लूका 14 - गवली उनाई नियम

चोखरा गा दिन ससाजा

¹ यीशु परमेश्वर गा चोखरा दिन फरीसि कुरकू गा मुख्या गा तलाटे जेका गा का उरान आटाजोम घल्जी ओले, एठा डी कुरकू डीचके ध्यान टे दोडो लक्के डा ताकी डीच अदा येनेगो डाए कि सेबाई कुरकू दिया लिंजेन आनोवा टोकाकी।

² देटेन म्या कोरो डा दियागा टी एठा नंगा साळजे डा।

³ येने लिंजेन यीशु नी मूसा गा नियम गा गुरूजीकु एठा फरीसि कुरकू के मंडीके, “चोच कुरकू के परमेश्वर गा चोखरा दिन गेन ससाजा गा अनुमति आलेगा नियम गेन टाकु?”

⁴ पेनो डीच कायोमका थंदळके। मेटे डीचनी हेजा टी दिया लिंजेन धोटे डीचके सजाकेनेच एठा बिडाकेनेच।

⁵ एठा डीचनी मंडीके, “आपे तलाटे येनोगो जे होय, जेगा गदाह, कोंटे, येटेन डोबा कुईन बोचोयेनकी बान ओट एठा देटेन परमेश्वर गा चोखरा दिन म्या गढढान बोचोयेन टासो, डीचके तुरुटो बल्लान बान ओट?”

⁶ दिकु इनी बातो गा चोचका जवाब बान जिडुका।

कोंजकेकु मिंकू गा मान दडा

⁷ जब यीशु नी डोके कि आमंत्रण कुरकू टोनोगो सुबान गा कास जगा कालाम्जावा होय, मेटे म्या उदाहरण जीटे दिकुटे मंडीके,

⁸ “जब जेका आमके ब्याह गेन हाकोकेमी, मेटे कास जगान बाकी सुबान, काही येनोगो बाकी डाऊ कि डीचनी अमाटे भी तुनिका खाट मिठाच के नेवता जीके।”

⁹ एठा इनिजनी आमके एठा डीचके नेवता जीके होय हेजेवा डो अमाटे मांडेवा, इनी जगा के इनिजके जिकी एठा मेटे आमेन सेरोमटे सेबाई टे कम कास जगान सुबान होना।

¹⁰ पेनो जब आमंत्रित कोम्बा मेटे सेबाईकु टे कम कास जागान सुबने कि जब देटेन इनिज्नी आमके नेवता जीके होय, हेजे एठा अमाटे मांडे, “हे सोपती सम्मान सेने डो कास जगान सुबने, मेटे अमा सेंग्गोन सुबानमिंकू गा सम्मान अमा जीमू डाऊवा।”

¹¹ चोयाकी जो जेकाभी आपना खुद खाट मेन्बा, देटेन सानिव्वा होय, एठा जो जेकाभी आपना खुदके सानी आरुयेवा देटेन खाडूवा होय,

कमाय गा फल

¹² मेटे यीशु नी नेवता जिऊमिठाच फरीसि टे मंडीके, “जब आम दिन गा या रातो गा खाना डोए टासो मेटे अमा सोपतीकु या डाईकु सगाकु या लकपाती मेराकू के बाकी हाको, काही येनोगो बाकी डाऊ कि दिकुभी आमके नेवता जेबा, अमा बदला पूराऊवा।

¹³ पेनो आम जब आम दिन गा या रातो गा खाना डोए टासो, मेटे गिरबोकु के, दुंडा, लांगळा, एठा अंधळाकुके हाकोकू।

¹⁴ मेटे आम धन्य होंगा, चोयाकी दिकुगा मेरान आमके बादला जिऊ गा चोचका बान होय। जब धर्मी कुरकू गोएन मिठाजा टे डाबोलटे जीटाऊवा मेटे परमेश्वर आमके प्रतिफाल जेबा।”

खाट आटा गा उदाहरण

¹⁵ यीशु गा सेंग्गोन आटाजोम मिंकू गा तलाटे म्याखोम इनी बातो आजुमटे दियाटे मंडीके, “धन्य होय, देटेन जो परमेश्वर गा राज्य गा खानान बेल्लाऊवा।”

¹⁶ डीचनी डीचके मंडीके, “तुनिका कोरोनी खाट खाना चराके एठा घोनेचकु के हाकोलेकु।

¹⁷ जब आटा तैयार जे होय, मेटे स्वामी नी हेजा भग्याकु गा टी गेन नेवता कुरकू के मंडी कुल्के, हेजे, नका आटा तैयारके होय।

¹⁸ पेनो दिकु सेबाईकु गा सेबाईकु माफी आसी लज्जे, पेला मिठाच नी डीचके मंडीके, ‘इंज्नी खिटी मोलाटे सावे होय, एठा जरुरी होय कि डीके दोडो होना, इंज अमाटे बिनती दडावाकी, इंज्के मापोकेमी।’

¹⁹ दूसरा नी मंडीके, ‘इंज्नी मोनाई जोळा डोबाकु मोलाटे सावे होय एठा दिकुके दोडो चेल्के मेना, इंज अमाटे बिनती दडावाकी, इंज्के मापोकेमी।’

²⁰ म्याखोम एठा मंडीके, ‘इंज्नी ब्याह डावे होय, इनिघल्जी इंज बान हेजे।’

²¹ डी भग्या नी हेंडो हेजा स्वामी के इनी बातो घल्के, मेटे उरा गा स्वामी नी खिजोन हेंडो हेजा भग्याकु टे मंडीके, ‘पूरा गा हाटीन एठा गिलीन तुरुटो सेनोडो गिरबोकु के, थुठळा, लांगळा एठा अंधळाकुके येटेन सालेकु।’

²² भाग्य नी डाबोलटे मंडीके, ‘हे स्वामी, जैसा आमनी मंडीके डा, डेनोगोका डाके होय एठाभी जगह होय।’

²³ स्वामी नी भग्याके मंडीके, ‘साळाक्कोन एठा खुफा कोनेन सेनेड़ो कुरकू के जबरदस्ती साकु का ताकी इंजा उरा भेट्टीयु होना।’

²⁴ चोयाकी इंज आपेटे मंडीवा दिकुके पेला नेवता जीके डा। दिकु तलाटे म्या भी कोरो इंजा खाना टे चोचकाभी बान जोम।”

जे यीशु गा चेला आरुवा होय?

²⁵ जब खाट गर्दी दियागा टाऊटे चेल्के डा, मेटे डीचनी टाउन मोराटे दिकुटे मंडीके।

²⁶ “अगर जेका इंजा मेरान हेन, एठा हेजा आंटे डो बाटे एठा जापाए एठा चफनीकू एठा डाईचो एठा बोकाजाईकु बनकी खुद गा जान के भी अच्छा बान मेन, मेटे देटेन इंजा चेला बाने होय।”

²⁷ इंजा चेलाकू आरु गा वोजीटे क्रूस बान तुटूल, एठा इंजा टाऊटे बान हेजे, देटेन भी इंजा चेलाकू बान आरु।

²⁸ “अगर आपे तलाटे जेका म्या मजली आरु गा इच्छा दडावा होय, मेटे देटेन सुबानटे इनी बातो गा हिसाब डाएवा कि इनिके आरुन चोटो खर्चा डाऊवा एठा डोगेवाकी दियागा मेरान इनिके पुपरा घल्जी घोनेच डामा टाकु या बाने।”

²⁹ अगर डीचनी येनोगो बान दडाडुका टासो मेटे पैय्या येंडाटे तैयारे बाकी, मेटे सेबाई दोडोमिंकू इनी मंडीटे दियागा मजाक उळातिंजेबा,

³⁰ येटेन कोरोनी आरुनी लज्जे, पेनो तैयार डुका बाने।

³¹ अगर म्या राजा गेल हजार कोरोकु सेंग्गोन दूसरा राजा गा टे लडाई घल्जी ओटबा होय। जो इसा हजार कोरोकु सेंग्गोन दियागा खिलाफ गेन लडाई हेन होय। मेटे सेबाई पेला सुबानटे इनी बातो गा फैसला डाएवा, कि चोच देटेन डी दूसरा राजा गा सामना दडा घल्जी शक्तीशाली होय या बाने।

³² अगर बनकी जब दुश्मान लेंक्कीनके का होय, देटेन हेजा गा दूतकु के कुलटे शांती दडा गा शेपेरेट गा बारेन चर्चा दडावा।

³³ इनिका रिती टे आपे तलाटे जो जेकाभी खुद गा सेबाईका आराकी टासो मेटे देटेन इंजा चेला बान आरु।

बानसिंबिल बुलूम

³⁴ “बुलूम नी अच्छा होय, पेनो अगर बुलूम अच्छा होय, अगर बुलूम गा खारा स्याएन टासो मेटे देटेन तुनी चीजो टे खराएबा।”

³⁵ देटेन न ओटे गा एठा न खट्टो घल्जी कामय गेन हेजेवा होय, डीके मेटे कुरकू नी बल्लान टेप्पायेवा होय, जो जेकाभी आजोम्बा होय, देटेन आजुमे,