ದರ್ಶಾನ್ 17 - गवली उनाई नियम

जापाए एठा राटा रेंग्गो गा जानवर

¹ जो याई स्वर्गदूत याई कोटोरा सावे डा, डे तालाटे म्याखोम नी इंजा मेरान हेन डो मंडीके, “हेजे, इंज आमके डी आनोवा डाके गा दण्डो जेबा, जो घोनेच डा गा मेरान सुबांके होय।

² जेगा सेंग्गोन पृथ्वी गा राजाकु नी आनोवा डाके एठा डीचनी बुरा कामय गा सिडू टे सेबाई कोरो जाटोकु के नशा गेन बैहलातिंज्केकु।”

³ मेटे स्वर्गदूत इंज्के पवित्र आत्मा गा मदत टे सुनसान जगा गा कोनेन सय्येमी। इंज्नी देटेन म्या जापाए के म्या राटा जानवर लिंजेन सुबांके मेंटो डोकेनेच। भायनक जानवर गा सेबाई कोम्बोर लिंजेन परमेश्वर गा खिलाफबेन निंदा गा शब्दनौर टे उगुर्के मेना डा। दियागा याई कापर एठा याई सिंगी डा।

⁴ येटेन जापाए एगान एठा राटा कपळे उरिके मेना डा एठा डीचनी हेजा कोम्बोरके सोना गा भांडे, किमती घोटा एठा मंहेंगा मोतीनौर टे सिंगरकेनेच डा। डीच टी गेन सोना गा कोटोरा सावे डा, जो दियागा आनोवा गा उजळातिंज कोनेन बुराई कामयनौर टे भेट्टिके मेना डा।

⁵ दियागा ठीकरी लिंजेन म्या उखु जीमू ओल्के मेना डा, “इंज खाट शहर बेबीलोन शहर मेना। इंज सेबाई रांडोकु एठा पृथ्वी गा सेबाई उजळातिंज मिनी कामयनौर गा आंटे मेना।”

⁶ इंज्नी डोके कि डीच जापाए परमेश्वर गा कुरकू गा पचना एठा यीशु गा गवाही जिऊ मिंकुगा पचना नुटे सीडूकुत्ती होय। इंज डीचके धोटे खाट बिचार गेन बोचोएन।

जापाए एठा जानवर गा मतलब

⁷ स्वर्गदूत नी इंजाटे मंडीके, “आम अचम्बो चोया दडावा होय? इंज आमके डी जापाए गा भेदो घालेवा एठा डी भायनक जानवर गा भी, दिया लिंजेन डीच सवारीके होय एठा दियागा याई कापर एठा गेल सिंगी होय।”

⁸ डी जानवर डीचके आमनी आए डोकेनेच, म्या टेमो जीटाका डा, पेनो नका जीटाका बाऊ होय। डीच पातल टे बल्लान हेजेमिठाच होय एठा परमेश्वर डीचके पूरा खिजाटे नशोएच्बा। पृथ्वी लिंजेन थंदळ मिंकू कुरकू दिकुगा जीमू परमेश्वर दुनिया के आरुटे पेला जीटाकु गा पुस्तक गेन बान ओलडुका, दिकु सेबाईकु अचम्बोऊवा जब दिकु इनी भायनक जानवर के डोगेचबा। म्या टेमो डीच जीटाका डा, नका डीच जीटाका बाऊ होय, पेनो डीच डाबोलटे हिराबा।

⁹ इनिके ससामझातिंजा गा घल्जी म्या ज्ञानी मन गा जरुरी होय। याई कापर डी याई टुक्की होय, डे लिंजेन डी जापाए राजो दडावा होय।

¹⁰ डी याई राजाकु के भी दर्शातिंज्कुवा होय, दिकु तालाटे मोनाईकु गोएन मेना होय, म्याखोम आए भी होय एठा आखरी मिठाच आए टाएन बान हेजडुका, पेनो जब डीच हेजेवा, मेटे थोळाका टेमो टाएन राजो दडावा।

¹¹ डीच भायनक जानवर, जो पेला डा एठा नका बाऊ होय, डीच इलाएरा राजा होय, लेकिन डी राजा याई राजाकु तालाटे म्याखोम होय एठा दियागा हमेशा गा घल्जी नशो डाऊवा।

¹² आमनी जो गेल सिंगी के डोके, दिकु गेल राजाकु होय। दिकुनी आए टाएन राजो दडा चालुडुका बाने होय। पेनो डी गेल राजाकु के डी भायनक जानवर गा सेंग्गोन बेल्लाटे राजो दडा गा हुकूम होय, पेनो दिकुगा राजो सिर्फ थोळा टेमो गा घल्जी थंदळवा।

¹³ गेल राजाकु गा म्याका मकसद होय कि दिकु सेबाईकु म्याका कामय के दडा गा घल्जी राजीऊवा, एठा दिकु इकु-इकुगा शक्ती एठा हाक भायनक जानवर के जेबा।

मेंडा कोंटे घल्जी जीटाऊ

¹⁴ दिकु मेंडा कोंटे टे लडाई दडावा एठा मेंडा कोंटे दिकुके हरातिंज्कुवा, चोयाकी डीच प्रभुकु गा प्रभु एठा राजाकु गा राजा होय। मेंडा कोंटे गा सेंग्गोन दियागा अनुसरण दडामिठाच भी जीटाऊवा, दिकु हाकोके मिंकू होय, कलामके मिंकू होय एठा विश्वास लायको भी होय।

¹⁵ स्वर्गदूत नी इंजाटे इनी भी मंडीके, “आमनी जो डा के डोके, देटेन आनोवामिठाच नी सुबांके मेना होय, इनी डा, सेबाई दुनिया कुरकू के, चोटोका देशो के, जाटोनौर के, एठा चोटोका खिजा गा भाषानौर के दर्शातिंजेवा होय।

¹⁶ आमनी जो गेल सिंगी एठा भायनक जानवरकु एठा राजाकु के डोकेकु, दिकु आनोवा मिंकूटे दुश्मनी डाएवा। दिकु दिया लिंजेन हमला डाटे नंगाएच्बा, दियागा जिलु जोमेबा एठा बचातिंज्के मिंकूके सिंगेल गेन जुल्कुवा।

¹⁷ चोयाकी परमेश्वर नी हेजा मकसद के पूरा दडा गा घल्जी डी राजाकु गा मेनके म्या डाके मेना होय। ताकी दिकु दिया भायनक जानवर के हेजा राज्य मेटे टाएन गा घल्जी जीकेच, जब टाएन परमेश्वर गा वचन पुरायु बाकी होना।

¹⁸ डी जापाए डीचके आमनी डोकेनेच डा, डीच येटेन खाट शहर होय जो पृथ्वी गा सेबाई राजाकु लिंजेन राजो दडावा होय।”