ಮಾರ್ಕ್ 4 - गवली उनाई नियम

बीजो बिबीट मिठाच गा उदाहरण

¹ यीशु डबोलटे गलील समुद्र गा धुरान इथू लज्जे, एठा एगो खाट गर्दी दियागा मेरान घोलाएन। घोनेच गर्दी गा वोजीटे देटेन डोंगा लिंजेन पेळेन एठा सुबानजे। एठा कुरकू पूरा गर्दी वोटे लिंजेन समुद्र गा धुरान नी टेगेनके डा।

² एठा डीचनी दिकुके उदाहरणेन नी घोनेचका बातो इथूकु लक्के डा। एठा इथूनका गघाल लज्जे दिकुके मंडीके,

³ “आजुमे!, म्या खिटी कोरो हेजा खिटीन बीजो बिबीट ओले।

⁴ एठा बीजो बिबीट टेमो अदा बीजो कोरा गा धुरान बोचोयेन, एठा भूरिकुनी हेके डो डीके कलमजे।

⁵ अदा बीजो मोरोम वोटेन लिंजेन बोचोयेन देडेन दिजेन घोनेच कासा बान घाटाडुका, चोयाकी कासा घोनेच बाऊ डा इनिघल्जी जलदिका वोट्जे।

⁶ एठा मेटे घामो पेळेन डो कोम्बो ओठ्जेडो जुलजे, चोयाकी डेगा जळी इटान बान सेंडुका इनिघल्जी डेगा कोम्बो ळोखोळजे।

⁷ अदा बीजो एगो जगान जानोम झाळीन बाळातिन्जू लक्के डा, एठा जानोम नी खाटजे डो डीके दबातिंजकेनेच, एठा देडेन जौ बाने।

⁸ पेनो अदा अच्छा ओटेन बोचोयेन, एठा इनी बीजो वोट्जे एठा घोनेच बीजो वोटजे अदा तीसो गुना बीजो वोट्जे अदा साठो गुना, सौ गुना।”

⁹ एठा दिच्नी मंडीके, “जो जेकाभी जो इनी बातो के आजुमबा होय जो इन्जा मंडीवा, डीके सामझातिन्जू गा कोशिश डाए।”

उदाहरण गा म्या लक्ष

¹⁰ जब यीशु एकला थांदळे, अदा कुरकू, एठा दियागा बारह चेलाकू दिया मेरान हेन डो कोम्बाराके, उदाहरण गा चोच मतलब होय?

¹¹ डीचनी दिकुटे मंडीके “परमेश्वर नी हेजा राज्य गा बारेन सच्चाई आपेके घालके होय, पेनो दिकुके जो इन्जा लिंजेन विश्वास बान दोडो इनी सेबाई मंडी उदाहरणेन मांडेवा।”

¹² इनिघल्जी डेनोगोका चोखरा बईबाल मंडीवा होय, “दिकु दोडो गेन डोके एठा दिकुन दोडुका एठा मिठाच आजुमे एठा बान समजातिन्जदुका, एंगो बाकी डाऊ दिकु पापो टे इखाडे, एठा मापोएबा।”

खिटी बिबीट मिठाच गा उदाहरण के घागल

¹³ डबोलटे यीशु नी दिकुटे मंडीके, “अगर आपे इनी उदाहरण के बान समझातिंजू, डो आपे दूसरा उदाहरण के भी बान समझातिंज डाये।”

¹⁴ खिटी बीजो बिबीटवा होय जो परमेश्वर राज्य गा वचन गा खाबोर गघाल गा रुपोन डेका रोंगो होय,

¹⁵ अदा कुरकू एनोगो होय दियागा रोंगो डी बीजो टे डाएवा होय जो कोरा गा धुरान बोचोके, डीच परमेश्वर गा वचन जारूर टेका आजोम्बा पेनो शैतान हेजेवा एठा डीचके टूलटे सेगेवा।

¹⁶ अदा कुरकू डेका रेंगो डी बीजो टे डायेबा होय जो मोरोम ओटेन बोचोएन होय, जो चोटोका बार वचन के आजुमटे खुशीटे मनातिंजेज्बा।

¹⁷ पेनो वचननी दिकु तालान ठायका जळी बान उठाडुका इनीघांजी जब वचन गा वोजीटे दिकु लिंजेन मुश्किल हेजेवा मेटे दिकु खेडा जोम्टे बोचोवा।

¹⁸ अदा कुरकू रोंगो डी दाना टे डाएवा जो जानोम झाळीन बोचोएन, जो कोरो परमेश्वर गा वचन आजुम्के,

¹⁹ पेनो इनी जीवन गा चिंतान, एठा डामा घाल्जी प्यार एठा अलग्गो चीजो चाहतावा दिकुगा जीवनेन मुवा होय एठा परमेश्वर गा वचन गेन मुश्किल येंडाएवा इनिघल्जी डीच फल गा गेल्ला जीवन बान बिबातातिंज्बा।

²⁰ अदा कुरकू रोंगो डी कोरो गेल्ला डाके जो अच्छा ओटेन बोचोके, जो परमेश्वर वचन रोंगो फल सेगेवा होय, तुनिका तीसो गुना, तुनिका साठो गुना, तुनिका सौ गुना।

दिवा गा उदाहरण

²¹ यीशु नी म्या एठा उदाहरण घालटे मंडीके, “चोच जेकभी म्या दिवा के जुलटे डीके म्या टोपला इटान डोएबा एनोगोका उजालाके उखोएवा? बिलकुल बाऊ। म्या दिवा के म्या कोंडाळन डोएबा होय, एनेटे दिज्यागा उजाल चामकतिंजूवा।

²² इन्जा इनी मंडी गा मतलब होय, परमेश्वर हरेका डी मंडीके वोड़ेवा देगो कुरकू बान हाडाई डी डीके मंडीके एसास जेबा जो आय टाएन उखुके होय।

²³ जेकाभी जो इनी बातो के आजुमबा होय जो इंज मंडीवा, डीके सामझातिंजू गा कोशिश डाए।”

²⁴ डबोलटे यीशु नी दिकुटे मंडीके, “ध्यान टे आजुमे! डिकारोंगो आपे दूसराकु गेल्ला व्यवहार दडावा होय डिकारोंगो आपेगा सेंग्गोन व्यवहार डाएवा एठा देटेभी बुरा व्यवहार डाएवा।”

²⁵ चोयाकी दियागा तालान समझातिंजू गा इच्छा तक होय, परमेश्वर डीचके एठाभी समझातिंजे गा जेबा। मेटेनी इनी समझातिंजू गा इच्छा बान दोडो, कि इंज चोच इथूलक्के होय, डो दियागा मेरान जो समजा होय, परमेश्वर दियाटे डी भी सेगेवा।

वोट मिनी बीजो गा उदाहरण

²⁶ मेटे यीशु नी मंडीके, “परमेश्वर गा राज्यन एगो होय देगोका म्या खिटी मिठाच खिटीन बीजो के बिडेवा होय,

²⁷ रातोभर डी खिटी मिठाच गिटीच्बा होय एठा दिनभर डीच कामयवा। एठा बीजो कोम्बोउवा होय एठा दिनभर झटटोका, एठा देडेन बीजो एगो वोट्जे एठा खाट्जे कि देडेन बान हडाई।

²⁸ एटेन ओटेका होय जो बीजो के ओडेवा होय एठा सिंज खाडेवा होय मेटे देटेन आनाजो डाऊवा, पेला कोम्बो, मेटे गुं गेलेन, एठा दाना घाठेन।

²⁹ अखिरीन, जब आनाजो सेबाई रोंगो टे कराएन होय, तुरुटो खिटी मिठाच कुरकू के आनाजोके हिर घाल्जी कुल्कुवा होय चोयाकी हिरगा टेमो हेन होय।” मेटे दाना कराएन होय, मेटे देडेन तुरुटो दठोम घाटाऊवा होय, चोयाकी आनाजो हिर घांजी हेके।

राई गा दाना गा उदाहरण

³⁰ डबोलटे यीशु नी मंडीके, “इंज परमेश्वर गा राज्यन गा डे रोंगो इनी तुनी चीजो टे डाए? इनी उदाहरण गा वोजीटे एनेगा बराबोर डाएवा।

³¹ परमेश्वर गा राज्य एगो होय म्या कोरो सनी राई गा दान साटे ओटेन बिबीटवा होय।

³² पेनो जब बीजो ओटे बिटके मेना, मेटे खिटीन सेबाई सिंजाटे डी ठायका खाटबेळे सिंज आरोएन, डेगा एगो खापेट डांगोल वोटजे, बदळा भूरिकु भी डेगा सहलीन थंदळ मिंकू डांगोलेन दिकुगा बुदिली हारोय सकतावा।”

³³ एठा यीशु नी दिकुके एगो-एगो घोनेचका उदाहरण घल्के देटोका दिकुगा समझातिंजे डा।

³⁴ डीच गर्दी बस उदाहरण वोजीटे का इथू डा, पेनो हेजे चेलाकूके सेबाई मंडी गा मतलब एकलान घाले डा।

यीशु गा कोयो धुंदळ के शान्तेवा

³⁵ डी दिनेन मेटे सिंगुरूप गा टेमो यीशु नी हेजा चेलाकू टे मंडीके, “हेजे गलील गा समुद्र गा हुधेळेन बो।”

³⁶ एठा चेलाकूनी गर्दी के सेने मेंके एठा दिकु यीशु सेंग्गोन डोंगान सुबानजेडो ओले। एठा चोटोका डोंगा लिंजेन कुरकू दिया टाउन ओले।

³⁷ जब दिकु समुद्र टे हुधेळेन चेल्के डा, म्या खाट कोयो धुंदळ हेके, एठा डा लपा डोंगा लिंजेन घाई लज्जे डोंगा डा टे भेटटेन एठा डोंगा नामुजू डा।

³⁸ एठा यीशु डोंगा गा टाऊ देळेन म्या गद्दी लिजेन गिटीचके डा, एठा मेटे चेलाकूनी यीशु के बिटकेनेच डो मंडीके, “हे गुरु, डोंगा नामुजू लक्के होय एठा आमेन चोचका चिंता बाऊ।”

³⁹ मेटे डीचनी बिटजे डो तूफान के कल्लाकेनेच, एठा डा लपा के मंडीके, “कायोमे, डो टेगेनजे!” मेटे तूफान सेन्द्रा बानदोएन, एठा समुद्रा कायोम जे।

⁴⁰ एठा यीशु नी चेलाकू टे कोम्बाराके, “आपे चोया हिघरावा? चोच आपेन आए टाएन भी विश्वास बाऊ?”

⁴¹ एठा चेलाकू भेवा हिगराएन हिकुका मंडीके, “इनीच तुनी कोरो होय? येदे टाएन कि कोयो एठा लपा भी दियागा हुकूम गा रोंगो दडावा होय।”