लूका 8 - गवली उनाई नियम

यीशु गा चेलाकू

¹ एनेगा बादोन यीशु आसो-पासो गाँवेन ओले एठा कुरकू के परमेश्वर गा राज्य गा अच्छा खाबोर घागल डा एठा बारह चेलाकू दियागा सेंग्गोन डा।

² एठा अदा जापाएकु भी जो भूतोकुटे एठा बेमारी नौर टे आराकेकु मेना डा। “दिकु तलाटे म्याखोम गा जीमू मरियम डा जो मगदेला गाँव टे डा, एठा दियाटे आईय्या भूतोकु ओटके डा।”

³ राजा हेरोदेस गा भण्डारी खुजा गा जापाएटे योअन्ना एठा सुसन्नाह एठा घोनेचका जापाएकु इकुगा संपत्ति टे यीशु एठा दियागा चेलाकू गा सेवा दडा डा।

बीजो बिबीट मिठाच गा उदाहरण

⁴ मेटे खाट कुरकू गा गर्दी घोलाएन, एठा पूरा-पूरा गा कुरकू दिया मेरान हेजे डा। मेटे डीचनी दिकुके उदाहरणेन मंडीके,

⁵ “म्या खिटी बिबीट मिठाच बीजो बिबीट ओटजे, खिटी बिबीट लठ्ठाका अदा कोरा गा धुरान बोचोयेन, एठा ठाजे डा, एठा बदळा गा भूरिकुनी डीके हिरीमजे।

⁶ एठा अदा बीजो पाठा लिंजेन बोचोयेन, एठा ओठ्जे। पेनो साईली बान घटाऊ टे लोखोळजे।

⁷ अदा झाळी गा तालान बोचोयेन, जानोम बाळातिन्जू लक्के डा, एठा जानोम नी खाटजे डो डीके दबातिंजकेनेच।

⁸ एठा पेनो अदा अच्छा ओटेन बोचोयेन, एठा इनी बीजो वोट्जे एठा घोनेच बीजो वोट्जे अदा तीसो गुना बीजो वोट्जे अदा साठो गुना, सौ गुना। फाल साले” इनी मंडीटे जोर टे मंडीके जो जेकाभी इंजगा मंडी आजोम टासो देटेन आजुमे।

उदाहरण गा मकसद

⁹ दियागा चेलाकूनी दियाटे कोम्बाराके, “उदाहरण गा चोच मतलब होय?”

¹⁰ आपेन परमेश्वर गा राज्य गा बारेन सच्चाई गा सामाझ जीके होय से, पेनो दूसराकु गा उदाहरणेन घालेवा होय, इनिघल्जी दिकु दोडो गेन डोके एठा दिकुन दोडुका एठा मिठाच आजुमे एठा बान समझातिंज्दुका।

बीजो बिबीट मिठाच उदाहरण गा मतलब

¹¹ “उदाहरण गा मतलब इनी होय? बीजो जो परमेश्वर राज्य गा वचन गा खाबोर होय।”

¹² कोरा गा धुरा गा इनी कुरकू दिकुनी वचन के आजुम्के एठा शैतान हेजेवा डो दिकु मन टे वचन टूलेवा होय। कि कही येनोगो बाकी डाऊ कि दिकु वचन लिंजेन विश्वास डाटे उध्दार घटौवा।

¹³ अदा कुरकू डेका रेंगो डी बीजो टे डायेबा होय। जो पाठा लिंजा गा येनोगो होय, कि मेटे आजोम्बा, मेटे खुशीटे वचन के मानेन नेवा होय, पेनो जळी बान उठा वोजीटे दिकु थोळासा टेमो टाएन विश्वास डोएबा अंदाजो गा टेमोन विश्वास बान दोडो,

¹⁴ अदा कुरकू रोंगो डी दाना टे डाएवा जो झाळीन बोचोयेन, मेटे इनी होय। जो आजोम्बा होय, पेनो चिंता एठा डामा एठा जिंदगी गा लंडडा खुशी गेन फसातीन्जुवा होय। एठा डेगा फल बान जाऊ।

¹⁵ पेनो अदा कुरकू रोंगो डी कोरो गेल्ला डाके जो अच्छा ओटेन बोचोके होय, जो वचन आजुमटे भला कास मनेन संभलातिंज टे डोएबा होय, एठा आराम्बोटे फल सेगेवा,

दिवा गा उदाहरण

¹⁶ जेका म्या दिवा के जुलटे म्या टोपला टे बान उगुर, एठा न पारकोमा इटान डोएबा होय। पेनो म्या दिवा के म्या कोंडाळन लिंजेन डोएबा होय, कि उरा तालान उजाला घाटाऊवा।

¹⁷ परमेश्वर हरेक डी मंडीके वोड़ेवा देगो कुरकू बान हाडाई डी डीके मंडीके एसास जेबा जो आए टाएन उखुके होय।

¹⁸ इनिघल्जी ध्यान टे थंदळे, आपे तुनी रिती टे आजोम्बा होंगा? चोयाकी दियागा तालान समझातिंजू गा इच्छा टाएन होय, परमेश्वर डीचके एठाभी समझातिंज गा जेबा। मेटे इनी समझातिंजू गा इच्छा बान दोडो, कि इंज चोच इथूलक्के होय, डो दियागा मेरान जो समझो होय, परमेश्वर दियाटे डी भी सेगेवा।

यीशु गा सच्चो खटला

¹⁹ दियागा आंटे एठा सनी बोकोटे दियागा मेरान हेजेवा, पेनो कुरकू गा गर्दी गा कारण दियाटे मिलातिंज डुका,

²⁰ एठा डीचके मंडीके, डोगे, अमागा आंटे एठा अमा सनी बोको आमके बल्लान टेंगेनके होय, अमाटे मिलातिंजू होय।

²¹ डीचनी दियागा जवाब बेन दिकुके मंडीके, “इंजा आंटे एठा इंजा सनी डाई इनिज होय। जो परमेश्वर गा वचन आजोम्बा एठा मनातीन्जेवा होय।”

कोयो एठा धूंडी के ककायोम

²² एठा म्या दिन यीशु एठा दियागा चेलाकू डोंगा लिंजेन पेळेन, एठा यीशु नी चेलाकू टे मंडीके, “हेजे गलील जिल्हा गा समुद्र गा हुधेळेन बो।” इनिघल्जी दिकुनी डोंगा इटीके।

²³ पेनो मेटे डोंगा चेल्के डा, मेटे यीशु डोंगान गिटेन डा, एठा समुद्रान कोयो धुंदळ हेन, एठा डोंगा डा टे भेट्टेन एठा दिकु मुसिबादेनके डा।

²⁴ मेटे दिकुनी यीशु गा मेरान हेंडो डीचके बिठ्केनेच, एठा मंडीके, “हे गुरु आले नशाऊ लक्के होय।” मेटे डीचनी बिटजे डो तूफान के कल्लाकेनेच, एठा डी रुकातिंजे एठा शान्तेन।

²⁵ एठा डीचनी डीचके मंडीके, आपेगा विश्वास तोटेन डा? पेनो अमा इंज्के चोया परेशान कोम्बा एठा बिचारजे डो इकु-इकुका मंडी लज्जे इनीच तुनी कोरो होय? येदे टाएन कि कोयो एठा लापा भी दियागा हुकूम गा रोंगो दडावा होय।

भूतोकुके बल्लान कोखला

²⁶ जब यीशु दियागा चेलाकू गेल्ला समुद्रा गा हुधेळेन गिरासेनियो गाँव गा इलाकन आदिरजे जो डी देळेन गलील गा सम्मान होय।

²⁷ मेटे देटेन धुरान आगुरुके मेटे डी नगर गा म्या कोरोन जो भूतोकु डा। एठा घोनेच दिनाटे डी कोरोन आंगी उरी बान डा, उरान थंदळ डा पेनो मर्गोटो गुफा जो मार्गोटो होय थंदळ डा।

²⁸ देटेन यीशु के धोटे चिल्लातिंजके एठा दियागा सम्मान बोचोयेनडो खाटटे का मंडीके, हे यीशु परमयाजक परमेश्वर गा कोण, आमेन इंजाटे चोच कामय? इंज अमा बिनती दडा होय, इंज्के तखलिफ बाकी जिऊ?

²⁹ चोयाकी देटेन भूतोके डी कोरो टे ओट गा हुकूम जिऊ लक्के डा, इनिघल्जी डीच दिया लिंजेन बार-बार सेने डा, एठा अगर कुरकू डीचके साकळी एठा हातकाळी टे भी टोलकेनेच टासो, तोभी देटेन टोलके मिनी टयागे मेना डा, एठा भूतो डीचके सुनसान जगान ससाडूप डा।

³⁰ यीशु दिजाटे कोम्बराके, “अमागा चोच जीमू होय? डी कोरो डीचके मंडीके, इंज जीमू सेना होय, चोयाकी घोनेच भूतोकुनी दिया तालानकु होय?

³¹ एठा दिकुनी दियाटे बिनती डावे, आलेके यानेकी पातल गेन सेने गा हुकूम बाकी जिऊ।

³² देटेन टुक्की लिंजेन सुकळीकु गा म्या खाळु चाचारा लक्के डा, मेटे डीचनी दियाटे बिनती डावे? कि आलेके दिकु तालान येण्डाकेमी,

³³ मेटे भूतो डी कोरो टे ओठ्जेडो सुकळीकु गा खाळु एठा देटेन झाळीकु तलाटे झुजाप तालाव गा जल्दी डा मेरान ओले एठा गोएन।

³⁴ दिकुगा चाचरा मिठाच सळुप जेडो पुरान एठा गाँवेन इनी खाबोर घाल्के।

³⁵ एठा कुरकू येटेन जो डायेन डा, डीके धोटे ओले, एठा यीशु गा मेरान जो कोरो टे भूतो ओटके डा, डीचके यीशु गा नंगा मेरान कपळे उरीटे ध्यान टे सुबानटे धोटे हिगरायेन,

³⁶ येदिकुनी सुकळीकु गा खाळु गा पूरा हाल दूसरा कुरकू के घाल्के, कि देटेन भूतो सताटीनज्के नेच कोरो तुनिरोंगो साजाएन होय?

³⁷ मेटे गिरासेनियो गाँव गा आसो पासोन गा सेबाई कुरकू नी यीशु टे बिनती डावे, कि आलेगा येनेटे सेंजू हुंगान चोयाकी दिकु लिंजेन भेबाव घबरातिंजे डा? मेटे देटेन डोंगा लिंजेन पेळेन डो हिराके मेना?

³⁸ जो कोरो टे भूतो ओटके डा, देटेन यीशु टे बिनती दडा लज्जे, इंज्के भी अमा सेंग्गोन साकोम।

³⁹ अमा उरा गेन हिरागे एठा कुरकू मंडीकी, कि परमेश्वर नी अमा घल्जी टोनोगो खाट कामाय डाके, होय देटेन ओलेडो सेबाई पुरान खाबोर गघाल लज्जे, यीशु नी इंज घल्जी चोफर खाट कामय डाके।

बिमार जपाए एठा गोयेन तराईके जीवन दान

⁴⁰ मेटे यीशु हिरा लक्के डा, मेटे म्या खाट घोंजा यीशु गा मेरान घोलाएन होय, चोयाकी दिकु सेबाईकु दियागा इंतजार दडा लक्के डा,

⁴¹ एठा डोगे, याईर जीमू म्या कोरो जो आराधना जगा गा मुख्या डा, हेन, एठा यीशु गा सम्मान टोपेरे जेगाके। एठा डी मुख्याकुनी इनी मंडीटे बिनतीके कि इंजा उरान बो,

⁴² चोयाकी दियागा बारह साल गा म्या कोन्जाई टे डा, येदे टाएन कि कुरकू यीशु टाऊटे हेजे एठा दियागा आसो-पासो खाट घोंजा जमाएन।

⁴³ एठा म्या जापाएनी दियागा पचना आडी बारह साल टे चोलाकाभी बान रुकातिंज्दुका। एठा डीचनी घोनेच खाट कासु टूलबे, एठा हेजा सेबाई डामा कखार्चोन भी डीच सजाडुका।

⁴⁴ इनिघल्जी डीच खाळु तलाटे दियागा टाऊटे हेन एठा दियागा कुर्ता के उठाये। एठा डीका टेमो डी जपाए गा पचना आडी बांददोयेन।

⁴⁵ येने लिंजेन यीशु नी मंडीके, इंजा आंगीके जे उठाके? मेटे सेबाईकु इखाटजे, मेटे पतरस एठा दियागा सेंग्गोमिनी नी मंडीके, हे स्वामी अमा दोडोवा होय कि कुरकू अमा लिंजेन दबातिंजकोम लक्के होय, एठा अमा लिंजेन बोचो लक्के होय, एठा आम मेंबाकी जेनी इंज्के उठाकेमी होय?”

⁴⁶ पेनो यीशु नी मंडीके, जेकानी इज्के उठाकेमी होय चोयाकी इंजेन नी मालूम्जे होय? चोयाकी डीच चिनाए डा कि देटे शक्ती ओठ्जे डा।

⁴⁷ इनिघल्जी डी जपाएनी डीच यीशु गा मेरान हेन डो एठा कपार झुकातिंजटे दियागा सम्मान ठोपरे जेगाके। हिघराटे एठा कपतिंजटे डीचनी यीशु के सेबाई घाल्के कि डीचनी चोच डाके डा एठा डबोलटे दियागा चोच डाएन।

⁴⁸ डीचनी डीचके मंडीके, “हे कोंजाई, इंज्नी आमके बबाचातिंजकोम्बा, चोयाकी आमनी इंजा लिंजेन विश्वास डोके। इनिघल्जी अमा बिमारी नका बान हिरा। अमा शांती टे सेंजू।”

⁴⁹ देटेन जब यीशु दियाटे जापाएटे बातो लक्के डा, अदा कुरकू याईर आराधना जगा गा मुख्या गा उरा टे हेन डो मंडीके, “नका गुरुके परीशान दडा गा जरुरात बाऊ होय, चोयाकी अमा कोंजाई गोएन होय गुरुके कासु बाकी जिऊ।”

⁵⁰ यीशु नी आजुमटे जवाब जीके, हिगरा बाकी बस इंजा लिंजेन भरोसा डोए, मेटे देटेन बचातिंजू,

⁵¹ उरान हेंडो दिच्नी पतरस एठा यूहन्ना एठा याकूब एठा ताराई गा आंटे-बाटे के आराटे एठा जेकाकेभी आबुगा सेंग्गोन तालान बाकी हेचडाए,

⁵² एठा सेबाईकु दियाघांजी मुंडा जोम लक्के डा, पेनो दिच्नी मंडीके, जाम बाकी देटेन गोजदुका पेनो गिटीच लक्के डा?

⁵³ दिकु इनी चिनाटे, कि गोयेन होय, दियागा लांद्दा लज्जे मेना,

⁵⁴ पेनो डीचनी दियागा टी उठाके, एठा हाकोटे मंडीके, ए तराई बिडे!

⁵⁵ मेटे दियागा जान एठा हेन एठा तुरुटो बिटजे; एठा डीचनी हुकूम जीके, कि डीचके जोम गा जिकी?

⁵⁶ दियागा आंटे-बाटे बिचारजे, पेनो दिच्नी दिकुके घाल्के, कि येटेन जो डायेन होय, जेकाटेका बाकी मंडी,