फिलेमोन 1 - गवली उनाई नियम

ओलबा

^1-2 इंज पौलुस, जो मसीह यीशु गा प्रचार गा वोजीटे जेलेन केटके मेना एठा आलेगा विश्वासी डाई तीमुथियुस टे भी, जो इंजा सोप्ती एठा सेंग्गो जिऊमिठाच होय, फिलेमोन के एठा आलेगा विश्वासी बोकजाई आफिया के एठा आलेगा सोप्तीकु सैनिक अरखिप्पुस एठा फिलेमोन गा उरान म्याजगाऊ मिनी मसीह गा मंडली के इनी पत्र ओल लक्के मेना।

³ इंज प्रार्थना दडावा मेना कि आलेगा परमेश्वर बाटे एठा प्रभु यीशु मसीह गा कोनेटे कृपा एठा शांती आपेन घाटाऊ लाज्जू।

धन्यवाद एठा प्रार्थना

⁴ इंजा डाई फिलेमोन, जब भी इंज अमागा घल्जी प्रार्थना दडावा मेना, इंज हमेशा अमागा घल्जी परमेश्वर गा धन्यवाद दडावा मेना।

⁵ इनिघल्जी इंज प्रभु यीशु मसीह गेन अमागा विश्वास एठा परमेश्वर गा सेबाई चोखरा कुरकू गा घल्जी अमागा प्यार गा बारेन आजुम्बा मेना।

⁶ इंज प्रार्थना दडावा मेना, कि आम खुद आपना विश्वास के कखितिंजेन अला भलायु, ताकी आम सेबाई रोंगो टे डी सेबाई अच्छा चीजो के समझातिन्जे, जो परमेश्वर नी जिले होय, एठा एनेगा द्वारा कुरकू गेन मसीह गा महिमा डाऊवा।

⁷ अच्छा डाई, इंज दूसराकु गा प्रति अमा प्यार टे भेबाव खुशोके एठा आराकी मेना, चोयाकी दूसराकु गा प्रति अमा प्यार गा वोजीटे परमेश्वर गा कुरकू गा मन ताजाऊवा होय।

उनेसिमुस गा घल्जी बिनती

^8-9 डी हाक गा द्वारा इंज आमके हुकूम जे सकतावा मेना देटे आमेन डेनेगो दडा होना। लेकिन इंज्नी एगो बान दडुका। इनेगा वाजा, इंज आमटे बस इनी दडा गा घल्जी मंडीके मेना, चोयाकी आले इनिज-दियाटे प्यार दडावा होय। इंज, पौलुस नका म्या बुढा कोरो गा रुपोन बिनती दडावा मेना डीके यीशु मसीह गा प्रचार दडा गा वोजीटे जेलेन येंडाकेमी होय।

¹⁰ इंज उनेसिमुस गा घल्जी बिनती दडावा मेना, जो इंजा घल्जी कोण गा रोंगो होय। जब डीच जेल गेन डा मेटे डीच मसीह गेन इंजा कोण हारोयेन।

¹¹ डीच मेटे पेला अमागा तुनिका कामय गा बान डा, पेनो नका अमागा एठा इंजा बार्खिंज गा खाट कामय गा होय।

¹² इंज उनेसिमुस के अमागा मेरान डाबोलटे कुलेच लक्के मेना, डीचके इंज पूरा दिल टे प्यार दडावा मेना।

¹³ इंज डीचके इंजा मदद दडा गा घल्जी येटेन दोडो चाहता डा, चोयाकी इंज अच्छा खाबोर प्रचार दडा गा वोजीटे जेलेनके डा। डीच येटेन इंजा मदद दडा गा घल्जी अमागा जगा सेगे सकतावा होय, चोयाकी इंजेन मालूम होय कि आम इंजा मदद दडा चाहताके होय।

¹⁴ एठाभी, इंज आमके इंजा मदद दडा गा घल्जी पापक्का बान चाहता। बल्कि, इंज चाहता कि आम इनिके आपना मर्जी टे डाए। इनिघल्जी जब टाएन आम सहमत बान डाऊ इंज चोचका बान डाए।

¹⁵ जब उनेसिमुस आमटे लंक्किन साळुपजे, शायद परमेश्वर नी एगो दडाईके। डीचनी आमके थोडा टेमो गा घल्जी आराकेमी ताकी आम डीचके हमेशा गा घल्जी डाबोलटे घाटायु होना।

¹⁶ नका आम डीचके बस आपना भाग्य बाकी समझातिंज। डीच म्या भाग्य टे खाट्टे-खाट होय। डीच नका म्या विश्वासी डाई होय डीचटे आम प्यार डोए सकतवा होय। इंज दियाटे घोनेच दडावा मेना, लेकिन आमके डीचके अमागा भाग्य गा रुपोन एठाभी ज्यादा प्यार दडा होना, चोयाकी डीच मसीह गेन प्रिय डाई होय।

फिलेमोन गा हुकूमनौर टे खुशोके

¹⁷ अगर आम इंज्के अमागा बेल्लाटे समझतिंजेवा होय, जब उनेसिमुस अमागा मेरान डाबोलटे हेजेवा होय, मेटे दियागा सेंग्गोन डीका नम्र टे लेन-देन डाए, जैसा इंजा सेंग्गोन लेन-देन दडावा होय।

¹⁸ एठा अगर डीचनी अमागा चोच्का नुकसान डाके होय, या डीच तुनिका चीजो गा घल्जी कर्जदार होय, मेटे इंज दियागा घल्जी फिटागेवा

¹⁹ इंज, पौलुस इंजागा टी टे ओलेवा होय, कि इंज आमके डाबोलटे भेट्टेवा। एठाभी इंज आमटे येटेन चर्चा डाए सकतवा मेना, कि उनेसिमुस टे भी ज्यादा इंजा आम लिंजेन एहसान होय, चोयाकी आपेनी इंजा का होय।

²⁰ हे प्रिय डाई, येटेन खुशी इंजेन मसीह गेन अमागा कोनेटे घाटाके, इनिघल्जी विश्वासी डाई गा रुपोन इंज्के हारीकेमी होय।

²¹ इंज्नी आमके इनी पत्र ओलके होय, चोयाकी इंजेन विश्वास होय कि आम डीका डाएवा जो इंज अमाटे मंडेबा एठा दियाटे चोटोका घोनेच डाएवा।

²² म्या एठा बातो, कि इंज्के अमागा उरा गेन रुकातिंजू गा घल्जी म्या खुली तैयारकी। चोयाकी इंजेन आसा होय कि परमेश्वर अमागा प्रार्थना गा जवाब जेबा एठा इंज्के अमागा मेरान हेज डाएवा एठा आले डाबोलटे मिलतिंजूवा।

अखिरीन शुभकामनानौर

²³ इपफ्रास जो इंजा सेंग्गोन जेल गेन होय, चोयाकी डीच यीशु मसीह गा बारेन प्रचार दडावा होय, डीच आमके नमस्कार दडावा होय।

²⁴ एठा मरकुस एठा अरिस्तर्खुस एठा देमास एठा लूका जो इंजागा सेंग्गोन प्रभु गा कामय दडावा होय, इंकू कोनेटे आमके नमस्कार।

²⁵ आलेगा प्रभु यीशु मसीह गा कृपा आपे लिंजेन आरुका थंदळकु। आमीन।