ಮತ್ತಾಯ್ 12 - गवली उनाई नियम

यीशु चोखरा दिन गा प्रभु

¹ डी टेमोन हेजे मिनी परमेश्वर गा चोखरा दिन, जब यीशु दियागा चेलाकू खिटीनींजटे चेल्के डा मेटे दियागा चेलाकू गुंहू गा जौ देडेज लज्जे डो जोजोम लज्जे।

² फरीसि कुरकू नी इनी धोटे डीचके मंडीके, “डोगे, अमा चेलाकू एनोगो कामय चोया दाडावा, जो मूसा गा नियम गा रोंगो परमेश्वर गा चोखरा दिनेन दडा सही बाऊ होय।”

³ डीचनी दिकुके मंडीके, “चोच आपेनी बान पळातिंज्दुका, घोनेच टेमो पेला आलेगा खापेट जुनाकु दाऊद नी जब दियागा सोपतीकु रांगेजका डा मेटे चोच डाके।”

⁴ दिकु चोफारटे परमेश्वर गा डेरान ओले डी सोकळाके जोफे जो परमेश्वर के भार जीटे पेळेचके एठा हेजा गा सोपतीकूके जीके। जो मूसा नियम गा रोंगो बस परमेश्वर गा याजककुन का जोजोम गा अनुमति डा?

⁵ चोच आपे मूसा गा नियम गेन बान पळातिंजडूका अगर यहूदी याजक परमेश्वर गा चोखरा दिन यरूशलेम गा मंदिरेन होय परमेश्वर गा चोखरा दिन रितो त्याटया गेन निर्दोष ठहरातिंजूबा होय।

⁶ पेनो इंज आपेटे मंडीवा होय कि येटेन देटेन होय जो यरूशलेम गा मंदिर टे भी खाट होय।

⁷ अगर आम हाडाई होय कि येनेगो चोच मतलब होय, मेटे आम निर्दोष चेलाकू गा निंदा बान दडा। इंजा घल्जी बलिदान पेपेळेचटे गा वाजा इंज चहतावाकी आपे दूसराकु घल्जी दयालु आरोए।

⁸ इंज कोरो गा कोण परमेश्वर गा चोखरा दिन गा मठान हाकगेल्ला दोडोवा।

लोखोळ टी मिठाच कोरो

⁹ देटे टे सेंदराटे देटेन दिकुगा आराधना जगान हेन।

¹⁰ देटेन म्या कोरो डा, दियागा टी लूला डा। आराधना जगान नी अदा फरीसि कुरकू यीशु लिजेन आनोवा टोकाके डा म्या वाजा घगाटा लक्के डा। एठा दिकुनी दिया लिजेन वाजा घगाटा लक्के डा दियाटे कोम्बाराके चोच परमेश्वर गा चोखरा दिनेन ससाजा साही होय?

¹¹ डीचनी दिकुटे मंडीके, आपे तलाटे येनोगो जे होय, दियागा म्या मेंडा टासो। अगर देटेन परमेश्वर गा चोखरा दिन म्या गढढान बोचोयेन टासो, आपे पक्का रुपोटे डीचके बचातिंजेज्बा?

¹² भला, कोरो गा मूल्य मेंडा टे चोटो खाट होय। इनिघल्जी परमेश्वर चोखरा दिन कुरकू गा भालाई दडा सही होय।

¹³ मेटे यीशु नी डी कोरो टे मंडीके, “अमा टी इंज कोनेन बळातिंज्के।” डीचनी बळतिंज्के, दिया टी डाबोलटे दूसरा टी रोंगो साजायेन।

¹⁴ मेटे फरीसि कुरकू बल्लान ओलेडो एठा यीशु गा खिलाफबेन योजना आरु लज्जे कि यीशु के चोफर टे घोजेचबा।

परमेश्वर गा कलमके सेवा दडा

¹⁵ येटेन मालूमजे यीशु देटे ओले। एठा म्या खाट गर्दी दियागा टाऊटे ओले, एठा डीचनी घोनेच कुरकू के सजाकेकु।

¹⁶ एठा यीशु नी दिकुके खट्टेका चतारायकेकू एठा मंडीके, “जेकाकेभी बाकी गघाल कि देटेन परमेश्वर गा कोण होय।”

¹⁷ डीचनी येनोगो इनिघल्जी डाके चोयाकी परमेश्वर नी जो वचन यशायाह परमेश्वर गा कोनेटे मंडीमिठाच वोजीटे मंडीके डा, देटेन पुरायू:

¹⁸ “डोगे, येटेन इंजागा भाग्य होय, डीचके इंज्नी कलमकेनेच होय, इंजा प्रिय, दियाटे इंज मन खुशोके होय, इंज इंजागा परमेश्वर गा आत्मा दिया लिंजेन येंडाएवा, एठा देटेन अलग्गो जाटो गा कुरकू गा न्याय गा खाबोर जेबा।

¹⁹ देटेन न झगडा डाएवा, एठा न चिल्लातिंजूवा, एठा देटेन कुरकू गा तलान तुनिका जोरदार भाषण बान जिऊ।

²⁰ देटेन तुनिका येनोगो कोरो के कासु बान घाई डाए, जो जेकाभी डोंगळा रोंगो कामजोर होय। एठा देटेन धुंजा जिऊ मिनी उजालाके बान हिरीच। आखरीन दिकु न्याय गा घल्जी जीटाऊ गा वाजा ठहरातिंजूबा।

²¹ एठा अलग्गो जाटो गा कुरकू दिया लिंजेन जीमू लिंजेन आसा डोएबा।”

यीशु एठा भूतो टे राजो

²² मेटे कुरकू म्या अंधळा के गूंगाके दियेन भूतोकु डा मेटे यीशु नी भूतोकुके डी कोरो टे बल्लान ओठकेनेज, मेटे डीचनी मंडी सुरुके एठा अंधळा भी दोडो लज्जे होय।

²³ इनी बातो कुरकू बिचार टे मंडी लज्जे, “चोच येटेन दाऊद कोणटे होय?”

²⁴ पेनो फरीसि कुरकू इनी आजोम टे मंडीके, “येटेन भूतोकु गा मुख्या, शैतान गा शक्ती बिना भूतोकुके बान कोखला डा।”

²⁵ यीशु नी दिकुगा मन गा बातो चिनाटे दिकुके मंडीके, “तुनिकाभी येनोगो राज्य डेन फुटके होय। तुनिकाभी पूरा या म्या सगाकु गा कुरकू एक-मेग गा खिलाफबेन जू, डो इनी सगाकु फुटके गा टेमोन म्या जगान बान थंदळ।”

²⁶ एठा अगर शैतान का भूतोकुके बाल्लन ओट टासो मेटे देटेन हेजाका खिलाफबेनुवा, डाबोलटे दियागा राज्य टोनोगो आरु बान थंदळ?

²⁷ अगर इंज शैतान गा मदत टे भूतोकुके कोखाला टासो, मेटे आपेगा पीढी जेगा मदत टे कोलाकुवा? इनिघल्जी डीचका आपेगा फैसला दडामिठाच डाएवा।

²⁸ पेनो अगर इंज परमेश्वर गा आत्मा गा मदत टे भूतोकुके कोखाला मेना, मेटे परमेश्वर गा राज्य आपे मेरान हेन होय।

²⁹ टोनोगो तुनिका म्या कोरो तुनिका ताखातदार गा उरान मुटे दियागा माल लुटातिंजेबा होय मेटे टाएन पेला डी ताखातदार के तोटोल होना टासो? एठा मेटे देटेन दियागा उरा लुटातिंजेबा।

³⁰ जो इंजागा सेंग्गोन बाऊ, देटेन इंजागा खिलाफबेन होय, एठा जो इंजागा सेंग्गोन बान कखाटिंज देटेन पासरुबा।

³¹ इनिघल्जी इंज आपेटे मंडी टासो कोरो गा वोजीटे डाके हारेक पापो एठा बुराई मापोएबा, पेनो पवित्र आत्मा गा खिलाफबेन मापोए बाने होय।

³² अगर जेका कोरो गा कोण गा खिलाफबेन चोचका मांडे, डीचके मापोएचबा पेनो अगर जेकाभी पवित्र आत्मा गा खिलाफबेन चोचकाभी मांडेवा, मेटे डीचके मापोए बाने।

म्या सिन्ज हेजा फल टे चिनाऊवा

³³ “अगर म्या सिंज अच्छा होय मेटे डेगा फल अच्छा होंगा। अगर म्या सिंज खराबो होय, मेटे डेगा फल भी खराबो होंगा। चोयाकी सिंज फल टेका चीनायेवा होय।

³⁴ आपे जेहर बिंज गा कोणकुटे रोंगो मेना। आपे बुरा मेंटो टोनोगो अच्छा बातो मंडीवा मेना? चोयाकी जो मनेन भेट्टिके होय डीका चभुन हेजेवा होय।

³⁵ म्या भला कोरो हेजाका भला मन गा खजाना टे भला बातो मंडीवा होय, एठा म्या बुरा कोरो मन खजना टे बुरा बातो मंडीवा होय।

³⁶ इनिघल्जी इंज आपेटे मंडीवा मेना, कि जो-जो बिना कामय बातो कोरो मंडेबा, न्याय गा दिन हारेक बातो गा हिसाब जेबा।

³⁷ परमेश्वर न्याय डाएवा एठा हार म्याखोम के दियागा द्वारा मंडीके बातो गा वोजीटे दोषी एठा निर्दोष ठहरातिंजूबा।”

यीशु टे निशान आसिवे

³⁸ एने घल्जी चोटो मूसा गा नियम इथूमिठाच एठा फरीसि कुरकू गा यीशु टे बिनती डाटे मंडीके, “हे गुरु, आले अमाटे म्या अचाम्बो कामय गा चिन्हा दोडो चहातावा होय।”

³⁹ यीशु नी दिकुके जवाब जीके कि इनी युग गा बुरा एठा आनोवा कुरकू अचम्बो कामय गा चिन्हा घागटावा होय, पेनो योना परमेश्वर गा कोनेटे मंडीमिठाच गा सेंग्गोन जो डाएन डा, डी अचम्बो कामय गा चिन्हा आरागे एठा तुनिका चिन्हा दिकुके बान जिऊ।

⁴⁰ डेनोगो योना परमेश्वर कोंटे मंडीमिठाच आफाई दिन आफाई रातो खाट काकू गा लाजेन नी थंदळके, डेनोगोका इंज जो कोरो गा कोण मेना आफाई दिन आफाई रातो ओटे गा तलान थंदळवा।

⁴¹ नीनवे शहर गा कुरकू न्याय गा दिन इनी युग गा कुरकू गा सेंग्गोन टेंगेनटे दिकुके दोषी ठहरातिंज्कुबा, चोयाकी दिकुनी योना गा अच्छा खाबोर आजुमटे मन बदलाके, एठा येटेन देटेन होय जो योना टे खाट मेना येठाभी आपे पश्चताप दडा टे बान मेंबा।

⁴² दक्षिण गा रानी न्याय गा दिन इनी युग गा कुरकू गा सेंग्गोन बिटबा डो दिकुके दोषी ठहरातिंज्कुबा चोयाकी देटेन सुलैमान गा ज्ञान आजोम घल्जी पृथ्वी गा खाट लेंक्कीटे हेके, भेबाव लेंक्कीटे हेन एठा डोगे येटेन देटेन होय, एठा येटेन देटेन होय जो सुलैमान राजाटे खाट मेना येठाभी आपे पश्चताप दडा टे बान मेंबा।

बुरा आत्मा के उरा घागटा

⁴³ “मेटे भूतोके मुके कोरो टे ओटबा होय, मेटे ळोखोळ जगान आराम्बो आखाट-इखाटबा पेनो दिजेन जगा बान घाटाऊ।

⁴⁴ मेटे हेजा हेज्केका मंडीवा होय, कि जो कोरो टे इंज हेन मेना दिजेनका हिराबा, एठा हेजेवा डो डी कोरो जीवन के सपा-सूत्र उरा गा रोंगो घाटाएवा।

⁴⁵ मेटे भूतो सेनेवा डो हेजाटे एठा बुरा सात भूतोकुके हेजा सेंग्गोन साकुवा होय, एठा डी कोरोन मुटे थंदळवा होय, एठा डी कोरो गा दशा पेला टे भी बुरा आरुवा होय, इनी युग बुरा कुरकू गेल्ला येनोगो गा डाऊवा।”

यीशु गा सच्चो खटला

⁴⁶ जब देटेन कुरकू गर्दी टे बातोका लक्के डा मेटे दियागा आंटे एठा सनी बोकोटे बल्लान टेंगेनके डा। एठा दियाटे बातो डा।

⁴⁷ जेकानी डीचके मंडीके, “डोगे, अमागा आंटे एठा आपेगा सनी बोको आमके बल्लान टेंगेनके होय। एठा दियाटे बातो डा।”

⁴⁸ येटेन बान आजोम मिठाच के भी जवाब जीके, इंजा आंटे एठा इंजा सनी बोको जे होय?

⁴⁹ एठा हेजे चेलाकू कोनेन हेजे टी बाळातिंजटे मंडीके, “डोगे, इंजा आंटे एठा इंजा सनी डाई इनिज होय।,

⁵⁰ चोयाकी जो जेकाभी इंजा स्वर्ग बाटे गा इच्छा लिंजेन सेंद्रवा, डीचका इंजा सनी बोको एठा बोकोजाई एठा आंटे होय।”