ದರ್ಶಾನ್ 18 - गवली उनाई नियम

बेबीलोन उरा गा नशो

¹ येनेगा बादोन इंज्नी म्या दूसरा स्वर्गदूत के स्वर्ग टे आगुरुटे डोके। दियागा मेरान खाट हाक डा एठा दियागा खाट चमकातिंजू वोजीटे पूरा पृथ्वी उजालाएन।

^2-3 डीचनी खाट्टेका हाकोटे मंडीके, “बेबीलोन शहर गा डी मशहूर शहर नका हरातिंजे होय। चोयाकी इनी बेबीलोन शहर नी सेबाई राज्यनौर गेन सेबाई कुरकू के सिडू आनुके होय, जो दियागा मूर्तिनौर गा पूजा होय। सेबाई पृथ्वी गा राजा दियागा सेंग्गोन दियागा बुरा कामयनौर गेन बेल्लाएन होय। पृथ्वी लिंजेन मंहेंगा चीजो गा घल्जी डी जापाए गा इच्छाटे लकपाती आरोएन होय। लेकिन परमेश्वर इनी बेसरोम रांडो के घोजेज्बा। एठा उजळातिंज भूरिकु गा बुदली आरु गा जगा डाऊवा।”

⁴ डाबोलटे इंज्नी स्वर्ग टे म्या एठा आवाज आजुम्के, “आपे जो इंजा कुरकू होय, डी शहर के आराकी। दियागा सेंग्गोन बेल्लाटे पापो बाकी दडा, ताकी आपेन दियागा सेंग्गोन दण्डो बाकी जिऊ होना।

⁵ चोयाकी दियागा पापोनौर गा ढेर स्वर्ग टाएन ऊँचाएन होय, एठा परमेश्वर नी दियागा अपराधनौर के यादो डाके होय।

⁶ डी बेबीलोन शहर नी जैसा डाके, आपे भी दियागा सेंग्गोन डेनोगोका डाए। दियागा बुरा कामयनौर गा बरी गुना बदला जे एठा डी शहर गा घल्जी बारी गुना शक्तीशाली कोशिश गा तैयारी डाए जैसा सताव टे डीचनी दूसरा कुरकू गा सेंग्गोन अत्यचार डाके डा।

⁷ डीचनी जोभी बाडाई डाके एठा सुख बोगातिंजे होय, दियेन देटोका तक्लिप एठा देटोका मुसीबत जे। चोयाकी डीच हेजा मन गेन इनी मंडीवा होय, ‘इंज रानी गा खिजा सिंघासन लिंजेन सुबांके मेना।’ ‘इंज विधवा बाने मेना एठा चोलाका शोक बान ममानातिंज।’

⁸ दियागा घमंड गा वाजा दिया लिंजेन अचानक टे सिनीनौर हेन मेना, अचानक म्या सेंग्गोन बिमारी एठा शोक एठा कळकी दिया लिंजेन म्या सेंग्गोन हेजेवा, एठा डीचके सिंगेल गेन रखोएच्बा। चोयाकी प्रभु परमेश्वर शक्तीशाली होय, एठा डीच दियागा न्याय डाएवा।”

बेबीलोन गा घल्जी तळपातिंजू

⁹ जब पृथ्वी गा राजा, दिकुनी दियागा सेंग्गोन आनोवा एठा सुख भोगातिंज्बे होय, दियागा जुलू गा धुंजा डोगेवा, मेटे दिकु जम्बा एठा दिया लिंजेन तळपातिंजुवा।

¹⁰ दिकु दियागा दण्डो टे हिघराटे इनी मंडी लठ्ठाका लेंक्कीन का टेंगेंबा, “धिक्कार! अमा घल्जी धिक्कार! बेबीलोन! शक्तीशाली पूरा बेबीलोन शहर! आमके अचानक का दण्डो घाटाएन!”

¹¹ पृथ्वी गा व्यापारी दियागा घल्जी जम्बा एठा कासु मनातिंजेवा, चोयाकी आए जेका बाऊ होय, जो डी सामोन के खरीदोएवा जो डीच किकीजी लक्के होय।

^12-13 दिकुगा माल चोटोका रोंगो गा डा, डेन सोना, चाँदी, रत्न एठा मोती डा। डेन अच्छाका कपळे डा जो मंहेंगा धगा, चमकातिंजू राटा एठा एंगन कलर रेशीम टे आरुके मेना डा, डेन सुकींज लकडी टे आरुके मिनी चीजो, हत्ती गा तिळींज टे आरुके मिनी चीजो डा। एठा अलग्गो चीजो डा जो मंहेंगा लकडी पित्र, लोखोंडो या चिनीटे आरुके मेना डा, दाळी सक्कर, मसाला, धुपो, मुर्र, लोबान, सिडू, सुकींज सुनूम, मैदा, गुं, जानवरकु, मेंडाकू, घुळगीकु यानेकी रथ, भाग्यकु यानेकी गुलाम कोरोकु गा तुनिका सा मिठाच बान थंदळ डुका।

¹⁴ इनिघल्जी व्यापारी मंडीवा, “डी सेबाई चीजो डेगा आम आरी दोडो डा नका बाऊ होय, डी सेबाई भी नी सुकींज मिनी सामोननौर जो आमेन पसंद डा, डीच सेबाई सामोननौर डीके आम अमा कोम्बोरके अच्छा आरु गा घल्जी इस्तमाल दडा डा, दिकु सेबाई आटके मेना होय, डी नका आपेके चोलाका बान घाटाऊ।

¹⁵ इनी सामोन गा व्यापारी, जो बेबीलोन शहर गा वाजा लकपति आरोएन होय, दियागा तखलिफ टे हिघराटे लेंक्कीन का टेंगेन थंदळवा। दिकु इनी मंडी लठ्ठाका जम्बा एठा तळपातिंजू टे मंडीवा,

¹⁶ धिक्कार! धिक्कार! इनी बेबीलोन शहर मलमल, येंगान रेंग्गो एठा राटा कपळे उरिके डा एठा सोना, रत्न एठा मोतीनौर टे सिंगेरके डा।

¹⁷ बेबीलोन नी हेजा सेबाई संपत्ति अचानक का आटके होय।” डोंगा गा सेबाई कप्तान, यात्री, डोंगा गेन कामय दडामिंकू, एठा दिकु सेबाईकु जो समुद्र टे हेजा जान कामयवा होय, बेबीलोन टे ठायका लेंक्कीन टेंगेनके लठ्ठाका डूगु लक्के होय।

¹⁸ एठा डेगा जुलू गा धुंजा धोटे खाट आवाज टे मंडी बिटजे, “इनी शहर गा रोंगो तुनिका शहर बाऊ होय।”

¹⁹ दिकु इकुगा कापर लिंजेन धुल्ला येंडाटे, जम्बा एठा तळपातिंजुटे खट्टेका मंडी डा, “धिक्कार! धिक्कार! इनी शहर लिंजेन! इनी महान शहर बेबीलोन गा डाके संपत्ति टे खाट डोंगा गा सेबाई मालिकोकु लकपति आरोएन। एठा नका थोडाका टेमो गेन, दियागा सेबाई डामा ओले मेना।”

²⁰ हे स्वर्ग गेन थंदळ मिंकू परमेश्वर गा कुरकू, परमेश्वर गा कलामके मिंकू चेलाकू एठा परमेश्वर गा कोनेटे मंडीमिंकू खुशीयु होना, चोयाकी परमेश्वर नी डी शहर लिंजेन हेजा न्याय कुल्के होय, डी बुराई गा वाजाटे जो डीचनी आपेगा सेंग्गोन डाके होय।

बेबीलोन गा नशो गा आखरी स्थिती

²¹ मेटे म्या तखातदार स्वर्गदूत नी चक्की गा खाट भागो-खिजा म्या घोटा टूलके एठा इनी मंडी लठ्ठाका समुद्र गेन टेप्पाके, “बेबीलोन शहर इनिका ओजाटे नशोएवा होय एठा दियागा डाबोलटे चोलाका पता बान घाऊ।”

²² हे बेबीलोन शहर, आमेन डाबोलटे चोलाकाभी विणा ससाडी गा स्वर आजुमू बाने, देटेन पवी या पिंगी ससाडी आजुमू बाने। इनी खिजा तुनिकाभी खिजा गा जेका उधम गा तुनिका कारीगार बान आरु, एठा चक्की जाटी गा आवाज डाबोलटे आजुमू बाने।

²³ दिवा गा उजाला आमेन डाबोलटे चोलाका बान जिऊ, देटे जागान निवरी एठा नावरा गा खुशी गा आवाज बान डाऊ, चोयाकी अमा व्यापारी पृथ्वी गा महान कुरकू डा, एठा आमनी अमा जादू द्वारा सेबाई देशो के बहकातिंज्के।

²⁴ परमेश्वर नी बेबीलोन शहर के दण्डो जीके चोयाकी डीच परमेश्वर गा कोनेटे मंडीमिंकू, परमेश्वर गा कुरकू एठा डी सेबाई कुरकू के घोगेज गा दोषी डा।