ಮತ್ತಾಯ್ 11 - गवली उनाई नियम

यूहना बपतिस्मा जिऊमिठाच गा प्रश्न

¹ मेटे यीशु हेजा बारह चेलाकूके गा निर्देश जीके मेना, मेटे देटेन पुरानौर गेन इथू एठा खाबोर घालके डो देटे टे ओलेन।

² यूहन्ना नी जेलेन यीशु मसीह गा कामय गा खाबोर आजुमटे हेजा चेलाकू तलाटे बार्खिंजके दियाटे इनी कोकोम्बारा कुलकेकु,

³ “चोच आमका मसीह मेना, डीचके कुकूल वादा परमेश्वर नी डाके डा या आले तुनिका दूसरा गा राह डोगे?”

⁴ यीशु नी दिकुके जवाब जीके, जो चोचकाभी आपे दोडो एठा आजुम लक्के मेना, देटेन सेबाई सेने डो यूहन्ना मंडीकी।

⁵ कि अंधा दोडोवा होय, एठा लंगडा सेंद्रा इखाटबा होय, कोळ्या सजाऊबा होय, एठा बेहेरा आजुमबा होय, मुर्द जीटाऊवा होय, एठा गिरबोकु के अच्छा खाबोर घालेवा होय।

⁶ एठा धन्य होय देटेन, दियागा विश्वास इंजा लिंजाटे बान बिट।

यीशु गा द्वारा यूहन्ना गा सम्मान

⁷ मेटे यूहन्ना चेलाकू देटे टे ओले मेना, मेटे यीशु गर्दी के यूहन्ना गा बारेन गघाल लज्जे, “आपे सुनसान जगान चोच दोडो ओले डा? चोच कोयो टे ओखेंज मिनी डोंगळाके?

⁸ डाबोलटे आपे चोच दोडो ओले डा? चोच नेरोम आंगी उरिके मिनी कोरो के? जो येनोगो आंगी उरिवा होय, दिकु राजभवनेन थंदळवा होय।

⁹ मेटे डाबोलटे चोच दोडो ओले डा? चोच तुनिका परमेश्वर गा कोनेटे मंडीमिठाच के दोडो गा घल्जी? हेन, इंज आपेटे मंडीवाकी, येटेन देटेन होय जो परमेश्वर कोंटे मंडीमिठाच टे भी खाट होय।

¹⁰ यूहन्ना देटेन कोरो होय दियागा बारेन पवित्र ग्रंथ इनी मंडीवा होय, कि ‘डोगे इंज इंजागा खाबोर जिऊमिठाचके अमा सम्मान कुलेजबा, जो अमा सम्मा कोरा तैयारेवा।’

¹¹ इंज आपेटे सच्चो मंडीवाकी, आए टाएन जोभी कोरोकु डायेन होय दिकु तलाटे म्याखोमभी यूहन्ना बपतिस्मा जिऊमिठाच जाटे खाट बाऊ होय। एठाभी स्वर्ग गा राज्यन सानी टे सानी भी यूहन्ना टे खाट होय।

¹² एठा मेटे टे यूहन्ना बपतिस्मा जिऊमिठाच खाबोर गघाल सुरुके, डी टेमो साटे आए टाएन स्वर्ग गा राज्य ताखातदार टे फाईलातिंजू लाके होय, एठा खीजो कुरकू नी एने लिंजेन हामला डाए लक्के।

¹³ परमेश्वर गा कोनेटे मंडीमिठाच गा द्वारा ओल्के मिनी सेबाई पुस्ताक गेन मूसा गा नियम गेन यूहन्ना बपतिस्मा जिऊमिठाच गा हेजे गा टेमो टाएन राज्य गा बारेन ओल्के मेना।

¹⁴ अगर आपे इनी सच्चाई गेन विश्वास दोडो टासो आजुमे, यूहन्ना का देटेन एलिय्याह होय दियागा दूसरा बार हेजे गा बारेन मंडीके डा।

¹⁵ जेकाभी इनी बातो के आजुमबा होय जो इंज मंडीवा, डीके सामझातिंजू गा कोशिश डाए।

¹⁶ इंज इनी टेमो गा कुरकू गा तुल्ना तुनी कुरकू सेंग्गोन डाए? दिकु डी चफनीकू गा रोंगो होय, जो शिकायत लक्के होय, एठा दिकु इनी बातो टे शांती बाऊ कि दूसरा पंचाती कुरकू चोच दडा लक्के होय।

¹⁷ आलेनी आपेगा घल्जी खुशी गा संगीत साडीके पेनो आपे बान नाचोडुका आलेनी कासु गा संगीत साडीके एठा आम नी बान नाचोडुका, एठा आपेनी छाती बान मुंडादुका।

¹⁸ चोयाकी यूहन्ना बपतिस्मा जिऊमिठाच दूसरा कुरकू गा रोंगो न जोजोम एठा न अंगूर गा रेस्सो नुनू डा, इनिघल्जी दिकु मंडी डा कि दिजेन भूतो मुके डा।

¹⁹ मेटे इंज कोरो गा कोण मेना एठा इंजा आटा सादा होय, एठा दिकु मंडीवाकी डोगे खादळया एठा सिडू कुत्या कोरो होय, टेक्सा सा मिंकू एठा पापोकु गा सोपती होय। पेनो ज्ञान हेजा सेबाई कामयनौर गेन सच्चो ठहरातिंज्के होय।”

मन बान इखाट मिंकू लिजेन हाय

²⁰ डी कुरकू गा धिक्कार केकु, दिकुनी यीशु नी घोनेच अचम्बो कामय डाके डा। चोयाकी दिकुनी पापो के आराटे परमेश्वर गा कोनेन इकुगा मन बान बदलाडुका डा।

²¹ धिक्कार होय आम लिंजेन खुराजीन शहर! धिक्कार होय आम लिंजेन बैतसैदा शहर! जो अचम्बो कामय आमेननी डाके, अगर दिकु सोर एठा सैदा शहरेन डाके टासो, मेटे देटेन कासु आंगी उरीटे कापरेन होप येंडाटे पेलाका मन बदलाके धारे।

²² पेनो इंज आपेटे सच्चो मंडीवा होय कि न्याय गा दिन परमेश्वर जो सजा सोर एठा सैदा शहर के जेबा, देटेन डी सजा घोनेच कमुबा जो देटेन आपेके जेबा।

²³ एठा हे कफरनहूम शहर गा कुरकू, चोच आपे स्वर्ग टाएन ऊचाऊबा मेना? आमनी नरक टाएन इटान बोचोगुवा, जो शक्तीगा कामय आमेननी डाके होय, अगर सदोम शहर गेन डाके धारे, मेटे देटेन आए टाएन थंदळ डा।

²⁴ पेनो इंज आपेटे सच्चो मंडीवा होय कि न्याय गा दिन परमेश्वर जो सजा सदोम शहर के जेबा, देटेन डी सजा घोनेच कमुबा जो देटेन आपेके जेबा।

यीशु गा मेरान आराम्बो

²⁵ डीका टेमो यीशु नी मंडीके, “हे स्वर्ग बाटे बदळा एठा पृथ्वी गा प्रभु, इंज अमागा धन्यवाद डाएवा मेना, कि आमनी इनी बातो के ज्ञानी एठा सामझदार कुरकू टे उखुटे डोके, एठा जो कुरकू आनपाळ कुरकू गा रोंगो होय दिकु लिंजेन ओटके होय।

²⁶ सच्चो होय स्वर्ग बाटे, चोयाकी आमेन इनिका अच्छा लगातिंजे।”

²⁷ इंजा स्वर्ग बाटे गा वोजीटे इंज्के सेबाई सोपातिंज्के होय। स्वर्ग बाटे गा अलावा जेका कोण के बान हाडाई एठा न जेका स्वर्ग बाटे के हाडाई होय, एठा बस कोण एठा इनिजगा अलावा कोण अदा कास कुरकू के स्वर्ग बाटे बारेन गघाल चाहतावा।

²⁸ “हे सेबाई कामय मिंकू एठा ओजाटे दबातिंज्के कुरकू, इंजा मेरान हेजे, इंज आपेके आराम्बो जेबा।

²⁹ इंजा टाऊटे हेजे एठा इंजाटे इठोए चोयाकी इंज नम्र एठा दिल गेन दिन मेना, एठा आपे आपेगा दिल गेन आराम्बो घाटाऊवा।

³⁰ चोयाकी इंज जो दडा गा हुकूम जेबा मेना, डीके दडा मुश्किल बाऊ।”