ಮಾರ್ಕ್ 12 - गवली उनाई नियम

यीशु व्दारा बुरा खिटीनकु गा उदाहरण

¹ एनेगा बादोन यीशु उदाहरणेन बातो लज्जे, “म्या कोरोनी हेजा खिटीन अंगूर एंदाके।” दिच्नी खिटी गा उफुन भी कोनेन म्या घोटा गा दीवार आरुके। दिच्नी उफुन भी कोनेन जानवरकु टे खिटी रखवाली दडा घाल्जी ठुम्बी आरुके एठा डाबोलटे दिच्नी खिटीके लागुन टे जीके एठा दूसरा देशो कोनेन ओले।

² जब अंगूर गा अनोजो हागम हेन मेटे मालिकोनी आपना गा भाग्यकूटे म्या भाग्या के मंडीके कि दिकु अंगूर गा खिटीन सेने एठा लागुन मिंकूटे डेगा नफा गा जमाटे दियागा मेरान सेगे।

³ पेनो लागुन मिंकू डीचके उठाटे मुंडाकेनेच एठा बिना चोचका दडा गा डीचके डाबोलटे हिराकेनेच।

⁴ डाबोलटे खिटी मालिको हेजा गा म्या एठा भग्याके लागुन मिंकू मेरान कुल्केनेच। पेनो दिकुनी दियागा कपार के फाळिके एठा दियागा अपमान डाके।

⁵ डाबोलटे खिटी गा मालिकोनी म्या एठा भग्याके कुल्केनेच। लागुनमिंकूनी डीचके घोच्केनेच मेटे मालिकोनी घोनेच्कुके कुलकेकु दिकु तलान थोडाकु के मुंडाके कु एठा थोडाकु के गोचके कु।

⁶ अखिरीन मालिको मेरान कुकूल घाल्जी सिर्फ म्या एठा कोरो डा डीच दियागा कोंटे डा। अखिरीन मालिकोनी हेजा कोंटे लागुन मिंकू मेरान इनी सोचातिंजे कुल्केनेच कि इंकू इंजा कोण गा मन डोएबा।

⁷ लेकिन मेटे खिटी कोरो दियागा कोणटे के हेजे टे डोकेनेच मेटे दिकुनी म्या बर्खिंजाटे मंडीके, एटेन डीचका होय जो अंगुरा बगीचा गा मालिको होय, हेजे आबु इनिज्के घोजेज इनी खिटी आबुगा आरुवा।

⁸ एठा लागुन मिंकुनी इनिज्के घोच्केनेच एठा लासोके अंगूर गा खिटी टे बल्लान टेप्पाके।

⁹ “आपेन चोच लगातिंजुवा कि अंगूर खिटी गा मालिको चोच डाएवा? डीच हेजेवा डो डी लागुन मिंकूके घोच्कुबा एठा अंगूर गा खिटी दूसरा लागुन मिंकूके जेबा।

¹⁰ चोच आपेनी पवित्र ग्रंथ गा डी भागो बान पडातिंज्दुका जो मसीह गा डे रोंगो म्या कास घोटा टे डाएवा होय? डीच मंडीवा होय जो घोटा मिस्री कुरकू नी टेप्पाके। डीका घोटा होय जो खाट उरा सेबाई टे कास आरोएन।

¹¹ प्रभु नी एनोगो डा डाके, एठा इनी आलेगा घाल्जी ठायका अचाम्बो होय!”

¹² मेटे यहूदी कुरकू गा अगुवाकु समझातिंजे कि यीशु नी दिकुगा खिलाफबेन इनी उदाहरण घाल्के डा इनिघल्जी इंकू डीचके जेलेन येंडाएच डा। पेनो दिकुनी डीचके जेलेन बान येंडाकु चोयाकी डीच कुरकू टे हिगरा डा। इनिघल्जी दिकु डीचके एकला आराटे ओले।

कैसर गा कर जिऊ लिजेन प्रश्न

¹³ मुख्यायाजक कुनी अदा फरीसि कुरकू एठा हेरोदेस राजा गा साथो गा अदा कुरकू के यीशु गा मेरान कुल्केकु ताकी दिकु यीशु के अदा बातो फसातिंज घाल्जी कुल्केकु ताकी दिकु यीशु के मुंजिरीम आरोएच्बा।

¹⁴ एठा दिकुनी हेन डो यीशु टे मंडीके, “हे गुरु आले हाडाई कि अमा हमेशा सच्चो गघालबा होय। एठा अमा इनी बातो टे अमा बान हिगरा कि दूसरा कुरकू अमा बारेन चोच सोचातिंज्बा होय। आपे सेबाईकु म्यासारिका व्यवहार दोडोवा एठा परमेश्वर गा कोरा सच्चाई टे घालेवा होय। चोच मूसा गा नियम आलेके रोमी सम्राट कैसर टेक्सा जिऊ गा हुकूम जेबा या बाने?

¹⁵ चोच आलेन कर जिऊ होना या बाने?” यीशु नी दिकुगा खोटो चिनाटे कोम्बराके, आपे इंज्के चोच्का गलत मंडी गा वोजीटे पपासातिंज गा कोशिश चोया दडा लक्के होय? म्या दिनार इंजा मेरान सेगे कि इंजभी डोगेवा। म्या दिनार म्या रोमी चिक्खा डा डी चाँदी गा आरुके डा (म्या दिन गा मुंजीरी)। एनेगा कामयसा गा यहूदी कुरकू वोजीटे रोमी सरकार के हेजा कर गा जिऊ गा घाल्जी दडा डा। दिनार गा मठान सम्राट गा जीमू मारा डाऊ डा।

¹⁶ डीच साले होय, एठा यीशु नी दिकुटे मंडीके, “इंज्के घाले कि इनी चाँदी गा चिक्खान जेगा फुटू डो जेगा जीमू होय?” दिकुनी मंडीके, “रोमी सम्राट कैसर।”

¹⁷ यीशु नी दिकुटे मंडीके, “जो रोमी सम्राट कैसर गा होय डीचके जे जो परमेश्वर गा होय डीके परमेश्वर के जे।”

डबोला टे जीटाऊ गा बारेन प्रश्न

¹⁸ मेटे सदूकी कुरकू गा अदा कुरकू यीशु गा मेरान हेन सदूकी कुरकू विश्वास बान दोडो कि कुरकू जो गोएन मिठाच जाटे जीटाएन होय। डाबोलटे दिकु यीशु गा मेरान हेन डो दियाटे कोम्बराके,

¹⁹ “हे गुरु मूसानी चोखरा ग्रंथन आलेगा घाल्जी म्या कानून ओलके डा कि अगर जेकाभी ब्याह डाके पोट्टा गोएन टासो एठा बिनाकोण गा जपाए टेके आराटे गुजूवा होय।” मेटे डी कोरो डाईटेके विधवा जापाएटे ब्याह दडा होना एठा कोण पेपैदा होना जो दियागा डाईटे गा वारिश होय।

²⁰ म्या टेमो आईय्या डाईकु डा सेबाईकु टे खाट मिठाच ब्याह डावे लेकिन बिनाकोण गा गोएन।

²¹ दूसरा डाईटेनी डी विधवा टे ब्याह डावे लेकिन डीच भी बिनाकोण गा गोएन। इनिका बातो आफाई डाईकु गेल्ला एठा सेबाई आईय्या डाईकु गेल्ला डाएन।

²² डी जपाएनी डी आईय्या डाईकु टे जेका घाल्जी म्या कोण के जनम बान जिडुका एठा अखिरीन डी जपाए भी गोएन।

²³ नका आलेके घाले, डी टेमो जब गोएन मिठाच जाटे जीटाएन डा, मेटे डीच जेगा जपाए आरुवा? आले इनी इनिघल्जी कोम्बराके डीचनी डी आईय्याकु टे ब्याह डावे डा।

²⁴ यीशु नी दिकुटे मंडीके, “आपे गलत होय चोयाकी आपे बान हाडाई कि पवित्र ग्रंथ चोच मेंबा आपे परमेश्वर गा शक्तीगा बारेन बान हाडाई।

²⁵ चोयाकी जब डीच गोएन मिठाजा टे जीटाऊवा, मेटे कुरकू ब्याह बान। डेनोगोका स्वर्गेन थंदळ मिंकू स्वर्गदूतकु रोंगो आरुवा।

²⁶ गोएन मिंकूटे जीटाऊ गा बारेन चोच आपेनी मूसा पुस्तक गेन डी भागो बान पडातिंज्दुका? जो भागो जुलू मिनी झाळीटे मूसा टे बातोवा होय। देटेन परमेश्वर मंडीवा होय इंज अब्राहम गा परमेश्वर एठा इसहाक गा परमेश्वर एठा याकूब गा परमेश्वर होय?

²⁷ जबकी परमेश्वर मंडीवा होय जो कुरकू गोएन होय, दिकु दियागा आराधना दडा लक्के होय मेटे दिकुके आए भी जीटाका थंदळ होना। आपेनी इनी विश्वास बान मेंटो म्या गलती डाके होय कि परमेश्वर गोएन मिंकूके जीवन गा घाल्जी ठुठूलबा होय।”

महान हुकूम

²⁸ मूसा गा नियम इथूमिठाच कु तलान म्याखोम नी हेन डो आजुम्के यीशु एठा सदूकी इकुका चोच बातो लक्के डा चिनाटे यीशु टे कोम्बराके। “परमेश्वर नी जोभी हुकूम जीके होय। डे तलाटे सेबाई टे कास हुकूम तुनी होय?”

²⁹ यीशु नी डीचके जवाब जीके, “सेबाई आज्ञा टे नी इनी मुख्या होय। हे इस्राएली कुरकू आजुमे! प्रभु आबुगा परमेश्वर का बस प्रभु होय।

³⁰ एठा आपे प्रभु आपना परमेश्वर टे आमगा पूरा मन टे, एठा आपना पूरा जानटे, एठा पूरा दिमाग टे, एठा आपना पूरा शक्तीटे प्यार डोकी।

³¹ एठा दूसरा सेबाई कास हुकूम इनी होय। दुसराकूटेभी देटोका प्यार डोए देटोका आपना खुद टे प्यार दोडो।”

³² मूसा गा नियम इथूमिठाच कुनी यीशु टे मंडीके, “हे गुरु ठाय सजाका होय आमनी सच्चो मंडीके कि परमेश्वर का म्याका परमेश्वर होय। एठा तुनिका दूसरा परमेश्वर बाऊ होय।

³³ प्रभु आपना परमेश्वर टे आमगा पूरा मन टे, एठा आपना पूरा जानटे, एठा पूरा दिमाग टे, एठा आपना पूरा शक्तीटे प्यार डोकी। एठा आपना मेराकुटे आपना रोंगो प्यार डोए, सेबाई बलिदान एठा भार पेपेळेचटे जदा महत्वपूर्ण होय।”

³⁴ मेटे यीशु नी डोके कि डीचनी समझोटे जवाब जीके डीचके मंडीके, “अमा परमेश्वर गा राज्यन मुगा मेरान होय।” एठा जेकान का यीशु टे चोचकाभी कोकाम्बारा गा हिम्मत बान दडुका।

यीशु गा प्रश्न

³⁵ एनेगा बादोन यीशु नी यरूशलेम गा मंदिर गा दरोमेन खाबोर गघाल लठ्ठाका मंडीके, “मूसा गा नियम इथूमिठाच मंडीवा कि मसीह, राजा दाऊद गा कोण होय।” जब दिकु एनोगो मंडीवा होय मेटे डेगा चोच मतलब होय?

³⁶ चोयाकी जब राजा दाऊद पवित्र आत्मा गा शक्तीटे मंडीके, “प्रभु परमेश्वर नी इंजा प्रभु टे मंडीके, इंजगा धखुरी देळेन सुबाने जब टाएन कि इंज अमा दुश्मनकूके हरातिंज डाए बाने।”

³⁷ “एटो टाएन राजा दाऊद नी भी मसीह के प्रभु मंडीटे जीमू मेटे डीच दाऊद कोण टोनोगो डाऊवा होय।” यीशु इथू आजुमटे म्या खाट घोंजा खुशी ममानातिंज लक्के डा।

यीशु गा व्दारा घालके

³⁸ यीशु नी हेजे गा इथू गेन दिकुके मंडीके, “मूसा गा नियम इथूमिठाचकुटे ध्यान टे थांदळे जो लाम्बा महंगा आंगी उरिके टे इखाटबा एठा हाटीन गेन कुरकू टे आदर गा सेंग्गोन नमस्कार सा पपासंदबा,

³⁹ डीच आराधना जगा गेन एठा मुख्या जागा गेन सेनेवा डो ऊँचा जगान सुबान पपासंदबा होय।

⁴⁰ दिकु धोकाटे जीटे विधवा जपाएकु गा डामा सैय्यावा होय। एठा दिकु कुरकू तलान खाट टाएन प्रार्थना दडावा होय ताकी कुरकू इनी सोचातिंजे कि दिकु अच्छा होय। जरुरी होय परमेश्वर दिकुके खाट सजा जेबा।”

विधवा गा दान

⁴¹ एठा यीशु मंदिर गा भंडार गा सम्मान सुबानटे दोडो लक्के डा कि कुरकू मंदिर गा भंडार इनी रोंगो टोनोगो येंडावा होय। चोटोका डामा कुरकू नी घोनेच्का डामा येंडाके।

⁴² एटोगेन म्या गिरबो विधवा हेन डो बरी तम्बा चिक्खा (सेबाई टे कामती भाव) डेगा भाव ठायका काम डा।

⁴³ मेटे यीशु नी हेजा चेलाकूके मेरान हाकोटे दिकुटे मांदिके, “इंज आपेटे सच्चो मंडीवा होय कि मंदिर गा भण्डारेन येंडा मिठाच कुटे इनी गिरबो विधवानी सेबाई टे खाट येंडाके होय।

⁴⁴ चोयाकी दिकु सेबाई कुरकू लकपति एठा दिकुनी डे तलाटे अदा का जीके डेगा जरुरत बाऊ। लेकिन इनी विधवानी गिरबो भी माका डीच सेबाईका जीके। जो दियागा मेरान बचातिंज्के डा। एटे टाएन कि डीच भी जो दियेन जीटा थंदळ गा घाल्जी होना डा।”