ಮತ್ತಾಯ್ 19 - गवली उनाई नियम

फारगति गा प्रश्र

¹ मेटे यीशु नी इनी बातो मंडीके, मेटे गलील शहरेन ओले, एठा यहूदिया जिल्हा यरदन गडा गा दूसरा कोनेन ओले।

² एठा कुरकू गा खाट गर्दी यीशु गा टाऊटे ओले, एठा डीचनी देटेन दिकुके साजाकेकु।

³ मेटे फरीसि कुरकू दियागा आन्दाजो सा घल्जी मेरान हेके मंडी लज्जे, “चोच हारेक वाजा अमा जपाएके फरगति जिऊ साही होय?”

⁴ डीचनी दिकुके जवाब जीके, “चोच आपेनी बान पळातिंज्दुका, डीचनी दिकुके आरुकेकु डीचनी सुटूटेका पोट्टा एठा तराई आरुटे मंडीके,

⁵ ‘इनी वोजीटे कोरो अमा आंटे बाटे टे आलग्गोउबा हेजा जापाएटे सेंग्गोन थंदळवा दिकिंज बार्खिंज म्या जानुबा।’

⁶ इनिघल्जी डिकीन्ज बारखीन्ज म्या जानुबा होय, इनिघल्जी डीके परमेश्वर नी म्या सेंग्गोन जोळातिंजके होय, डीके कोरो अलग्गो बाकी।”

⁷ फरीसि कुरकू नी यीशु टे मंडीके, “डाबोलटे मूसा गा नियम गेन चोया येटेन ठहरातिंज्के मंडीके, आरापत्र जीटे डीचके आराकेच?

⁸ यीशु नी फरीसि कुरकू टे मंडीके, मूसानी आपेगा मन गा जिद्दो गा वोजीटे आपेके अमा जापाए के आरा गा हुकूम जीके पेनो सुरुवादेनका येनोगो बाऊ डा।

⁹ एठा इंज आमके मंडीवाकी, जो जेकाभी आनोवा के आराटे एठा तुनिका वोजीटे आपना जापाए के आराटे, दूसरा टे ब्याह दडावा, देटेन आनोवा दडावा होय। एठा जो आराके मिठाजा टे ब्याह दडावा, देटेन भी आनोवा दडावा होय।”

¹⁰ दियागा चेलाकूनी दियाटे मंडीके, “अगर साना गा जापाए गा सेंग्गोन येनोगो संबंध होय मेटे ब्याह साही बाऊ।”

¹¹ यीशु नी दिकुके मंडीके, “बस डी कुरकू दिकुके एकला थंदळ गा वरदन जीके मेना होय दिकु इनी शिक्षा गा स्वीकार दडावा होय।

¹² अदाकु किन्नार होय जो जनम इनी रोंगो टे डाके होय, एठा अदाकु किन्नार येनोगो होय, दिकुके कुरकू नी किन्नार आरुकेकु, एठा अदा किन्नार दिकुनी स्वर्ग गा राज्य घल्जी खुदके किन्नार आरुके होय, दिकु समझातिंजेन साकशाम होय समझातिंजे।”

चाफ्निकु के आशीर्वाद

¹³ मेटे कुरकू चफनीकुके यीशु गा मेरान साकु लज्जे, “कि देटेन दिकु लिंजेन टी डोकी एठा प्रार्थना डाकी, पेनो चेलाकूनी कुरकू के कल्लाकेकु।

¹⁴ यीशु नी मंडीके, चफनीकुके इंजा मेरान हेजडाए एठा दिकुके ममाना बाकी। चोयाकी स्वर्ग गा राज्यन इंकुका होय।”

¹⁵ इनी मंडीटे यीशु चफनीकू लिंजेन टी डोके एठा डेगा बदोन देटे टे ओले मेना।

लकपति जवान गा महत्व गा प्रश्न

¹⁶ एठा डोगे, म्या कोरोनी मेरान हेंडो यीशु के मंडीके, “हे कास गुरु, इंज तुनी भला कामाय डाए, हमेशा गा जीवन घाटायु?”

¹⁷ यीशु नी डीचके मंडीके, “अमागा मंडी गा वाजा चोच होय कि इंज कास होय? बस परमेश्वर का आए टेमोन कास होय।”

¹⁸ डीचनी यीशु टे मंडीके, “तुनी मिनी हुकूम?” यीशु नी मंडीके, “एटेन कि घोगेच बाकी, आनोवा बाकी दडावा, चुचीरी बाकी, लाबाळ गवाही बाकी मंडी।

¹⁹ आपना गा बाटे एठा आंटे गा आदर डाए, एठा आपना मेराकुटे आपना रोंगो प्यार डोए।”

²⁰ डी जवाननी यीशु टे मंडीके, “इनी सेबाईकेनी इंज्नी सानी टेमो लागी मनतिंज्के होय, नका इंजेन तुनी बातो गा कमी होय?”

²¹ यीशु नी डीचके मंडीके, “अगर अमा पुराका रुपो आरु टासो मेटे सेने आमगा सेबाई किजीटे गिरबोकूके खाटिंजकी एठा आमेन स्वर्ग गेन डामा घाटाऊवा, हेजे डो इंजा टाऊटे हेजे।”

²² इनी आजुमटे डी जवान दुखीनजे डो हिराये चोयाकी डीच भेबाव लकपाती डा,

²³ मेटे यीशु नी उफुन भी कोने धोटे हेजा चेलाकू टे मंडीके, “इंज आपेटे साच्चो मंडीवा कि, लकपाती कोरो गा स्वर्ग गा राज्यन मु मुश्किल होय।

²⁴ डाबोलटे आपेटे मंडीवाकी कि परमेश्वर गा राज्यन म्या लकपाती कोरो गा मु मुश्किल होय, देटोका ऊँटो गा सुई गा पोपा टे ओट असान होय।”

²⁵ इनी आजुमटे, चेलाकूनी इनी अचम्बोएन डो मंडीके, “मेटे जेगा उध्दार डाऊवा होय?”

²⁶ यीशु नी दिकु कोने धोटे मंडीके, “कुरकू टे येटेन बान डाऊ, पेनो परमेश्वर सेबाईका डाएवा।”

²⁷ येने लिजेन पतरस नी डीचके मंडीके, “डोगे आलेनी सेबाईका आराटे अमा टाऊटे हेन होय, मेटे आलेन चोच घाटाऊवा?”

²⁸ यीशु नी दिकुके मंडीके, “इंज साच्चो मंडीवा कि उनाई उत्पातीन मेटे कोरो गा कोण हेजा माहिमा गा सिंघासन लिंजेन सुबन्बा एठा आपे भी जो इंजा टाऊटे हेन मेना, बारह सिंघासन लिंजेन सुबांटे इस्राएल देशो गा बारह जाटो गा न्याय डाएवा।

²⁹ जो जेकाभी इंजा घल्जी उराके, डाईके, बोकाजाईके, आंटे-बाटे के, जापाए, चफनीकुके, खिटीके आराके होय, देटेन इंकुटे चोटोका गुण येठाभी घाटाएवा एठा हमेशा गा जीवन गा वारिश आरुवा।

³⁰ पेनो घोनेच सेबाई जो पेला होय, टाऊ मेना, एठा जो टाऊ होय, पेलाऊ मेना।”