ದರ್ಶಾನ್ 2 - गवली उनाई नियम

इफिसुस शहर - प्यार बान मसीह गा मंडली

¹ डीचनी इंजाटे इनी भी मंडीके, “इफिसुस शहर गा मसीह गा मंडली गा स्वर्गदूतकु के इनी खाबोर ओले, इंज डीचका मेना जो हेजा जेवना टी गेन याई इफिलकु साटे डोकुवा मेना एठा इंज डीचका मेना जो सोना गा याई ओटा गा तालाबिचोन सेंदरावा मेना। इंज आपेटे इनी मंडीवा मेना आजुमे,

² इंज अमा कामय, एठा अमा मेहनत, एठा न चोलाका हार बान ममानातिंज अमा आराम्बो के हाडाई मेना। एठा इनी भी हाडाई मेना कि आम बुरा कुरकू के मेटे दोडो बान साकता एठा जो हेज खुदके कलामके मिठाच चेला मेंटो मंडीवा होय, लेकिन बाऊका होय, दिकुके आपे कुरकू नी चिनाटे एठा लाबाळ घाटाकेकु होय।

³ आम आराम्बो उठावा होय, एठा आमनी इंजा जीमू गा वोजीटे तक्लिप सेहेंजे होय एठा विश्वास दडा बान आरा होय।

⁴ पेनो इंजेन आपे खिलाफ इनी शिकायत होय, कि नका आम इंजाटे डेनोगोका प्यार बान दडा जैसा आम इंजाटे पेला प्यार दडा डा।

⁵ आपेन का डी खिजाटे बान थंदळ जैसा आपे सुरुवात दडा लक्कू डा। डेगा बारेन सोचातिंजे। नका, आपेके आपेगा पापोनौर टे हिरा होना एठा डी चीजो के दडा चालुकी होना, जो आपे सुरुवात गेन डाके डा। अगर आपे मन बदलाए बाने टासो मेटे इंज आपेगा मेरान हेजेवा एठा तोटेन आपे टेंगेनके, देटे टे आपेगा दिवा के बाजुटे खुदके नंगा साबेबा।

⁶ पेनो म्या अच्छा बातो होय जो आपे दडावा होय। डी इनी होय कि आम नीकुलइयों गा द्वारा इथूलक्के मिनी बुरा कामयनौर टे खीजो दडावा होय, साही डेनोगोका जैसा इंज खीजो दडावा मेना।

⁷ हर जेका जो इंजा खाबोर के समझातिंजू चाहतावा होय, दियेन डी बातो के ध्यान टे आजुम होना, जो पवित्र आत्मा मसीह गा मंडलीनौर टे मंडीवा होय। जो बुराई लिंजेन जीटाऊ हासिलजू, दिकुके इंज जीवन गा सिंज टे फल जोम गा हाक जेबा, जो परमेश्वर गा बगिचान होय।”

स्मुरना शहर गा - सतातिंज्के मिनी मसीह गा मंडली

⁸ डीचनी इंजाटे इनी भी मंडीके, स्मुरना शहर गा मसीह गा मंडली गा स्वर्गदूतकु के इनी खाबोर ओले, “इंज सुरुवात एठा आखरी होय, एठा इंज गोएन मेना डा, पेनो नका जीटाका मेना एठा हमेशा जीटाका थंदळवा, इंज आपेटे इनी मंडीवा मेना, आजुमे!”

⁹ इंज आपेगा सिनी एठा गिरबो के हाडाई मेना। फिरभी आपे आत्मिकता गेन लकपाती होय, एठा इंज इनी भी हाडाई मेना कि दिकु यहूदी कुरकू आपेगा चोटो खिलाफबेन दडावा होय, जो इकु खुदके परमेश्वर गा कलामके मिंकू कुरकू मंडीवा होय, पेनो जो होय का बाने, बनकी कि शैतान गा दल गा होय।

¹⁰ डी कासुनौर टे बाकी हिगरा जो आपेन घाटाऊवा। चोयाकी शैतान आपे कुरकू तालाटे अदा कुरकू के गिरफ्तार कुवा एठा आपेके जेलेन केटकोम्बा, ताकी डीच आपेगा अंदजो डाकी होना। आपे गेल दिन टाएन खाट मुसीबतनौर गा अनुभव डाए चालेवा, पेनो जान जिऊ टाएन विश्वास लायको थंदळके, मेटे इंज आमके हमेशा गा जीवन जेबा।

¹¹ हर जेका जो इंजा खाबोर के समझातिंजू चाहतावा होय, दियेन डी बातो के ध्यान टे आजुम होना, जो पवित्र आत्मा मसीह गा मंडलीनौर टे मंडीवा होय। जो बुराई लिंजेन जीटाऊवा, दिकुके डी सजा गेन बेल्ला डाए बाने जो दूसरा गुजू होय।

पिरगमुन शहर गा - समजाऊता डाके मिनी मसीह गा मंडली

¹² “डीचनी इंजाटे इनी भी मंडीके पिर्गमुन शहर गा मसीह गा मंडली गा स्वर्गदूतकु के इनी ओले,” इंज का मेना दियागा मेरान तेज धारी मिनी तलवार होय। इंज आपेटे इनी मंडीवा मेना,

¹³ इंज हाडाई मेना, कि आपे डी शहर गेन थंदळवा होय, देटेन शैतान गा राज्य होय। लेकिन फिरभी आपे इंजा प्रति विश्वास लायको आरुका थंदळके एठा इंजा लिंजेन विश्वास दडा भी चोलाका बंदोडुका बाने, मेटे भी बाने जब अन्तिपास गा गुजू घोनेच पेला डाके मेना डा। डीच इंजा वचननौर गा प्रचार दडा गा घल्जी वफादार डा, इनिघल्जी डीच आपेगा शहर गेन गोएन मेना डा जो शैतान गा नजर गेन होय।

¹⁴ पेनो इंजेन अमा बारेन इनी शिकायत होय, चोयाकी आपे डी कुरकू गा खिलाफ बान दडा, जो मसीह गा मंडलीनौर गेन लाबाळ गवाही जिऊवा होय, जो खिजा जाम गा गवाही ओले मिनी टेमो गेन जीके डा, डीचनी सानी के इस्राएली कुरकू गा सम्मा पापो दडा गा घल्जी भभाळकातिंज गा घल्जी चोच दडा होना डीच इथूकेनेच, ताकी दिकु मूर्तिनौर लिंजेन पेळेचके मिनी चीजोनौर जोमे, एठा आनोवा डाए।

¹⁵ डेनोगोका अमा येटेन चोच्का येनोगो होय, जो नीकुलइयों गा अनुयायियों गा शिक्षा के मनातिंजटे सेंदरावा होय।

¹⁶ इनिघल्जी मन बदलाए अगर आम येनोगो डाएवा, मेटे इंज जल्लोका हेजेवा एठा इंजा चाभु गा तलवार टे दिकुगा सेंग्गोन लडाईवा।

¹⁷ हर जेका जो इंजा खाबोर के समझातिंजू चाहतावा होय, दियेन डी बातो के ध्यान टे आजुम होना, जो पवित्र आत्मा मसीह गा मंडली टे मंडीवा होय। जो बुराई लिंजेन जीटाऊवा, डीचके इंज उखु मन्ना तालाटे जेबा, एठा डीचके म्या पुलूम घोटा भी जेबा, एठा डी घोटा लिंजेन म्या जीमू ओल्टे थंदळवा, जो कोरो डीके घोटा हासिलेवा। डीके आराटे जेकाभी डी जीमू के बान हाडाईयु।

थुआतीरा शहर गा - स्याएन मसीही मंडली

¹⁸ “डीचनी इंजाटे इनी भी मंडीके,” थुआतीरा शहर गा मसीह गा मंडली गा स्वर्गदूत के इनी ओले, “परमेश्वर गा कोण गा कोनेटे इनी खाबोर होय। दियागा मेट सिंगेल गा आफो गा खिजा एठा दियागा नंगा भेट्टीन जुलू मिनी पितरा गा खिजा होय।”

¹⁹ इंजेन मालूम होय कि आपे इनिज-दियाटे प्यार दडावा होय एठा आपे इंजा लिंजेन पूरा भरोसा दडावा होय। इंजेन मालूम होय कि आपेनी तुनी खिजाटे इनिज-दियागा मदत डाके होय, एठा आपेगा सेसेहेन गा ताखत इंजेन मालूम होय, कि आपेन का इनी अच्छा कामयनौर के डी टेमो टे येठाभी दडा लक्के होय, जब आपेनी इंजा लिंजेन पेला बार विश्वास डाके डा।

²⁰ पेनो इंजेन अमागा बारेन इनी शिकायत होय, कि आपे डी जापाए इजेबेल के लाबाळ शिक्षा फैपलातिंज जेबा होय। डीच मंडीवा होय कि डीच म्या परमेश्वर गा कोनेटे मंडीमिठाच होय, पेनो इकुगा शिक्षानौर टे देटेन इंजा भाग्यकु के आनोवा दडा एठा मूर्तिनौर के पेळेजे मिनी आटा के जोजोम गा घल्जी बहकातिंजकुवा होय।

²¹ इंज्नी डीचके मन बबादला गा घल्जी मौका जीके, पेनो डीच डी बुरा कामयनौर टे मन बबादला बान चाहता।

²² आजुमे, इंज डीचके बिमारकेच्बा, एठा जो दियागा साथोन आनोवा दडावा होय अगर दिकुभी दिकुगा कामयनौर टे पश्चाताप बान दडा मेटे इंज दिकुके खाट तखलीफ़ गेन येंडाएच्बा।

²³ इंज दियागा शिक्षानौर गा पालन दडामिंकू के घोच्कुबा, मेटे सेबाई मसीह गा मंडली गा सेबाई विश्वासीकु इनी चिनाएवा कि दिल एठा मन गा चिचनामिठाच इंज का मेना, एठा इंज आपेटे हर म्याखोम के दियागा डाके मिनी कामयनौर गा रोंगो दण्डो जेबा।

²⁴ पेनो थुआतीरा गेन आपेटे बाकी कुरकू नी डी लाबाळ शिक्षा गा रोंगो बान दडुका। एठा आपेनी डेन भागो बान साडुका जो दियागा अनुकरण दडामिठाच शैतान गा घोनेच कास बातो मंडीवा होय। इंज आपेटे मंडीवा होय, कि इंज आपे लिंजेन तुनिका अलग्गो कास हुकूम गा पालन दडा गा ओझा बान येंडा।

²⁵ सिवाय एनेगा कि जो शिक्षा आपेगा मेरान होय, दिया लिंजेन इंजा हेजे टाएन मजबूत आरुका थंदळे।

²⁶ जो बुराई लिंजेन जीटाऊवा एठा आखिरी टेमो टाएन इंजा हुकूम गा पालन दडा लक्के, इंज दिकुके सेबाई जाटो गा कुरकू लिंजेन हाक जेबा।

²⁷ इंज दिकुके राज्य दडा गा डीका हाक जेबा जैसा इंजा बाटे नी इंज्के जिले होय। दिकुगा राज्य लोखोंड़ो गा खिजा मजबूत होंगा जो डेजू बाने होय, एठा दिकुगा दुश्मनकु के टुक्काके मिनी कासा गा बर्तननौर गा खिजा टुकाएवा।

²⁸ इंज डीचके हेजा गा जीटाऊ के घागल गा घल्जी फेजेर गा इफिल जेबा।

²⁹ हर जेका जो इंजा खाबोर के समझातिंज चाहतावा होय, डीचके डी बातो के ध्यान टे होना, जो पवित्र आत्मा मसीह गा मंडलीनौर टे मंडीवा होय,