ದರ್ಶಾನ್ 13 - गवली उनाई नियम

समुद्र तालाटे ओटके बरी जानवरकिंज

¹ मेटे इंज्नी म्या भायनक जानवर के समुद्र तालाटे ओटटे डोकेनेच, दियागा गेल सिंगी एठा याई कापर डा। दियागा सिंगीनौर लिंजेन गेल मुकूट डा एठा हर म्या कापर लिंजेन परमेश्वर गा खिलाफबेन निंदा दडामिठाच म्या जीमू ओल्के डा।

² इंज्नी जो भायनक जानवर के डोकेनेच, डीच चिता गा खिजा डा, पेनो दियागा नंगा बना गा नंगा खिजा डा एठा दियागा चाभु कुला गा चाभु खिजा डा। अजीगार नी डीचके हेजा शक्ती, सिंघासन एठा महान हाक जीके।

³ येनोगो लगातिंजू लक्के डा कि डी भायनक जानवर गा म्या कापर लिंजेन येनोगो भरी घाव डा, देटे डीच गुजू साकता डा, लेकिन डी घाव साजाएन मेना डा। इनिघल्जी सेबाई दुनिया अचम्बो टे डी भायनक जानवर गा टाउन ओले।

⁴ कुरकू नी अजीगार गा पूजा डाके, चोयाकी डीचनी भायनक जानवर के हाक जीके डा एठा दिकुनी इनी मंडी लठ्ठाका जानवर गा भी पूजा डाके, “इनी जानवर गा बराबोर जे डाए सकतावा होय? एठा जे दियागा सेंग्गोन लडाई सकतावा होय?”

⁵ भायनक जानवर के बढाई मुमंडा यानेकी परमेश्वर गा खिलाफबेन दडा गा हुकूम एठा बयालीस महिना टाएन आरुका थंदळ गा हाक जीके मेना।

⁶ येने लिंजेन भायनक जानवर परमेश्वर गा खिलाफबेन दडा एठा दियागा जीमू, दियागा पेळा जागान एठा डी कुरकू गा निंदा दडा लज्जे, जो स्वर्ग गेन थंदळवा होय।

⁷ डीचके परमेश्वर गा कुरकू टे लडाई दडा एठा दिकुके हरातिंज गा हुकूम घाटाएन एठा हर म्या कुल, कुरकू, भाषा एठा देशो लिंजेन हाक जीके मेना।

⁸ पृथ्वी लिंजेन थंदळ मिंकू सेबाई कुरकू डी जानवर गा पूजा दडा लज्जे। मतलब, डी सेबाई कुरकू दिकुगा जीमू दुनिया गा सुरुवात टे मेंडा कोंटे गा जीवन गा पुस्तक गेन बान ओलडुका मेना। मेंडा कोंटे डीचका होय जो गोएन मेना डा।

⁹ हर जेका जो इंजा खाबोर के समझातिंजू चाहतावा होय, दियेन डी बातो के ध्यान टे होना,

¹⁰ जो कुरकू के केखेट तय होय, दिकु पक्का रुपोटे केडुवा। दिकुन तलवार टे गुजू होना होय, डीच पक्का रुपोटे तलवार टे गुजूवा। नका जरुरी होय, कि चोखरा कुरकू आराम्बो एठा विश्वास गा अनुभाव डाए।

पृथ्वी तालाटे ओटके जानवर

¹¹ मेटे इंज्नी म्या दूसरा जानवर पृथ्वी तालाटे ओटटे डोके। दियागा मेंडा कोंटे गा सिंगी खिजा बरी सिंगी डा एठा डीच अजीगार गा खिजा मंडी डा।

¹² इनिज दूसरा भायनक जानवर डी पेला जानवर गा सेबाई हाक गा इस्तमाल दडावा होय। दूसरा भायनक जानवर पृथ्वी एठा येने लिंजेन थंदळ मिंकूटे डी पेला जानवर गा आराधना दडा होळाकु डा, दियागा जान घोगेच गाए साजाएन डा।

¹³ इनी दूसरा भायनक जानवर खाट अचम्बो कामय घाले लक्कू डा। येटे टाएन कि डीच कुरकू गा दोडो बदळा टे पृथ्वी लिंजेन सिंगेल बरसातिंजे डा।

¹⁴ घोनेच सेबाई कुरकू दूसरा भायनक जानवर गा डी अचम्बो कामयनौर टे आसर टे धोका जोवे, जो डीच पेला भायनक जानवर गा शक्तीटे तिटीपी डा। डीचनी पृथ्वी लिंजेन थंदळ मिंकूटे डी भायनक जानवर गा मूर्ति आरु गा घल्जी मंडीके, जो तलवार टे घायलजे मेना डा, पेनो डाबोलटे साजाएन डा।

¹⁵ डी दूसरा जानवर के पेला जानवर गा मूर्ति आरुटे डीचके जिजाटा गा भी शक्ती जीके मेना, इनिघल्जी डीच मंडी भी साकता डा। एठा डी मूर्ति नी डी सेबाई कुरकू के घोगेज गा हुकूम जीके, जो दियागा पूजा बान दडा डा।

¹⁶ डी दूसरा जानवर सेबाई कुरकू के चाहे दिकु सानी होय या खाट, लकपाती होय या गिरबो, आझाद होय या जो भाग्य बाऊ डा। मतलब सेबाई कुरकू के मजबूर डाकेकु, कि दिकु पेला जानवर गा जीमू हेजा जेवना टी लिंजेन या हेजा ठीकरी लिंजेन छाप येंडाएवा।

¹⁷ डे लिंजेन डी जानवर गा छाप यानेकी दियागा जीमू गा संख्या बान घाईडुका होय, डीच चोच्का सेगे या कीजे बान साकता।

¹⁸ येटे समझो गा जरुरी होय। जो दिमागदार होय, डी भायनक जानवर गा जीमू गा संख्या जोळातिंज्की, चोयाकी डीच तुनिका कोरो गा जीमू गा संख्या होय, एठा दियागा संख्या तुरुई सेद्दी छेसाठ होय।