ಮತ್ತಾಯ್ 20 - गवली उनाई नियम

अंगूर बगीचा गा मुंजरीकू गा उदाहरण

¹ यीशु मसीह लगातार इथू लठ्ठाका मंडीवा होय, स्वर्ग राज्य इनी उदाहरण रोंगो होय। जो कोरो फेजेर ओटके कि आमगा अंगूर गा बागिचान मुंजरीकूके कामय गेन येंडाकु।

² मेटे डीचनी मुंजरीकूटे कामय दडा घल्जी ठाहरातिंज्के मिनी म्या दिनार (म्या दिन गा मुंजीरी) मुंजरी ठाहरातिंजटे, दिकुके अंगूर बगिचान कामय घल्जी कुलकेकु।

³ डी फेजेर गा अंदाजोटे नाऊ बाजान, डी कोरोनी अदा एठा मुंजरीकूके हाटीन टेंगेनटे डोकेकु, जो चोचकाभी बान दडा लक्के डा।

⁴ डीचनी दिकुटे मंडीके, “आपे भी अंगूर गा बागिचान सेने, इंज आपेके म्या दिन गा ठहरातिंज्के मुंजरी जेबा।” मेटे दिकुभी कामय दडा ओले।

⁵ डीचनी डयागेन एठा आफाई बजा गा डाबोलटे हाटीन ओले। एठा दूसरा मुंजीरीकु घाटाएन, दिकुके साही मुंजरी जिऊ गा वादा डावे एठा कामय गेन येंडाकेकु।

⁶ अंदाजोटे सिंगरुप पाच बाजान डाबोलटे ओटजे डो दूसरा मुंजरी हाटीन टेंगेनटे डोकेकु। एठा दिकुटे मंडीके, “आपे चोया दिनभोर बिना कामय गा टेंगेनके? दिकुनी डीचके मंडीके इनिघल्जी कि जेकानी आलेके मुंजरीन येंडाडुका।”

⁷ डीचनी दिकुटे मंडीके, “आपे भी इंजा अंगूर बगिचान सेने डो एठा कामय डाए, एठा इंज आपेके म्या दिन गा ठहरातिंज्के मुंजरी जेबा।”

⁸ सिंगरूपनी अंगूर बागीचा गा स्वामी नी हेजा भांडरी मंडीके, “मुंजरीकूके हाकोटे आखरीन नी कामय गेन डोके कुरकू टे साटे पेला टाएन दिकुके मुंजीरी जिकी।”

⁹ जब सेबाई मुंजीरीकु आदिरजे, जो मुंजीरीकु डया टे सिंगरुप गा पाच बाजान टाएन कामय गेन येंडाके डा। दिकुन म्या दिन गा ठहरातिंज्के मुंजरी दिन गा दिनार (म्या दिन गा मुंजीरी) घाटाएन।

¹⁰ मुंजरीकू जो फेजेरा-फेजेर हेन डा, दिकुनी इनी धोटे समझातिंज्के, कि आलेन येठाभी घाटाऊवा। पेनो दिकुन भी म्या दिनार (म्या दिन गा मुंजीरी) घाटाएन।

¹¹ मेटे दिकु अंगूर बागीचा गा स्वामी लिंजेन कुरूकुरू टे मंडी लज्जे,

¹² “आखरीन हेनमिंकू इनी मुंजरीकूनी बस म्याका घंटा कामय डाके डा, एठा आमनी दिकुके भी देटोका मुंजरी जीके डो जो आलेके भी देटोका जिले। आलेनी मेटे गर्मीन पूरा दिन काडी महनातबे।”

¹³ मालिकोनी दिकु तलाटे म्याखोम के जवाब जीके, “हे सोपती इंज्नी आमगा सेंग्गोन चोचकाभी धोका बान दडुका, इंज्नी आमके डीका मुंजरी जीके, डे लिंजेन आले सहमतके डा पूरा दिन कामय घल्जी ठहरातिंज्के मुंजरी म्या दिनार (म्या दिन गा मुंजीरी) मंडीडुका डा?

¹⁴ अमा मुंजरीन डो सेने इंजा इच्छा इनी होय कि चोटो आमेन देटोका बदोन हेजे मुंजीरीकूके जिकी।

¹⁵ पक्का रुपोटे इंजेन इनी हाक होयकी इंज इंजागा मर्जी रोंगो खर्चोएबा। आमेन जुलू बाकी होना चोयाकी इंज दूसरा बारेन दयालु मेना।”

¹⁶ इनिघल्जी घोनेच सेबाई जो पेला होय, टाऊ मेना, एठा जो टाऊ होय, पेलाऊबा मेना। हाकोके मिंकुनी घोनेच होय, लेकिन कलाम्केमिंकू काम होय।

गुजू एठा डबोला टे जीटाऊ गा बारेन हेजे मिनी टेमो

¹⁷ यीशु यरूशलेम शहर सेने लठ्ठाका बारह चेलाकूके एकलान सैय्येकु, एठा कोरान नी मंडी लज्जे।

¹⁸ “डोगे, आले यरूशलेम शहर गेन सेनेवा होय, एठा कोरो गा कोण मुख्यायाजक एठा मूसा गा नियम इथूमिठाच गा टीन उठाएनेच मेना एठा दिकु डिच्के घोगेच गा लायको ठहरातिंज्के।

¹⁹ एठा इंज्के अलग्गो जाटोकु गा टीन जेच्बा। एठा दिकु दियागा मजाक ऊळातीन्जेबा, दिया लिजेन उलीच बेजेवा, डीचके बाल्खा टे मुंडाएबा, एठा क्रूस लिंजेन पेळेजेचबा, एठा आफाई दिन इंज जीटाऊवा।”

म्या आंटे गा हेजा सानी गा घाल्जी उशार

²⁰ मेटे जब्दी गा कोणटे आंटे हेजा कोणकु सेंग्गोन नी दियागा मेरान हेके डो मंडीके, “हे गुरु, आले चाहतावा कि जो चोचकाभी आले अमाटे आसी टासो।

²¹ यीशु नी डीचके मंडीके, आपे चोच चाहतावा कि देटेन दियाटे मंडीके, येदेन मंडीके, कि इन्जागा बरी कोणकिंज आमगा स्वर्ग गा राज्यन म्याखोम आम जेवना कोनेन म्याखोम आम डाखोरया कोनेन सुबान डाए।”

²² यीशु नी जवाब जीके आपेन बान मालूम कि चोच आसिवा जो कासु इंज भोभागातिंजवा मेना, चोच आपे डी कासुके भोगातिंजेवा, दिकुनी डीचके जवाब जीके हा आपे भोगातिंजेवा।

²³ यीशु दिकुके मंडीके, आपे इंजगा कासुके भोगातिंजेवा पेनो इंजा डाखोरया एठा जेवना जेकाकेका सुबान इंजा कामय बाऊ होय, पेनो जे घाल्जी इंजगा बाटे कोंटे तैयारके दिकुका घांजी होय।

²⁴ इनी आजुमटे, भाग्यकु एठा चेलाकू दिकु याकूब एठा यूहन्ना लिजेन खिजोऊ लज्जे।

²⁵ मेटे यीशु नी चेलाकूके मेरान हाकोटे दिकुटे मंडीके, “आपे हाडाई होय कि जो कुरकू इनी दुनियान हाक मेंबा होय। दिकु इकुगा हाक गा इस्तामाल आपना इटान थंदळ कुरकू लिंजेन हाक दोडो घाल्जी दडावा होय। दिकुगा अगुवा कुरकू दिकुगा बातो ममानातिंज घाल्जी दिकुगा हाक इस्तामाल दडावा होय।

²⁶ पेनो आपे तलाटे येनोगो बान डाऊ जो आपे तलाटे खाट होना डा, देटेन आपेगा भाग्य आरोए।

²⁷ एठा जो आपे तलाटे जो याजक आरु टासो दिजेन दूसराकु गा सेवा दडा होना।

²⁸ डेनोगोका कोरो गा कोण होय दुसराकूगा सेवा दडा घाल्जी इनी दुनियान हेन डा। इंज इनिघल्जी बान हेजडुका कि दूसरा इंजा सेवा डाये। इंज चोटोका कुरकू के दिकुगा पापो टे आरागेच्बा गुजू जेबा।”

बरी अंधळा गा दोडो गा दान

²⁹ जब दिकु यरीहो शहर टे ओट लक्के डा, मेटे म्या खाट गर्दी दियागा टाऊटे ओले।

³⁰ एठा बरी अंधळाकिंज, जो सळक्को गा धुरान सुबानके डा, येटेन आजुमटे यीशु चेल्के होय, हाकोटे मंडी लज्जे, “हे प्रभु, दाऊद गा कोणकुटे, आले लिंजेन दया डाए।”

³¹ घोनेच कुरकू नी डीचके कल्लाकेनेच, कि कायोम कि कायोमका थंदळके, पेनो दिकु एठाभी चिल्लातिंजटे मंडीके, “हे प्रभु, दाऊद गा कोणकुटे, आले लिंजेन दया डाए।”

³² मेटे यीशु नी टेंगेनटे, दिकुके हाकोकेकु एठा मंडीके, “आपे चोच चाहतावा कि इंज आपिंज घल्जी डाए।”

³³ दिकिंजनी यीशु टे मंडीके, “हे प्रभु, येटेन आलेगा मेट खुल्लायु।”

³⁴ यीशु नी असान हेन्ड़ो दिकिंज गा मेट उठाजे, एठा दिकिंज तुरुटो दोडो लज्जे, एठा दियागा टाऊटे ओले।