ದರ್ಶಾನ್ 10 - गवली उनाई नियम

स्वर्गदूत एठा सानी पुस्तक

¹ येनेगा बादोन इंज्नी म्या दूसरा शक्तीशाली स्वर्गदूतकु के बदळा टे आगुरुटे डोकेनेच। डीच बदळा टे बोचोके मेना डा एठा दियागा कापरा लिंजेन इन्द्रधनुष उफुन कोनेन डा। दियागा चेहरा सूर्य गा रोंगो चमकातिंजू डा एठा दियागा नंगा जुलू मिनी खम्भानौर गा रोंगो डा।

² डीच टी गेन म्या खुल्लाके पुस्तक घल्जी डा। डीचनी हेजा जेवना नंगा समुद्र लिंजेन डोके एठा डाखुरी नंगा पृथ्वी लिंजेन डोके।

³ डी स्वर्गदूत नी जोर टे हाकोटे एठा दियागा आवाज कुला गा रा गा रोंगो डा। जब डीच चिल्लातिंजके, मेटे याई तेजो आवाजनौर नी डीचके जवाब जीके, जो गुळगुळ गा आवाज गा रोंगो डा।

⁴ जब याई तेजो आवाजनौर मंडीके मेना, मेटे इंज ओलगा घल्जी तैयारके का डा, कि इंज्नी स्वर्ग टे म्या आवाज के इनी मंडीटे आजुम्के, “जो चोच्का याई बदळानौर गा कुराई नी मंडीके होय, डीके ओल बाकी पेनो उखु डोकी।”

⁵ मेटे जो स्वर्गदूत के इंज्नी समुद्र एठा पृथ्वी लिंजेन टेंगेन डोकेनेच डा, डीचनी हेजा जेवना टी बदळा गा कोनेन मठान टूलके,

⁶ एठा परमेश्वर गा जीमू लिंजेन म्या वचन सावे, जो हमेशा गा घल्जी थंदळवा होय, डीचनी बदळा एठा पृथ्वी एठा समुद्र एठा डेन सेबाई चोच्का आरोएन होय, दियागा कासोम जोम्टे स्वर्गदूत नी इनी मंडीके, “नका एठा टेमो बान डाऊ।

⁷ जो दिन याईय्या स्वर्गदूत गा पिंगी आजुमूबा, डी दिन परमेश्वर गा उखु रहस्य पूराऊवा, जैसा कि डीचनी हेजा सेवककु के, मतलब परमेश्वर गा कोनेटे मंडीमिंकू के घाल्के डा।”

⁸ जो आवाज इंज्नी स्वर्गदूत टे आजुम्के डा, डीचनी डाबोलटे इंज्के मंडीके, “सेने, जो स्वर्गदूत समुद्र एठा पृथ्वी लिंजेन टेंगेनके होय, दियागा टी टे डी खुल्लाके मिनी पुस्तक सायोम।”

⁹ इनिघल्जी इंज्नी स्वर्गदूत गा मेरान ओलेडो दियाटे बिनती डावे, कि डीच इंज्के पुस्तक जिकी। डीचनी मंडीके, “इनिजाटे सायोम एठा जोमे। येनेगा स्वाद निलीकु डा गा खिजा सिंबिल होय, पेनो बादोन येनेगा कटीच टे अमा लाच कासुवा।”

¹⁰ इनिघल्जी इंज्नी स्वर्गदूत गा टी टे पुस्तक सावे एठा जोवे। सच्चोनका येनेगा स्वाद निलीकु डा खिजा सिंबिल डा, पेनो जब इंज्नी इनिके उटजे, मेटे इंजा लाच कासु लज्जे।

¹¹ येने लिंजेन डीच इंजाटे मंडीके, “आमके घोनेच्का कुरकू, जाटोकु, भाषानौर एठा राजाकु गा बारेन डाबोलटे भविष्यवाणी दडा होना।”