ಯೊಹಾನ್ 7 - गवली उनाई नियम

यीशु एठा दियागा डाईटे

¹ इनी बातो गा बादोन यीशु गलील जिल्हान इखाट लक्के। देटेन यहूदिया जिल्हान सेने बान चाहता डा। चोयाकी यहूदी अगुवाकु डीचके घोगेच चाहता डा।

² एठा यहूदी कुरकू गा झुपळीनौर गा तिवार गा टेमो मेरान डा।

³ इनिघल्जी यीशु गा डाईटे टाकुनी दियाटे मंडीके, “येटे टे यहूदिया जिल्हा सेंजू ताकी जो कामय आम दडावा होय, डीके अमा चेलाकूभी डोगे।

⁴ अगर आम मेंबाकी कुरकू अमा बारेन हाडाईयु मेटे आमेन सेबाईकु सम्मान कामय दडा होना होय।”

⁵ चोयाकी दियागा डाईचो भी दिया लिंजेन विश्वास बान दोडो डा।

⁶ मेटे यीशु नी दिकुटे मंडीके, “इंजा टेमो आए बान हेजडुका पेनो आपे कुरकू घल्जी सही टेमो होय।

⁷ दुनिया गा कुरकू अमाटे दुश्मान बान दोडो पेनो देटेन कुरकू इंजाटे दुश्मनी दोडोवा होय, चोयाकी इंज दियागा खिलाफबेन इनी गवाही जेबा मेना कि दियागा कामय बुरा होय।

⁸ आम तिवार गेन सेने, इंज आए बान सेने चोयाकी आए इंजा टेमो हेजडुका होय।”

⁹ देटेन दिकुटे इनी बातो मंडीटे गलील जिल्हा गेन थंदळजे।

झुपळीनौर गा पर्व गें यीशु

¹⁰ पेनो जब दियागा डाईटे तिवार गेन ओले, मेटे देटेन दिकुगा ओलेन बादोन देटेन हेज्का उखुटे देटेन ओले।

¹¹ यहूदी अगुवाकु तिवार गेन दियाटे इनी मंडीटे घागटा लज्जे कि “देटेन तोटेनेच होय?”

¹² एठा कुरकून दियागा बारेन कायोम-कायोम घोनेच बातो डाएन चोटोका कुरकू मंडी डा, “देटेन भला कोरो होय।” एठा चोटोकु का मंडी डा, “बाने, देटेन कुरकू भूबल्लावा होय।”

¹³ तोभी कुरकू यहूदी अगुवाकु गा हिगरा गा वोजीटे तुनिका कोरो यीशु गा बारेन खुल्लाटे बान मंडी डा।

पर्व गें यीशु गा बातो गघाल

¹⁴ जब तिवार गा अदा दिन ओले, मेटे यीशु यरूशलेम गा मंदिर गा दरोमेन ओलेडो इथू लज्जे।

¹⁵ मेटे यहूदी अगुवाकु नी अचम्बो मेंटो कोम्बाराके, “इनी कोरोन बिना पपाळातिंजा, पवित्र ग्रंथ गा ज्ञान तुंगाटे हेन।”

¹⁶ यीशु नी डीचके जवाब जीके, “इंजा शिक्षा इंजा खुद गा बाने, पेनो इंजा कुकूल मिठाच परमेश्वर गा कोंटे होय।

¹⁷ अगर जेका दियागा इच्छा लिंजेन सेंद्रा मेन टासो, देटेन चिनाएवा कि इंजा शिक्षा परमेश्वर कोंटे होय या इंज खुद कोंटे होय।

¹⁸ जो हेज कोंटे चोचका मंडीवा होय, देटेन हेजेका सम्मान चाहतावा होय। पेनो जो हेजा कुकूल मिठाच गा सम्मान चाहतावा होय देटेन ईमानदार होय एठा दियेन बैमानी बाऊ होय।

¹⁹ मूसानी आमके नियम जीके, तोभी आपे तलाटे जेकाभी मूसा गा नियम गा रोंगो बान सेंद्रा। आपे चोया इंज्के घोगेच चाहतावा होय?”

²⁰ कुरकू गा गर्दी नी जवाब जीके, “आमेननी भूतो होय। जे आमके घोगेच चाहतावा होय?”

²¹ यीशु नी दिकुके जवाब जीके, “इंज्नी म्या कामय डाके एठा आपे सेबाईकु अचम्बो दडा होय।

²² मूसानी आपेके खतना गा हुकूम जीके होय, येटेन बाने कि देटेन मूसा गा कोनेटे होय पेनो जुना सनाकु टेमो टे हेजे लक्के रितो होय, एठा आपे परमेश्वर गा चोखरा दिनेन कोरो गा खतना दडावा होय।

²³ जब परमेश्वर गा चोखरा दिनेन कोरो गा खतना डाएवा होय ताकी मूसा गा नियम गा हुकूम गा मानतिंजू होना, मेटे आपे इंजा लिंजेन चोयाकी खीजो दोडोवा, कि इंज्नी परमेश्वर गा चोखरा दिन म्या कोरो के पूरा रितो टे सजाके।

²⁴ मठा गा रुपो धोटे न्याय बाकी दडा पेनो सही-सही न्याय डाए।”

चोच यीशु का मसीह होय?

²⁵ मेटे चोटोका यरूशलेम शहर गा घोनेच थंदळ कुरकू मंडी लज्जे, “येटेन डीचका होय डीचके येने अगुवाकु घोगेच गा कोशिश दडा लक्के होय।

²⁶ पेनो डोगे देटेन नी सेबाई रुपोटे बातो लक्के होय एठा जेकाभी दियाटे चोचका बान मंडी। चोच सम्भव होय कि दिकुनी सच्चो-सच्चो चिनाये होय, कि इनिज्का सच्चोनका मसीह होय?

²⁷ इनिज्के नी आले हाडाई होय, कि येटेन टोनेगा होय, पेनो मसीह जब हेजेवा, मेटे जेकाभी बान हाडाई कि देटेन टोनेगा होय।”

²⁸ मेटे यीशु नी यरूशलेम गा मंदिर गा दरोमेन शिक्षा जिऊ लठ्ठाका खट्टेका मंडीके, “आपे इंज्के हाडाई मेना एठा इनी हाडाई मेना कि इंज टोनेगा मेना। इंज्नी खुद हेजडुका पेनो इंजा कुकूल मिठाच भरोसामंद होय, डीचके आपे बान हाडाई।

²⁹ पेनो इंज डीचके हाडाई मेना, चोयाकी इंज डीच कोनेटे मेना एठा डीचकानी इंज्के कुल्लेमी होय।”

³⁰ एने लिंजेन अगुवाकु नी डीचके उठा कोशिश डाके, लेकिन जेकाभी नी डीचके जेलेन बान केटडुका चोयाकी दिया गुजू गा साही टेमो आए हेजडुका डा।

³¹ गर्दी टे घोनेचकुनी दिया लिंजेन विश्वास डाके, एठा दिकु मंडी लज्जे, “मसीह जब हेजेवा, मेटे चोच येनेटे भी येठाभी चिन्हा के घालेवा जो इनिजनी घाल्ले?”

यीशु के उठामिठाच गा कोशिश

³² फरीसि कुरकू के दियागा बारेन इनी बातो उखु उखुटे आजोमके एठा मुख्यायाजकु नी एठा फरीसि अगुवाकु नी यीशु के उठाघल्जी मंदिर गा जगलीमिंकुके कुलकेकु।

³³ एने लिंजेन यीशु नी दिकुटे मंडीके, “इंज थोळा टेमो टाएन एठा आपेगा सेंग्गोन मेना, डाबोलटे इंज इंजा कुकूल मिठाच गा मेरान हिरायुवा।

³⁴ आपे इंज्के घागटावा, पेनो इंज्के बान घटाऊ एठा तोटेन इंज मेना देटेन आपे बान हेजे।”

³⁵ यहूदी अगुवाकु नी इकुका मंडीके, “इनी मंडेबा कि आले इनिज्के बान घटाऊ? शायद देटेन डी यहूदी कुरकू मेरान सेनेवा जो यूनानी कुरकू गेन चिगळ-बिगळ टे थंदळवा होय।

³⁶ देटेन चोच मंडी चाहतावा होय, कि आपे इंज्के घागटावा पेनो इंज्के बान घटाऊ, एठा तोटेन इंज मेना देटेन आपे बान हेजे।”

जीवन डा गडा

³⁷ डाबोलटे तिवार गा आखरी दिन जो कास दिन होय, यीशु टेंगेनजे एठा जोरटेका मंडीके, “अगर जेका डा तटाम टासो मेरान हेजे एठा नोए।

³⁸ जो इंजा लिंजेन विश्वास डोएबा, जैसा पवित्र ग्रंथ गेन ओल्के होय, दियागा टे डा गा गडा आडीवा जो जीवन जिऊवा होय, अडीऊवा।”

³⁹ मेटे देटेन पवित्र आत्मा गा बारेन मंडी लक्के डा डीके दिया लिंजेन विश्वास दडामिंकू डा लिंजेन डा। एठा पवित्र आत्मा आए टाएन बान अगुरुडूका डा, चोयाकी परमेश्वर नी आए टाएन यीशु गा महिमा के ओटडुका डा।

⁴⁰ इनी अजोम्टे गर्दी तलाटे अदा कुरकू नी इनी मंडीके, “सच्चोका इनिका कोरो देटेन परमेश्वर गा कोनेटे मंडीमिठाच होय, दियागा आले इंतजार दोडो लक्के होय।”

⁴¹ अदा कुरकू नी मंडीके, “येटेन मसीह होय,” पेनो तुनिच्कानी मंडीके, “मसीह गा हेजे गलील जिल्हा टेका नी होंगा।

⁴² पवित्र ग्रंथ गेन ओल्के होय, कि मसीह दाऊद गा पीढी टे बैतलहम पूरा टे हेजेवा, देटेन दाऊद थंदळ डा।”

⁴³ इनी रोंगो टे दिया वोजीटे कुरकू गेन अलग्गोयेन।

⁴⁴ दिकुटे तलाटे चोटोकु का डीचके उठा चाहता डा, लेकिन जेकाभी डीचके बान उठाडुका। चोयाकी दिया गुजू गा साही टेमो आए हेजडुका डा।

⁴⁵ मेटे पहरेदार मुख्यायाजककु एठा फरीसि कुरकू अगुवाकु गा मेरान हेन, एठा दिकुनी पहरेदारकु टे कोम्बाराके, “आपे डीचके चोया बान साडुका?”

यहूदी अगुवाकु गा बान विश्वास

⁴⁶ सिपाईकुनी जवाब जीके, “तुनिका कोरोनी चोलाकाभी येनेगो बातो बान मंडीडुका।”

⁴⁷ फरीसि कुरकू नी दिकुके जवाब जीके, “तोटेनका आपे भी नी दियागा बहकातिंजेन हेजडुका?

⁴⁸ चोच आले अधिकारीकु या फरीसि कुरकू गा तलाटे जेकाभी नी दिया लिंजेन विश्वास दडुका?

⁴⁹ पेनो इनी कुरकू जो मूसा गा नियम के बान हाडाई परमेश्वर गा द्वारा श्रापोके होय।”

⁵⁰ नीकुदेमुस नी जो येनेगा म्या रातोन यीशु गा मेरान ओले डा एठा दिकु तलाटे म्याखोम डा, दिकुटे मंडीके,

⁵¹ “चोच आलेगा मूसा गा नियम तुनिका कोरो गा आजुम्के बिना एठा दियागा कामय चिनाये बिना डीचके दोषी ठहरातिंज्के होय?”

⁵² दिकुनी डीचके जवाब जीके, “चोच आम भी गलील जिल्हा गा होय? पवित्र ग्रंथ गेन घाटाए एठा आम घटाएवा, कि गलील जिल्हा टे तुनिका परमेश्वर गा कोनेटे मंडीमिठाच ओट बाकी होना।”

⁵³ मेटे सेबाई कुरकू आपना-पापना उरान ओले।