ದರ್ಶಾನ್ 19 - गवली उनाई नियम

स्वर्ग गेन परमेश्वर गा स्तुति

¹ येनेगा बादोन इंज्नी स्वर्ग गेन म्या खाट घोंजा के खाट आवाज गेन इनी सिरिंज लठ्ठाका आजुम्के, “प्रभु गा स्तुति डाए! आलेगा परमेश्वर गा उध्दार, महिमा एठा शक्ती होय।

² दियागा सेबाई निर्णय सही एठा अच्छा होय। डीचनी डी रांडो के दण्डो केनेच होय, जो हेजा आनोवा द्वारा पृथ्वी के बिसोटोए डा। परमेश्वर नी दियागा डाबोलटे किम्मत फेळाके होय, चोयाकी दियागा भाग्य गोएन मेना डा।”

³ मेटे दिकुनी डाबोलटे हाकोटे मंडीके, “प्रभु गा स्तुति डाए! जो सिंगेल गेन बेबीलोन शहर गा नशो डाके डेगा धुंजा हमेशा बिटका थंदळवा।”

⁴ चौबीससो जुना सनाकु एठा उफुन जीटा जानवरकु चबुटेका इटान बोचोएन एठा दिकुनी इनी मंडी लठ्ठाका सिंघासन लिंजेन सुबांके परमेश्वर गा आराधना डाके, “आमीन! प्रभु गा स्तुति डाए!”

⁵ येनेगा बादोन सिंघासन टे म्या आवाज इनी मंडीटे आजुम्के, “आमगा सेबाई भक्तकुके दिकुगा मन गेन अमा घल्जी आदर होय, दिकुके ईनाम जेबा, चाहे दिकु सानी होय या खाट होय, जो दियागा हिगरा दोडोवा होय, आलेगा परमेश्वर गा स्तुति डाए।”

⁶ मेटे इंज्नी म्या घोनेच खाट गर्दी गा खिजा आवाज, समुद्र गा लपानौर एठा गरजातिंजू मिनी बदळानौर गा डा गा खाट आवाज के इनी मंडी लठ्ठाका आजुम्के, “प्रभु गा स्तुति डाए! आलेगा सर्वशक्तीमान प्रभु परमेश्वर नी राज्य दडा चालुके मेना होय।

⁷ हेजे आबु खुशी मनातिंजटे मगनुवा एठा परमेश्वर गा महिमा सिरिंजे। चोयाकी मेंडा कोंटे ब्याह गा टेमो हेन मेना होय। एठा दियागा निवरी नी हेज खुदके तैयार जे मेना होय।

⁸ एठा पुलूम नेरोम गा कपळे उरी गा जीके मेना होय। चोयाकी डी मलमल गा मतलब चोखरा कुरकू गा धार्मिक कामय होय।”

⁹ स्वर्गदूत नी इंजाटे मंडीके, “इनी ओले, धन्य होय दिकु, जो मेंडा कोंटे गा ब्याह गा जशन ममानातिंज गा घल्जी खाना गेन हाकोके मिंकू होय!” डाबोलटे डीचनी इंजाटे मंडीके, “परमेश्वर गा द्वारा कुल्के मिनी इनी खाबोर सच्चो होय।”

¹⁰ जब इंज आजुम्के मेटे इंज डी कोरो गा सम्मान झुकातिंजे जो इंजाटे बातो लक्के डा, चोयाकी इंज दियागा आराधना दडा चेल्के डा। लेकिन डीचनी इंजाटे इनी मंडीके, “आम इंजा आराधना बाकी दडा। इंजभी आमगा एठा आमके डी डाई बोकजाईचो गा, जो यीशु गा जीकेमिनी गवाही सजाका डोएबा होय, सेंग्गोन सेवक मेना। आम परमेश्वर गा का आराधना डाए, चोयाकी यीशु गा गवाही भविष्यवाणी गा आत्मा होय।”

पुलूम घुळगी लिंजेन सवारी

¹¹ मेटे इंज्नी स्वर्ग खुल्लाका डोके। देटेन इंजा सम्मान म्या पुलूम घुळगी डा। यानेकी जो दिया लिंजेन चुटके होय, डीच विश्वास लायको एठा सच्चो मेंटो मंडीवा होय। डीच धार्मिक तरीका टे दियागा दुश्मनकु गा न्याय दडावा होय एठा दिकुगा खिलाफ लडाई लळातिंजुवा होय।

¹² दियागा मेट सिंगेल गा झोको गा खिजा चमकदार होय एठा दियागा कापर लिंजेन घोनेच सेबाई मुकूट होय। दियागा कोम्बोर लिंजेन म्या जीमू ओल्के मेना होय, लेकिन सिर्फ डीचका डा, जो हाडाई डा कि डी जीमू गा चोच मतलब होय।

¹³ डीच पचना गेन नमुज्के मिनी कपळे उरिके होय दियागा जीमू होय, “परमेश्वर गा वचन,”

¹⁴ स्वर्ग टे सैनिककु गा खाट घोंजा दियागा टाऊ-टाऊ ओले। इनी सैनिककु पुलूम घुळगीकु लिंजेन सवारीके डा एठा दिकुनी पुलूम नेरोम गा कपळे उरिके मेना डा।

¹⁵ चुटके मिठाच गा चभुटे धारी तलवार ओटबा होय, डेगा इस्तमाल डीच देशो के हरातिंज घल्जी डाएवा, एठा डीच लोखोंडो गा छड़ी गा सेंग्गोन दिकु लिंजेन राजो दडावा। डीच सर्वशक्तीमान परमेश्वर गा भयानक खीजो के डेनोगोका आरागेवा, जैसा म्या रेस्सो गा गड्डा टे अंगूर रेस्सो आडीवा होय।

¹⁶ दियागा जेवना भाऊळी गा कपळे लिंजेन इनी जीमू ओल्के मेना होय “राजाकु गा राजा एठा प्रभुकु गा प्रभु।”

जानवर एठा दियागा सेना गा हरातिंजू डाऊ

¹⁷ डाबोलटे इंज्नी म्या स्वर्गदूत के सूर्य गेन टेंगेंटे डोके। डीचनी खाट्टेका हाको लठ्ठाका बदळान उळातिंजू मिंकू सेबाई भूरिकुटे मंडीके, “हेजे एठा परमेश्वर गा खाट खाना गा घल्जी गोलायु।

¹⁸ आपे राजाकु, सेनापतिकु, तखातदार मिंकू, घुळगीकु, घुळगीन सुबानमिंकू एठा सेबाई कुरकू गा चाहे आझाद होय या भाग्य, सानी होय या खाट दिकुगा जिलु जोमे।”

¹⁹ डाबोलटे इंज्नी डी भायनक जानवर के डोकेनेच जो समुद्र टे बल्लान हेन डा, एठा पृथ्वी गा राजाकु के एठा दिकुगा सेनाकु के डोकेकु, दिकु घुळगीकु लिंजेन सुबानमिंकू एठा दियागा सेना गा खिलाफबेन लडाई दडा गा घल्जी म्या सेंग्गोन हेन।

²⁰ डी भायनक जानवर बंदी आरुकेकु मेना एठा दियागा सेंग्गोन डी लाबाळ कुरकू जो इकु खुदके परमेश्वर गा कोनेटे मंडीमिंकू भी, डीचनी जानवरकु गा जीमू गेन अचम्बो कामय तीपिटे डी कुरकू के बहखातिंजकेकु डा। दिकुनी जानवर गा छाप मनेन जे डा एठा दियागा मूर्ति गा आराधना डाके डा। दिकिंज बार्खिंज जीटाका ढागा-ढागा मिनी गंधक गा सिंगेल गा कुंड गेन येंडाकेकु मेना।

²¹ येनेगा बादोन, डीचनी जो घुळगीकु लिंजेन सुबांके डा आपना चाबुटे ओटमिनी तलवार गा इस्तमाल डाटे अलग्गो सेबाईकु के घोच्केकु, मेटे बदळा गा भूरिकु मेटे टाएन म्हळा गा जिलु जोम लक्के जब टाएन कि दिकुगा लाज ठायका भेट्टी डुका बाने।