लूका 7 - गवली उनाई नियममुख्या गा विश्वास लिंजेन यीशु गा अचम्बोऊ 1 यीशु नी हेजा सेबाई बातो देटेन टाकु कुरकू घागल गा बादोन कफरनहूम पुरान हेन। 2 एठा तुनिका मुख्या गा म्या भग्या जो दियागा लाळ गा डा। देटेन बेमारी गुजून डा। 3 डीचनी यीशु गा कामय गा चर्चा आजुमटे यहूदी कुरकू गा चोटोका यहूदी जुना सनाकुके यीशु टे इनी बिनती दडा गा दियागा मेरान कुल्केनेच, कि देटेन हेजे डो दियागा भाग्य के सजाकेमी। 4 दिकु यीशु गा मेरान हेंडो दियाटे बिनती डाटे मंडी लज्जे, “देटेन इनी लायको होय कि आम दिया घल्जी इनी डाए। 5 चोयाकी देटेन आलेगा जाटो टे प्यार डोएबा होय, एठा डीच्कानी आलेगा आराधना जगा के आरुके होय।” 6 यीशु नी दिकु सेंग्गोन-सेंग्गोन ओले, पेनो मेटे देटेन उरा टे लेंक्कीन बान डा, मेटे मुख्यानी दियागा मेरान चोटोका सोप्तीकु गा गेल्ला मंडी कुलके? “हे प्रभु कासु बाकी तुटूल, इंज एने लायको बाऊ, कि आम इंजा उरा तलान हेजे। 7 इनिका वोजीटे इंज्नी इंज खुदके इनी लायको भी बान सामझातिंज्डूका, कि अमा मेरान हेजे, पेनो वचनका मंडीकी, चाभु टे मंडे मेटे इंजा भाग्य सजाऊबा। 8 इंज खुद का हरातिंज कोरो मेना, एठा सिपाई इंजा टी गेन होय, एठा म्याखोम के सेने गा हुकूम जेबा होय, देटेन सेनेवा एठा दूसराके हेजे गा हुकूम जेबा डीच हेजेवा होय। एठा इंजा तुनिका भाग्यकु के हुकूम जेबा होय कि येटेन डाये, मेटे देटेन डेनोगोका दडावा होय।” 9 इनी आजुमटे यीशु नी अचम्बो कामय डाके, एठा डीचनी म्वार इखाडेवा डी गर्दी टे जो दियागा टाऊटे हेजे लक्के डा, मंडीके, इंज आपेटे मंडीवाकी, कि इंज्नी इस्राएल देशोन म्या भी येनोगो कोरो बान घाटाडुका। 10 मेटे कुलकेकु कुरकू जब उरान हिराके मेटे डोके कि डी भाग्य के साजाका डोके जो पेला बिमार के डा। गोयेन मिंकूके जीवन दान 11 दूसरा दिन बादोन यीशु नाईन जीमू गा म्या पुरान चेल्के डा, एठा दियागा चेलाकू एठा खाट गर्दी दियागा सेंग्गोन चेलके डा। 12 जब देटेन पूरा गा फाटाको गा मेरान पोचातींजे, मेटे डोके, कुरकू म्या म्हाळाके बल्लान सेगेच लक्के डा। जो हेजा गा आंटे गा म्याका कोणटे डा एठा देटेन विधवा डा। एठा पूरा गा घोनेच्का कुरकू दियागा सेंग्गोन डा। 13 डीचके धोटे प्रभुन दया टे भेट्टेन, एठा डीचनी डी जापाए के मंडीके, “जाम बाकी।” 14 मेटे यीशु नी मेरान हेंडो, म्हाळाके उठाके, एठा तुटूल मिंकू रुकातिंजे। मेटे डीचनी मंडीके, “हे जवान, इंज आमके मंडीवाकी, टेंगेने!” 15 मेटे देटेन म्हाळा बिटजे डो सुबानजे, एठा मंडी लज्जे। यीशु नी डीचके दियागा आंटे मेरान जीकेनेच। 16 इनिजाटे सेबाई कुरकू हिगरायेन एठा दिकु परमेश्वर गा आराधना डा टे मंडी लज्जे, “आलेगा तलान म्या महान परमेश्वर गा कोनेटे मंडीमिठाच हेन होय, एठा परमेश्वर नी हेजा गा कुरकू गा बबाचातिंज घल्जी कुल्केकु।” 17 दियागा विषय गेन इनी बातो सेबाई यहूदिया जिल्हा एठा आसो पासो गा सेबाई देशोन फैलातिंजे, यूहन्ना बपतिस्मा जिऊमिठाच गा प्रश्न 18 एठा यूहन्ना के दियागा चेलाकूनी इनी सेबाई बातो टे खाबोर घल्के। 19 मेटे यूहन्ना नी हेजा गा चेलाकू तलाटे बार्खिंजके हकोटे यीशु गा मेरान इनी कोकाम्बरा कुल्केकु, “चोच हेजेमिठाच आमका होय, या आले तुनिका दूसरा गा राह दोडो लक्के?” 20 दिकुनी दियागा मेरान हेंडो मंडीके, यूहन्ना बपतिस्मा जिऊमिठाच आलेके अमा मेरान इनी कोकाम्बरा कुलकेमी होय, “चोच हेजेमिठाच आमका होय, या आले तुनिका दूसरा गा राह दोडो लक्के?” 21 डीका टेमो डीचनी घोनेच कुरकू के बिमारीनौर टे एठा ताखलिफ मिंकूके साजाकेकु, एठा भूतोकुटे आराकेमी, एठा घोनेच अंधळाकु दोडो होळाकेकु। 22 एठा डीचनी डीचके मंडीके, जो चोचकाभी आपे डोके एठा आजुम्के होय, सेने डो यूहन्ना के मंडीकी, कि अंधा डा दोडोवा होय, लंगळा सेंदरावा इखाटबा होय, कोळ्या साजाऊवा, होय, एठा गिरबोकु अच्छा खाबोर घालेवा होय। 23 दिकु चोटो खुशोके होय, जो इंजा लिंजेन शक बान दोडो। 24 मेटे यूहन्ना खाबोर जिऊमिठाचके देटे टे ओले मेना, मेटे यीशु गर्दी के यूहन्ना गा बारेन गघाल लज्जे, “आपे सुनसान जगान चोच दोडो ओले डा? चोच कोयो टे ओखेंज मिनी डोंगळाके? 25 मेटे आपे चोच दोडो ओले डा? चोच नेरोम आंगी उरिके मिनी कोरो के? डोगे, जो भडकातिंज आंगी उरी डा, एठा सुखी-विलास टे थंदळवा होय, दिकु राजभवनेन थंदळवा होय। 26 मेटे डाबोलटे चोच दोडो ओले डा? चोच तुनिका परमेश्वर गा कोनेटे मंडीमिठाच के दोडो गा घल्जी? हेन, इंज आपेटे सच्चो मंडीवाकी, येटेन देटेन होय जो परमेश्वर कोंटे मंडीमिठाच टे भी खाट होय। 27 येटेन डीचका होय, दियागा बारेन पवित्र ग्रंथ गेन ओल्के होय, इंज इंजगा खाबोर जिऊमिठाचके अमा सम्मान कुलेच्बा, जो अमा घल्जी कोरा तैयारेवा।” 28 इंज आपेटे सच्चो मंडीवाकी, आए टाएन जोभी कोरोकु डायेन होय दिकु तलाटे म्याखोमभी यूहन्ना बपतिस्मा जिऊमिठाच जाटे खाट बाऊ होय। एठाभी स्वर्ग गा राज्यन सानी टे सानी भी यूहन्ना टे खाट होय। 29 जब दिकुनी यीशु गा मंडीके मिनी बातो के आजुम्के मेटे सेबाई कुरकू नी एठा टेक्सा सा मिंकूभी यूहन्ना गा द्वारा बपतिस्मा सावे एठा एलान डाके कि परमेश्वर धर्मी होय। 30 पेनो फरीसि कुरकू एठा मूसा गा नियम गा गुरूजीकुनी यूहन्ना गा द्वारा बपतिस्मा साटे बान मेंके। दिकुनी परमेश्वर गा इच्छाके इकुगा बारेन बान मेंटो डो आजुमडूका। 31 एठा यीशु नी मंडीके, “इनिघल्जी इंज इनी टेमो गा कुरकू गा तुल्ना तुनी कुरकू सेंग्गोन डाए, दिकु डी चफनीकू गा रोंगो होय, जो शिकायत लक्के होय? 32 एठा दिकु इनी बातो टे शांती बाऊ कि दूसरा पंचाती कुरकू चोच दडा लक्के होय। आलेनी आपेगा घल्जी खुशी गा संगीत साडीके पेनो आपे बान नाचोडुका आलेनी कासु गा संगीत साडीके एठा अमा नी बान नाचोडुका, एठा आपेनी छाती बान मुंडादुका। 33 चोयाकी यूहन्ना बपतिस्मा जिऊमिठाच दूसरा कुरकू गा रोंगो न सोकळा जोजोम डा, न अंगूर रेस्सो नुनू डा, एठा आपे मंडीवाकी दियेन भूतो होय।” 34 कोरो गा कोण जोजोम कखाफ टे हेन होय, एठा दिकु आमके मंडीवाकी “डोगे, खादळया एठा सिडू कुत्या कोरो होय, टेक्सा सा मिंकू एठा पापोकु गा सोपती होय।” 35 पेनो ज्ञान हेजा सेबाई कोणकुटे साच्चो ठहरातिंज्के होय। शमौन फरीसि गा उरा पापी जपाएके मफीजीऊ 36 एठा तुनिका फरीसि कुरकू दियाटे बिनती डावे, कि इंजा सेंग्गोन आटाजोम, इनिघल्जी देटेन डी फरीसि कोरो गा उरा गेन ओलेडो आटाजोम सुबानजे। 37 देटेन डी पूरा गा म्या आनोवा जापाएनी इनी मालूमटे कि यीशु फरीसि कुरकू गा उरान आटाजोम सुबानके होय। डीचनी संगमरमर गा घोटा आरुके कुप्पीन सुकींज सुनूम साले। 38 एठा दियागा टाउन टेगेन टे नंगा मेरान, जम लठ्ठाका दियागा नंगाके मेट गा डा टे ओला एठा हेजा गा कपर गा हुफटे ओजो लज्जे। एठा दियागा नंगा बार-बार जोमटे सुकींज सुनूम लेमेटके डा। 39 येटेन धोटे, देटेन फरीसि कुरकू डीचनी यीशु हकोलेनेच डा, हेजा मनेन सोचातिंज लज्जे, “अगर येटेन परमेश्वर गा कोनेटे मंडीमिठाच धरे चिनाए डा कि येटेन जो डीचके उठा लक्के होय, चोयाकी डीच आनोवा जापाए होय।” 40 यीशु नी दियागा मन गा बातो चिनाटे डी फरीसि कोर के दियागा जीमू शमौन डा, दियाटे मंडीके, “हे शमौन, इंजेन अमाटे चोचका मंडी टाकु होय।” देटेन मंडीके, “हे गुरु, मांडे।” 41 मेटे यीशु नी इनी उदाहरण जीके, “तुनिका डामा कोरो गा बरी कर्जो मिनकिंज डा, म्याखोम पाच सौ दिनार (पाच सौ दिन गा मुंजीरी), एठा दूसराकु पाचासो दिनार (पचासो दिन गा मुंजीरी) उदारी डा। 42 जब दिकु मेरान कर्जो फिपाटा गा चोचका बान बचातिंजू डुका, मेटे डीचनी दिकिंज गा कर्जोके मापोके। दिकिंज बर्खिंजाटे जे डी लकपाती कोरो टे जादा प्यार डोएबा?” 43 शमौन नी जवाब जीके, “इंजगा सामाजोन देटेन, दियागा डीचनी येठाभी कर्जो मापोके।” यीशु नी दियाटे मंडीके, “आमनी सही जवाब जीके होय।” 44 डी जापाए गा कोनेन इखाट टे डीचनी शमौन के मंडीके, “चोच आमनी डोके कि इनी जापाएनी चोच डाके होय? इंज अमा उरान हेन पेनो आमनी आलेगा रिवाज रोंगो आमनी इंज्के नंगा अबुंज गा घल्जी डा बान जिडुका। पेनो इनिज्नी इंजा नंगा मेट गा डा टे ओलाके एठा हेजा हुफटे ओजोके।” 45 आमनी इंजा स्वागत बान दडुका, पेनो जब टे इंज हेन मेना इनी जापाए इंजा नंगाके जोम लक्के। 46 आमनी इंजगा कापरेन सुनूम बान येंडाडुका, पेनो इनी जापाएनी इंजा नंगान जैतून सुकींज सुनूम लेमेटके होय। 47 “इनिघल्जी इंज आपेटे मंडीवाकी घोनेच सेबाई पापो जो इनिज्नी डाके होय, डी मापोएन मेना, चोयाकी इनिज्नी भेबाव प्यार डावे। पेनो जेगा थोळाका पापो मापोके होय, देटेन प्यार भी थोळाका दडावा होय।” 48 एठा डीचनी जापाएटे मंडीके, “अमा पापो मापोएन।” 49 मेटे जो कुरकू दियागा सेंग्गोन आटा जोजोम सुबानके डा, दिकु इकुका मानेन सोचातिंज लज्जे, “पापो गा मापो बस परमेश्वर का डाएवा होय।” 50 पेनो यीशु नी जापाएटे मंडीके, “परमेश्वर नी आमके बचातिंजकेमी होय चोयाकी आमनी इंजा भरोसा डाके होय, शांती टे सेंजू।” |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation