गा तुनिका जगा बाऊ होय, चोयाकी दिकु सेबाई कुरकू दिकुगा जीमू जीवन गा पुस्तक गेन बान ओलडुका मेना डा दिकुके सिंगेल गा समुद्र गेन टेप्पाकेकु मेना इनिके का दूसरा गुजू मंडीवा मेना होय, जो कि सिंगेल गा समुद्र गेन दण्डो होय। येनेगा बादोन गुजू एठा पातल, बाएरा भी के सिंगेल कुंड गेन येंडाकु मेना। इनी सिंगेल कुंड दूसरा गुजू होय। जेगा जीमू जीवन गा पुस्तक गेन ओल्के मिनी बान घाटाडुका, डीच सिंगेल कुंड येंडाकेनेच मेना।