ಯೊಹಾನ್ 21 - गवली उनाई नियम

तिबिरियास समुद्र गा धुरान चेलाकू लिंजेन ओटबा

¹ इनी बातो बादोन यीशु नी हेज खुदके गलील समुद्र गा डीके तिबिरियास भी मंडीवा होय, डेगा धुरा लिंजेन चेलाकूके ओटके। एठा इनी रोंगो टे ओटके-

² शमौन पतरस एठा थोमा जो दिदुमुस मेंबा होय, एठा गलील जिल्हा गा काना पुरा गा नतनएल एठा जब्दी गा कोंटे एठा सेंग्गोन यीशु गा चेलाकू तलाटे दूसरा बरी गोलाके डा।

³ शमौन पतरस नी दिकुटे मंडीके, “इंज काकू उठा चेल्के मेना।” दिकुनी दियाटे मंडीके, “आले अमा सेंग्गोन सेनेवा होय।” एठा दिकु तुरुटो का ओटजे डो डोंगा लिंजेन पेळेन, पेनो डी रातो चोचका बान उठाडुका।

⁴ दूसरा दिन फेजेर आंगुटे यीशु नी धुरान टेंगेनके डा, चेलाकूनी बान चिनाडुका कि येटेन यीशु होय।

⁵ मेटे यीशु नी दिकुटे मंडीके, “हे प्रियो, चोच आपे मेरान चोचका जोम गा होय?” दिकुनी जवाब जीके, “बाने।”

⁶ डीचनी दिकुटे मंडीके, “डोंगा गा डाखुरी कोनेन जाली येंडाए, मेटे घाटाऊवा।” मेटे दिकुनी जाली येंडाके, एठा दिकुन येटो जादा काकू घटाएनकि दिकुटे जाली बान ओळु लज्जे।

⁷ इनिघल्जी डी चेलानी दियाटे यीशु प्यार दोडो डा पतरस टे मंडीके, “येटेन नी प्रभु होय।” जब शमौन पतरस नी इनी आजुम्के कि देटेन प्रभु होय, मेटे डीचनी हेजा डी कपळे उरीये जो डीचनी कामय दडा टेमो आगुरुके डा। एठा समुद्रन ओएन।

⁸ पेनो एठा चेलाकू डोंगा लिंजेन काकू कुटे भेट्टिके जाली ओळटेका हेन चोयाकी दिकु धुराटे अंदाजोटे म्या सेद्दी मीटर लेंक्कीन डा।

⁹ जब दिकु धुरान आदिरजे, मेटे दिकुनी कोल्जा गा सिंगेल गेन काकू डोके डा एठा मेरान सोकळा भी डा।

¹⁰ यीशु नी दिकुटे मंडीके, “जो काकू आपे आए उठाके होय डी तलाटे अदा सेगे।”

¹¹ शमौन पतरस नी डोंगा लिंजेन पेळेचटे म्या सेद्दी त्रेपन खापेट काकू कुटे भेट्टिके जाली धुरान ओळके एठा येटो काकूनौर थंदळेनभी जाली बान टयाडूका।

¹² यीशु नी दिकुटे मंडीके, “हेजे आटा जोमे।” एठा चेलाकू तलाटे जेकान भी येटो हिम्मत बान दडुका कि दियाटे कोम्बाराए, “आम जे होय?” चोयाकी दियेन मालूम डा कि येटेन प्रभु होय।

¹³ यीशु नी सोकळा ठुल्के एठा दिकुके जीके एठा डेगा बादोन काकू भी।

¹⁴ इनी आफाई बार होय कि यीशु नी गोएन मिठाच जाटे जीटाएन बादोन चेलाकू दर्शन जीके।

यीशु गा पतरस टे बातो चितो

¹⁵ आटाजोम गा बादोन यीशु नी शमौन पतरस टे कोम्बाराके, “हे योना गा कोणटे शमौन चोच आम सच्चोन इनी दूसराकु टे येठाभी इंजा प्यारबा होय?” डीचनी दियाटे मंडीके, “हां प्रभु, आमेन मालूम होय कि इंज अमाटे प्यार दोडोवा होय।” डीचनी दियाटे मंडीके, “इंजागा मेंडा कोंटे देखभाल डाए।”

¹⁶ यीशु नी डाबोलटे दूसरा बार दियाटे कोम्बाराके, “हे योना गा कोणटे शमौन चोच आम इंजाटे प्यार दोडोवा होय?” डीचनी दियाटे मंडीके, “हे प्रभु, आमेन मालूम होय, कि इंज अमाटे प्यार दोडोवा मेना।” डीचनी दियाटे मंडीके, “इंजागा मेंडा कोंकूटे राखवली डाए।”

¹⁷ यीशु नी आफाई बार दियाटे कोम्बाराके, “हे योना गा कोणटे शमौन, चोच आम इंजाटे प्यार डोएबा होय?” पतरस नराजोएन, कि डीचनी डीचके आफाई बार येनेगो मंडीके, “चोच आम इंजाटे प्यार डोएबा होय?” डीचनी दियाटे मंडीके, “हे प्रभु, आमेननी सेबाईका मालूम होय। आम इनी मालूम होय कि इंज अमाटे प्यार दोडोवा मेना।” यीशु नी दियाटे मंडीके, “इंजा मेंडाकू गा जगली डाए।

¹⁸ इंज आपेटे सच्चो-सच्चो मंडीवा मेना, जब आम जवान डा मेटे अमा मयांग टोलटे तोटेन चाहता डा देटेन इखाट डा। पेनो जब आम सानाऊबा मेटे अमागा टी फैलातिंजेवा एठा जेका आमके ठोलकोम्बा एठा आमके देटेन साकोम्बा येटेन आम बान सेने चाहतावा।”

¹⁹ यीशु नी येनेगो इनी गघाल घल्जी मंडीके कि पतरस टोनोगो गुजूवा एठा परमेश्वर गा महिमा डाएवा। इनी मंडी गा बादोन डीचनी पतरस टे मंडीके, “इंजा चेला आरु घल्जी इंजा टाऊटे हेजे।”

यीशु एठा दियागा प्यारा चेला

²⁰ पतरस नी टाऊ आंगुरटे डी चेलाकू टाऊटे हेजे डोकेनेच दियाटे यीशु प्यार दोडो डा, जोजोम गा टेमोन यीशु गा बाजुन सुबांके डा एठा डीचनी यीशु टे कोम्बराके, “हे प्रभु अमा उठामिठाच जे होय?”

²¹ डीचके धोटे पतरस नी यीशु टे मंडीके, “हे प्रभु, इनिजगा सेंग्गोन चोच डाऊवा?”

²² यीशु नी दियाटे मंडीके, “अगर इंज चाहता कि देटेन इंजा हिरा टाएन जीटाका थंदळे, मेटे आमके इनिज टे चोच? आम इंजा आरु घल्जी इंजा टाऊटे हेजे।”

²³ इनिघल्जी चेलाकून इनी बातो फैलातिंजे कि देटेन बान गुजू, पेनो यीशु नी दियाटे इनी बान मंडीडुका डा, कि डीच गुजू बाने, पेनो इनी कि “अगर इंज चाहता कि देटेन इंजा हिरा टाएन जीटाका थंदळे, मेटे आमके इनिज टे चोच?”

उपसंहार

²⁴ एटेन डीका चेला होय, जो कोरोनी इनी सेबाई डोके डीचनी इनी बातो गा गवाही जीके होय, एठा जो कोरोनी इनी बातो ओल्के होय आले मालूम होय कि दियागा गवाही सच्चो होय।

²⁵ यीशु नी येठाभी घोनेच कामय डाके। अगर म्या-म्याखोम डाटे आले दिकुगा घाले धारे, मेटे इंज समझातिंजेवा मेना, कि पुस्तकनौर ओले धारे, डी दुनिया भोरेन बान ठाऊगु डा।