ಮಾರ್ಕ್ 2 - गवली उनाई नियम

यीशु गा व्दारा टे लखवा गा बिमारी के सासजा

¹ चोटोका दिन बदोन, यीशु कफरनहूम पुरान डाबोलटे हेन। एठा डेगा कुरकू मालूमजेकी यीशु डी उरान डाबोलटे हेन।

² एठा घोनेच कुरकू जामाएन इनी कारण पूरा उरान कुरकू भेट्टेन। एटो टाएन कि दराजो गा बल्ला दारोमेन कुरकू टे भेटटीके डा, एठा यीशु दिकु तलान नी परमेश्वर गा वचन गा खाबोर गघाल लक्के डा।

³ एठा अदा कुरकू म्या लखवा गा बिमारी कोरो के दिकुगा, डी उफुन कुरकू नी टूलटे डीचके यीशु मेरान सालेनेच।

⁴ पेनो गर्दी गा वोजीटे दियागा मेरान बान आदिरडुका। मेटे दिकुनी डी कोरो के जो पदळी इटान यीशु डा डी पदळी खुल्लाटे कोरा आरुके, डी कोरो के चाटाई के उफुन भी कोनाटे टोलटे इटान आराम्बोटे आगुरुकेनेच।

⁵ मेटे यीशु नी डी उफुन कुरकू गा विश्वास डोके मेटे देटेन डी लखवा गा बिमारी कोरो के मंडीके, “हे सोपती, इंज आमगा पापो के मापोएबा होय।”

⁶ जब घोनेच मूसा गा नियम इथूमिठाच जो डी उरान सुबानके डा, जो चोचकाभी यीशु नी मंडीके डेगा विषय के दिकु इकुका मनेन बिचार लज्जे,

⁷ “इनी कुरकू एनोगो बाकी मंडी होना डा! चोयाकी एनोगो मंडीटे इनी कोरो परमेश्वर गा खिलाफबेन दडावा होय। परमेश्वर आराटे जेकाभी पापो के मापोए बाने।”

⁸ तुरुटो यीशु नी चिनाटे डा कि दिकु चोच बिचार लक्के। एठा यीशु नी दिकुके मंडीके, “आपेन एनोगो बाकी बिचार होना डा।”

⁹ चोच इंजेन लखवा गा बिमारी मिठाच के इनी मंडी असान होय? “कि अमागा पापो के मापोएबा होय।” देटेन इनी मंडीकी एठाभी असान होय, “कि बिडे डो, अमागा चाटाई टूले, डो सेंद्राए?”

¹⁰ “पेनो इंज मेन्बाकी आपे चिनाए कि इंज कोरो गा कोण पृथ्वी लिंजेन पापो गा मापो जिऊ गा हाक दोडोवा।” मेटे यीशु नी लखवा गा बिमारी मिठाच के मंडीके,

¹¹ “इंज अमाटे मंडीवा होय, बिडे डो, अमागा चटाई टूलटे अमा उरान सेने।”

¹² डीका टेमोन इनी कोरो बिटजे, डीचनी हेजे चटाई टूलटे हेजा उरान ओले, सेबाई कुरकू डीचके दोडो लक्के डा, एठा हैरानजे, एठा परमेश्वर गा जीमू रिमे लज्जे कि डाटे मंडी लज्जे, “आले एनोगो चोलाका बान दोडुका।”

यीशु व्दारा मत्ती के हाको

¹³ यीशु हेजा उफुन चेलाकू सेंग्गोन म्या ठेको डबोलटे गलील गा समुद्र गा धुराटे ओले। एठा घोनेच कुरकू दियागा मेरान हेन एठा यीशु दिकुके परमेश्वर गा वचन इथू लज्जे।

¹⁴ डेगा बादोन जब यीशु चेल्के डा, मेटे डीचनी लेवी जीमू गा म्या कोरो डोकेनेच दियागा दूसरा जीमू मत्ती डा। दिया बाटे जीमू हलफाईस डा, डीच उरा गा टेक्सा सा डा, डीच हेजा गा टेक्सा सा गा नका जगान सुबानटे डोकेनेच, एठा यीशु नी डीचके मंडीके, “इंजा चेला आरु घाल्जी इंजा गेल्ला हेजे।” एठा लेवी टेंगेनजे हेजा कमाय गा जगा आराटे एठा यीशु गा चेला आरु घाल्जी इंजा टाऊटे हेजे।

¹⁵ एठा थोळासा दिन गा बादोन यीशु एठा दियागा चेलाकू लेवी गा उरान आटाजोम लक्के डा। एठा घोनेच टेक्सा सा मिंकू एठा अलग्गो कुरकू डीचके पापी मेंडडा डी कुरकू डी उरानके डा, एठा डीच भी दिकु गेल्ला आटाजोम लक्के डा, चोयाकी दिकु सेबाईकु यीशु गा टाऊटे ओले।

¹⁶ येटेन डोके कि मूसा गा नियम इथूमिठाच कुरकू दिकुके जो फरीसि कुरकू डा। दिकुनी इनी डोके डा देटेन पापीकु एठा टेक्सा असिमिनकू गा सथोन आटा जोजोम लक्के होय। दियागा चेलाकू टे मंडीके, “देटेन नी टेक्सा असिमिनकू एठा पापीकु गा सथोन नी जोम्बा डो नुनूवा होय!”

¹⁷ जब यीशु नी इनी आजुमटे दिकुके मंडीके, “सजा कुरकून जळीबुटी जिऊ कोरो जारुरत बाऊ पेनो बिमरी कुरकून जारुरत होय। इंज डी कुरकू के हाको घल्जी बान हेजडुका जो खुदकेका धर्मी मेन्बा, पेनो डी कुरकू के मन बदलाए गा घल्जी हाको हेन जो पापी होय।”

उपासो टे जूळातिन्ज के प्रश्न

¹⁸ यूहन्ना गा चेलाकू, एठा फरीसि कुरकू बिना आटा जोजोम उपासो दोडो डा। एठा म्या दिन थोडा कुरकू यीशु गा मेरान हेन डो कोम्बाराके, “दिकुनी हेके डो एठा डियटे येदेन मंडीके, यूहन्ना गा चेलाकू एठा फरीसि कुरकू चोया बिना आटा जोमा गा उपसो दोडो डा, पेनो अमागा चेलाकू उपसो बान दोडो?”

¹⁹ यीशु नी दिकुटे मंडीके, “जब टाएन इंज इंजागा चेलाकू सथोन होय, दिकु बिना जोम गा उपसो बान दोडो, चोयाकी दिकु खुशी ममानातिंजबा होय। डेनोगोका नावरा गा सोपतीकु दियागा सथोन ब्याह गेन खुशी मानतिंजे लक्के होय।”

²⁰ पेनो एगो दिन हेजेवा, जब नावरा दिकु सेंग्गोन बान थंदळ डी टेमो बिना आटाजोम उपसो डोएबा।

²¹ अगर इंजगा शिक्षा के जुना रितो टे बेल्लाएवा, डो एगो डायेबा जुना आंगी मठान उनाई आंगी ठिगरा जुळतिन्जकी। उनाई ठिगरा टोरमेडेबा एठा आंगी त्याकिवा। इंजा शिक्षा इनी आंगी गा रोंगो बेकारजुवा।

²² उनाई अंगूर गा रेस्सो के जुना कातळे गा झोरान जेकाभी बान दोडो, बान तो अंगूर रेस्सो जुना कातळे झोरा टयागेवा, एठा अंगूर गा रेस्सो बाएरा भी खराबोउवा, पेनो उनाई अंगूर गा रेस्सो उनाई कातळे झोरान भेटटेवा होय।

यीशु चोखरा दिन गा प्रभु

²³ परमेश्वर गा म्या चोखरा दिन, जब यीशु दियागा चेलाकू खिटीनींजटे चेल्के डा मेटे दियागा चेलाकू गुंहू गा जौ देडेज लज्जे डो जोजोम लज्जे।

²⁴ मेटे अदा फरीसि कुरकू नी यीशु टे मंडीके, “डोगे, अमा चेलाकू एनोगो कामय चोया दाडावा? जो मूसा गा नियम गा रोंगो परमेश्वर गा चोखरा दिनेन दडा सही बाऊ होय?”

²⁵ यीशु नी दिकुके मंडीके, “चोच आपेनी बान पळातिनज्दुका घोनेच टेमो पेला आलेगा खापेट जुनाकु दाऊद नी चोच डाके जब दियागा सोपतीकु रांगेजका डा।”

²⁶ डी टेमोन अब्बियातार परमेश्वर गा खाटयाजक डा। मेटे दाऊद बेल्लाउमिनी परमेश्वर गा डेरान ओले डी सोकळाके जोफे जो परमेश्वर के भार जीटे पेळेचके एठा हेजा गा सोपतीकूके जीके। जो मूसा नियम गा रोंगो बस परमेश्वर गा याजककुन का जोजोम गा अनुमति डा।

²⁷ मेटे यीशु नी इनी बातो के मंडी स्याके, परमेश्वर नी हेजा चोखरा दिनके कुरकू गा घाल्जी आरुके होय, पेनो कुरकू के परमेश्वर गा चोखरा दिन गा घाल्जी बान आरुडुका।

²⁸ इनिघल्जी इंज कोरो गा कोण चोखरा दिन गा मठान हाकगेल्ला दोडोवा।