ಮಾರ್ಕ್ 13 - गवली उनाई नियम

यीशु व्दारा मंदिर नशो गा परमेश्वर इथूमिठाच

¹ जब यीशु यरूशलेम गा मंदिर टे ओट लक्के डा। मेटे चेलाकू तलाटे म्याखोम नी दिजाटे मंडीके, “हे गुरु डोगे चोच अच्छाका खाट उरा होय! डीच तुनी खापेट घोटा टे आरुके होय!”

² यीशु नी हेजा गा चेलाकू टे मंडीके, “इनी मंदिर गा खापेट उरा घल्जी जो आम आए दोडो लक्के होय। लेकिन इंज आमके घालेवा। दुश्मनकु म्या भी घोटा इकु जगान बान आरा। दिकु सेबाई नशोऊबा।”

आखिरी दिन गा निशान

³ मेटे यीशु यरूशलेम गा मंदिर गा टे जैतून गा टुक्की लिजेन ओले बल्ला हुधेळेन ओले। मेटे पतरस एठा याकूब एठा यूहन्ना एठा अन्द्रियास नी यीशु गा मेरान हेन जब दिकुगा गेल्ला जेका बान डा एठा दिकुटे कोम्बराके,

⁴ “आलेके भी घाले कि इनी बातो चोला डाऊवा? एठा जब इनी सेबाई बातो पूराऊवा डी टेमो चोच निशान थंदळवा?”

⁵ यीशु चेलाकू टे मंडी लज्जे, “ध्यान टे थांदळे कि जेका आपेके धोका बाकी जिऊ।

⁶ घोनेच कुरकू इंजगा जीमू गा उपयोग डाएवा। दिकु मंडीवा, ‘इंज मसीह होय’ एठा डीच घोनेच कुरकू के दिकुगा मामानातींज गा घाल्जी धोका जेबा।

⁷ एठा जब आपे लाडाई, एठा लाडाई गा चर्चा आजुमे, मेटे बाकी हिगरा। चोयाकी एनेगा डाऊ जरुरी होय। लेकिन इनी दुनिया गा अन्त बाऊ होय।

⁸ चोयाकी सेबाई जाटो गा कुरकू, देशो एठा राज्य म्या दूसरा गा खिलाफबेन लाडाई गेन सेनेवा। एठा हार कोनेन भूकंपा डाऊवा एठा काळकी हेजेवा। इनी नी ताखलिफ कोण गा जनम पेला कासु रोंगो होय।”

⁹ “पेनो आपे ध्यान टे थांदळे, चोयाकी कुरकू आमके जेलेन येंडाकोम्बा एठा डी जगा सभा गेन साकोम्बा। एठा दिकु आमके आराधना जगा गेन खुठाकोम्बा। चोयाकी आपे इंजा चेलाकू होय, आपे मजबूर कोम्बा कि अमा खाटसभा गेन एठा हाकमिंकू गा सम्मान सेनेवा ताकी दिकु आपेगा न्याय डाएवा। डेगा रोंगो आपे दिकुके इंजा बारेन अच्छा खाबोर घालेवा।

¹⁰ पेनो जरुरी होय कि संसार गा अंत टे पेला इंजा बारेन अच्छा खाबोर सेबाई जाटो गा कुरकू गघाल होना।

¹¹ जब आमके जेलेन येंडाकोम टासो। मेटे पेलाटेका चिंता बाकी कि आले चोच मेंबा। पेनो डी टेमो हेजेन परमेश्वर जो चोचकाभी मंडीवा होय डीचके मांडे। चोयाकी आपे डीका शब्द मांडेवा जो पवित्र आत्मा आपेके जेबा। आम अमा मेराटे चोचकाभी बाकी मंडी।

¹² डी टेमो, जो कुरकू इंजा विश्वास बान दोडो होय। दिकु इकुका डाईकु के जेलेन येंडाकुबा। एठा जो इंज लिंजेन विश्वास दोडोवा होय घोच्कुबा। बाटे हेजा गा कोणकु गेल्ला एनोगो डाएवा एठा चफनीकू आपना आंटे-बाटे खिलाफबेन सेनेवा एठा दिकुके घोच्कुबा।

¹³ चोयाकी आपे इंज लिंजेन विश्वास दोडोवा होय। इनी कारण टे सेबाई कुरकू अमाटे दुश्मनी डोएबा। लेकिन जो कुरकू इंजगा आजुम्बा होय एठा कासु स्यागु टाएन इंज लिंजेन भरोसा दोडोवा होय। एठा हार बान ममानातिंज दिकु परमेश्वर गा वोजीटे बचातिंजे।”

खाट तखलीफ़ गा टेमो

¹⁴ म्या दिन आम उजळातिंज बुरा चीजो डोगेवा डेगा वोजीटे मंदिर के आरागेवा। इनी चीजो डी जगान डाऊवा देटेन डेगा डाऊ साही बाऊ होय। हार जेका इनिके पपाळातिंज्बा होय डीके समझातिंजू गा कोशिश होना! जब डी टेमो हेजेवा मेटे जो कुरकू यहूदिया जिल्हा गेन होय, दिकुके सजा थंदळ घल्जी टुक्की कोनेन सळुप होना।

¹⁵ अगर अमा अमागा पदळी लिंजेन टासो। मेटे आपना सामोन सा घाल्जी उरा तलान बाकी सेने आपे देटे टे सळुपजू होना।

¹⁶ एठा जो खिटीन टासो डीच हेजा कपडे सा घाल्जी उरान डाबोलटे बाकी हिरा।

¹⁷ इनी डी जपाएकु घाल्जी म्या भयनाक टेमो हेजेवा जो लाजके होय एठा दिकु घाल्जी जो चफनीकुके दिडोम आनु लक्के! चोयाकी दिकु घाल्जी सळुप ठायका मुश्किल होय।

^18-19 डी दिनेन कुरकू ठायका बुरा रुपोटे तखलीफबुवा। कुरकू नी चोलाकाभी इनी रोंगो कासु सामना दडुका होय, जब टे परमेश्वर नी दुनिया आरुके डा। एनेगा बदोन कुरकू डाबोलटे डी रोंगो कासु टे भोबगातिंज बाने। इनिघल्जी प्रार्थना डाए कि इनी खतरनक टेमो भांबरान बाकी डाऊ, जब यात्रा दडा मुश्किलुबा।

²⁰ अगर परमेश्वर नी डी भयनाक टेमो के जल्लोका स्यस्यागा फैसला बान दडुका टासो सेबाईकु घोयुवा। लेकिन परमेश्वर नी हेजा कलमके कुरकू गा वोजीटे डी टेमो बचातिंजे।

²¹ डी टेमो अगर जेका अमाटे मांडे, “डोगे मसीह येटेनके होय! येटेन डोगे मसीह देटेनके होय!” मेटे विश्वास बाकी दोडो।

²² चोयाकी लाबाळ मसीह एठा लाबाळ परमेश्वर गा कोनेटे मंडीमिठाच हेजेवा। एठा निशान एठा अचम्बो कामय घालेवा। डी कुरकू के धोका जिऊ घाल्जी दिकुके परमेश्वर कलमकेकु।

²³ “इनी सेबाई घटना डाऊटे पेला इंज्नी आमके सेबाई घटना गा बारेन घल्के होय इनिघल्जी ध्यान टे थंदळे।”

यीशु गा डबोलटे हेजे

²⁴ “डी दिनेन भयानक कासु गा टेमो स्यागु गा बादोन। सूर्या एठा चंद्र चमकतिंजू बंदोऊबा।

²⁵ एठा बदळा टे इफुलकु बोचोवा, एठा बदळा गा शक्तीनौर ओखेंजेबा।

²⁶ डी टेमो कुरकू कोरो गा कोण जो इंज होय पृथ्वी गा कोनेन बदळान हेजे लक्के होय। दिकु इंजा महान शक्ती एठा महिमा डोगेवा।

²⁷ डी टेमोन डीच हेजा स्वर्गदूतकु के कुलकूबा, पृथ्वी गा इनी कोपरा टे बदळा गा डी कोपरा टाएन। उफुन भी दिशा कलमके कुरकू घोलाकुवा।”

अंजीर गा सिन्ज गा उदाहरण

²⁸ “अंजीर गा सिंजाटे इनी उदाहरण इठोए। जब एनेगा डांगोल ओठ्बा होय एठा पाला ओटबा होय। मेटे आपे चिनाएवा कि गर्मी गा मोसोम मेराएन होय।

²⁹ डीका रोंगो जब अमा डी चीजो के डाऊटे डोगे। मेटे आपेन मालूम होनाकी इनी दुनिया गा अंत बिल्कुल हेन होय।

³⁰ इंज आपेटे सच्चो मंडीवा होय इनी पीढी अदा कुरकू मेटे भी जीटाका थंदळवा जब इनी सेबाई घटना डाऊवा।

³¹ बदळा एठा पृथ्वी नशोऊबा डी हमेशा गा घाल्जी बान थंदळ लेकिन इंज्नी जो मंडीके इनी हमेशा घाल्जी थंदळवा।”

रोजोका झाटटो थांदळे

³² “इनी बातो तुनी घिळीन एठा तुनी दिन डाऊवा इनी जेका बान हाडाई।” न स्वर्गदूत एठा न इंज जो कोण होय। पेनो बस बाटे परमेश्वर का डी दिनके एठा घिळीके हाडाई होय।

³³ डोगे, जटटो थंदळे, एठा प्रार्थना दडा लक्कू। चोयाकी आपे बान हाडाई घटना गा डी टेमो चोला हेजेवा।

³⁴ कोरो गा कोण जो इंज होय डाबोलटे हिरा हेजे म्या दूसरा गाँवेन ओले मिठाच कोरो रोंगो होय। जो दूसरा गाँवेन सेने टेमो आपना उरा आराकी। एठा हेजा भाग्याकूके हाक जे जो दिकुन दडा होना, एठा देटेन चौकीदार घालेवा होय कि देटेन हेजे घल्जी तैयारकु।

³⁵ इनिघल्जी यीशु नी हेजा चेलाकू टे मंडीके जटटो थांदळे, चोयाकी आपे बान हाडाई उरा गा मालिको चोला हिराबा होय। सिंगुरुपटे या अदा रातोन या ठायका फेजेरा टेमो हिराबा इनिघल्जी आपेके ध्यान दोडो होना।

³⁶ अगर इनिज बिना तुनिका गघाल गा अचानक मेटे दिकुन इनी बाकी मलुम्जू बाकी होना एनोगो बाकी डाऊ कि दिकु अचानक हेन डो आपेके गिटीच डोकोम्बा।

³⁷ एठा जो इंज आपेटे मंडीवा हारेक कोरो टे डीका मंडीवा होयकी, “इंज हेजे घल्जी तैयारकु।”