ಯೊಹಾನ್ 6 - गवली उनाई नियममोनाई हजार कुरकू के चचारा 1 इनी बातो गा बादोन यीशु गलील जिल्हा गा समुद्र हुधेळेन ओले, डीके तिबिरियास समुद्र गा जीमू टे चिचानावा होय। 2 एठा म्या खाट गर्दी दियागा टाऊटे ओले चोयाकी जो अचम्बो कामय देटेन बिमारीकु लिंजेन दडा डा डीच दिकुके दोडो डा। 3 मेटे यीशु टुक्की लिंजेन पेळेन डो हेजा चेलाकू सेंग्गोन देटेन सुबांजे। 4 यहूदी कुरकू गा फसह गा तिवार मेरान डा। 5 मेटे यीशु नी हेजा मेट टूलटे म्या खाट गर्दी के हेजा मेरान हेजे टे डोकेकु, एठा फिलिप्पुस टे मंडीके, “आले इंकू आटा घल्जी तुंगाटे सोकळा मोलाटे सेगे?” 6 पेनो डीचनी इनी बातो डीचके चिचाना गा घल्जी मंडीके, चोयाकी यीशु खुद हाडाई डा कि देटेन चोच डाएवा 7 फिलिप्पुस नी डीचके जवाब जीके, “बरी सेद्दी दिनार (बरी सेद्दी दिन गा मुंजीरी) गा सोकळा भी दिकु घल्जी पुराऊ बाने कि दिकु तलाटे हर म्याखोम के थोळा-थोळाभी घटायु।” 8 दियागा चेलाकू तलाटे शमौन पतरस गा डाईटे अन्द्रियास नी दियाटे मंडीके। 9 “येटेन म्या पोट्टा होय, दियागा मेरान कोलोम गा मोनाई सोकळा एठा बरी काकू होय, पेनो येटो कुरकू गा घल्जी डी चोच होय।” 10 यीशु नी मंडीके, “कुरकू के सुबान कु।” डी जगान घोनेच निला झरा डा। मेटे कुरकू डेन पोट्टाकु संख्या अंदाजोटे मोनाई हजार गा डा, सुबांजे। 11 मेटे यीशु नी सोकळा सावे, एठा धन्यवाद डाटे चेलाकूके जीके, एठा चेलाकूनी सुबानमिंकू कटींजके, एठा डेनोगोका काकूके भी देटो दिकु चाहता डा कटींजके। 12 जब दिकु जोमटे लाज भेट्टेन, मेटे यीशु नी हेजा चेलाकू टे मंडीके, “बचातिंज्के तुकळा के गोलकी, चोचकाभी टेप्पायु बाकी होना।” 13 इनिघल्जी दिकुनी कोलोम गा मोनाई सोकळा गा बचातिंज्के तुकळा के म्या जगान के एठा डी तुकळा टे बारह टोपला भेट्टिके मेना। 14 मेटे जो अचम्बो कामय यीशु नी डा टे टिपीके डीचके इनी कुरकू धोटे मंडी लज्जे, “देटेन परमेश्वर गा कोनेटे मंडीमिठाच जो दुनिया गेन हेजेमिठाच डा, जरुर टेका इनिज्का होय।” 15 यीशु इनी चिनाटे कि कुरकू डीचके जबरदस्ती राजा आरु घल्जी गा मक्सात टे सा चाहतावा होय, तो देटेन डाबोलटे टुक्की लिंजेन एकलाका ओले। यीशु गा डा लिंजेन सेंदरा ( मत्ती 14:22-27 ; मरकुस 6:45-52 ) 16 डाबोलटे जब सिंगरूपजे, मेटे यीशु गा चेलाकू समुद्र गा धुरान ओले, 17 एठा डोंगा लिंजेन पेळेन समुद्र गा हुधेळेन कफरनहूम पुरान सेने लज्जे। डी टेमो अंधराएन डा, एठा यीशु आए टाएन दिकु मेरान बान हेजडुका डा। 18 एठा धुंदळ वोजीटे समुद्र गेन लपा बिट लज्जे। 19 जब दिकु डोंगा चाचुलू-चाचुलू अंदाजोटे तुरुई किलो मीटर ओटजे मेटे दिकुनी यीशु के समुद्र लिंजेन सेंद्राटे एठा डोंगा मेरान हेजे टे डोकेनेच मेटे दिकु हिगराएन। 20 पेनो डीचनी दिकुटे मंडीके, “इंज यीशु मेना, हिगरा बाकी।” 21 इनी आजुमटे चेलाकू यीशु के डोंगा लिंजेन पेपेळेच गा घल्जी तैयारके मेना एठा तुरुटो देटेन डोंगा डीका जगान आदिरजे येटेन देटेन सेने डा। कुरकू गा यीशु के घगाटा 22 दूसरा दिन डी गर्दी नी जो समुद्र गा दूसरा देळेन थंदळजे डा। येटेन डोगे, येटेन म्या डोंगा के आराटे एठा जेका सानी डोंगा बान डा। दियेन मालूम डा कि यीशु हेजा चेलाकू गा सेंग्गोन डी डोंगा लिंजेन बान पेळेचडुका, पेनो बस दियागा चेलाकू का ओले डा। 23 मेटे भी एठा सानी डोंगानौर तिबिरियास समुद्र टे डी जगा गा मेरान हेन, येटेन दिकुनी प्रभु गा धन्यवाद दडा गा बादोन सोकळा जोवे डा। 24 जब गर्दी नी डोके, येटेन न यीशु होय, एठा न दियागा चेलाकू, मेटे दिकुभी सानी-सानी डोंगा लिंजेन पेळेन डो यीशु के घगाटा लठ्ठाका कफरनहूम पुरान हेन। यीशु जीवन गा सोकळा 25 समुद्र गा हुधेळेन यीशु टे बेल्लाटे मंडीके, “हे गुरु, आम येटेन चोला हेन?” 26 यीशु नी दिकुके जवाब जीके, “इंज आपेटे सच्चो-सच्चो मंडीवा मेना, आपे इंज्के इनिघल्जी बान घागटा कि आपेनी अचम्बो कामय डोगे, पेनो इनिघल्जी आपे सोकळा जोम्टे भेट्टेन। 27 डी आटा घल्जी गा आटा घल्जी मेहनत बाकी, जो नशो गा होय पेनो दियागा घल्जी जो हमेशा गा जीवन टाएन ठहरतिंजूबा होय इंज जो कोरो गा कोण आपेके इनी आटा जेबा चोयाकी बाटे परमेश्वर नी इंज्के येनेगो दडा गा हाक जिले होय।” 28 दिकुनी दियाटे मंडीके, “परमेश्वर आलेटे चोच चाहतावा होय कि आले डीके?” 29 यीशु नी दिकुके जवाब जीके, “परमेश्वर चाहतावा कि आपे कोण विश्वास लिंजेन डाए इनिज्के डीचनी कुल्लेनेच होय, इनिका परमेश्वर गा कामय होय।” 30 मेटे दिकुनी दियाटे मंडीके, “डाबोलटे आम तुनी चिन्हा घालेवा कि आले डीके धोटे अमा लिंजेन विश्वास डाए? आम चोच दडावा मेना होय? 31 आलेगा जुना सनाकु नी डोंगोरेन मन्ना जोवे, जैसा पवित्र ग्रंथ गेन ओल्के होय ‘परमेश्वर नी दिकुके जोम गा घल्जी स्वर्ग टे सोकळा जीके।’” 32 यीशु नी दिकुटे मंडीके, “इंज आपेटे सच्चो-सच्चो मंडीवाकी मूसानी आपेके स्वर्ग देटेन सोकळा स्वर्ग टे बान जिडुका, पेनो इंजा बाटे परमेश्वर आपेके सच्चो सोकळा स्वर्ग टे जेबा होय। 33 चोयाकी सच्चो सोकळा जो परमेश्वर जिऊवा होय, डीका होय, जो स्वर्ग टे आगुरू टे दुनिया के कुरकू के जीवन जेबा होय।” 34 मेटे दिकुनी दियाटे मंडीके, “हे गुरु, इनी सोकळा आलेके हमेशा सेगेका।” 35 यीशु नी दिकुटे मंडीके, “जीवन गा सोकळा इंज मेना जो हमेशा गा जीवन जेबा होय, जो इंजा मेरान हेजेवा डीच चोलाकाभी रांगेचका बान थंदळ एठा जो इंजा लिंजेन विश्वास डोएबा, देटेन चोलाकाभी डा तटाम बान थंदळ। 36 इंज्नी आपेटे पेलाका मंडीके डा, कि आपेनी डोकेमी भी होय, तोभी विश्वास बान दडा। 37 जो चोचकाभी बाटे इंज्के जेबा होय देटेन सेबाई इंजा मेरान हेजेवा एठा जो जेकाभी इंजा मेरान हेजेवा, डीचके इंज चोलाकाभी बान ओट। 38 चोयाकी इंज इंजा इच्छाटे बाने बनकी इंजा कुकूल मिठाच गा इच्छा पुपारा घल्जी स्वर्ग टे आगुरुके मेना। 39 इंजा कुकूल मिठाच गा इच्छा इनी होय कि जो चोचकाभी डीचनी इंज्के जिले होय, दिकु तलाटे म्याखोम के भी नशो डाए बाने, पेनो डीचके आखिरी दिन डाबोलटे जीटाएच्बा। 40 चोयाकी इंजा बाटे गा इच्छा इनी होय कि जो जेकाभी कोण के डोगेच दिया लिंजेन विश्वास डोए एठा हमेशा गा जीवन घटायु। एठा इंज डीचके आखिरी दिन डाबोलटे गोएन मिठाच जाटे जीटाएच्बा।” 41 मेटे यहूदी अगुवाकु दिया लिंजेन कुरू-कुरू लज्जे, इनिघल्जी कि डीचनी मंडीके डा, “जो सोकळा स्वर्ग टे आगुरुके, देटेन इंज मेना।” 42 एठा दिकुनी मंडीके, “चोच येटेन यूसुफ गा कोणटे यीशु बाने, दियागा आंटे-बाटे के आले हाडाई होय? मेटे देटेन चोया मंडीवा होय कि इंज स्वर्ग टे आगुरुके मेना?” 43 यीशु नी दिकुके जवाब जीके, “आपे-आपेका बाकी कुरू-कुरू। 44 जेका इंजा मेरान बान हेजे जब टाएन बाटे परमेश्वर, डीचनी इंज्के कुल्लेमी होय, डीचके ओळजाकेच बाकी, एठा इंज डीचके आखिरी दिन डाबोलटे गोएन मिठाच जाटे जीटाएच्बा। 45 परमेश्वर गा कोनेटे मंडीमिंकू गा ओलेन इनी ओलके होय। ‘दिकु सेबाईकु परमेश्वर गा कोनेटे इथूके मिंकू होंगा।’ जो जेकाभी नी बाटे टे अजोम्के एठा इथूके होय, देटेन इंजा मेरान हेजेवा होय। 46 जेकानी बाटे परमेश्वर के बान दोडुका। इंज एकलाका इंज्का मेना जो परमेश्वर कोनेटे हेन मेना डीचनी बाटे के डोकेनेच होय। 47 इंज आपेटे सच्चो-सच्चो मंडीवा मेना कि जो जेकाभी विश्वास दडावा होय, देटेन हमेशा गा जीवन दियाका। 48 इंज जीवन जिऊ मिनी सोकळा मेना, जो हमेशा गा जीवन जेबा होय। 49 आपेगा जुना सनाकु सुनसान जगान मन्ना जोवे एठा बादोन गोएन भी। 50 येटेन डी सोकळा होय जो स्वर्ग टे आगुरुवा होय ताकी कुरकू देटे जोमे एठा बाकी गुजू। 51 इंज जीवन जिऊ मिनी सोकळा मेना, जो स्वर्ग टे आगुरुके मेना। अगर जेका इनी सोकळा टे जोमेबा मेटे हमेशा जीटाका थंदळवा, एठा डी इंजा कोम्बोर होय जो इंज दुनिया गा कुरकू घल्जी जेबा।” 52 एने लिंजेन यहूदी कुरकू इनी मंडीटे इकुका हिंजमान लज्जे, “येटेन कोरो टोनोगो आलेके हेजा कोम्बोर जोम गा जेबा होय?” 53 यीशु नी दिकुटे मंडीके, “इंज आपेटे सच्चो-सच्चो मंडीवा मेना जब टाएन इंज जो कोरो गा कोण मेना, इंजागा कोम्बोर बाकी जोम एठा पचना बाकी नुनू, आपेन नी जीवन बाऊ। 54 जो इंजागा कोम्बोर जोमबा एठा पचना नुनूवा हमेशा गा जीवन दियाका होय एठा इंज आखिरी दिनेन डीचके गोएन मिठाच जाटे जीटाएच्बा। 55 चोयाकी इंजा कोम्बोर आए टेमोन जोमा गा चीजो होय एठा इंजा पचना आए टेमोन नुनू गा चीजो होय। 56 जो इंजा कोम्बोर जोम्बा एठा इंजा पचना नुनूवा होय, देटेन इंजेन मजबूत थंदळवा होय, एठा इंज दियेन आरुका थंदळवा मेना। 57 इंजा बाटे डीचनी इंज्के कुल्लेमी होय, देटेन जीवन जेबा होय। जो रोंगो डीचनी इंज्के जीवन जिले डीका रोंगो इंजभी डी कोरो के जीवन जेबा जो इंजा कोम्बोरके जोमेबा होय। 58 इनी डी सोकळा होय, जो स्वर्ग टे आगुरुके होय। इनी डी सोकळा रोंगो बाऊ होय, जो जुना सनाकु नी जोवे डा। दिकुनी गोएन, पेनो जो इनी सोकळाके जोमेबा होय, देटेन हमेशा जीटाका थंदळवा।” 59 इनी बातो डीचनी कफरनहूम पूरा गा म्या आराधना जगा गेन इथू टेमो मंडीके। हमेशा गा जीवन गा वचन 60 इनिघल्जी दियागा चेलाकू तलाटे घोनेचकु का नी इनी अजोम्टे मंडीके, “येटेन मेटे कठिन शिक्षा होय, इनिके जे मनातिंजेवा होय?” 61 यीशु नी हेजा मनेन इनी चिनाटे कि इंजा चेलाकू इकुका इनी बातो लिंजेन कुरू-कुरूबा होय, दिकुटे कोम्बाराके, “चोच येटेन आपेके इंजा लिंजेन विश्वास दोडो टे रोकातिंजबा होय? 62 अगर आपे कोरो गा कोण के देटेन डीच पेला डा, देटेन मठान सेने टे डोगेवा मेटे चोच डाऊवा? 63 इनी आत्मा होय जो आमके जीवन जेबा होय। कोरो गा शक्तीगा वोजीटे एनेगो बान डाऊ। इंज्नी अमाटे जो शब्द मंडीके होय, डी आमके जीवन जिऊवा होय। 64 पेनो आपे तलाटे चोटोकु येनेगो होय जो विश्वास बान दडा।” यीशु नी इनिघल्जी चोयाकी यीशु के पेलाटेका हाडाई डा कि जो विश्वास बान दडा, दिकु जे होय एठा जे इंज्के उठाकोम्बा। 65 एठा यीशु नी मंडीके, “इनिघल्जी इंज्नी आपेटे मंडीके डा कि जब टाएन जेकाकेका बाटे गा कोंटे इनी वरदान बान जिऊ मेटे टाएन देटेन इंजा मेरान बान हेजु।” पतरस गा विश्वास 66 एने लिंजेन दियागा चेलाकू तलाटे घोनेच कुरकू टाउन बाजुनजे। एठा डेगा बादोन दियागा सेंग्गोन बान सेने। 67 मेटे यीशु नी डी बारह चेलाकू टे मंडीके, “चोज आम भी सेने चाहतावा?” 68 शमौन पतरस नी डीचके जवाब जीके, “हे प्रभु, आले जेगा मेरान सेने? हमेशा गा जीवन गा बातो अमाका मेरान होय। 69 एठा आलेनी विश्वास डाके, एठा चिनाये होय, कि आम परमेश्वर गा चोखरा कोणटे मसीह होय।” 70 यीशु नी दिकुके जवाब जीके, “इंज्नी आपे बारह कु के कलामजेकु डा। तोभी आपे तलाटे म्याखोम शैतान गा नजरेन होय।” 71 येटेन डीचनी शमौन यहूदा इस्करियोती गा कोणटे गा बारेन मंडीके, चोयाकी देटेन बारह चेलाकू तलाटे म्याखोम डा एठा यीशु गा सेंग्गोन धोका जिऊमिठाच डा। |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation