ದರ್ಶಾನ್ 12 - गवली उनाई नियम

जापाए एठा खाट मिठाच अजीगार

¹ जब डीच स्याएन मेना, मेटे तब बदळा गेन म्या महान एठा अचम्बो चिन्हा डोके मेना, इंज्नी म्या जापाए चंद्रा लिंजेन टेंगेनटे डोके, दियागा कपळे सूर्य गा खिजा चमकातिंजू लक्के डा। दियागा कापार लिंजेन म्या मुकूट उरिके डा डेन बारह इफिलकु डा।

² डी जापाए लाचके डा, एठा दियागा जनम जिऊ गा टेमो हेन डा, एठा डीच जनम जिऊ गा कासु गा वाजाटे तक्लिपबेन डा एठा चिल्लातिंजू डा।

³ मेटे बदळा गेन म्या एठा चिन्हा डोके डा, राटा रेंग्गो गा म्या ठायका खाट कफामिठाच अजीगार यानेकी शैतान डा। दियागा याई कापर डा, गेल सिंगी डा एठा हर म्या कापर लिंजेन म्या मुकूट डा।

⁴ दियागा चुट नी बदळा गा म्या आफाई इफिलकु के ओळटे पृथ्वी लिंजेन टेप्पाकेकु। एठा अजीगार डी जापाए गा सम्मान टेंगेंजे, ताकी दियागा कोंटे के डाऊ लठ्ठाका जोमजाकेच।

⁵ मेटे डी जापाएनी म्या कोंटे के जनम जीके, पेनो डीचके अजीगार बान जोमडुका। चोयाकी डी सानी के बिटटे परमेश्वर गा सिंघासन टाएन इडीकेनेच। डी पोट्टा म्या लोखोंडो गा छाळी गा सेंग्गोन सेबाई देशोनौर लिंजेन राज्य डाएवा।

⁶ मेटे डी जापाए सुनसान जगा गा कोनेन साळुपजे देटेन परमेश्वर नी दियागा घल्जी म्या जगा तैयार डाके डा, एठा डीचके बारह सेद्दी साठो दिन टाएन आटा घाटाऊमिनी डा।

अजीगार स्वर्ग टे बल्लान टेप्पाकेनेच

⁷ नका स्वर्ग गेन लडाई छेळातिंजे। परमेश्वर गा मेन दूतकु तालाटे दियागा जीमू मिकाईल एठा हेजा हात टाल्लेन थंदळ मिठाच स्वर्गदूतकु गा सेंग्गोन अजीगार गा खिलाफ लडाई लळातिंज्बे।

⁸ पेनो अजीगार एठा दियागा सेंग्गो दूत लडाई गेन हरातिंजे, एठा स्वर्ग गेन दिकुगा घल्जी तुनिका जगा बान थंदळ डुका।

⁹ मेटे देटेन खाट अजीगार मतलब डी जुना बिंज, जो दोष येंडा मिठाच शैतान मंडीवा होय, एठा सेबाई दुनिया के भुल्लाकुवा होय। हेजा दूतकु गा सेंग्गोन पृथ्वी लिंजेन बोचोकेनेच।

¹⁰ डाबोलटे इंज्नी लिंजाटे इनी खाट आवाज हेजे लठ्ठाका आजुम्के, नका आलेगा परमेश्वर हेजा कुरकू गा उध्दार डाएवा! नका डीच हेजा शक्तीगा उपयोग डाएवा एठा राजा गा रुपो गेन राजो डाएवा। नका दियागा मसीह दुनिया लिंजेन हेजा हाक गा दावा डाएवा! चोयाकी नका शैतान आलेगा परमेश्वर गा थंदळ गेन टेंगेंजे आलेगा सेंग्गो डाईचो लिंजेन दिन-रातो दोष बान येंडा। डीचके स्वर्ग टे बल्लान टेप्पाकेनेच मेना होय।

¹¹ “आलेगा विश्वासीकु नी मेंडा कोंटे गा पचना गा द्वारा एठा इकुगा गवाही गा वचन गा द्वारा शैतान लिंजेन जीटाएन होय, चोयाकी दिकुनी परमेश्वर के मनेन दडा चालुका डोके, हालाकी दिकुके सतातिंजकेकू येटे टाएन कि घोच्केकु भी, पेनो दिकु इकुगा डी अंगीकार टे टाउन बाजुडुका।”

¹² “इनिघल्जी स्वर्ग एठा डेगा पेळामिंकू खुशी मनातिंजे। पेनो आपे जो पृथ्वी लिंजेन एठा समुद्र गेन थंदळवा होय आपेके धिक्कार होय। शैतान आए टेमोन घोनेच खीजो के होय, चोयाकी डीच हाडाई होय कि झाल्लोका दियागा अंत डाऊवा।”

जापाए सतातिंज्के मेना

¹³ जब अजीगार नी समझातिंजे कि डीचके पृथ्वी लिंजेन सोटकेनेच मेना होय, मेटे डीच डी बाई गा पीछा दडा लज्जे, डीचनी डी कोंटे के जनम जीके डा।

¹⁴ पेनो जापाए के खाट शिकरया गा बरी काफा घाटाएन, ताकी डीच डी जगा के उळातिंजू जो सुनसान जगान परमेश्वर नी दियागा घल्जी तैयार केनेच डा, एठा देटे जगान साळे आफाई साल टाएन दियागा देखभाल डाऊ मिनी डा, ताकी खाट बिंज डीच टाएन बाकी आदिररजू होना।

¹⁵ मेटे अजीगार नी डी जापाए गा कोनेन हेजा म्वार टे गडा गा रोंगो डा उखिळेके ताकी आडी डीचके तुटे साईय्याकेच।

¹⁶ पेनो साही डीका टेमो देटे गा ओटे चिराएन एठा डी सेबाई डा जो अजीगार गा चभुटे ओटके डा, ओटेन ओले एठा जापाए गा मदत डाके।

¹⁷ येने लिंजेन अजीगार के बाई लिंजेन भेबाव का खीजो हेन एठा डीच दियागा बचातिंज्के मिनी कोणकुटे लडाई दडा ओटजे, मतलब डी कुरकू टे जो परमेश्वर गा हुकूमनौर गा पालन दडा एठा यीशु मसीह गा बारेन जीकेमिनी गवाही लिंजेन मजबूत आरुका थंदळवा होय।

¹⁸ येनेगा बादोन अजीगार ओले मेना, एठा समुद्र गा धुरा लिंजेन टेंगेंजे।