लूका 12 - गवली उनाई नियम

मूसा गा नियम इथूमिंकू एठा फरीसि कुरकू रोंगो बाकी आरु

¹ एटोकु तलाटे जब हजार कु गा गर्दी येंडाके, येटे टाएन कि म्या बार्खिंज लिंजेन बोचो डा, मेटे देटेन सेबाईकु टे पेला हेजा चेलाकू टे मंडी लज्जे, “फरीसि कुरकू गा ढोंगो रुपो खमीर टे ध्यान टे थंदळे।”

² चोयाकी येनोगो चोचकाभी उगुर बाऊ, परमेश्वर हरेक डी मंडीके वोड़ेवा डेंगो कुरकू बान हाडाई डी मंडीके एसास जेबा जो आए टाएन उखुके होय।

³ इनिघल्जी जो चोचकाभी आपेनी अंधरान मंडीके होय, देटेन उजालान आजुमूबा एठा जो आपे तला गा खुलीन जो चोचकाभी आम उखुटे आजोम्बा, देटेन पदिळी लिंजेन खाबोर घालेवा।

दियाटे हिघराए

⁴ “पेनो इंज आपेटे जो इंजा सोप्ती टासो मंडीवा, जो कोम्बोरके मुंडाएबा होय, एठा देटे जदा एठा चोचका बान दडा दिकुटे बाकी हिगरा।”

⁵ इंज आपेके घालेवा कि आपेन जेटे हिगरा होना, गोएन गा बादोन जेके नरक गेन येंडा गा हाक होय, दियाटेका हिघराए बनतो इंज आपेटे मंडीवाकी, परमेश्वर टे हिघराए।

⁶ चोच बरी पैसा गा मोनाई कूक्रीकू बान किजिऊ? एठाभी परमेश्वर दिकु तलाटे म्याखोम के भी बान भुल्लाऊ!

⁷ आमगा कपार गेन चोटो हुफ मेना उमनाके होय? तोभी इनिघल्जी हिगरा बाकी, आम घोनेच कूक्री भूरिकुटे भी खाट किमती होय।

यीशु के बान मेन गा मतलब

⁸ “इंज साच्चो मंडीवाकी जो कोरो सेबाई रुपोटे मानेनकोम्बा डीचके कोरो गा कोण भी परमेश्वर गा स्वर्गदूत गा सम्मान मनातिंजेवा।”

⁹ पेनो जो कोरो गा सम्मान इंज्के इंकार डाए दियागा परमेश्वर गा स्वर्गदूत गा सम्मान इंकार मेंबा होय।

¹⁰ “जो जेकाभी इंज जो कोरो गा कोण खिलाफबेन तुनिका बातो मांडे, दियागा देटेन पापो मापोऊबा होय। पेनो जो पवित्र आत्मा गा खिलाफबेन सेनेवा, दियागा आनोवा बान मापोऊ।”

¹¹ “जब कुरकू आपेके आराधना जगा एठा हाकीमा टे एठा अधिकारी गा सम्मान साकोम्बा, मेटे चिन्ता बाकी दडा कि आले तुनी रितो टे या चोया जवाब जेबा, या चोच मांडे।

¹² चोयाकी पवित्र आत्मा डीका टेमो आमके इथूकोम्बा, कि चोच मंडी होना।”

म्या लकपाती कोरो गा उदाहरण

¹³ डाबोलटे गर्दी तलाटे म्या कोरोनी यीशु टे मंडीके, “हे गुरु, इंजा डाईटे मंडीके, कि बाटे गा संपत्ति इंज्के खातींज्की।”

¹⁴ यीशु नी दियाटे मंडीके, “हे डाई, जेनी इंज्के आपेगा फैसला दडामिठाच या संपत्ति कखाटिंज मिठाच ठहरातिंज्केमी होय?”

¹⁵ एठा डाबोलटे यीशु नी दिकुटे मंडीके, “ध्यान टे थंदळे, एठा हरेक प्रकार गा लालीचो टे आम खुदके बचातिंज डोए, चोयाकी जेका गा जीवन दियागा संपत्ति गा घोनेच टे बान डाऊ होय।”

¹⁶ डीचनी दिकुके म्या उदाहरण जीके, “तुनिका डामा मिठाच गा ओटेन खाट आनाजो डायेन।”

¹⁷ मेटे देटेन हेजाका मनेन सोचातिंज लज्जे, इंजेन बान मालूम कि इंजेन चोच दडा होना, इंजा मेरान सेबाई आनाजोके जमाटे दोडो घल्जी तुनिका खाट जगा बाऊ होय।

¹⁸ बादोन डीचनी मंडीके, इंजेन मालूम होय। कि इंजेन चोच दडा होना। इंज गोदामके फाळीटे डीके खाट आरोएवा। एठा इंजा सेबाई आनाजो एठा संपत्ति डेन डोएबा।

¹⁹ येनेगा बादोन इंज खुदके मेंबा घोनेच साल गा घल्जी इंजा मेरान भेबाव अच्छा चीजो डोके होय, डेगा इंजेन जरुरत होय, आराम्बो डाए जोमे नुगे एठा सुकीटे थंदळे।

²⁰ पेनो परमेश्वर नी दियाटे मंडीके, “हे मूर्खा, इनिका रातो आम गुजूवा, मेटे डी चीजो के जे सेगेवा जो डीके आमनी खुद घल्जी जमाके होय?”

²¹ येनोगोका डी कोरो गेल्ला डाऊवा जो सेबाईका हेजा घल्जी जमाएबा होय, “पेनो परमेश्वर गा नजर गेन दिकु लकपति बाऊ होय।”

तुनिकाभी बातो गा चिन्ता बाकी दडा

²² डाबोलटे डीचनी हेजा गा चेलाकू टे मंडीके, “इनिघल्जी इंज आपेटे मंडीवाकी अमा जान गा चिन्ता बाकी, कि आले चोच जोम्बा न आपना कोम्बोर गा घल्जी चोच उरेवा।”

²³ चोयाकी आटा टे जान, एठा कपळे टे कोम्बोर खाट होय।

²⁴ कावळा लिंजेन ध्यान डोए, दिकुन बिबीटवा होय, न हिरबा, न दिकुगा कुठीन एठा न घोम्टान थंदळवा होय, तोभी परमेश्वर दिकुके चाराएबा होय। आपेगा किमती भूरिकुटे चोटो गुनाह येठाभी होय।

²⁵ आपे तालाटे येनोगो जे होय, जो चिन्ता डाटे हेजा जीवनभोरेन म्याघिळी भी बळातिंजेवा होय?

²⁶ इनिघल्जी अगर आम सेबाई टे सानी कामय भी बान दडा टासो, मेटे जीवन अलग्गो मुद्दा गा घल्जी चिंतान बाकी थंदळ।

²⁷ घंटी गा फुल लिंजेन ध्यान डोए, कि चोथान टे खाडूवा होय, दिकुनी आराम्बो दडावा होय कपळेन आरु बान न गेगेटबा होय। तोभी इंज आपेटे मंडी बाकी राजा सुलैमान भी, हेजा सेबाई शान दिकु तलाटे जेकाभी रोंगो आंगी उरीका बाऊ डा।

²⁸ इनिघल्जी अगर परमेश्वर मैदान गा निला झराके जो टाइंज होय, एठा गफान भेट्टीन येंडाएवा डेगा चिंतावा होय, मेटे देटेन जरुर टेका आपेगा देखभाल डोएबा। पेनो आपेगा विश्वास एटो काम चोया होय? देटेन आमके एठाभी चोया बान उरी,

²⁹ एठा इनी बातो गा घगाटान बाकी थंदळ, कि चोच जोम्बा एठा चोच नुनूवा, एठा न साक बाकी दोडो।

³⁰ चोयाकी दुनिया गा जाटो इनी सेबाई चीजो के घगाटावा होय, पेनो आपेगा स्वर्ग बाटे मालूम होय, कि आपेन तुनी चीजो गा जरुरत होय,

³¹ पेनो परमेश्वर गा राज्यके घगाटान थंदळे, मेटे सेबाई चीजो आपेन घाटाऊवा।

डामाके तोटेन गोगला होना?

³² “आपे मेंडाकू खाळु रोंगो होय, इनिघल्जी तुनिका बातो गा बारेन बाकी हिगरा। चोयाकी आपेगा बाटे परमेश्वर आपे घल्जी अच्छा चाहतावा होय, कि देटेन आमके स्वर्ग गा राज्य जे।

³³ आपना ओटे किजीटे दानेन येंडाकी एठा अमा घल्जी येनोगो पाकीट आरोए, जो जुनाऊ बाने, यानेकी स्वर्ग लिंजेन येनोगो डामा जमाए, कि जो स्यागु बाने, डेगा मेरान चोरकु भी बान सेने, एठा किळाकु बान सिस्या।

³⁴ चोयाकी तोटेन अमागा डामा होय देटेन अमागा मन हमेशा का थंदळवा होय।”

हमेशा तैयार थंदळे

³⁵ अमा मयांग टोलटे एठा दिवा जुलटे कामय दडा घल्जी तैयार थंदळे (इंज डाबोलटे हेजे घल्जी तैयार थंदळे)।

³⁶ आपे डी कोरोकु रोंगो आरोए, जो इकुगा स्वामी गा राह दोडो लक्के, कि दिकु ब्याह टे हिराकी एठा जब डीच हेजेवा डो दराजो ठोट-ठोडेबा मेटे तुरुटो दिया घल्जी दराजो खुल्लाकी।

³⁷ धन्य होय, डी भाग्य, दिकुगा स्वामी डाबोलटे हेजेवा होय। एठा दिकुके जटटो लठ्ठाका डोएन टासो! इंज आपेटे सच्चो मंडीवा, कि डीच खुली बंदोटे दिकुके आटाजोम घल्जी सुबानकुबा, एठा मेरान हेजेवा डो दियागा सेवा डाएवा।

³⁸ धन्य होय, डी भाग्य डीचके एठा अदा रातोन या डाबोलटे आंगु गा फेजेरेन भी हेजेवा डो जटटो लठ्ठाका डूगुवा।

³⁹ पेनो आपे इनी चिनायाकी, कि अगर उरा गा स्वामीन मालूम, कि चोर तुनी टेमोन हेजेवा, मेटे झाट्टोका थंदळवा, एठा हेजा उराके लुटातिंज डाए बाने।

⁴⁰ आपे इंजा हिरा टाएन तैयार थंदळे, चोयाकी इंज कोरो गा कोण येनोगो टेमोन स्वर्ग टे हेजेवा जब आपे इंजा हेजे गा उम्मीद भी बान दडा होंगा।

विश्वास लायको सेवक जे?

⁴¹ मेटे पतरस नी कोम्बाराके, “हे प्रभु! चोच आम इनी उदाहरण आलेगा घल्जी मंडी लक्के मेना या सेबाईकु घल्जी?”

⁴² प्रभु नी मंडीके, देटेन विश्वास लायको एठा दिमागदार भण्डरी जे होय, दियागा स्वामी डीचके भाग्यकु गा तालान मुख्या आरोयेच्बा कि डी टेमो लिंजेन सीधा बाटे जे।

⁴³ धन्य होय, देटेन भग्या, इनीजेन दियागा स्वामी हेजेवा येनोगोका दडावा होय।

⁴⁴ इंज आपेटे साच्चो मंडीवाकी; देटेन डीचके इंजा सेबाई संपत्ति लिंजेन मुख्या आरुकेनेच।

⁴⁵ मेटे अगर देटेन भाग्य सोचातिंज लज्जे, कि इंजा स्वामी हेजेन टेमो होय, एठा भाग्य एठा भागनी गा कुखा-मुमंडान एठा जोजोम कखाफ एठा सिडू कुत्या आरु लज्जे?

⁴⁶ मेटे डी भाग्य जो हेजा गा स्वामी इच्छा हाडाई डा पेनो तैयार बान थंदळ डुका एठा न दियागा इच्छा गा रोंगो सेंदराके, देटेन भेबाव मुंडा जोम्बा।

⁴⁷ एठा जो भाग्य हेजा मालिको गा इच्छा चोच होय इनी मालूमटे भी, तैयारी बान दडुका, दियागा इच्छा गा रोंगो बान सेंद्रा डुका टासो मेटे डीच भेबाव मुंडा जोम्बा।

⁴⁸ पेनो जो कोरोनी आंजन गेन भी मुंडा जोम गा कामय डाके, डीच थोळाका मुंडा जोम्बा। जो कोरो के घोनेच जीके होय दियाटे घोनेच आसेवा एठा जो कोरो के घोनेच सोपातिंज्के होय, दियाटे येठाभी सेगेवा होय।

शान्ति बान फाळीऊ

⁴⁹ “इंज पृथ्वी लिंजेन सिंगेल येंडा हेन मेना, एठा इंज चहतावा मेना, कि आए इनी सिंगेल भाळकातिंजु।

⁵⁰ इंजेन जल्लोका भायनक ताखलिफ सेहसेन होना। एठा जब टाएन देटेन ताखलिफ डाऊ बाने मेटे टाएन इंज ठायका उदासो के मेना।

⁵¹ चोच आपेन सामझातिंजूवा होय, कि इंज पृथ्वी लिंजेन मिमलातिंज हेन मेना, इंज मंडीवाकी, बाने, इनिघल्जी अलाग्गो कोम घल्जी हेन मेना।

⁵² चोयाकी नका टे अगर म्या उरा गेन मोनाई कुरकू टासो मेटे दिकु इकुका भागोऊबा आफाई कुरकू जो इंजा लिंजेन विश्वास बान दोडो, दिकु डी बरी कुरकू किंज खिलाफ डाएवा जो इंजा लिंजेन विश्वास दोडोवा होय।

⁵³ बाटे कोणटे गा खिलाफ, एठा कोण बाटे गा विरोध डोएबा। आंटे कोणकु खिलाफ एठा कोणकु आंटे गा खिलाफ, कणकर किमीन गा खिलाफ एठा किमीन कणकर गा विरोध डोएबा।”

टेमो के चिचाना

⁵⁴ एठा डीचनी गर्दी के मंडीके, मेटे बदळा के पश्चिम टे बिटेटे दोडो डा, मेटे तुरुटो मंडीवा कि डा घामावा, एठा येनोगोका डाऊवा होय,

⁵⁵ एठा मेटे दक्षिण कोने दोडो टासो मेटे मंडीवाकी, कि बाफो सेंदरावा, एठा येनोगोका डाऊवा होय?

⁵⁶ हे ढोंगो, आपे ओटे एठा बदळा गा रुपो गेन भेदो डायेबा, पेनो इनी जमाना गेन चोया भेदो बान हाडाई?

आपना मुसीबत के पुराए

⁵⁷ आमनी खुद का तय दडा होना कि आपे घल्जी चोच दडा सही होय।

⁵⁸ मेटे आम आमगा फैसला दडामिठाच गा सेंग्गोन खाट कोरो गा मेरान चेल्के होय, मेटे कोरान का दियाटे आरा गा इच्छा डोए, येनोगो बाकी डाऊ, कि देटेन आमेन फैसला गा मेरान ओळकोम्बा, एठा फैसला आमके सिपाई मेरान जीकोम्बा एठा सिपाई आमके जेलेन येंडाकोम्बा।

⁵⁹ इंज आपेटे साच्चो मंडीवा कि जब टाएन आम डी सेबाईकु के जिऊ बान टाएन, मेटे अमा लिंजेन आए टाएन थंदळके। मेटे टाएन आम जेलाटे बान आरागु।