ಯೊಹಾನ್ 5 - गवली उनाई नियम

अळोतीस साल गा बिमार मिठाच के ससाजा

¹ इनी बातो गा बादोन यीशु यहूदी कुरकू गा तिवार टेमो यरूशलेम शहर गेन ओले।

² यरूशलेम शहर गेन मेंडाकू फाटक गा मेरान तलाव डा, डीके इब्रानी भाषा गेन बैतहसदा मेंबा होय येटेन मोनाई पदळी दराजोटे बोचोके मेना डा।

³ इंकून घोनेच बिमार, अंधळा, लंगळा एठा लाखवा गा रोगो डा दिकु डा गा ओखेंज गा असान देटेन सोटका थंदळ डा।

⁴ चोयाकी ठहरातिंज्के टेमोन स्वर्गदूत तलाव गेन आगुरुटे डा ओखेंजे डा। डा ओखेंज गा बादोन जो जेकाभी तलाव गेन पेला मु डा देटेन साजाऊ डा, चाहे दियागा तुनिकाभी बिमारी टासो।

⁵ देटेन म्या कोरो डा, जो अळोतीस साल टे बिमारीन सोटके डा।

⁶ यीशु नी डीचके सोटका धोटे एठा इनी चिनाटे कि देटेन घोनेच दिन टे इनी हाल गेन सोटके होय, दियाटे कोम्बाराके, “चोच आम सजाऊ चाहतावा?”

⁷ डी बिमारी कोरोनी डीचके जवाब जीके, “हे स्वामी, इंजा मेरान तुनिका कोरो बाऊ कि जब डा ओखेंजेकी मेटे इंज्के तलाव गेन अगुरुन इंजागा मदत डाए, इंज तलाव गेन आगुरू गा कोशिश दडा मेना, पेनो हमेशा जेका इंजा पेलाका देटेन आगुरुवा होय।”

⁸ यीशु नी दियाटे मंडीके, “बिडे, अमागा चटाई टूले एठा सेंद्राए।”

⁹ देटेन कोरो तुरुटो साजाएन एठा हेजा चटाई टूलटे सेंद्रा लज्जे।

¹⁰ जो दिन इनी डाएन डी परमेश्वर गा चोखरा दिन डा। इनिघल्जी यहूदी अगुवाकु दियाटे जो साजाएन डा, मंडे लज्जे, “टैंज परमेश्वर गा चोखरा दिन होय मूसा गा नियम गा रोंगो आमेन अमा चटाई तुटूल साही बाने।”

¹¹ डीचनी दिकुके जवाब जीके, “डीच इंज्के सजाकेमी डीचकानी इंजाटे मंडीके, ‘अमा चटाई टूले डो सेन्द्रा टे सेने।’”

¹² दिकुनी दियाटे कोम्बाराके, “देटेन तुनी कोरो होय, डीचनी अमाटे मंडीके, ‘अमा चटाई टूले डो सेंजू।’”

¹³ पेनो जो साजाएन डा देटेन बान हाडाई डा कि देटेन जे होय। चोयाकी गर्दी टाकु गा वोजीटे यीशु डी जगा टे म्याधेळेनजे डा।

¹⁴ इनी बातो बादोन देटेन यीशु के यरूशलेम गा मंदिर गा दरोमेन घाटाएन मेटे यीशु नी दियाटे मंडीके, “डोगे आमनी साजाएन होय, डाबोलटे पापो बाकी दडा, येनेगो बाकी डाऊ येनेटे तुनिका खाट मुसीबात अमा मठान हेयु।”

¹⁵ डीचनी कुरकू तलान ओलेडो यहूदी अगुवाकु टे मंडीके कि डीचनी इंज्के सजाकेमी देटेन यीशु होय।

¹⁶ इनी वोजीटे यहूदी अगुवाकु यीशु के ताखलिफ जिऊ लज्जे, चोयाकी देटेन येनेगो-येनेगो कामय परमेश्वर गा चोखरा दिन गेन दडा डा।

¹⁷ एने लिंजेन यीशु नी दिकुके जवाब जीके, “इंजा बाटे परमेश्वर हमेशा कामय दडावा होय एठा इंजेन भी कामय दडा होना।”

¹⁸ चोयाकी यीशु नी इनी शब्द मंडीके, यहूदी अगुवाकु येठाभी ठायका डीचके घोगेच गा कोशिश लज्जे, चोयाकी देटेन न बस परमेश्वर गा चोखरा दिन गा विधी के टुक्काएवा, बनकी परमेश्वर के हेजा मेंटो मंडीटे हेज खुदके परमेश्वर गा रोंगो मेन डा।

कोण गा अधिकार

¹⁹ एने लिंजेन यीशु नी दिकुटे मंडीके, “इंज आपेटे सच्चो-सच्चो मंडीवा मेना, कोण खुद टे चोचका बान दडा। देटेन डीचका डाएवा होय, जो देटेन बाटे के दडा डोगेवा होय, चोयाकी जो चोचकाभी बाटे दडावा कोण भी डीका दडावा।”

²⁰ इनिघल्जी बाटे कोणटे टे प्यार दोडोवा होय एठा जो-जो कामय देटेन आम दडावा होय, देटेन सेबाई डीचके घालेवा होय। बाटे इंकूटेभी खाट कामय डीचके घालेवा ताकी आपे अचम्बो डाए।

²¹ चोयाकी जैसा बाटे गोएन कुरकू के डाबोलटे जीटाकुवा होय, डेनेगोका कोण भी दिकुके चाहतावा होय दिकुके डाबोलटे जीटाकुवा होय।

^22-23 चोयाकी जो रोंगो सेबाई कुरकू बाटे परमेश्वर के आदर जेबा होय। डीका रोंगो दिकु इंजा मतलब कोण के आदर जेबा होय। बाटे परमेश्वर नी इंज जो दियागा कोणटे मेना न्याय दडा गा सेबाई हाक जिले। अगर जेका इंज्के आदर बान जिऊ मेटे देटेन बाटे परमेश्वर के भी आदर बान जिऊ, डीचनी इंज्के कुल्लेमी होय।

²⁴ इंज आपेटे सच्चो-सच्चो मंडीवा मेना, जो इंजा वचन आजुमटे इंजा कुल्के मिठाचजा लिंजेन विश्वास दोडोवा होय, हमेशा गा जीवन दियाका होय एठा डीचके दण्डो बान जिऊ पेनो दिकु जेलोमका गुजूटे बचातिंजे होय एठा पेलाटेका उनाई जीवनेन मोएन होय।

²⁵ इंज आपेटे सच्चो-सच्चो मंडीवा मेना, डी टेमो हेजेवा होय एठा नका होय, डेन गोएन मिंकू परमेश्वर गा कोण आवाज अजोमेबा एठा जो आजोम्बा दिकु हमेशा घल्जी जीटाऊवा।

²⁶ चोयाकी जो रितो टे बाटे हेज खुदेन जीवन दोडोवा होय, डीका रितो टे डीचनी कोण के भी इनी हाक जीके होय कि आम खुदेन जीवन डोए।

²⁷ चोयाकी इंज कोरो गा कोण मेना, बाटे परमेश्वर नी इंज्के सेबाई कुरकू गा न्याय दडा हाक जिले होय।

²⁸ एनेटे अचम्बोऊ बाकी, चोयाकी टेमो हेजेवा होय कि इनी सेबाई कुरकू जो गोएन होय दियागा आवाज आजुमेबा एठा जीटाटे टेंगेंबा।

²⁹ जेगा मेरान अच्छा जीवन डा, दिकु हमेशा गा जीवन घटाऊ जीटाऊवा एठा दिकु जो बुराई गेन जीवन बिबातातिंज डा, दिकु दोषी ठहरातिंजू घल्जी जीटाऊवा।

यीशु गा बारेन गवाही

³⁰ “इंज खुद टे चोचकाभी बान दडा, इंज कुरकू गा न्याय डेनोगोका दडावा जैसा बाटे परमेश्वर इंज्के दिकुगा न्याय दडा गा मंडीवा होय एठा इंजा न्याय सच्चो होय। चोयाकी इंज खुद गा इच्छा बाने, पेनो इंजा कुकूल मिठाच गा इच्छा चाहतावा मेना।

³¹ अगर इंज खुद का इंजा गवाही जे टासो, मेटे इंजा गवाही मन्य बाऊ।

³² म्याखोम एठा होय जो इंजा बाटे होय जो इंजा गवाही जिऊवा होय एठा इंज हाडाई मेना कि इंजा जो गवाही देटेन जेबा होय डी सच्चो होय।

³³ आपेनी यूहन्ना बपतिस्मा जिऊमिठाच गा मेरान इंजा बारेन कोकाम्बरा घल्जी खाबोर जिऊमिठाचके कुल्केनेच एठा डीचनी सच्चाई गा गवाही जीके होय।

³⁴ पेनो इंज खुद गा बारेन कोरो गवाही बान चाहता। फिरभी इंज्नी आमके डी गवाही गा बारेन घाल्के होय जो यूहन्ना नी जिले डा ताकी आपेन उध्दार घाटायु।

³⁵ यूहन्ना म्या दिवा रोंगो जुलू एठा चमकातिंजू डा एठा अदा टेमो टाएन दियागा उजाला गेन खुशी ममानातिंज अच्छा लगातिंजे।

³⁶ पेनो इंजा मेरान यूहन्ना बपतिस्मा जिऊमिठाच गा गवाही टे खाट गवाही होय। देटेन कामय जो बाटे नी इंज्के पुपरा घल्जी जिले होय, डीका इंजा बारेन गवाही जिऊवा होय। जो कामय इंज दडा लक्के मेना देटेन कामय इंजा गवाही जेबा कि बाटे नी इंज्के कुल्लेमी होय।

³⁷ एठा बाटे डीचनी इंज्के कुल्लेमी होय डीचकानी इंजा गवाही जीके होय। आमनी न चोलाकाभी दियागा आवाज अजोम्के होय एठा न डीचके अम्मा-सम्मा डोकेनेच होय।

³⁸ दियागा शिक्षा के मजबूत बान दोडो चोयाकी आपे इंजा लिंजेन विश्वास बान दोडो, डीचके कुल्केनेच होय।

³⁹ आपे पवित्र ग्रंथ गेन पपाळातिंजबा होय, चोयाकी समझातिंजेवा कि डेन हमेशा गा जीवन घाटाऊवा होय। एठा इनी पवित्र ग्रंथ इंजा का बारेन गवाही जिऊवा होय।

⁴⁰ फिरभी आपे हमेशा गा जीवन घटाऊ घल्जी इंजा मेरान हेजे बान चाहतावा।

⁴¹ इंज कुरकू टे आदर बान चाहता।

⁴² आपे आपेगा मनेन परमेश्वर टे प्यार बान दडा।

⁴³ इंज इंजागा बाटे परमेश्वर गा हाक टे हेन मेना, एठा आपे इंज्के मनेन कोम बाने। अगर जेका दूसरा हेजाका हाक टे हेजे, मेटे डीचके मनेन नेज्बा।

⁴⁴ आपे इंजा लिंजेन विश्वास बान दोडो, चोयाकी आपे इनिज दियाटे आदर चाहतावा एठा आपे म्याका रोंगो परमेश्वर टे आदर घटाऊ गा कोशिश बान दडा।

⁴⁵ इनी बाकी ससामझातिंज कि इंज बाटे सम्मान अमा लिंजेन आनोवा टोकाएवा। मूसा गा नियम लिंजेन आपेनी आसा डोकी होय डीचका आपे लिंजेन आनोवा टोकाएवा।

⁴⁶ अगर आपे मूसा लिंजेन दोडोवा, मेटे इंजा लिंजेन भी विश्वास दोडोवा, चोयाकी डीचनी इंजा बारेन ओल्के होय।

⁴⁷ पेनो आपे दियागा ओल्के बातो लिंजेन विश्वास बान दोडो, मेटे जो इंज मंडीवा मेना आपे पक्का रुपोटे एने लिंजेन विश्वास बान दोडो कि इंज जो मंडीवा मेना।”