ಮತ್ತಾಯ್ 7 - गवली उनाई नियम

आनोवा बाकी तोटाका

¹ आनोवा बाकी तोटाका, कि अमा लिंजेन भी आनोवा बाकी तोटाका होना।

² चोयाकी डिकारोंगो आपे दूसराकु लिंजेन आनोवा तोटाकावा, डिकारोंगो परमेश्वर आपेगा न्याय डायेबा। परमेश्वर आपेगा सेंग्गोन डेनोगोका व्यवहार डाएवा, येनोगोका आपे दूसराकु सेंग्गोन डाएवा।

³ आपना डाई गा चफनी-चफनी गलती गा बारेन चिंता बाकी, पेनो आपना खापेट-खापेट गलती के डोगे एठा समझातिंजे।

⁴ जब अमागा खुद गा तलान ठायका खाटबेळे गलती होय, मेटे आमके खुद टे सानी गलती मिनी अमा डाई गा मदत दडा कोशिश बाकी दडा होना।

⁵ हे ढोंगो, पेला अमा खाट गलती के सुदरातिंज्की, डाबोलटे आम अमा डाई गा सानी गलती के सुसाधरातिंज गा मदत डायेबा।

⁶ डी कुरकू के परमेश्वर गा चोखरा खाबोर के बाकी गघाल जो इनिके आजोम बाने। अगर आपे येनोगो दडा टासो, “मेटे इनी येनोगो डाऊवा डेनोगोका तुनिका चोखरा चीजो सिटाकु गा सम्मान टेप्पाकी, देटेन येनोगोका सुकळीकु गा सम्मान मोती टेटाप्पा जो बस मोती नंगा इटान टाजेबा एठा डाबोलटे आपे लिंजेन हामला डायेबा।”

परमेश्वर टे आसी एठा सा

⁷ आपेके जो होना डी परमेश्वर टे आसे एठा डीच आपेके जेबा, घाटाए, टासो घाटाऊवा, ठाट-ठाडे टासो मेटे आपेगा घल्जी खुल्लाएबा।

⁸ चोयाकी जो जेकाभी आसिवा होय, दियेन घाटाऊवा होय, जो घगाटावा होय, देटेन घाटाऊवा होय, एठा जो ठाट-ठाडेबा होय, दिया घल्जी खुल्लाएबा।

⁹ आपे तालाटे तुनिकाभी बाटे हेजा कोणटे के घोटा बान जिऊ अगर डीच अमाटे सोकळा आसी टासो।

¹⁰ इनिका रोंगो तुनिकाभी बाटे हेजा कोण के काकू आसी टासो जेर मिठाच बिंजके बान जिऊ।

¹¹ इनिघल्जी नका आपे बुरा आरुटे, आपना चफनीकुके अच्छा चीजो जिऊ हाडाई टासो, मेटे आपेगा स्वर्ग गा बाटे हेजा आसी मिठाच अच्छा चीजो जरुर जेबा।

¹² इनिघल्जी जो चोच्काभी आपे चाहतावा, कि कोरोकु आपेगा सेंग्गोन डाये, आम भी दिकु सेंग्गोन डेनोगोका डाये, चोयाकी मूसा गा नियम एठा परमेश्वर गा कोनेटे मंडीमिंकू गा शिक्षा मतलब इनिका होय।

सीधा एठा मुश्किल कोरा

¹³ आपे बस सकडा फाटक टेका परमेश्वर गा राज्यन मुवा होय, चोयाकी देटेन फाटक चौदा होय, एठा सीधा होय देटेन कोरा जो नाशोऊ गा कोनेन साकोम्बा होय, एठा घोनेच कुरकू होय जो देटे मुवा होय।

¹⁴ चोयाकी सकडा होय देटेन फाटक एठा मुश्किल होय, देटेन कोरा जो हमेशा गा जीवनेन पोचातींकोम्बा होय, एठा थोडा कुरकू होय, जो डीके घाटायेवा होय।

फलनौर टे सिंजके चिचाना

¹⁵ डी कुरकू टे ध्यान टे थंदळे, जो परमेश्वर गा कोंटे मंडीमिंकू रोंगो आरुटे दूसराकु के धोका जिऊ घल्जी, एठा खुदके मेंडाकू रुपो आरुटे हेजेवा होय, ताकी दिकु इनी कुरकू के विश्वास जेबाकी दिकु मेंडाकू होय, पेनो आए टेमोन दिकु डोंगोरा सिटा जो कुरकू लिंजेन हामला डाएवा।

¹⁶ दिकुगा जीवन दडा गा तरीका टे आपे दिकुके चीनाकुवा! झाळीनौर टे अंगूर गा फल बान जाऊ एठा जानोम टे अंजीर बान जाऊ।

¹⁷ इनिका रोंगो हर म्या अच्छा सिंज अच्छा फाल सेगेवा होय, एठा जो कामय बाऊ सिंज बुरा फल सेगेवा होय।

¹⁸ अच्छा सिंज बुरा फल बान सा टासो, एठा जो सिंज तुनिका कामय गा बाऊ, देटेन अच्छा फाल बान सा टासो।

¹⁹ जो सिंज अच्छा फल बान सा, डीके म्हागेवा मेना, एठा डीके सिंगेलेन येंडाएवा होय, डी कुरकू के जो परमेश्वर गा कोंटे मंडीमिंकू आरुवा होय दूसराकु के धोका जिऊवा होय दिकुके इनिका रोंगो दण्डो जेबा होय।

²⁰ इनिघल्जी दिकुगा कामय टे आपे दिकुके चीनाकुवा।

²¹ जो इंजाटे, “हे प्रभु, हे प्रभु मंडीवा होय, दिकु तलाटे हर म्याखोम स्वर्ग गा राज्यन मुवा बाने, पेनो डीचका स्वर्ग राज्यन मुवा जो इंजगा स्वर्ग बाटे गा इच्छा लिंजेन सेंदरावा होय।”

²² न्याय गा दिनेन घोनेच कुरकू इंजाटे मांडेवा, “हे प्रभु, हे प्रभु, चोच आले अमागा जीमू टे भविष्यवाणी बान दडुका, एठा अमागा जीमू टे भूतोकुके ओटकेकु, एठा अमागा जीमू टे अचम्बो कामय डाके।”

²³ यीशु नी मंडीके, कि इंज डी कुरकू टे सपा रुपोटे मंडेबा, “हे बुरा कामय दडामिंकू इंजा मेराटे लेंक्कीन सेंजू चोयाकी इंज आपेके बान हाडाई।”

दिमागदार एठा बेदिमाग कोरो

²⁴ “इनिघल्जी जो जेकाभी इंजा इनी बातो आजुमटे डीके मनातिंजेवा होय, देटेन डी दिमागदार कोरो गा रोंगो ठहरातिंजूबा जोभी हेजा उरा गा पैय्याके पाठा लिंजेन आरुके।

²⁵ डाबोलटे डा घामाएन डो आडी हेन एठा डी धुक्काऊ लज्जे, पेनो देटेन बान बोचोडुका, चोयाकी डेगा पैय्या पाठा लिंजेन येंडाके डा।

²⁶ पेनो जो जेकाभी इंजा इनी बातो आजोम्बा होय एठा डे लिंजेन बान सेंदरा देटेन डी बेदिमाग कोरो रोंगो ठहरातिंजूबा डीचनी हेजा उरा रिती लिंजेन आरुके।

²⁷ एठा डा घामाएन डो आडी हेन, एठा कोयो धुंदळ लज्जे, एठा उरान टकरातिंजे एठा नाशोएन।”

²⁸ मेटे यीशु इनी मंडीकेका डा, मेटे कुरकू गर्दी दियागा शिक्षानौर टे बिचारजे।

²⁹ चोयाकी देटेन मूसा गा नियम इथूमिठाच रोंगो बाने, पेनो म्या हाकगेल्ला शिक्षानौर जिऊ डा।