ಮಾರ್ಕ್ 3 - गवली उनाई नियम

लूला टी मिठाच कोरो के सासजा

¹ डबोलटे यीशु टे आराधना जगा नी ओले। देडेन म्या कोरो डा दियागा टी लूला डा।

² आराधना जगान नी अदा फरीसि कुरकू यीशु लिजेन आनोवा टोकाके डा म्या वाजा घागटा लक्के डा। इनीघाल्जी दिकु यीशु के ध्यान टे दोडो लक्के डा, दिकु डीचके परमेश्वर गा चोखरा दिनेन सजाएच्बा कि बाने।

³ यीशु नी लूला टी मिठाच कोरो टे मंडीके, “सेबाई कुरकू तालान तेगेन्जू म्हणजे आमके कुरकू डोयामी होना।”

⁴ एठा डीचनी कोम्बराके मूसा गा नियम रोंगो, “चोच परमेश्वर आलेके दियागा गा चोखरा दिन कुरकू गा भालाई दडा हुकूम जेबा या बुरा दडा गा? चोच दिकु आलेके जेगा जीवन बबाचातिंज गा हुकूम जेबा होय या डीचके घोगेच्जा?” पेनो इनी कुरकू कायोमके।

⁵ एठा यीशु खिजोएन, जब यीशु दिकु कोने डोके भेवा नराजोके डा चोयाकी दिकुनी यीशु गा सेंग्गोन बान आजुम्गा इन्कारके। एठा डी कोरो टे मंडीके, “अमा टी इंज कोनेन बळातिंज्के।” डी कोरोनी यीशु कोनेन बळातिंज्के एठा दिज्या टी साजायेन।

⁶ मेटे फरीसि कुरकू बल्लान ओले तुरुटो हेरोदेस राजा गा साथो जिऊमिंकू सेंग्गोन बेल्लाटे योजना आरु लज्जे कि यीशु के चोफर टे घोजेचबा।

घोंजा गा यीशु मेरान हेजे

⁷ एनेगा बादोन यीशु हेजा गा चेलाकू सेंग्गोन कुरकू टे लेंक्कीन गलील समुद्र गा धुरान ओले। एठा गलील जिल्हा गा टे कुरकू गा म्या खाट गर्दी दियागा टाऊटे ओले।

⁸ दिकु कुरकू यरूशलेम शहर, एठा यहूदिया जिल्हा गा अलग्गो पुराटे, एठा इदूमिया जिल्हान, एठा यरदन गडान गा पूर्वा कोणटे, एठा सोर एठा सैदा शहरेन गा आसो पासो टे कुरकू गा म्या गर्दी इनी आजुमटे दिया मेरान हेन। कि यीशु टोनोंगो अचाम्बो कमाय दडा लक्के डा।

⁹ एठा यीशु नी हेजा चेलाकू टे मंडीके, “इंज्के सुबान घल्जी म्या सनीसा डोंगा साली, म्हणजे इंज्के कुरकू तलान दाबातिंजू बाकी होना।”

¹⁰ चोयाकी यीशु घोनेच कुरकू के साजकु डा। इनिघल्जी जो कुरकू बीमारडा, डीचके उठा घाल्जी सोडू डा।

¹¹ जब भी भूतोकु मुके कुरकू डिच्के दोडोवा, दिकु दिज्या सम्मान डिच्के मानजिउगा घाल्जी सोटजू। एठा इनी मंडी डोन चिल्लतिंजू डोन कि अमा परमेश्वर गा कोणटे होय।

¹² एठा यीशु नी दिकुके खट्टेका चतारायकेकू एठा मंडीके, “जेकाकेभी बाकी गघाल कि इंज परमेश्वर गा कोण होय।”

यीशु व्दारा बारा चेलाकू कलमके मिंकू

¹³ इने बदोन, यीशु मेरा गा म्या टुक्की लिजेन ओले एठा डी कोरोकु के मेरान हाकोलेकु। दिकुके डीचनी हेजा चेला हारूघल्जी कलमके डा। एठा दिकु डी गर्दी टे दिया मेरान हेके।

¹⁴ मेटे डीचनी दिकु तलाटे बारह कोरोकु के कलामके मिंकू चेलाकू घल्जी ठहरातिंजकेकु, यीशु इनिघल्जी डाके, ताकी डीच दियागा सथोन थंदळवा, एठा देटेन खाबोर गघाल घल्जी कुलकेकु।

¹⁵ एठा यीशु नी चेलाकूके भूतोकुके कोखाला गा हाकगेल्ला डोकी।

¹⁶ एठा दिकु बारह चेलाकू होय, दिकुके यीशु कलमके डा, शमौन दियागा जीमू डीचनी पतरस डोके।

¹⁷ एठा जब्दी गा कोणटे याकूब एठा याकूब गा डाईटे यूहन्ना डिय गा जीमू डीचनी बुअनरगिस मतलब बरसातिंजू कुला गा खीजो आवाज एठा बाणतो बरसातिन्जुवा गा कोणटे डोके।

¹⁸ एठा अन्द्रियास एठा फिलिप्पुस एठा बरतुल्मै एठा मत्ती एठा थोमा एठा हलफईस गा कोणटे याकूब एठा तद्दै एठा शमौन कनानी।

¹⁹ एठा यहूदा इस्करियोती डीचनी यीशु के दुश्मान गा टीन उठाकेनेच डा।

यीशु एठा शैतान

²⁰ जब यीशु हेजा चेलाकू सेंग्गोन हेजा उरान हेन, एठा देडेन खाट गर्दी जमाएन, कि डीच आटा भी बान जोमडुका।

²¹ जब दियागा सगाकु दियागा कमाय गा बारेन इनी आजुम्के, चोयाकी कुरकू मंडी डा, दियागा दिमाग होशोन बाऊ डा, इनिघल्जी दिकु डीचके उरान सा कोशिश लक्के डा।

²² एठा मूसा गा नियम इथूमिठाच गा गुरजी जो यरूशलेम शहर टे, इनी मंडी डा, “दिजेन शैतान होय, डीच भूतोकु गा मुख्या, शैतान गा शक्तीटे भूतोकुके कोलाकुवा होय।”

²³ एठा यीशु दिकुके मेरान हाकोटे, दिकुटे उदाहरणेन नी मंडी लक्के, “शैतान चोलाकाभी हेजाका भूतोकुके कुरकू टे बल्लान बान ओट,

²⁴ अगर म्या देशो गा कुरकू इकु इकुका लाडाई टासो मेटे दिकुगा देशो नशोऊबा।”

²⁵ एठा अगर म्या सगाकु गा कुरकू एक-मेग गा खिलाफबेन जू, डो इनी सगाकु म्या सथोन बान थंदळ।

²⁶ अगर शैतान हेजाका खिलाफबेन लाडाई डाये टासो, मेटे डीच आरु बान थंदळ, एठा डीच नशोऊबा,

²⁷ एठा यीशु नी शैतान गा बाराबोर म्या ताखातदार कोरो टे डाके डिजा मेरान म्या उरा होय, म्या कोरो के पेला डी ताखातदार कोरो तोटोल होना, बस मेटे दियागा उरा मुवा, दियागा डामा कोरो टे डामा सेगेवा डो उराके लुतातिन्जेवा।

²⁸ “इंज आपेटे सच्चो मंडीवा कुरकू गा सेबाई पापो एठा बुराई जो परमेश्वर या तुनिका कोरो खिलाफबेन दडावा होय, दिकुगा मापोऊ बाने होय।”

²⁹ पेनो जो जेकाभी पवित्र आत्मा गा खिलाफबेन मंडीवा? मेटे परमेश्वर डी कोरो के चोलाकाभी मापोऊ बाने होय, “एठा परमेश्वर डी कोरो हमेशा का घाल्जी पापो आंडाएबा।”

³⁰ चोयाकी दिकु इनी मंडी डा, कि दिजेन भूतोकु भेटटीके होय।

यीशु गा आंटे एठा डाई

³¹ डबोलटे यीशु आंटे एठा दियागा सनी बोकोकु सेंग्गोन हेन, दिकु बल्लान तेगेनटे जेकाकेभी डीचके तालन हाको कुल्केनेच।

³² मेटे गर्दी दियागा आजू-बाजुन सुबानके डा, एठा डीचनी दियाटे मंडीके, “डोगे, अमागा आंटे एठा आपेगा सनी बोको आमके बल्लान हाको लक्के।”

³³ यीशु नी डिचके नी जवाब जीके, “इंजा आंटे एठा इंजा सनी बोको जे होय?”

³⁴ एठा दिच्नी दिकु लिंजेन जो डिय गा आसो पासोन सुबानके डा, नजर येंडाटे मंडीके, “डोगे, इंजा आंटे एठा इंजा डाई इनकू होय,

³⁵ चोयाकी जो परमेश्वर गा इच्छा लिंजेन सेंद्रावा, देडेन इंजगा सनी बोको, एठा बोकोजाई, एठा आंटे होय।”