ಮತ್ತಾಯ್ 23 - गवली उनाई नियम

मूसा नियम इथूमिंकू एठा फरीसिकू गा बुरा सोचबा

¹ मेटे यीशु नी गर्दी टे एठा हेजा चेलाकू टे मंडीके?

² “मूसा गा नियम इथूमिठाच एठा फरीसि कुरकू मूसा गा नियम माहिर होय।

³ इनिघल्जी दिकु जो चोचकाभी आपेटे मंडे डाए, मनातिंजे। पेनो दिकुटे जो आजुमे, डेनोगो कामय बाकी दडा, चोयाकी दिकु शिक्षा मेटे जिऊवा होय, लेकिन डेगा पालन बान दडा।

⁴ दिकु कुरकू गा खाडान खांबाल ओझा सेगेवा होय, पेनो आपे डीके म्याधेळेन घल्जी म्या बोटो भी येंडा बाने।

⁵ दिकु इकुगा सेबाई कामय गा कुरकू के ध्यान इकु कोनेन हेजे घल्जी दडावा होय। दिकु डी पट्टीनौर चावळाएबा होय डे लिंजेन दिकु पवित्र ग्रंथ वचन ओलटे कोम्बोरेन ठोठोलबा होय एठा इकुगा आंगी गा झल्लारके बबाळातिंज्बा होय।

⁶ जोजोम गेन मुख्या जागा, एठा आराधना जगा गेन खापेट-खापेट सुबान,

⁷ एठा हाटीननी नमस्कार एठा कुरकून हे गुरु मंडी दिकुन पसंद होय।

⁸ एठा आपे खुदके कुरकू कोनेटे हे गुरु बाकी मेन, चोयाकी आपेगा म्याका गुरु होय। एठा आपे सेबाईकु म्याका रोंगो होय।

⁹ एठा पृथ्वी लिंजेन जेकाकेका आपना बाटे मेंटो बाकी मंडी, चोयाकी आपेगा म्याका बाटे होय जो स्वर्ग गेन होय।

¹⁰ एठा स्वामी भी बाकी मंडी, चोयाकी आपेगा म्याका स्वामी होय, मतलब देटेन मसीह होय।

¹¹ आपेन जो खाट आरु चहतावा, डीच भाग्य आरुवा।

¹² जो जेकाभी हेज खुदके खाट मेनबा देटेन सानिऊवा मेना एठा जो जेकाभी आपना खुदके सानेवा, देटेन खाडेवा।”

¹³ “हे मूसा गा नियम इथूमिठाच ढोंगो एठा फरीसि कुरकू धिक्कार आपे लिंजेन! आपे कोरो गा खिलाफबेन स्वर्ग गा राज्य गा दारोजो बंडाऊ टासो, न आपेका डेन मुवा एठा न डेन मु मिंकूके भी मु डाएवा।

¹⁴ हे कपटी एठा मूसा गा नियम इथूमिठाच एठा फारिसि कुरकू धिक्कार आपे लिंजेन! आपे विधवा जपाएकु गा उराके जोमेबा मेना, एठा गघाल घल्जी खाट टेमो टाएन प्रार्थना दडावा मेना। इनिघल्जी आपेन एठाभी दण्डो घाटाऊवा।”

¹⁵ हे ढोंगो एठा मूसा गा नियम इथूमिठाच एठा फरीसि कुरकू आपे घल्जी धिक्कार होय? आपे म्या कोरो के आपेगा घोजान सा घल्जी समुद्र गेन एठा पृथ्वी लिंजेन लम्बा-लम्बा सेंदरा गा यात्रा दडावा। एठा डीका कोरो आपेगा घोजान गेन बेल्लाऊ गा बादोन आपे डीचके नरक गा सिंगेलेन गा बरी गुण दण्डो घाटाऊ गा लायको आरोएच्बा होय।

¹⁶ हे अंधळा अगुवा, आपे लिंजेन धिक्कार होय, आपे जो येटेन शिक्षा जिऊवा होय, “अगर जेका यरूशलेम गा मंदिर गा कासोम जोम टासो, मेटे दियागा चोचका फरक बान बोचो, पेनो अगर जेका मन्दिर गा सोना गा कासोम जोम टासो, मेटे डीच हेजा गा डी कासोम के पुपरान मजबूर के होय। इनिघल्जी डी कासोम पुपरा जरुरी होय।”

¹⁷ हे मूर्ख एठा अंधळा कुरकू! महत्वपूर्ण चोच होय, सोना या देटेन यरूशलेम गा मंदिर डेगाटे देटेन सोना चोखरा आरुवा होय?

¹⁸ एठा इनी रोंगो आपे मंडी मेना, “अगर जेका वेदी गा कासोम जोम्बा टासो मेटे डेगा चोचका मतलब बाऊ, लेकिन अगर जेका वेदी लिंजेन पेळेचके भार गा कासोम जोम्बा होय, मेटे डीच डी कासोम के पुपरान मजबूर के होय। इनिघल्जी डी कासोम पुपरा जरुरी होय।”

¹⁹ हे मूर्ख एठा अंधळा कुरकू!, एठाभी महत्वपूर्ण चोच होय, वेदी लिंजेन पेळेचके भार या वेदी देटे भार चोखरा आरुवा होय?

²⁰ इनिघल्जी जो वेदी गा कासोम जोम्बा होय, देटेन वेदी यानेकी वेदी लिंजेन पेळेचके भार बाएरा गा भी कासोम जोम्बा होय।

²¹ जो जेकाभी यरूशलेम गा मंदिर गा कासोम जोम्बा होय, मेटे डीच एठा मंदिर थंदळ मिठाच भी परमेश्वर गा कासोम जोम्बा होय।

²² एठा जो स्वर्ग गा कासोम जोम्बा होय, देटेन परमेश्वर गा सिंघासन गा यानेकी डेगा जो डे लिंजेन सुबानके होय, बाएरा गा भी कासोम जोम्बा होय।

²³ हे ढोंगो एठा मूसा गा नियम इथूमिठाच एठा फरीसि कुरकू धिक्कार आपे लिंजेन? आपे पोदीना एठा सोपो एठा जीरा गा दान जिऊवा, पेनो आपेनी नियम गंभीर बातो मतलब न्याय, एठा दया, एठा विश्वास के आराके होय। होना डा कि येनेन भी दडा होना, एठा दिकुके भी बान आरा।

²⁴ हे अंधळा अगुवा, आपे बेमतलब नियमनौर गा पालन दडा गेन भेबाव ध्यानजूवा मेना। जैसा कि आपे डाके रुकूकुके लेंक्कीन डोएबा, लेकिन जब आपे परमेश्वर गा महत्वपूर्ण हुकूम गा उल्लाघान दडावा! एठा डी आपेके ऊँटो के उठ रोंगो लगातिंजुवा होय।

²⁵ हे ढोंगो एठा मूसा गा नियम इथूमिठाच एठा फरीसि कुरकू धिक्कार आपे लिंजेन? आपे कोटोरा एठा थाळाके, मठा-मठा उरूटडेबा पेनो तला अंधरा एठा असयम टे भेट्टीका थंदळवा होय।

²⁶ हे अंधळा फरीसि कुरकू, पेला कोटोरा थाळाके तालाटे उरुडे कि डी बल्लाटे भी सपायु।

²⁷ “हे ढोंगो एठा मूसा गा नियम इथूमिठाच एठा फरीसि कुरकू धिक्कार आपे लिंजेन?” आपे चुना जोलोम्के कब्रा गा रोंगो मेना जो माठा टे अच्छाका डूगुवा होय, पेनो ताला मुर्दा गा हाडेनौर एठा सेबाई गिदळी टे भेट्टिके होय।

²⁸ इनिका रिती टे आपे भी माठा टे कोरोकुन धर्मी डूगुवा, पेनो तालाटे ढोंगो एठा बुरा कामय दडामिंकू टे भेट्टिके।

²⁹ “हे ढोंगो एठा मूसा गा नियम इथूमिठाच एठा फरीसि कुरकू धिक्कार आपे परमेश्वर गा कोनेटे मंडीमिठाच मिंकू गा कब्रा सुसीटीबा एठा धर्मिकुगा कब्रा आरुवा।”

³⁰ एठा मंडीवा होय, “अगर आले आलेगा जुना सनाकु गा दिनेन धारे मेटे परमेश्वर गा कोनेटे मंडीमिठाच मिंकूके घोगेज गा दिकुगा साथो बान जिऊ डा।”

³¹ इनी मंडीटे आपेनी आपेका बारेन गावही जेबा होय, कि आपे दिकुगा कोणकु मेना दिकुनी परमेश्वर गा कोनेटे मंडीमिठाच मिंकूके घोचकेकु डा।

³² इनी रोंगो आपे डी पापो के स्यागेबा मेना जो आपेगा जुना सनाकु नी सुरुके डा।

³³ आपे जो जहरमिंकू बिंजकु कोंकु गा रोंगो मेना! आपे नरक गा दण्डो टे बचातिंजू बाने।

³⁴ इनिघल्जी डोगे, इंज आपेगा मेरान परमेश्वर गा कोनेटे मंडीमिंकू के एठा दिमागदार एठा मूसा गा नियम इथूमिंकू के कुलकूबा, एठा आपे दिकु तलाटे अदा कुरकू के घोचकुवा, एठा क्रूस लिंजेन पेळेचकुबा, अदाकुके आबुगा आराधना जगान बल्खा मुंडाएबा एठा म्या पूरा टे दूसरा पुरान खेडाकुबा।

³⁵ आपे लिंजेन सेबाई धर्मी कोरोकु गा पृथ्वी लिंजेन आडीके दोष हेयु। धर्मी हाबिल गा पचना टे साटे बिरीक्याह गा कोणटे जकर्याह गा पचना दियागा पचना आपेनी यरूशलेम गा मंदिर एठा वेदी गा तलान घोच्केकु डा।

³⁶ जोभी धर्मीकु गा पचना पृथ्वी लिंजेन आडीके मेना होय, देटेन सेबाई आपेगा कपरा लिंजेन बोचोवा। इंज आपेटे सच्चो मंडी बाकी, इनी सेबाई बातो इनी पीढी लिंजेन हेजेवा।

यीशु गा यरूशलेम लिजेन जाम

³⁷ हे यरूशलेम शहर हे यरूशलेम शहर! आम परमेश्वर गा कोनेटे मंडीमिंकू गा गोघेच्बा एठा दिकुके लेचाकुबा होय, दिकुके अमा घल्जी कुलकूबा होय। चोटो बार इंज येटेन प्रयास डाके कि अमागा कोणकूके म्या जगानकू, डेनोगोका सिम हेजा कोणकूके हेजा कफा इटान जमाकुवा पेनो आमनी इनी बान मेनडुका।

³⁸ इनिघल्जी इनी समझातिंजे, आपे उरा आपेगा घल्जी उजाळका आरागेवा होय।

³⁹ चोयाकी इंज आपेटे मंडीवाकी, कि नका टे मेटे टाएन आम बान मंडी, “धन्य होय देटेन जो प्रभु जीमू टे हेजेवा होय, मेटे टाएन आपे इंज्के डाबोलटे चोलाकाभी बान दोडो।”