ಮಾರ್ಕ್ 14 - गवली उनाई नियम

यीशु के घोगेजा गा घाल्जी बिचारबा

¹ बरी दिन बदोन यहूदी कुरकू गा फसह गा तिवार बिना खमीर गा तिवार डाऊ मिनी डा। एठा मुख्यायाजक एठा मूसा गा नियम इथूमिठाच इनी बातो के घगाटा लक्के डा, कि यीशु के टोनोगो धोकाटे उठाटे घोजेज्बा।

² पेनो डीच मंडी लक्के डा, “तिवार गा दिन बान उठा एठा बान कुकूठा कही एनोगो बाकी डाऊ कि कुरकून धुम गाळबोळ डायु।”

यीशु गा बेल्लाटे जोम

³ जब यीशु बैतनिय्याह गाँव गेन शमौन कोढया गा उरान आटा जोजोम सुबानके डा मेटे म्या जापाए मेरान संगमरमर गा घोटा आरुके कुप्पीन जटामांसी फुल गा सुकींज सुनूम साटे हेन। एठा कुप्पी टुक्का टे सुकींज सुनूम के यीशु गा कपारेन येंडाके।

⁴ पेनो अदा कुरकू इकुका मनेन खिजोएन एठा म्या बार्खिंजटे गघाल लज्जे, “इनी किमती सुकींज सुनूम गा चोया दिच्नी नाशोके?”

⁵ “चोयाकी इनी किमती सुकींज सुनूम तीन सौ दिनार टे (तीन सौ दिन गा मुंजीरी) अगिरी किमती गेन किजीटे गिरबोकूके कटिंजे डा।” एठा डी जपाएके कल्ला लज्जे।

⁶ यीशु नी मंडीके, “जपाएके कल्लाबाकी, एठा आपे डीचके सतातिन्जेज बाने। दिच्नी एनोगो इंजा गेल्ला अच्छा डाके होय।

⁷ चोयाकी गिरबो आपे गेल्ला हमेशा थंदळवा होय एठा आपे चोला मेंबा मेटे गिरबोकु भलाई डाएवा होय पेनो इंज आपे गेल्ला हमेशा बान थांदळ।

⁸ इनी जपाएनी सुकींज सुनूम इंजा कपारेन येंडाटे। इंजा खबर गेन गळातिंजू गा तैयारी गेन पेलाटेका इंजा कोम्बोरेन ओजोके होय।

⁹ इंज आपेटे सच्चो मंडीवा होय, सेबाई संसार जो तोटेनकभी यीशु गा अच्छा खाबोर प्रचार डाएवा। देडेन इनी जपाए कामय गा चर्चा भी डाऊवा एठा कुरकू डीचके यादोएच्बा।”

यहूदा गा यीशु सथोन विश्वास टुक्काके

¹⁰ मेटे यहूदा इस्करियोती जो यीशु गा बारह चेलाकू तालाटे म्याखोम डा। मुख्यायाजककु गा मेरान ओले, एठा दिकुटे मंडीके कि इंज यीशु के उठा गा आपेके मदत जेबा।

¹¹ डीच इनी आजुमटे खुशोएन एठा डीचके डामा जिऊ गा वादा डावे। एनेगा बादोन यहूदा इस्करियोती यीशु के धोकाटे उठा मौका घगाटा लज्जे।

आखिरी आटाजोम

¹² बरी दिन बादोन, बिना बुलूम सोकडा गा तिवार गा पेला दिन, फसह गा आटा घाल्जी सिळी कोंटे गा बलिदान पेळेच्के, यीशु गा चेलाकूनी दियाटे कोम्बाराके, “आम तुगन मेंबाकी आले सेने एठा अमा घाल्जी फसह तिवार गा आटा आले तैयारे?”

¹³ यीशु नी हेजा चेलाकू तलाटे बार्खिंजके इनी मंडीटे कुलकेकु, “यरूशलेम शहरेन सेने, एठा म्या कोरो डा गा गुंडो तुटूल टे आमेन घाटाऊवा, दियागा टाऊटे सेंजू।

¹⁴ एठा डीच जो उरा सेनेवा डी उरा मालिको टे मांडे गुरु मंडीवा होय, कि इंजगा पाहुनशला तोटेन होय? डेन इंज इंजागा चेलाकू गा सेंग्गोन फसह तिवार गा आटा जोम्बा।

¹⁵ डबोलटे उरा गा मालिको आमके माठा गा म्या सजा सजाका तैयार कोने घलेबा, डीका जगा आलेगा घाल्जी तैयारी डाए।”

¹⁶ मेटे डी बरी चेलाकू ओडजे डो यरूशलेम शहरेन हेन। डेनोगोका यीशु नी दिकुटे मंडीके डा डेनोगोका डोके। एठा देटेन फसह तिवार गा आटा तैयारके होय।

¹⁷ मेटे सिंगुरूपजे मेटेनी यीशु हेजा बराह चेलाकू सेंग्गोन डी उरान हेन।

¹⁸ एठा जब दिकु सुबांके डो आटाजोम लक्के डा। मेटे यीशु नी मंडीके, “इंज आपेटे सच्चो मंडीवा, कि आपे तलाटे म्याखोम जो इंज सेंग्गोन आटाजोम लक्के होय। दिकु इंज्के उठाघल्जी इंजा दुश्मानकु गा मदत डाएवा।”

¹⁹ जब चेलाकूनी इनी आजुम्के मेटे इंकू सेबाईकु उदासोन एठा म्या-म्याखोमटे यीशु टे कोकाम्बारा लज्जे, “चोच डीच इंजा होय?”

²⁰ यीशु नी दिकुटे मंडीके, “आपे तलाटे म्याखोम होय जो इंजा सेंग्गोन होय थाळान येंडावा होय।

²¹ चोयाकी कोरो गा कोण जो इंज होय डेनोगोका दियागा विषय गेन ओलके होय, डेनोगोका डाऊवा। पेनो डी कोरो लिंजेन भेबाव सजा हेजेवा जो कोरो गा कोण के उठाएच्बा। डी कोरो घाल्जी अच्छा डाऊवा कि डीच जनम बान सा।”

चेलाकू सथोन प्रभु भोज

²² एठा जब यीशु एठा दियागा जोम्का लक्के डा मेटे दिकु यीशु नी सोकडा सावे एठा डेगा आशीर्वाद आसिटे टुक्काके। एठा हेजा चेलाकूके जीके। एठा मंडीके, “ना इनी इंजा कोम्बोर होय।”

²³ डाबोलटे अंगूर डा गा कोटोरा साटे धन्यवाद जीके। हेजा गा चेलाकूके जीके एठा दिकु सेबाई जीके एठा दिकु सेबाईकु नुवे।

²⁴ यीशु नी चेलाकू टे मंडीके, “इनी पचना वोजीटे परमेश्वर नी कुरकू गेल्ला उनाई करार डाके जो घोनेच कुरकू घाल्जी आडेवा होय।

²⁵ इंज आपेटे सच्चो मंडीवाकी, कि अंगूर गा रेस्सो इंज डी दिन टाएन बान नुनू जब टाएन परमेश्वर गा राज्यन उनाई अंगूर गा रेस्सो बान नुनूवा।”

²⁶ बदोन यीशु दियागा चेलाकू भाजन गानावे डो बल्लान जैतून गा टुक्की लिजेन ओले।

पतरस गा बान हाडाई गा हेजे मिनी टेमो

²⁷ जब दिकु टुक्की कोनेन चेल्के डा, मेटे यीशु नी चेलाकू मंडीके, “आपे सेबाईकु इंज्के आराकोम, चोयाकी पवित्र ग्रंथ इंजा बारेन चोच मंडीवा होय देटेन साच्चोजू होना। इन्जा कोरो के घोजेचबा जो इंजा कुरकू गा देखभाल म्या चचारामिंकू रोंगो डाएवा, एठा दिकु मेंडाकू रोंगो इंगन-हुगन सेनेवा।

²⁸ पेनो इन्जा जीटाऊ गा बदोन आपेटे पेला गलील शहरेन सेनेवा आपे देटेन मिलातिंजकु।”

²⁹ पतरस नी यीशु टे मंडीके, “अगर सेबाई कुरकू आमके आराटे ओले टासो पेनो इंज बान सेने।”

³⁰ यीशु नी पतरस जवाब जीके, “इंज अमाटे सच्चो मंडीवाकी टाइंज इनिका रातो कोम्बा बरी डाव राटे पेला, आम आफाई बार इंजागा इन्कार डाएवा।”

³¹ पेनो पतरस नी एठाभी जोर टे मंडीके, “अगर इंज्के अमा गेल्ला गुजू भी टासो एठाभी इंज अमा इन्कार चोलाका बान दडा।” इनी रोंगो बाकी चेलाकूभी मंडीके।

गतसमनी शहरेन यीशु गा प्रार्थना

³² जब यीशु एठा दियागा चेलाकू गतसमनी जीमू म्या जगान गेन हेन। एठा यीशु नी हेजा चेलाकू टे मंडीके, “येटेनका सुबानकूका जब टाएन इंज प्रार्थना दडावा।”

³³ एठा यीशु पतरस एठा याकूब एठा यूहन्ना के हेजा सेंग्गोन थोळासा लेंकिन साय्येकु। दिकु ठायका दुखी एठा नाराजो लक्के डा।

³⁴ एठा यीशु नी मंडीके, “इंजा ठायका दुकीके होय डेनोगोका इंजा जान ओठ्बा। आपे एटेन टेंगेनेका एठा जटटो थंदळे।”

³⁵ मेटे यीशु थोळासा लेंक्कीन सम्मान ओले, एठा ओटेन बोचोएन डो प्रार्थना दडा लज्जे कि बाटे अगर अमा योजनान डाऊका टासो मेटे इनी कासु टेमो इंजा लिंजेन बाकी हेजे।

³⁶ एठा दिच्नी मंडीके, “हे अबा हे बाटे अमाटे सेबाईका डाऊवा होय। इनी खाट कासुके इंजा मेराटे म्या देळेनकी एठाभी पेनो जैसा इंज चाहता डेंगो बाने। पेनो अमा इच्छा पुरायु।”

³⁷ डाबोलटे जब यीशु हिराके चेलाकूके गिटीचटे डोके पतरस टे मंडीके, “हे शमौन अमा गिटीच लक्के होय? चोच अमा म्या घंटा भी जटटो थंदळ डुका?

³⁸ झाटटो एठा प्रार्थना दडा होना एठा तखलीफबेन बाकी बोचो। कि अमा अंदाजो बाकी बोचो, आत्मा तैयारके होय पेनो कोम्बोर कमजोर होय।”

³⁹ यीशु डबोलटे दिकुके आराटे ओले, एठा देडेनका मंडीटे डीका शब्द प्रार्थना वे होय।

⁴⁰ एठा डबोलटे यीशु हेन डो दिकुके गिटीचका डोकेनेच, चोयाकी दियागा दुनूम गा धुंडीनके डा एठा बान हाडाई डा कि डीचके तुनी जवाब जे।

⁴¹ एठा तिसरा बार हेन यीशु नी चेलाकू टे मंडीके, “नका आपे गिटीजे का एठा आराम्बोए बस टेमो हेन होय। डोगे कोरो गा कोण जो इन्ज होय पापीकु गा टीन उठाउवा होय।

⁴² बिडे बो, डोगे इंजगा उठामिठाच मेरान हेन होय।”

गतसमनी शहरेन यीशु के धोकाटे उठायेनेच

⁴³ जब यीशु इनी मंडी लक्के डा। कि यहूदा इस्करियोती जो बारह चेलाकू टे म्याखोम डा हेन। एठा हेजा सेंग्गोन म्या खाट गर्दी दिकुगा टीन तलवार एठा लठ्ठा डा साले। दिकुके मुख्यायाजकु एठा मूसा गा नियम इथूमिठाच एठा यहूदी जुना सनाकु नी कुलकेकु डा।

⁴⁴ एठा यहूदा नी उठामिंकूके इनी पता घल्के डा। डीचके इंज गुरु मेंटो हाकोएच्बा एठा चुम्मा जे देटेनका होय डीचके उठाटे सावधान टे साईंय्याकेच।

⁴⁵ यहूदा हेन एठा तुरुटो यीशु गा मेरान ओलेडो मंडीके, “हे गुरु!” एठा डीचके चुम्मा जीके।

⁴⁶ मेटे उठामिंकूनी यीशु लिंजेन टी येंडाटे डीचके उठाएनेच।

⁴⁷ यीशु गा चेलाकू तालाटे जो मेरान टेगेनके डा, म्याखोम नी तलवार कोलाटे खाटयाजक गा भाग्य लिजेन सेन्द्राके। एठा दियागा लुटूरके म्हाके।

⁴⁸ यीशु नी डी गर्दी के मंडीके जो डिच्के उठा हेन डा, “चोच आपे डाकु मेंटो इंज्के उठा गा घल्जी तलवार एठा लठठा साटे ओटके होय?

⁴⁹ इंज नी हरेक दिन यरूशलेम गा मंदिर गा हालेन आपेगा सेंग्गोन थांदळटे इथू डा एठा मेटे आपे इंज्के बान उठाडुका। पेनो इनी इनिघल्जी डाएन कि पवित्र ग्रंथ गा मंडी पुरायु।”

⁵⁰ मेटे सेबाई चेलाकू यीशु के आराटे साळुपजे।

⁵¹ एठा म्या जवान हेजा नंगा कोम्बोरेन लिजेन चद्दार ओळटे दियागा टाऊटे ओले। एठा कुरकू नी डीचके उठाकेनेच।

⁵² पेनो डीच चद्दार आराटे नंगा साळुपजे।

यीशु महासभा गा सम्मान

⁵³ डाबोलटे दिकु यीशु के खाटयाजक गा उरान सैय्येनेच। एठा सेबाई मुख्यायाजककु एठा यहूदी जुना सनाकु एठा मूसा गा नियम इथूमिठाच डी उरान जामाएन।

⁵⁴ पतरस लेंक्कीटे टेका दिकु टाऊ-टाऊटे खाटयाजक गा उरा गा दरोम टाएन ओले। एठा सैनिककु गा सेंग्गोन सुबानटे सिंगेलेन सेको लज्जे।

⁵⁵ मुख्यायाजककु एठा सेबाई खाटसभा यीशु के घोगेज गा घाल्जी दियागा खिलाफबेन गवाही घगाटा लक्के डा, पेनो बान घाटाडुका।

⁵⁶ चोयाकी घोनेच कुरकू यीशु गा खिलाफबेन लबाळ गवाही जिऊ लक्के डा। पेनो दिकु सेबाई कुरकू गा गवाही म्याका रोंगो बान डा।

⁵⁷ मेटे चोटोकु नी बिटजे डो दियागा खिलाफ मेटे लाबाळ गवाही जीके,

⁵⁸ आलेनी डीचके इनी मंडीटे आजुम्के होय, “इंज इनी जो कुरकू द्वारा आरुके मिनी मंदिर के फाडेबा, एठा आफाई दिनेन दूसरा आरोएवा।”

⁵⁹ एने लिंजेन भी दिकुगा गवाही म्याका रोंगो बाऊ डा।

⁶⁰ मेटे खाटयाजक नी कुरकू सम्मान टेंगेनटे यीशु के कोम्बाराके, “आम अमागा बबाचातिंजेन चोचकाभी चोया बान मंडी? इनी कुरकू अमा खिलाफबेन चोच गवाही जेबा होय?”

⁶¹ पेनो यीशु कायोम्के एठा तुनिका जवाब जिडुका। खाटयाजक नी यीशु टे डाबोलटे कोम्बाराके, “चोच अमा डी सेबाई टे महान परमेश्वर गा कोंटे मसीह होय दियागा आले आराधना दडावा होय?”

⁶² यीशु नी मंडीके, “हेन इंज होय एठा आपे कुरकू कोरो गा कोण जो इंज होय कि सर्वाशक्तीमान परमेश्वर गा डाखुरी कोनेन सुबानके एठा आपे इंज्के आकाश गा बदळा गा सेंग्गोन स्वर्ग देटेन परमेश्वर थंदळवा होय देटे टे हेजे टे डोकोम्बा।”

⁶³ मेटे खाटयाजक नी हेजा कपळे टयाटे मंडीके, आलेन एठा तुनिका गवाही गा जरुरत बाऊ होय।

⁶⁴ आमनी इनी खिलाफबेन आजुम्के जो इनिजनी चोखरा परमेश्वर गा घाल्जी मंडीके। “आपेगा एनेन चोच साला होय?” दिकु सेबाई कुरकू नी आजुम्जे कि यीशु नी गलती डावे होय इनिघल्जी डीचके गुजू गा दण्डो जे।

⁶⁵ मेटे जेकानी दिया लिजेन बेबेच लज्जे एठा जेका दियागा म्वार टोलटे एठा डीचके बुक्की मुंडाटे मंडी लज्जे अगर अमा परमेश्वर गा कोनेटे मंडीमिठाच होय मेटे आलेके भविष्यवाणी डाटे घाले, कि आमके जे मुंडाकेमी। एठा रखवाली दोडो मिंकूभी डीचके उठाटे थपळा मुंडाके।

पतरस गा बान चिचाना एठा जाम

⁶⁶ जब पतरस इटान दरोम गा मेरानके डा, मेटे खाटयाजक गा दासीकू तलाटे म्याखोम देटेन हेन।

⁶⁷ एठा पतरस के सिंगेलेन सेकोटे डोकेनेच एठा डीचके कळाक्को हाडे टे डोकेनेच मंडी लज्जे, “आमभीनी नासरी यीशु गा सेंग्गोन डा।”

⁶⁸ पतरस बादलाएन एठा मंडीके, “इंज नी बान हाडाई एठा बान समझातिंज डुका कि अमा चोच मेन लक्के।” डाबोलटे डीच बल्लान दराजोन ओले एठा कोम्बानी राके।

⁶⁹ डी दासीनी पतरस के धोटे दियाटे जो मेरान ठेगेन्के डा। डाबोलटे मंडी लज्जे, “कि इनिज दिकु तलाटे म्या चेला होय।”

⁷⁰ पेनो पतरस डाबोलटे बदलाएन एठा मंडीके बाने इंज बाऊ होय। एठा थोळासा टेमो बदोन दिकुनी जो दियागा मेरान टेगेनके डा डाबोलटे पतरस के मंडीके, “जरुर टेका आम दिकु तलाटे म्याखोम होय चोयाकी आम गलील कुरकू टे होय।”

⁷¹ मेटे पतरस नी मंडीके इंज कसोम जोम सच्चो मंडी लक्के, “इंज डी कोरो बान हाडाई, दियागा बारेन इंज बातो लक्के होय।”

⁷² मेटे तुरुटो का दूसरा बार कोम्बानी राके पतरस के इनी बातो जो यीशु नी दियाटे मंडीके डा यादो हेन, “कोम्बा गा बरी बार राटे पेला अमा आफाई बार इंजगा इन्कार कोम्बा।” मेटे पतरस इनी बातो के सोचातिंजटे खट्टेका जाम लज्जे।