लूका 9 - गवली उनाई नियम

बारह चेलाकूके कुकूल

¹ डाबोलटे यीशु नी हेजा बारह चेलाकूके हेजा मेरान हकोलेकु एठा डाबोलटे दिकुके भूतोकुके एठा बिमारी के लेंक्की सेने गा शक्ती एठा हाक जीके।

² एठा बारह चेलाकूके परमेश्वर गा राज्य गा प्रचार दडा, एठा बिमारी के ससाजा घल्जी कुल्केकु।

³ एठा डीचनी दिकुटे मंडीके, “कोरा गा घल्जी चोचका बाकी सा न लठ्ठा न झोरा, न सोकळा, न डामा एठा न बरी-बरी आंगी?

⁴ एठा जेका आमके हेजा उरान थंदळ घल्जी हाकोटासो, दियागा पाओना आरुटे थांदळे। एठा देटे टेका बिडायु।

⁵ जो जेकाभी आमके मनेन कोम बाने, मेटे आपे पुराटे ओट लठ्ठाका अमा नंगा गा धुल्ला कुठाकी ताकी दिकु खिलाफबेन गवाही डायु।”

⁶ मेटे दिकु ओटजे डो गाँव-गाँवेन अच्छा खाबोर घागल लठ्ठाका, एठा हरेक कुरकू के ससाजा लठ्ठाका इखाट लक्के।

हेरोदेस गा घबरातिंजू

⁷ एठा उफुन देशो गा मेटे हेरोदेस राजा नी येटेन सेबाई आजुमटे हिगराएन, चोयाकी चोटोकु का मंडीके, कि यूहन्ना बपतिस्मा जिऊमिठाच गोएन मिठाजा टे जीटाएन होय।

⁸ एठा चोटोकु नी येटेन, कि एलिय्याह डोके होय, परमेश्वर गा कोनेटे मंडीमिठाच जुना सनाकु तलाटे जेका जीटाएन होय।

⁹ पेनो हेरोदेस राजा नी मंडीके, “यूहन्ना बपतिस्मा जिऊमिठाच होय, इंज खुद दियागा कपार के म्हाके डा, नका येटेन जे होय, जेगा विषय गेन येनोगो बातो आजोम्बा होय?” एठा डीचनी डीचके दोडो गा इच्छा डाके।

मोनाई हजार कुरकू के चचारा

¹⁰ जब दिकु बारह कलामके मिंकू चेलाकूनी यीशु कुल्केकु डबोलटे हिराके दियागा उफुन भी कोनेन म्याखठठा जमाएन एठा जो चोचकाभी दिकुनी डाके एठा इथूकेकु डा। सेबाई यीशु के घाल्के। एठा डीचनी डीचके दोडो अलग्गो डाटे बैतसैदा जीमू म्या पुरान सैय्येनेच।

¹¹ इनी चिनाटे गर्दी दियागा टाऊटे हेजे लज्जे एठा यीशु खुशी गा सेंग्गोन दिकुटे मिलातिंजे। दिकुटे परमेश्वर गा राज्य गा बातो लज्जे मेना, एठा जो सजाऊ चहतावा डा, दिकुके सजाकेकु।

¹² जब डी दिन सिंगरूबु लज्जे, मेटे बारह चेलाकूनी हेंडो दियाटे मंडीके, “गर्दी के भिडाए कि उफुन भी कोने गा गाँवेन एठा बस्तीन सेने डो आबु घल्जी थंदळ घल्जी जगा एठा आटा घाटाए, चोयाकी आबु येटेन सुनसान जगान के होय।”

¹³ यीशु नी दिकुटे मंडीके, “आपे दिकुके जोम गा जे।” दिकुनी मंडीके, “आलेगा मेरान मोनाई सोकळा एठा बरी काकूके आराकी एठा चोचका बाऊ। पेनो हां, अगर आले इनी सेबाई कुरकू गा घल्जी आटा चचारा टासो, मेटे आलेन आटा मोलाटे सा सेने होना। गर्दी गेन मोनाई हजार मेटे सानाकु का डा।”

¹⁴ मेटे यीशु नी हेजा गा चेलाकू मंडीके, “दिकुके पाचासो-पाचासो कुटे लाईन टे सुबानकू।”

¹⁵ दिकुनी येनोगो डाके एठा सेबाईकु के सुबानकेकु।

¹⁶ मेटे यीशु नी डी मोनाई सोकळा एठा बरी काकू साले, एठा स्वर्ग गा कोने धोटे धन्यावाद डाके, एठा टुक्का टे चेलाकूके जीके कि कुरकू जे।

¹⁷ एठा सेबाई कुरकू लजा बिऊ आटा जोवे, चेलाकूनी बचातिंज्के सोकळानौर एठा काकूनौर गा तुकळा के बारह टोपला भेट्टी टे।

पतरस गा यीशु के मसीह मनातिंजेज्बा

¹⁸ मेटे देटेन एकलान प्रार्थना दडा लक्के डा, एठा चेलाकू दियागा सेंग्गोन डा, मेटे डीचनी दियाटे कोम्बराके, “कुरकू इंज्के चोच मंडीवा होय?”

¹⁹ डीचनी जवाब जीके, “यूहन्ना बपतिस्मा जिऊमिठाच, एठा जेका-जेका परमेश्वर गा कोनेटे मंडीमिठाच एलिय्याह, एठा जेका येटे गा परमेश्वर गा जुना मंडीमिंकू तलाटे जेका जिटाके होय।”

²⁰ यीशु नी दिकुटे मंडीके, “पेनो आपे इंज्के चोच मंडीवा?” पतरस नी जवाब जीके, “आम परमेश्वर गा कोंटे कुल्केमी मसीह होय।”

²¹ मेटे यीशु नी चेलाकूके चातराएटे घाल्के, “येटेन दियागा बारेन जेकाकेका बाकी मंडी।”

यीशु द्वारा हेजा गुजू गा भविष्यवाणी

²² मेटे यीशु नी हेजा चेलाकूके इथूटे मंडीके कि जरुरी होय, “इंज जो कोरो गा कोण होय, घोनेच कासु टूलबे एठा बान मेना, एठा यहूदी जुना सनाकु एठा मुख्यायाजक एठा मूसा गा नियम इथूमिठाच वोजीटे इंज्के मनेन बान मनातिंजटे घोच्केमी एठा देटेन आफाई दिन जीटाएन।”

यीशु गा टाऊटे सेंदरा गा मतलब

²³ यीशु नी सेबाईकु टे मंडीके, “अगर जेका इंजा चेलाकू आरु टासो, मेटे आपना खुदके बान मेन एठा हारेक दिन आपेन आपेगा क्रूस तुटूल घल्जी तैयारका थंदळ होना।

²⁴ चोयाकी जो जेकाभी हेजा गा जान बचातिंजेवा, देटेन डीके नशोऊबा, पेनो जो जेकाभी इंजा चेला आरु गा वोजीटे हेजा जीवन जेबा डीका डीचके बचातिंजेवा।

²⁵ अगर डीच दुनिया गा सेबाईकु टे खाट डामा कोरो आरोएन टासो, एठा आपना जान नशोए, या दियागा ताखलिफ टूलेवा, मेटे दियेन चोच फायदा डाऊवा?

²⁶ जो जेकाभी इंजाटे एठा इंजा बातो टे सेरोम्बा, कोरो गा कोण भी मेटे हेजा गा, एठा इंजा बाटे गा, एठा चोखरा स्वर्गदूतकु महिमा गेल्ला पृथ्वी लिंजेन हिराबा, मेटे दियाटे सेरोम्बा।

²⁷ इंज आपेटे सच्चो मंडीवाकी जो येटेन टेंगेनके होय दिकु जेका-जेका एनोगो होय, कि जब टाएन परमेश्वर गा राज्य बन दोडो, मेटे टाएन गुजू गा एसास बान डाऊ।”

मूसा एठा एलिय्याह गा सेंग्गोन यीशु

²⁸ इनी बातो गा तुनिका इलार दिन बादोन देटेन पतरस, याकूब एठा यूहन्ना के सेंग्गोन साटे प्रार्थना दडा घल्जी ऊँचा टुक्कीन ओले।

²⁹ जब देटेन प्रार्थना दडाका लक्के डा, मेटे दियागा चेहरा गा पूरा रुपो बदलाएन। एठा दियागा आंगी पुलूम्जे डो उजालाएन।

³⁰ एठा डोगे, मूसा एठा एलिय्याह जो परमेश्वर गा कोनेटे मंडीमिठाच, इनी बरी कोरो किंज यीशु गा सेंग्गोन बातो लक्के डा।

³¹ दिकु महिमा सेंग्गोन डोकेकु, एठा दियागा गुजू गा बातो लक्के डा जो यरूशलेम शहर गेन डाऊ मिनी डा।

³² पतरस एठा दियागा सोप्ती दुनूमेनके डा, एठा जब अच्छा खिजाटे चेव हेन, डोके मेटे यीशु गा तेज के, एठा डी बरी कोरो किंज जो दियागा सेंग्गोन टेंगेनके डा, डोके।

³³ जब दिकु दियागा मेराटे सेने लज्जे, मेटे पतरस नी यीशु टे मंडीके, “हे स्वामी, आलेगा येटेन थंदळ भला होय, इनिघल्जी आले आफाई डेरा हारोए, म्या अमा घल्जी म्या मूसा घल्जी एठा एलिय्याह गा घल्जी।” देटेन मालूम बान डा, कि चोच मंडी लक्के होय।

³⁴ देटेन इनिका मंडीका लक्के डा, कि म्या बदळा नी हेंडो दिकुके उगुरजेकु, एठा जब दिकु डी बादलाळाटे बोचो लज्जे, मेटे हिगराएन।

³⁵ एठा डी बदळा टे इनी आवाज हेन, “येटेन इंजा प्रिय कोण होय, इनिजगा आजुमे।”

³⁶ येटेन आवाज आजुमकेका डो यीशु के एकलाका डोके, एठा दिकु कायोम थंदळजे एठा चोचकाभी डोके डा, दियागा तुनिका बातो डी दिनेन जेकाटेका बान मंडीडुका।

पोट्टाके भूतो टे आरा

³⁷ एठा दूसरा दिन मेटे दिकु टुक्कीटे आगुरुके, मेटे म्या खाट गर्दी दियाटे हेन डो मिलातिंजे,

³⁸ मेटे, गर्दी तलाटे म्या कोरोनी चिल्लातिंजटे मंडीके, हे गुरु इंज आपेटे बिनती डाए बाकी, कि इंजा कोण लिंजेन ध्यान टे डोगे, चोयाकी देटेन इंजा म्या कोण होय,

³⁹ एठा डोगे, म्या भूतो डीचके उठाकेनेच होय, एठा देटेन म्याखोमटे म्याखोम चिल्लातिंजू लज्जे होय, पेसो भेट्टीव्वा होय एठा डीचके कुचलातिंजटे ताखलिफबेन आरागेच्बा होय।

⁴⁰ एठा इंज्नी अमागा चेलाकू टे बिनती डाके, पेनो डीच बान ओटडुका।

⁴¹ यीशु नी जवाब जीके, “हे बान विश्वासी एठा आळस्या कुरकू, इंज चोटो टाएन आपेगा सेंग्गोन थंदळवा, एठा आपेगा सेहनेवा? आमगा कोण के येटेन सालेच।”

⁴² देटेन हेजेका लक्के डा, कि भूतोनी डीचके सोडकेनेच कोळेच्केनेच, पेनो यीशु नी भूतोके कल्लाकेनेच एठा पोट्टाके साजाटे दियागा बाटेन जीकेनेच।

⁴³ मेटे सेबाई कुरकू परमेश्वर गा महा शक्तीटे अचम्बो मेना। पेनो जब सेबाई कुरकू डी सेबाई कामय टे जो देटेन दडा डा, अचम्बो दडा लक्के डा, मेटे डीचनी हेजा चेलाकू टे मंडीके।

⁴⁴ “इनी बातो आपेगा लुटूरेन आजुम्का थंदळकु, चोयाकी कोरो गा कोण कुरकू गा टी गेन उठाउवा होय।”

⁴⁵ पेनो दिकु इनी बातो के बान सामजा तिंजडुका डा, एठा येटेन दिकुटे उखुके मेना, कि दिकु डीचके चीनायू बाकी होना, एठा दिकु डीचके इनी बातो गा विषय गें यीशु टे कोकोम्बारा टे हिगरा डा।

सेबाईकु टे खाटजे?

⁴⁶ एठा दिकुनी येटेन हिंजमान लज्जे, कि आलेटे खाटजे होय?

⁴⁷ पेनो यीशु नी मना गा बिचार मालूम्जे एठा म्या सनी के साटे हेजा गा मेरान तेंगेन्केनेच,

⁴⁸ एठा दिकुके मंडीके जो जेकाभी इंजा जीमू टे इनी सनी के मनेनेच टासो होय, देटेन इंजकेभी मानेनकोम्बा होय, देटेन इंजा कुकुलमिठाच के मानेनकोम्बा होय चोयाकी जो आपेन नी सेबाईकु टे सानी टे सानी होय, डीका खाट होय,

जो खिलाफबेन बाऊ, देटेन पक्ष गेन होय

⁴⁹ मेटे यूहन्ना नी यीशु टे मंडीके, “हे स्वामी, आलेनी म्या कोरो के अमा जीमू टे भूतोके ओट टेमो डोकेनेच, एठा आले डीचके बाकी मेन लक्के, इनिघल्जी कि डीच आले रोंगो चेलाकू टे बाऊ डा।”

⁵⁰ यीशु नी यूहन्ना टे मंडीके, “डीचके बाकी रोराकातिंज, चोयाकी जो आलेगा खिलाफबेन बाऊ, देटेन आलेगा सेंग्गोन होय।”

यरूशलेम गा यात्रा

⁵¹ मेटे दियागा मठान तुटूल गा दिन पुराऊ गेन डा, जो डीचनी यरूशलेम शहर गेन सेने गा बिचार काळाक्कोके।

⁵² एठा डीचनी हेजा गा खाबोर जिऊमिठाचके कुल्केनेच एठा दिकु सामरी कुरकू गा म्या गाँवेन ओले, कि दियागा घल्जी जागा तैयार डोकी।

⁵³ पेनो डी कुरकू नी डीचके आगुरूडाए डुका, चोयाकी देटेन यरूशलेम शहर गेन सेने लक्के डा।

⁵⁴ येटेन धोटे दियागा चेलाकू याकूब एठा यूहन्ना नी मंडीके, “हे प्रभु आम चोच चहतावा होय, कि आले हुकूम जे, कि बदळा टे सिंगेल बोचोटे दिकुके नशोकु? जैसा एलिय्याह नी डाके डा।”

⁵⁵ पेनो डीचनी एठाभी दिकुके काल्लाकेकू एठा मंडीके, “आपेन बान मालूम कि आपे टोनोगो आत्मा गा मेना। चोयाकी कोरो गा कोण कुरकू गा जान के नशो दडा बाने पेनो बबाचातिंज घल्जी हेन होय।”

⁵⁶ एठा दिकु तुनिका गाँवेन ओले मेना।

यीशु गा टाऊटे सेंदरा गा मतलब

⁵⁷ मेटे दिकु कोरा टे चेल्के डा, म्या मूसा गा नियम इथूमिठाच नी यीशु गा मेरान हेंडो मंडीके, “हे गुरु इंज आमगा चेला आरु घल्जी अमा टाऊटे हेजेवा।”

⁵⁸ यीशु नी डीचके मंडीके, “कोल्जाकु गा मेरान दिकुगा गुफानौर एठा बदळा गा भूरिकु गा मेरान दिकुगा बुदली थंदळवा होय, पेनो इंज जो कोरो गा कोण मेना इंजा मेरान म्या उरा भी बाऊ देटेन इंज गिटीचबा।”

⁵⁹ डीचनी दूसराकु टे मंडीके इंजा टाऊटे हेजे, डीचनी मंडीके, “हे प्रभु, इंज्के पेला उरान सेंडाए, इंजा बाटे गा गुजू गा बादोन इंज डीचके गळतिंजेज्बा एठा डाबोलटे हेजेवा डो अमा चेला आरुवा।”

⁶⁰ डीचनी डीचके मंडीके, गोयेन मिंकूके इकुके का म्हाळा गळातिंज डाए, पेनो अमा सेने डो परमेश्वर गा राज्य गा अच्छा खाबोर घाल्के,

⁶¹ म्याखोम नी एठा मंडीके, “हे प्रभु, इंज अमा टाऊटे हेजेवा, पेनो पेला इंज्के सेंडाए कि इंज इंजा सगाकु विदा साटे हेजेवा।”

⁶² यीशु नी डीचके मंडीके, “जो जेकाभी हेजा टी नंगर लिंजेन धोटे टाऊ दोडोवा होय, देटेन परमेश्वर गा राज्य गा लायको बाऊ।”