ಮಾರ್ಕ್ 11 - गवली उनाई नियम

यीशु गा यरूशलेमेन हेजे

¹ डेनोगोका यीशु एठा दियागा चेलाकू यरूशलेम शहर गा मेरान आदिरु लक्के डा, दिकु जैतून टुक्की धुरान बैतफगे एठा बैतनिय्याह गाँव गेन हेन। मेटे दिच्नी हेजा चेलाकू तलाटे बरी चेलाकिंजके इनी मंडीटे कुल्केकु,

² “सम्मा गा गाँवेन सेने, एठा डेन आदिरुंका म्या गधा गा कोंटे, दिच्नी पेला चोलाकाभी तुनिका सवारीके चुटडुका, टोल्के आपेन घटाऊबा डीचके ईटी टे सालेच।

³ अगर आपेटे जेकाभी कोकाम्बाराकी, ‘इनी चोया दडावा होय? मेटे मांडे यीशु आलेगा प्रभु के इनिजगा कमाय सा जरुरी होय।’ दिकु इनिजके जल्लोका येटेन डाबोलटे हिरागेच्बा।”

⁴ चेलाकूनी डी गाँवेन ओले एठा गधा गा कोंटे के कोरा गा कोनेन म्या उरा गा दराजो मेरान म्या खुटान टोलका घटाएन। एठा दिकुनी ईटीकेनेच लज्जे।

⁵ दिकु तलाटे जो देटेन टेंगेनके डा, जे-जेका मंडी लज्जे “येटेन चोच दडावा होय, चोया आपे गधा गा कोंटे के इटेच लक्के?”

⁶ चेलाकूनी डेनोगोका यीशु नी दिकुके मंडी घाल्जी मंडीके डा डेनोगोका चेलाकूनी कुरकू मंडीके डा, डाबोलटे कुरकू दिकुके गधा गा कोंटे दिकुनी ससाघल्जी।

⁷ एठा चेलाकूनी गधा गा कोंटे यीशु मेरान सालेनेच एठा हेजा गा आंगीके गधा गा भाऊडीन। मेटे यीशु गधा लिंजेन चुटके।

⁸ डेनेगोका यीशु गधा लिजेन चुटाटे यरूशलेम शहर कोनेन ओले। घोनेच कुरकू नी दियागा सम्मान कोरान इकुगा कपडे बिंदिल टे मन जीके। अलग्गो कुरकू नी कोरान खजूर गा डांगोल बिंदिलके एठा डीचके मान जीके। डीके दिकुनी कोरा गा आजू बजुगा सिंजाटे म्हाके डा।

⁹ अदा कुरकू यीशु गा साम्मा-साम्माटे चेल्के अदा कुरकू दियागा टाऊ-टाऊटे। दिकु सेबाईकु खुशीटे चिल्लातिंजू लक्के डा, “परमेश्वर गा स्तुति डायु! दिकु धन्य होय डी जो परमेश्वर गा हाक गा गेल्ला हेजेवा होय, दिया लिंजेन परमेश्वर गा आशीर्वाद होय।”

¹⁰ “परमेश्वर गा कृपा सेंग्गोन आलेगा जुना दाऊद गा रोंगो म्या राजा हेजे लक्के होय। धन्य होय! परमेश्वर गा स्तुति डायु, जो स्वर्गेन थंदळवा होय!”

¹¹ जब यीशु नी यरूशलेम शहर गेन मुएन, डेगा बादोन, देटेन यरूशलेम गा मंदिर ओले। दिच्नी उफुन भी कोनेन हारेक चीजो के ध्यान टे डोके एठा डाबोलटे दिच्नी शहर के आराके चोयाकी डयागेन पेलाका टेमोएन डा। डाबोलटे देटेन हेजा बारह चेलाकू गा सेंग्गोन बैतनिय्याह गाँव कस्बे घाल्जी ओटजे।

अंजीर गा सिन्ज के श्रपो जेबा

¹² दूसरा दिन जब दिकु बैतनिय्याह गाँव टे वोटजे एठा यीशुन आटा रागेन।

¹³ एठा देटेन लेंक्कीटे पला टे भेटटी धोटे अंजीर गा सिंज धोटे डेगा मेरान ओले। डी सिंजेन पला गा अलावा तुनिका फल बाऊ डा। चोयाकी फल गा टेमो बान डा।

¹⁴ मेटे यीशु नी सिंजके सरापो जीटे मंडीके कि डेगा लिंजेन डाबोलटे चेलाकूभी फल बान हेजे।

मंदिर टे व्यापारीकु के वोटकु लक्के

¹⁵ एनेगा बादोन यीशु एठा दियागा चेलाकू यरूशलेम शहर हेन। एठा दिकु यरूशलेम गा मंदिरेन ओले, दिच्नी यरूशलेम गा मंदिर टे डी कुरकू बल्लान ओट सुरुकेकु। जो बलिदान गा घाल्जी बडातिंजू मिनी जानवरकु एठा अलग्गो चीजो के सगा एठा किकीजी गा कामय दडा डा। दिच्नी डामा बबादाला मिंकू गा टेबालके पलटीके। एठा दिच्नी बलिदान गा घाल्जी कबूत्तर कूके किकीजीमिंकू टाएन पाल्टिके।

¹⁶ एठा यीशु नी कुरकू के हुकूम जीके कि दिकु यरूशलेम गा मंदिर गा दारोम गा आसो पासो गा ईरिया टे चीजो के सा बंद्दोए।

¹⁷ एठा इथूटे यीशु नी मंडीके, “चोखरा ग्रंथन ओल्के होय कि परमेश्वर नी मंडीके कुरकू यरूशलेम गा मंदिर एनोगो जगा मेंबा देटेन सेबाई जाटो गा कुरकू प्रार्थना दडा घाल्जी हेजेवा होय। लेकिन आपेनी इनिज्के चुचीरी मिंकूटे भेटटीके गुफा रोंगो आरुके होय।”

¹⁸ मेटे डाबोलटे मुख्यायाजककु एठा मूसा गा नियम इथूमिठाच नी घल्के डा कि यीशु नी चोच डाके डा। दिकु दियाटे हिगरा डा चोयाकी गर्दी गा सेबाई कुरकू यीशु प्रचार लिंजेन बिचारजे डा। इनिघल्जी डी म्या कोरा घगाटा लज्जे ताकी दिकु यीशु घोचकेच होना।

¹⁹ जब सिंगुरूपजे मेटे यीशु एठा दियागा चेलाकू शहर आराटे बैतनिय्याह गाँवेन डी रातो गिटीच घाल्जी ओले।

विश्वास गा शक्ती

²⁰ दूसरा फेजेर जब यीशु एठा दियागा चेलाकू डाबोलटे हिरा यरूशलेम शहर कोनेन चेल्के डा। मेटे दिकुनी डी अंजीर गा सिंज गा जळी डोके डीके यीशु नी सरापो जीके डा। डी पूरा खिजाटे टे ळोखोळजे डा।

²¹ पतरस के डी बातो यादो हेन, एठा डीचनी यीशु टे मंडीके, “हे गुरु, डोगे! अंजीर गा सिंज डीके आमनी सरापो जीके डा, ळोखोळजे होय।”

²² यीशु नी डीचके जवाब जीके, “परमेश्वर लिजेन विश्वास डोए। जो आपेनी आसिवे होय डीच डी डाएवा।”

²³ इंज आपेटे सच्चो मंडीवा होय, कि जेकाभी इनी टुक्कीटे मांडे कि, बिडे एठा आपना खुदके समुद्रननी टेप्पाकी एठा आपना दिलेन शक बाकी कि एनोगो डाऊवा। बनकी विश्वास डोए जो दिच्नी आसिवे होय परमेश्वर डीके डाएवा। मेटे दियागा घाल्जी इनी डाएवा।

²⁴ इनिघल्जी इंज आपेटे मंडीवा होय कि जो चोचकाभी आपे प्रार्थना डाटे आसे डो एठा विश्वास डोएकी आमेन डी घटाऊबा। मेटे परमेश्वर आपे घाल्जी डेनोगोका डाएवा।

²⁵ इनी रोंगो मेटे चोलाकाभी अमा तेगेनटे प्रार्थना दडावा होय, अगर जेकाभी अमागा खिलाफबेन अदा बुरा डाके टासो मेटे डीचके मपोकेच। मेटे आपेगा स्वर्ग गा बाटे भी आपेगा पापो के मापोएबा।

²⁶ एठा अगर आपे माफी बान जिऊ टासो। मेटे आपेगा बाटे परमेश्वर जो स्वर्गेन थंदळवा आपेगा आनोवा के मापोए बाने।

अधिकार लिजेन प्रश्न

²⁷ यीशु एठा दियागा चेलाकू यरूशलेम शहर डाबोलटे हेन। एठा जब यीशु यरूशलेम गा मंदिर गा दरोमेन इखाट लक्के मेटे मुख्यायाजक एठा मूसा गा नियम इथूमिठाच एठा यहूदी जुना सनाकु दियागा मेरान हेंडो कोंकाम्बरा लज्जे।

²⁸ “दिकुनी यीशु टे मंडीके इनी चीजो के दडा गा घाल्जी अमा मेरान चोच हाक होय? एठा जेनी आमके इनी रोंगो हाक सेंग्गोन कुल्केमी होय?”

²⁹ यीशु नी दिकुटे मंडीके, “इंजभी आपेटे म्या बातो कोकाम्बारावा होय इंज्के जवाब सेगे मेटे इंज आपेके घालेवा कि इंज इनी कामय तुनी हाक टे दाडावा होय।

³⁰ जब यूहन्ना नी कुरकू के बपतिस्मा जीके। मेटे चोच डेगा हाक स्वर्ग टे परमेश्वर गा कोनेटे हेन देटेन कुरकू कोनेटे? इंज्के घाले।”

³¹ मेटे दिकु हिंजमान लज्जे डा, “अगर आले जवाब जे कि स्वर्ग टे परमेश्वर गा कोनेटे मेटे डीच आलेटे कोम्बाराएबा।” मेटे आपेनी दिया लिंजेन विश्वास चोया बान दोडुका?

³² लेकिन अगर आले मांडे कुरकू कोनेटे मेटे डीच इनी रोंगो जवाब बान जिडुका। चोयाकी डीच कुरकू टे हिगरा डा जो इनी आसी डा कि यूहन्ना परमेश्वर गा कोनेटे कुलके म्या सच्चो परमेश्वर गा कोनेटे मंडीमिठाच डा।

³³ मेटे दिकुनी यीशु के जवाब जीके, “आले बान हाडाई।” यीशु नी दिकुटे मंडीके, “कि इंजभी आपेके बान घागल कि इंज्के इनी चीजो के दडा गा हाक तुंगाटे घटाके होय।”