ದರ್ಶಾನ್ 1 - गवली उनाई नियम

परिचय

¹ इनी पुस्तक डी बातो गा वर्णन दडावा होय, जो परमेश्वर नी यीशु मसीह के टिपीके, ताकी डीच हेजा भाग्यकु के डी घटनानौर गा बारेन घाल्की होना, जो जल्दीका डाऊवा, यीशु नी इनी खाबोर इंज्के, हेजा भाग्य यूहन्ना के हेजा स्वर्गदूत गा द्वारा जीके।

² इनिघल्जी, इंज यूहन्ना नी डी सेबाई चोच्का ओल्के जो इंज्नी डोके। इंज्नी इनी काकोडोन परमेश्वर गा खाबोर एठा डी सच्चो बातो घाल्के होय, डेगा जानकारी यीशु मसीह नी इंज्के जिले डा।

³ परमेश्वर हर डी कोरो के आशीर्वाद जेबा, जो इनी भविष्यवाणी के दूसराकु के पळातिंजटे घालेवा होय, एठा डीच हर डी कोरो के आशीर्वाद जेबा जो इनिके आजोम्बा होय एठा इनिके मनातिंजेवा होय। चोयाकी इनी बातोनौर जल्लोका डाऊवा।

याई मसीह गा मंडलीनौर के यूहन्ना गा नमस्कार

⁴ इंज यूहन्ना, इनी पत्र आपे याई मसीह गा मंडलीनौर गा विश्वासीकु गा घल्जी ओल लक्के मेना, जो आसिया जिल्हा गेन टाकु होय। इंज प्रार्थना दडावा मेना कि आपेके परमेश्वर गा कोनेटे कृपा एठा शांती हासिलजू होना। डीच डीका परमेश्वर होय, जो टेमो गा सुरुवात टे साटे आए टाएन एठा हमेशा गा घल्जी म्या होय एठा बान बदलाऊ। एठा डी याई आत्मानौर गा कोनेटे, जो, परमेश्वर गा सिंघासन गा सम्मान होय।

^5-6 एठा यीशु मसीह गा कोनेटे आपे कुरकू के कृपा एठा शांती हासिलजू होना। यीशु मसीह गा गवाही विश्वास लायको होय, कि डीच गोएन गा बादोन डाबोलटे जीटामिंकू तालाटे पेला कोरो एठा इनी दुनिया गा सेबाई राजाकु गा राजोमिंकू होय। डीच आलेटे प्यार दडावा होय, इनिघल्जी डीचनी हेजा पचना टे आलेके पापो टे आजादकेमी। एठा परमेश्वर एठा बाटे गा सम्मान आलेके हेजा प्रजा एठा याजक आरु घल्जी कलाम्केमी। डीचके आदर, महिमा एठा हाक हमेशा एठा हर टेमो घाटाऊ चाले। आमीन।

⁷ आजुमे, डीच बदळानौर लिंजेन हेजेमिठाच होय। हर म्या कोरो डीचके डोगेचबा, एठा जो कुरकू नी डीचके घोच्केनेच डा, दिकुभी यीशु मसीह के हेजे लठ्ठाका डोगेचबा। पृथ्वी गा सेबाई कुरकू जोर-जोर टे जाम्बा जब दिकु डीचके डोगेचबा, हें, येनोगो डाऊवा! आमीन।

⁸ प्रभु परमेश्वर मंडीवा होय, “इंज अल्फा एठा ओमेगा मेना, जो कि पेला एठा आखरी होय। सर्वशक्तीमान, जो हमेशा टे डा, एठा जो आए भी होय एठा जो हेजेमिठाच होय।”

यूहन्ना के मसीह गा दर्शन

⁹ इंज यूहन्ना, आपेगा विश्वासी डाई मेना, एठा यीशु गा सेंग्गोन आलेगा रिश्ता गा वाजाटे इंज आपेगा सेंग्गोन परमेश्वर गा राज्य गेन, कष्टनौर गेन, एठा दिकुके सेसेहेन गा शक्ती गेन सेंग्गो मेना, इंज परमेश्वर गा खाबोर घागल एठा यीशु मसीह गा बारेन प्रचार दडा गा वाजा पतमुस जीमू टापू गेन केटके डा।

¹⁰ एठा इतवार गा जो परमेश्वर गा दिन होय, पवित्र आत्मा नी इंजा अगुवाई डाके एठा इंज्नी पिंगी गा आवाज खिजा म्या खाट आवाज इंजा टाऊटे इनी मंडीटे आजुम्के।

¹¹ डीचनी इंजाटे मंडीके, “जो चोच्काभी आम दोडोवा होय, डीके पुस्तक गेन ओलटे याई मसीह गा मंडलीनौर गा मेरान कुलकी, जो इनी शहरनौर गेन होय, इफिसुस शहर, स्मुरना शहर, पिर्गमुन शहर, थुआतीरा, सरदिस शहर, फिलादिलफिया, एठा लौदीकिया पुरा।”

¹² मेटे इंज्नी डीचके, जो इंजाटे मंडी लक्के डा, दोडो गा घल्जी हेजा म्वार मुराके एठा टाउन इखाट टे इंज्नी सोना गा याई टेकना डोके।

¹³ एठा डी टेकना गा तालान म्या कोरो के डोकेनेच। जो म्या लम्बा बल्ला कपळे उरिके मेना डा, जो दियागा नंगा टाएन आदिरु डा, एठा हेजा साती लिंजेन सोना रेंग्गो गा पट्टा उरिके डा।

¹⁴ दियागा हुफ कपुसो एठा बरप गा खिजा भेबाव पुलूम डा, एठा दियागा मेट सिंगेल गा पेटेच गा खिजा डा।

¹⁵ दियागा नंगा भेट्टी गेन चाटागु मिनी पितरा गा खिजा चमकातिंजू लक्के डा, एठा जब डीच मंडीके मेटे दियागा आवाज भेबाव जोरदार डा जैसा चोटोका गडानौर गा आवाज तेजो टे आडी लक्के होय।

¹⁶ डीच हेजा जेवना टी गेन याई इफिलकु साटे डा, एठा दियागा चाभु टे ओटके वचन तेजो धारी तलवार खिजा डा। एठा दियागा चेहरा डया गा ताला गा टेमो चमकातिंजू मिनी सूर्य गा खिजा चमकातिंजू लक्के डा।

¹⁷ जब इंज्नी डीचके डोकेनेच, मेटे दियागा नंगा लिंजेन मुर्दकु गा रोंगो बोचोएन, पेनो डीचनी इंजा लिंजेन हेजा जेवना टी धोटे इनी मंडीके, “बाकी हिगरा,” इंज अल्फा एठा ओमेगा मेना, जो कि पेला एठा आखरी होय,, एठा इंज डीचका मेना जो जीवन जिऊवा होय,

¹⁸ इंज गोएन मेना डा, पेनो नका जीटाका मेना, एठा इंज हमेशा जीटाका थंदळवा, इंजा मेरान गुजू एठा पातल गा भी हाक होय।

¹⁹ इनिघल्जी आम इनी सेबाई चीजो के पुस्तक गेन ओलकी डीके आम नका दोडो लक्के होय, एठा डी चीजो जो पक्का रुपोटे डी सेबाई हेजे मिनी टेमो गेन डाऊ मिनी होय।

²⁰ नका इंज घालेवा कि इंजा जेवना टी गा याई इफिलकु गा चोच मतलब होय, एठा सोना गा याई बत्तीनौर गा मतलब चोच होय, जो कि पेला मालूम बाऊ डा। येनेगा मतलब इनी होय, याई इफिलकु डी स्वर्गदूतकु के दर्शातिंजेवा होय जो याई मसीह गा मंडलीनौर गा रखवाली दडावा होय, एठा याई बत्ती याई मसीह गा मंडलीनौर के दर्शातिंजेवा होय।